Levitike

12 Yehova watwaleleleleho kuleka Mosesa ngwendi: 2 “Leka Baisalele ngwobe, ‘Nga munakazi akala na cikute, co akita mwana wa munalume, co apwa wa kujwala ha matangwa 7 ngwe mwakapwila wa kujwala ha matangwa akakala ku ngonde. 3 Ha litangwa lya bu 8, munapande kuteta cikoba ca ku bunalume bwa uje mwana. 4 Uje munakazi napande kutwalelelaho kulijelesa ku maninga ha matangwa a kupwa 33. Kapandele kukwata cuma coshe-coshe ca kujela, co lalo kapandele kukobela mu mwela wa kujela kweta noho hawakahwila matangwa endi a kulijelesa.

5 “‘Nga munakazi akita mwana wa munakazi, co apwa wa kujwala ha matangwa 14 ngwe mwakapwila wa kujwala ha simbu yakakala ku ngonde. Napande kutwalelelaho kulijelesa ku maninga ha matangwa 66. 6 Matangwa endi a kulijelesa mwafwa ya kukita mwana wa munalume nambe mwana wa munakazi muwahwa, uje munakazi napande kwana kapilistu muna manga wa nkomba wa mwaka umo kupwa bwana bwa kwenyeka, na muna liyembe wa kulela nambe katela kupwa bwana bwa kufwika bubi, ku cikolo ca tenti ya kuliwanena. 7 Uje kapilistu akanena buje bwana kulutwe lwa Yehova na kwanena uje munakazi uje mulambu mangana bamujelese, co uje munakazi akapwa wa kujela ku maninga endi aje anakala na kwita. Eli likelyo lishiko lya kutalesa kuli munakazi uje akita mwana wa munalume nambe wa munakazi. 8 Oloni nga kasa kwana manga, napande kwana tutela babali nambe bana ba mayembe babali ba kulela. Umo apwa wa bwana bwa kwenyeka, mukwabo wa bwana bwa kufwika bubi, co kapilistu anena uje munakazi mulambu mangana bamujelese, co apwa wa kujela.