Kupilula Banu Mata Kunahyana Manene mu Kaye—Bika Biyendeka Mbimbiliya?

Mu ngonde ya July 2022, kunakala mizimbu ya kukasamesa ya bushonde bwa kupilula banu mata mu kaye koshe:

• “Banu babangi mu kaye koshe bakasamene manene mubazibile bya butsi bwa uje wapwile ntwama wa fulumende ya Japan wa lizina lya Shinzo Abe, mwafwa mu lifuti lya Japan kumwakele manene bukenya bwa kupilula banu na mata, co lalo muli mashiko abindika kupangesa mwamubi mata.”—July 10, 2022, The Japan Times.

• “Banu ba mu Denmark banakasama manene omwo munalume umo natsiile banu batatu mu cintolo cakama ca mu nganda ya Copenhagen.”—July 4, 2022, Reuters.

• “South Africa: Banalume bamo banakobelele mu cintolo ca kulandesela bwala na kupilula banu mata ba kupwa 15 mu nganda ya Soweto.”—July 10, 2022, The Guardian.

• “Ha simbu ya cilika ca kuhwima cije cikakalako ha July 4 mu United States, banu ba kutubakana 220 banatsile munima ya kubapilula mata.”—July 5, 2022, CBS News.

Kuma bushonde bwa cifwa eci bukahwa ndi? Bika biyendeka Mbimbiliya?

Bushonde Bukahwa

Mbimbiliya inatumbula simbu ituli na kuyoya ngwayo “matangwa a mamaneselelo,” muje banu bakapwa bakutewesa. (2 Timateo 3:1, 3) Ebi bilinga bya bukenya bikalingisa banu balishoshomwene. (Luka 21:11) Nameme ngoco Mbimbiliya inakulahesa ngwayo kukakala simbu omwo bukenya bukahwa, co “banu ba Njambi kubakalishoshomwena, co membo abo akakala mwamubwa na kwoloka.” (Isaya 32:18) Bukenya bukahwa bati?

Njambi akanyongesa banu bababi hamolika na bitwa bya nzita byoshe.

• “Njambi akatundisa baka-bubi mu lifuti.”—Visimo 2:22.

• “Ikeye amanesa binzita hano hasi hoshe, akapokozola mata a lusipa na makunga, enyeka bintelo na tuhya.”—Myaso 46:9.

Njambi akamenesa bukenya omwo akalongesa banu mwa kukela mu kwoloka.

• “Ha lilundu lya Njambi lya kujela, kuhakakala cuma cimo ca kukubulumuna nambe bubi. Lifuti likashula na mana akuzibuka Shukulu Kalunga ngwe mema a kalunga mwakajalela.”—Isaya 11:9.

• Nameme ha simbu ino, Njambi ali na kulongesa banu mu kaye koshe bajenjuke ku bilinga bya bukenya na kufula “mikwale yabo kupwa matemo, na makunga kupwa bimoko bya kunongesa miti.”—Mika 4:3.

Nga mushaka kuzibuka byabingi ha cikulaheso ca mu Mbimbiliya ca kukayoya mu kaye kwa kujeneka kuziba lyoba, co tandeni ñanda ya “Freedom From Fear—Is It Possible?”

Nga mushaka kuzibuka mubukahwila bukenya mu kaye, tandeni ñanda ya “Peace on Earth at Last!”