Mabazi Akama Aje Ali na Kubiisa Manene Byuma—Bika Biyendeka Mbimbiliya?

Banu babangi mu kaye koshe bali na kulifwita na bukalu bunaija mwafwa ya mabazi. Nangukeni biyendeka mizimbu inatako:

• Lya August 2, 2023, muzimbu wa baka-AP unendekele ngwawo: “Mu mbongi yakama mu China kunanyokele nyonzi yakama manene ya kweta ku mamilimita a kupwa 744.8. Inashangumukile Lyasapalalo kweta Lyamucitatu. Kuneti oni myaka 140 kutunda hakwanyokelele nyonzi yakama ngacije mu China.”

• Lya August 3, 2023, muzimbu wa baka-Deutsche Welle unendekele ngwawo: “Lyamuciwana, mu Japan munakele lihunzi lyakama na nyonzi yakama ije inatsiile banu babali. . . . Co lalo ngwabo eli lihunzi lyakama lyasa kunena nyonzi ya mamita a kweta ku 0.6 ku mutambela wa minkinda mu Taiwan.”

• Lya July 24, 2023, muzimbu wa baka-BBC unendekele ngwawo: “Lyasapalalo na Lyacalumingo kunakele libazi [mu Nova Scotia] mwafwa ya nyonzi yakama ije inanyokele ku kalunga-ndonga wa Atlantic ku mutamba wa Canada ije kanda icinyokeho mu myaka 50 ineti.”

Mbimbiliya inendeka bika ha byuma bya cifweci?

Cimweso ca “matangwa a mamaneselelo”

Mbimbiliya inamwesa ngwayo tuli mu simbu ibanatumbula ngwabo “matangwa a mamaneselelo.” (2 Timothi 3:1) Yesu wapolofwetele ngwendi mu simbu yetu tumona “byuma bya kutewesa.”(Luka 21:11) Kushaluka nambe kutonola manene nakwo kuli na kulingisa mu kaye mulingiwe byuma bije kubasinganyekele banu ngwabo bilingiwa.

Byuma bitukwasa tukale na lilabelelo

Mbimbiliya inatuleke ngwayo byuma byabingi bya kutewesa bije bili na kulingiwa ano matangwa mu kaye bitwana lilabelelo. Bika twendekela ngoco? Yesu wendekele ngwendi: “Mumukamona ebi byuma bilingiwa, muzibuke ngweni Bumwene bwa Njambi buli muyehi.”—Luka 21:31; Mateu 24:3.

Byuma bili na kulingiwa bili na kumwesa ngwabyo Bumwene bwa Njambi ololo bulingisa byuma mu kaye bikale mwamubwa.—Yombi 36:27, 28; Samu 107:29.

Nga mushaka kuzibuka Bumwene bwa Njambi mubukamanesela byuma byoshe byabibi bili na kulingiwa ha lifuti-libu, taleni ñanda ya mutwe wa “Who Will Save the Earth?”