Yesu Wapwa Kapilistu Wahakamwa Uje Akatuzibila Mema ku Mbunge

1-2. (a) Mwafwa bika Yehova watumine Munendi hano hasi? (b) Bika bitusimutwiya muno mu cilongesa? (Bahebelu 5:7-9)

MYAKA 2,000 kunima, Yehova Njambi watumine Munendi yazema manene hano hasi. Cimo ca byuma byezilile Yesu hano hasi capwile kutsila banu na kubapatula ku bubi na ku kutsa na kumanesa bipangi bya Satana Liyabolo. (Iwano 3:16; 1 Iwa 3:8) Yehova wazibukile lalo ngwendi kwija hano hasi kukwasa Yesu alibwahesele kupwa Kapilistu Wahakamwa wa mema ku mbunge. Yesu wapwile Kapilistu Wahakamwa munima ya kumumbwitika mu 29 C.E.a

² Muno mu cilongesa tusimutwiya omwo kwija hano hasi na kupwa munu kwakwaselelemo Yesu apwe Kapilistu Wahakamwa wa mema ku mbunge. Kunapu kwa seho manene kuzibisisa mwamubwa ei ñanda. Mwafwa kulinga ngoco, kutukwasa twase kulombela kuli Yehova na kushwena kuli ikeye maneneni nga tuli na kuliziba kubihya ku mbunge mwafwa ya tupenga twetu.—Tandeni Bahebelu 5:7-9.

MUNA NJAMBI YAZEMA MANENE AIJA HANO HASI

3-4. Byuma byatengulukile bati mu kuyoya kwa Yesu mwezile hano hasi?

³ Simbu imo byuma bikatenguluka mu kuyoya kwetu. Cakumwenako, hamo twajalukile ku mwela umo utwazema manene na kuzesa babusamba na baka-naanga yetu. Kutenguluka kwa cifweci kukwapwile kwakwasi. Nameme ngoco, kukwesi munu hano hasi naliwanaho laja na kutenguluka ngwe kwaliwanene nakwo Yesu. Acisinganyekeni lika, Yesu mwakele mwilu ikeye wapwile kangelo wakulibanga, co lalo wapwile wa seho manene. Ikeye yazemene manene Yehova. Co lalo Yesu wabwahelele manene kupangela ku ‘liboko lya cilyo’ lya Ishe. (Samu 16:11; Prov 8:30) Oloni mukanda wa Filipi 2:7 wendeka ngwawo Yesu walyanene, co “wasezele byuma byoshe” byakele nabyo mwilu na kwija na kuyoya na banu ba kujeneka kulumbunuka hano hasi.

⁴ Acisinganyekeseseni lalo ha myaka yakulibanga yayole Yesu hano hasi. Naanga yendi ya hano hasi yapwile ya kuhutwa. Tuzibuka ngoco mwafwa bisemi bendi basele lika kulambula tuzila babali babandondo mwasemukile. (Levi 12:8; Luka 2:24) Co lalo mwene wamubi Heloda mwazibukile bya kusemuka kwa Yesu, washakele kumutsiya. Ngeci mu kushaka kunyungilila kuyoya kwa Yesu, bisemi bendi bamuteweselele ku Ijipiti na kukakalako ha kasimbu kakandondo. (Mate 2:13, 15) Cili bene, buyoye bwa Yesu hano hasi bwalisezelele kulako na buyoye bwendi mwakele mwilu.

5. Bika byamwene Yesu mwakele hano hasi, co byamukwasele bati apwe Kapilistu Wahakamwa wa mema ku mbunge? (Taleni na cikupulo.)

⁵ Yesu mwakele hano hasi wamwene banu babangi bayanda. Wazibukile mwamubwa mukukazibikila nga munu atsisa munu yazema mwafwa nendi watsisile banu bazema, kwambateselela na ishe Jozefu. Co mwakele hano hasi waliwanene na banu baje bakele na kubinja manene, tupuputwa, biyanga na bisemi baje batsisile bana babo. Co wabazibilile ngozi. (Mate 9:2, 6; 15:30; 20:34; Maki 1:40, 41; Luka 7:13) Yesu walimwenenene banu mubakele na kuyanda mwakele mwilu. Oloni mwakele hano hasi wazibisisile oni mwamubwa mubakalizibila banu nga bayanda. (Isaya 53:4) Kuyoya hano hasi kwamukwasele azibisise mwamubwa mubakalizibila banu nga baliwana na bukalu bwa kuliseza-seza na tuyando tubakaliwana natwo mu kuyoya kwabo. Co lalo ngwe mwa banu boshe, Yesu nendi bisimbu bimo wakele na kujuka na kuziba kubabala ku mbunge.

YESU AMWESA BANU MEMA KU MBUNGE

6. Bika bitulilongesa ku bupolofweto buli ku mukanda wa Isaya kutalesa ku ngozi yamwesele Yesu ku banu? (Isaya 42:3)

⁶ Mu cipangi cendi ca hano hasi, Yesu wazibilile mema ku mbunge baje bazeyele na baje babakele na kulinga mwamubi. Mwalingile ngoco, washulisililile byuma byapolofwetele Yehova kwitila muli kapolofweto Isaya. Mu Bisoneka bya Cihebelu, banu ba kukanyama na kufuka banabesekesa ku lihya libakashangelela mwamubwa simbu yoshe nambe ku miti yailaha ya kukola. (Samu 92:12; Isaya 61:3; Jele 31:12) Oloni tuhutu na baje babali na kulinga mwamubi banabesekesa ku lihongo lya kutepama na ku mukole wa ndeya uje uli na kukakama bwisi uje ushaka kuzima. (Tandeni Isaya 42:3; Mate 12:20) Yehova wahwimininine kapolofweto Isaya apangese ebi byakumwenako mu kupolofweta bya cizemo na ngozi byamwesele Yesu ku banu baje babakele na kuyandesa na kulinga mwamubi.

7-8. Yesu washulisilile bati bupolofweto bwa Isaya?

⁷ Mateu wamwesele ngwendi Yesu washulisilile obu bupolofweto bwa Isaya mwasonekele ngwendi: “Kakafunyula lihongo lya kutepama nambe kuzima mukole wa ndeya uje uli na kukakama bwisi.” Bikomokeso bimo byalingile Yesu byakwasele baje babakele na kulinga mwamubi, baje balizibile ngwe lihongo lya kutepama. Co lalo byakwasele na baje balizibile ngwe byuma kubibendela mwamubwa, baje bapwile ngwe mukole wa ndeya uje uli na kukakama bwisi uje ushaka kuzima. Cakumwenako, Yesu waliwanene na munalume uje wakele na kubinja mbumba. Co mwafwa ya uje mushongo, uje munalume kakele na kukala muyehi na banu. Hamo uje munalume walizibile ngwendi kasa kukanguka nambe kukala hamo lalo na baka-naanga yendi na babusamba bendi. (Luka 5:12, 13) Co lalo waliwanene na munalume wa kasinda-mwatwi uje wakele lalo na kalaka. Acisinganyekeni mwalizibilile uje munalume mwakele na kumona bakwabo basimutwiya, oloni ikeye kazibi bibendeka. (Maki 7:32, 33) Oloni ebi keti bikebyo lika.

⁸ Mu simbu ya Yesu, Bajuda bakulahelele ngwabo nga munu asemuka oku napu ciyanga, co kanapu kashitiko ka bubi bwendi nambe bwa bisemi bendi. (Iwano 9:2) Mwafwa ya kukulahela bilongesa bya makuli bya cifweci, banu baje basemukile na buyanga bakele na kubalinga mwamubi. Mu kushulisilila bupolofweto bwa Isaya, Yesu wakangwisile babezi na kubakwasa bazibuke ngwabo Njambi wabaka mbunge. Ebi bitulingisa tukulahele byuma muka?

9. Mukanda wa Bahebelu 4:15, 16 umwesa bati ngwawo Yesu akazibila banu ba kujeneka kulumbunuka mema ku mbunge?

⁹ Tandeni Bahebelu 4:15, 16. Twasa kukulahela ngwetu Yesu atumwesa mema ku mbunge simbu yoshe. Oku kulumbununa bika? Munu uje wakala na mema ku mbunge akazibisisa tuyando twa bakwabo nomu mubali na kulizibila. Lijwi lya Cigriki libananungulula ngwabo ‘kuzibila mema ku mbunge’ lilumbununa kuliziba ngwe mwali na kulizibila mukwetu uje naliwana na bukalu. (Taleni na Bahebelu 10:34 kuje kwanapangesa Paulu lijwi lya Cigriki lya kulifwa.) Mizimbu yendeka ha bikomokeso byalingile Yesu imwesa mwakele na kulizibila ha tuyando tubakele na kuliwana natwo banu. Kakangwisile banu mwafwa ya kusinganyeka lika ngwendi napande kulinga ngoco embwe. Yesu wakangwisile banu mwafwa wabakele manene mbunge, co watondele kubakwasa. Cakumwenako, Yesu kapandele kukwata uje muka-mbumba mangana amukangwise, oloni walingile ngoco. Co olu hamo lwapwile lwakulibanga ou munalume kumukwata. Co lalo mwakangwisile munalume wa kasinda-matwi, wamutwalelele ku mwela wa kwoloka kuje kukwakele banu. Acisinganyekeni ha byuma byalingiwile omwo munakazi umo uje walingile bubi watengulukile na kujwelesa mendi a Yesu na misozi yendi. Kafalisi umo kamwesele ngozi kuli uje munakazi, oloni Yesu wemanenene uje munakazi na kunangula uje Kafalisi. (Mate 8:3; Maki 7:33; Luka 7:44) Yesu kayengwile baje bakele na kubinja nambe baje balingile bubi bwakama. Oloni wabalanyele baije kuli ikeye, co wabamwesele cizemo. Netu twasa kukulahela ngwetu Yesu atuzibila mema ku mbunge.

TWASA KUTEMBWININA BATI KAPILISTU WETU WAHAKAMWA?

10. Byuma muka bitwasa kupangesa mu kukwasa tusinda-matwi na tupuputwa? (Taleni na bikupulo.)

¹⁰ Ha kupwa baka-kukabangeya Yesu ba kulongwa, tunapande kulifwita kumutembwinina ha kumwesa cizemo na kuzibila bakwetu ngozi na mema ku mbunge. (1 Pita 2:21; 3:8) Nameme kutwasa kukangwisa tupuputwa na tusinda-matwi, twasa kubakwasa balilongese bya Yehova na kushwena kuli ikeye. Cakumwenako, ano matangwa mabulu anakundama ha Mbimbiliya awaniwa mu bindaka bya tubebebe bya kutubakana 100. Co baje kubasa kumona mwamubwa nambe tupuputwa, banababwahesela mabulu a kulitila mu bindaka bya kutubakana 60. Co lalo banababwahesela mavidio aje ali na muka-kulumbununa bili mu vidio mu bindaka bya kutubakana 100. Ebi byoshe banabibwahesa mangana bakwase tusinda-matwi na tupuputwa bashwene kuli Yehova na Munendi Yesu.

11. Munga ya Yehova ili na kutembwinina bati Yesu mu kumwesa banu mema ku mbunge? (Bilinga 2:5-7, 33) (Taleni na bikupulo.)

¹¹ Munga ya Yehova ili na kukwasa banu ba miyati yoshe bashwene kuli Yehova. Anukeni ngweni munima ya kusanguka kwendi, Yesu wetilile sipilitu ya kujela hali bandongesi bendi mangana base kwambulwila banu boshe baje bezile ku cilika ca Pentekosti, munu na munu “mu ndaka yendi.” (Tandeni Bilinga 2:5-7, 33.) Na ano matangwa, Yesu ali na kutwamenena munga ya Yehova mu kutuhula mabulu aje anemana ha Mbimbiliya mu bindaka bya kutubakana 1,000, kwambateselela na bindaka bya kwisi manene. Cakumwenako, bindaka bimo bakabyendeka ku banu babandondo lika baje bakala ku North na ku South America. Nameme ngoco, munga ya Yehova inatuhula mabulu mu bindaka bya kutubakana 160 byoku ku mitambela mangana banu babangi baliko baje bakendeka ebi bindaka bazibe muzimbu waubwa. Co lalo mabulu etu awaniwa na mu bindaka bya kutubakana 20 bya Ciloma. Ngeci, banu babangi baje bakapangesa ebi bindaka banashangumuka kupangela Yehova.

12. Byuma muka bikwabo biili na kulinga munga ya Yehova mu kukwasa banu ano matangwa?

¹² Munga ya Yehova ili na kukwasa lalo baje bali na kuyanda mwafwa ya bukalu bwa kulizila. Ngeci bandolome na bandokazi babangi bakalyana kukwasa bakwabo baje bali mu bujene. Munga ya Yehova inabwahesa lalo mitungo ya kulemesela mangana banu balilongeselemo mwabazemena Njambi.

KAPILISTU WETU WAHAKAMWA ASA KUMIKWASA

13. Yesu akatukwasa mu bingila muka?

¹³ Ha kupwa kanyungi wamubwa, Yesu ali na kulinga mwoshe mwasela kutwana byoshe bitutonda mangana tushwene kuyehi na Yehova. (Iwano 10:14; Efeso 4:7) Bisimbu bimo, tunasa kuzeya na kuliziba ngwe mukole wa ndeya uje uli na kukakama bwisi nambe lihongo lya kutepama. Tunasa kuliziba ngoco mwafwa ya kubinja manene, kusebuka kwetu nambe hamo mwafwa ya kulipyakana na munu umo mu ku cikungulukilo. Munasa kwaka manene mbunge ku tuyando na bukalu bumuli na kuliwana nabwo ha simbu ino, kutubakana kwaka mbunge ku lilabelelo lyeni lya byuma bya kulutwe. Oloni anukeni ngweni Yesu ali na kumona bukalu bumuli na kuliwana nabwo nomu mumuli na kulizibila. Ngeci ashaka kumikwasa mwafwa ali na kumizibila mema ku mbunge. Cakumwenako, asa kupangesa sipilitu ya kujela mu kumikanyamesa nga munazeye. (Iwano 16:7; Tito 3:6) Kutundaho, Yesu asa kupangesa ‘banalume baje banapu bwana’ na bandolome na bandokazi mu kumishongangeya na kumikwasa.—Efeso 4:8.

14. Bika bitunapande kulinga nga tunazeye?

¹⁴ Nga munazeye, co singanyekeseseni mwamikwasela Yesu ha kupwa Kapilistu Wahakamwa. Anukeni ngweni Yehova watumine Munendi aije hano hasi mangana akututsile na kumukwasa azibuke bukalu bubakaliwana nabwo banu ba kujeneka kulumbunuka. Nga tunazeye mwafwa ya bubi bwetu nambe kusebuka kwetu, co tukulaheleni ngwetu Yesu nalibwahesela kutukwasa “ha simbu inapande.”—Hebe 4:15, 16.

15. Bika byakwasele ndolome umo uje watundile mu cikungulukilo eluke kuli Yehova?

¹⁵ Yesu ali na kutwamenena lalo banu bendi bakwase baje banatundu kuli Yehova beluke kuli Ikeye. (Mate 18:12, 13) Tucisimutwiyeni ha byuma byaliwanene nabyo Stefano.b Munima ya myaka 12 kutunda habamutundisilile mu cikungulukilo, wendekele ngwendi: “Njazibile shwamwa hakulibanga, nameme ngoco njatondele kwiluka mu naanga ya Yehova ije yakala na cizemo. Bakulunu baje basimutwiiye nange banjikwasele njilizibe ngwange bananjitambula. Bisimbu bimo njakele na kuliziba manene kubihya ku mbunge mwafwa njasezele Yehova, co njashakele kuzeya. Oloni bakulunu ba cikungulukilo banjanukisile ngwabo Yehova na Yesu batonda ngwabo njitwaleleleho kubapangela. Munjelukile mu cikungulukilo bandolome na bandokazi banjitambwile mwamubwa na kunjimwesa cizemo hamolika na naanga yange. Kutundaho munakazi wange washangumukile kulilongesa Mbimbiliya, co hano tuli na kupangela hamo Yehova ha kupwa naanga.” Kapilistu Wahakamwa wa cizemo akabwahelela manene mwakamono bandolome na bandokazi boshe mu cikungulukilo bakwasa baje banatenguluka ku bubi bwabo beluke mu cikungulukilo.

16. Mwafwa bika twakandelela manene kuli Yehova hakutwana Kapilistu Wahakamwa wa mema ku mbunge?

¹⁶ Mwakele hano hasi, Yesu wakwasele banu babangi ha simbu inapande. Netu twakulahela ngwetu Yesu asa kutukwasa hoshe-hoshe hatutondela bukwasi bwendi. Co mu kaye kakaha, akatukwasa tukayoye kwa kujeneka bukalu bwoshe bukaija mwafwa ya bubi na kujeneka kulumbunuka. Twakandelela manene kuli Yehova Njambi ha kutumwesa cizemo omwo natwana Munendi kupwa Kapilistu Wahakamwa wa mema ku mbunge.