Mukanda Wakulibanga wa Samwele
30 Devidi na banalume bakele nendi mubelukile ku Zikilagi ha litangwa lyamucitatu, bawanene Baamaleki banapukula byuma ku mbwela* na mu Zikilagi, co balwisile Zikilagi na kuyenyeka na tuhya. 2 Bambatele banakazi na banu boshe bakele mu nganda, banike na bakulunu. Naumo wahi ibatsiile, babambatele lika na kuya nabo. 3 Devidi na banalume bakele nendi mubetele, bawanene nganda banayenyeka, co banakazi babo na bana babo ba banalume na ba banakazi banabambata. 4 Ngeci, Devidi na banalume bakele nendi bashangumukile kulila mu kutambeka, kweta noho kubasele oni na kulila. 5 Banakazi ba Devidi babali nabo babambatele, Ahinoamu wa ku Jezilele na Abigeu uje wapwile munakazi wa Nabale wa ku Kameu. 6 Devidi wakele manene mu bishoti mwafwa banalume bakele nendi bakele na kuliyongola bya kumwasha mamanya, omwo aba banalume boshe balubalele manene mwafwa ya bana babo ba banalume na ba banakazi babambatele. Oloni Devidi wakanyamenene kuli Yehova Njambi yendi.
7 Co Devidi walekele kapilistu Abiatha muna Ahimeleki ngwendi: “Shukulu-kambu nena kuno efodi.” Ngeci, Abiatha wanenele efodi kuli Devidi. 8 Devidi wehwile Yehova ngwendi: “Kuma njiye na kusheka eci cibunga ca bikenya ndi? Kuma njibahyana ndi?” Co wamukumbulwile ngwendi: “Basheke, mwafwa ubahyana na kwobola banu na kwilwisa bibanapukula.”
9 Oho bene Devidi wakatukile na banalume 600 baje bakele nendi, co baile kuketa na ku Linema lya Beso, kuje kubakasalele banalume bamo. 10 Devidi na banalume 400 batwaleleleleho kusheka bitozi babo. Oloni banalume 200 baje kubasele kuya mu sambwa ya Linema lya Beso basalele mwafwa ya kujuka manene.
11 Bawanene munalume wa ku Ijipiti mu shwata, co bamutwalele kuli Devidi. Bamwanene byakulya mangana alye na mema mangana anwe. 12 Bamwanene na mbazubwila ya likende lya bikuyu bya kuma na makende abali a bushuka bwa binyu bwa kuma. Mwamanesele kulya, wakele na nzili, mwafwa kalile byakulya byoshe-byoshe nambe kunwa mema matangwa atatu, butsiki na mutanya. 13 Devidi wamwihwile ngwendi: “U ngamba yeya, co utunda kuli?” Co wamukumbulwile ngwendi: “Nji muka-Ijipiti, co lalo nji ndungo ya munalume umo wa Kaamaleki. Oloni shukulu yange nanjiseze mwafwa njinabinjile izuzi-lije. 14 Tunalwisile mutambela wa ku mbwela* wa Bakeleti na mutambela wa Juda na mutambela wa ku mbwela* wa Kalebu na kwenyeka Zikilagi na tuhya.” 15 Co Devidi wamwihwile ngwendi: “Kuma wasa kunjitwala kuli eci cibunga ca bikenya ndi?” Wamukumbulwile ngwendi: “Nga ulisinga hali Njambi ngwobe kuunjitsii, co lalo kuukanjana mu liboko lya shukulu yange, njikutwala kuli eci cibunga ca bikenya.”
16 Ngeci wamutwalele kuje kubajalakanene oku bali na kulya na kunwa na kulisamba mwafwa ya byuma byoshe byabingi bibapukwile mu lifuti lya Bafilistiya na mu lifuti lya Juda. 17 Co Devidi wabatsiile kushwa mutondo-tondo simbu kanda kukye bwino kweta mangwezi. Naumo wahi wobokele kubanga banalume 400 baje batewele oku bali ha tumele. 18 Devidi wanyekele Baamaleki byuma byoshe bibapukwile na kwobola banakazi bendi babali. 19 Nacimo cahi kubawanene ku byuma byabo, kushangumukila ku cacindondo manene kutwala ku cakama manene. Babanyekele bana babo ba banalume na ba banakazi na byuma bibapukwile. Devidi wabanyekele byuma byoshe bibambatele. 20 Ngeci Devidi wambatele bimanga na bingombe boshe ba Baamaleki, co banu bendi babitwamekele kulutwe lwa bimuna babo. Bendekele ngwabo: “Ebi bikebyo byuma byanapukula Devidi.”
21 Kutundaho, Devidi wezile ku banalume 200 baje bonowele kuya nendi mwafwa ya kujuka manene, baje basalele mu Linema lya Beso, co basheshele Devidi na banu bakele nendi. Devidi mwetele kuyehi nabo, wabehwile ciindu cabo. 22 Oloni banalume boshe ba bimbunge byabibi, ba kujeneka seho hakati ka baje baile na Devidi bendekele ngwabo: “Kubaile netu, ngeci kutubana cuma coshe-coshe ku byuma bibanapukwile bije bitunelwisa, bambate lika banakazi babo na bana babo baye.” 23 Oloni Devidi wendekele ngwendi: “Bandolome bange, keti mulinge ngoco ha byuma byanatwana Yehova. Natunyungilila na kwana cibunga ca bikenya baje banezile na kutulwisa mu liboko lyetu. 24 Iya alitombola neni mu ñanda ei? Mutamba wa uje naile ku nzita upwa hamo na mutamba wa uje nasalele na bitenga. Boshe batambula mutamba wa kupwa hamo.” 25 Kushwa bene lije litangwa, watungilile Baisalele eli lishiko libapandele kukabangeya kwa kweta na lelo lino.
26 Devidi mwelukile ku Zikilagi, watuminine bakulunu ba Juda baje bapwile babusamba bendi byuma bimo bibapukwile ngwendi: “Bwana bweni obu, buje butunapukula ku bitozi ba Yehova.” 27 Watuminine baje bakele mu Betheu, baje bakele mu Lamothi ya Negebu, baje bakele mu Jatile, 28 baje bakele mu Aloe, baje bakele mu Sifumothi, baje bakele mu Eshitemoa, 29 baje bakele mu Lako, baje bakele mu binganda bya Bajelamele, baje bakele mu binganda bya Bakeni, 30 baje bakele mu Homa, baje bakele mu Bolashani, baje bakele mu Ataki, 31 baje bakele mu Hebroni, na baje boshe bakele mu myela yendelele manene Devidi na banalume bakele nendi.