Levitike

14 Yehova watwaleleleleho kuleka Mosesa ngwendi: 2 “Eli likelyo lishiko lya kutalesa ku litangwa lya kujelesa munu ali na mbumba, ha litangwa libamunena kuli kapilistu. 3 Kapilistu akaya kusambwa lya cilombo na kumwilula. Nga uje muka-mbumba nakanguka ku mushongo wa mbumba, 4 co kapilistu akamushika ngwendi anene tuzila babali ba kuyoya ba kujela, na muti wa sida, na nanga ya kubenga, na hisopu bya kupangesa mu kumujelesa. 5 Kapilistu akashika ngwendi kazila umo bamutsiile mu ndeho ya buma muje muli mema a mu kabwelubwelu. 6 Oloni kapilistu napande kwambata uje kazila wa kuyoya hamolika na citi ca sida na nanga ya kubenga na hisopu na kubimbwitikila hamo mu maninga a uje kazila ibanatsiila ha mema a mu kabwelubwelu. 7 Co akashamwina maninga lwa kupwa 7 hali uje ali na kulijelesa ku mbumba na kumutumbula ngwendi najele, co akecelela uje kazila wa kuyoya aliile mu shwata.

8 “Uje ali na kulijelesa napande kukusha bizalo byendi na kutehula biñambu byendi byoshe na kutana na mema, co apwa wa kujela. Kutundaho, asa kukobela mu cilombo, oloni akakala hanja ya tenti yendi ha matangwa 7. 9 Ha litangwa lya bu 7, napande kutehula biñambu byoshe ku mutwe wendi na kutehula minjezi ku cipozi na kutehula bikuku byendi. Munima ya kutehula biñambu byendi byoshe, napande kukusha bizalo byendi byoshe na kutana, co apwa wa kujela.

10 “Ha litangwa lya bu 8, akambata bana ba bimanga babali ba nkomba bababwa, na muna manga umo wa lwabo wamubwa uje ali na mwaka umo, na mitamba itatu ya ha mitamba 10 ya efa* ya fulawa yaibwa ya kushinga na mazi kupwa bwana bwa binona, na logu* imo ya mazi. 11 Co kapilistu uje akatumbula uje munu ngwendi najele akambata uje munu ali na kulijelesa hamolika na bwana bwendi na kumutwala halutwe lwa Yehova ku cikolo ca tenti ya kuliwanena. 12 Kapilistu akambata muna manga wa nkomba na kumwana kupwa bwana bwa mulonga hamolika na logu ya mazi, co akabihwingisa noku-noku kupwa bwana bwa kuhwingisa halutwe lwa Yehova. 13 Co akatsiila uje muna manga wa nkomba mu mwela wa kujela, mu mwela muje mubakatsiila cimuna wa bwana bwa kufwika bubi na cimuna wa bwana bwa kwenyeka, mwafwa cimuna wa bwana bwa mulonga nendi napu wa kapilistu ngecilika mwa cimuna wa bwana bwa kufwika bubi mwanapu wa kapilistu. Bunapu cuma ca kujela manene.

14 “Co kapilistu akambatako maninga amo a cimuna wa bwana bwa mulonga na kuwakwita ku shongo ya litwi lya ku cilyo lya uje ali na kulijelesa na ku munye wendi wakama wa ku liboko lya cilyo na ku munye wendi wakama wa ku lindi lya cilyo. 15 Co kapilistu akambata logu imo ya mazi na kwitilako amo mu liboko lyendi lya cimoshwe. 16 Co kapilistu akambwitika munye wendi wa ku cilyo mu mazi aje ali mu liboko lyendi lya cimoshwe na kushamwina mazi amo na munye wendi lwa kupwa 7 halutwe lwa Yehova. 17 Co kapilistu akambata mazi amo aje anasala mu liboko lyendi na kuwakwita ku litwi lya ku cilyo lya uje ali na kulijelesa na ku munye wakama wa ku liboko lyendi lya cilyo na ku munye wakama wa ku lindi lyendi lya cilyo helu lya maninga a cimuna wa bwana bwa mulonga. 18 Kapilistu akambata aje mazi anasala mu liboko lyendi na kuwakwita mu mutwe wa uje ali na kulijelesa, co ebi bikebyo byakalinga kapilistu mangana uje munu bamukonekele bubi bwendi kuli Yehova.

19 “Kapilistu akana bwana bwa kufwika bubi mangana bakonekele uje ali na kulijelesa ku kujwala kwendi, co kutundaho akatsiya cimuna wa bwana bwa kwenyeka. 20 Co kapilistu akana bwana bwa kwenyeka na bwana bwa binona ha mutula mangana uje munu bamukonekele, co apwa wa kujela.

21 “Oloni nga owo munu napu kahutu, co lalo kesi na byabingi, co napande kutwala muna manga wa nkomba kupwa bwana bwa mulonga buje bubahwingisa noku-noku mangana bamukonekele bubi bwendi. Napande kumutwala hamolika na mutamba umo wa ha mitamba 10 ya efa* ya fulawa yaibwa ya kushinga na mazi kupwa mulambu wa binona hamolika na logu imo ya mazi, 22 na tutela babali nambe mayembe babali ba kulela kwesekesa na byuma byali nabyo. Umo apwa wa bwana bwa kufwika bubi mukwaboco apwa wa bwana bwa kwenyeka. 23 Ha litangwa lya bu 8, akabinena kuli kapilistu ku cikolo ca tenti ya kuliwanena halutwe lwa Yehova mangana bamujelese.

24 “Kapilistu akambata uje muna manga wa nkomba wa bwana bwa mulonga na logu ya mazi, co akabihwingisa noku-noku kupwa bwana bwa kuhwingisa halutwe lwa Yehova. 25 Co akatsiya uje muna manga wa nkomba wa bwana bwa mulonga, co kapilistu akambatako maninga amo a cimuna wa bwana bwa mulonga na kuwakwita ku litwi lya ku cilyo lya uje ali na kulijelesa na ku munye wendi wakama wa ku liboko lyendi lya cilyo na ku munye wakama wa ku lindi lyendi lya cilyo. 26 Kapilistu aketila mazi amo mu liboko lyendi lya cimoshwe, 27 co akapangesa munye wendi wa ku cilyo mu kushamuna mazi amo aje ali mu liboko lyendi lya cimoshwe. Akawashamwina halutwe lwa Yehova lwa kupwa 7. 28 Co kapilistu akambata mazi amo aje ali mu liboko lyendi na kuwakwita ku shongo ya litwi lya ku cilyo lya uje ali na kulijelesa na ku munye wakama wa ku liboko lyendi lya cilyo na ku munye wa ku lindi lyendi lya cilyo haje hanabangele kwaka maninga a cimuna wa bwana bwa mulonga. 29 Co kapilistu akambata aje mazi anasalako mu liboko lyendi na kuwakwita mu mutwe wa uje ali na kulijelesa mangana bamukonekele halutwe lwa Yehova.

30 “Co akana umo wa baje tutela nambe umo wa baje mayembe ba kulela kwesekesa na tuzila bali nabo, 31 baje baasa kwana. Umo apwa bwana bwa kufwika bubi, co mukwabo apwa bwana bwa kwenyeka. Akabana hamolika na bwana bwa binona. Co ebi bikebyo byakalinga kapilistu mangana uje munu bamukonekele bubi bwendi kuli Yehova.

32 “Eli likelyo lishiko lyanapande kukabangeya munu uje nakala na mushongo wa mbumba uje kesi na byuma byabingi ha simbu ibamujelesa.”

33 Co Yehova walekele Mosesa na Aloni ngwendi: 34 “Mumukakobela mu lifuti lya Kanana lije linjimyana kupwa buswana, co nga njikatabesa binjibo byomu mu lifuti lyeni kukala na mushongo wa mbumba, 35 co babenya njibo napande kuya na kuleka kapilistu ngwendi, ‘Kuli mushongo umo unasholoka mu njibo yange.’ 36 Kapilistu akashika ngwendi batundise byuma muje mu njibo simbu kanda aye na kwilula uje mushongo mangana keti akatumbule byuma byoshe bili muje mu njibo ngwendi binapu bya kujwala, co munima yebi, kapilistu akaya na kwilula ije njibo. 37 Akelula haje hali mushongo. Nga bibumbe bya ije njibo binendika, co bisholoka kukala na mubala wa yelo na bushompo nambe wa kubenga, co lalo haje hanendika hanalobo kutubakana habasalimbile, 38 co kapilistu akatuhuka muje mu njibo na kukemana ku cikolo. Akashoka ije njibo ha matangwa 7.

39 “Co ha litangwa lya bu 7, kapilistu akeluka na kwilula ije njibo. Nga mushongo unajalakana ha bibumbe bya ije njibo, 40 co kapilistu akashika ngwendi batundise aje mamanya a kujwala na kuwombila hanja ya nganda mu mwela wa kujwala. 41 Co napande kuleka banu ngwendi bapale manene ije njibo mukati, co libu libaisalimbisile lije libatundisaho, banapande kukalyumbila hanja ya nganda ku mwela wa kujwala. 42 Co banapande kwaka mamanya eka mu myela muje mubanatundisa mamanya na kupangesa libu lyeka mu kusalimba lalo ije njibo.

43 “Nga uje mushongo wiluka lalo na kusholoka muje mu njibo munima ya kutundisa mamanya na kupala ije njibo na kuisalimba lalo, 44 co kapilistu akakobelamo na kuilula. Nga uje mushongo unajalakana muje mu njibo, co muje mu njibo muli mushongo wa mbumba uje ushambukila. Ije njibo inapu ya kujwala. 45 Co akashika ngwendi bapujule ije njibo, co mamanya ayo na biti byayo na libu lyoshe libasalimbisile, byoshe bakabitwala hanja ya nganda ku mwela wa kujwala. 46 Oloni woshe akobela muje mu njibo ha matangwa oshe abanaishoko, apwa wa kujwala kweta mangwezi. 47 Co woshe alala muje mu njibo napande kukusha bizalo byendi, co lalo woshe alila muje mu njibo napande kukusha bizalo byendi.

48 “Oloni nga kapilistu mwaija akumona ngwendi uje mushongo kuwajalakanene muje mu njibo munima ya kusalimba lalo ije njibo, co kapilistu atumbula ije njibo ngwendi inajele, mwafwa uje mushongo unahu. 49 Napande kwambata tuzila babali na muti wa sida na hisopu mangana ajelese ije njibo ku kujwala. 50 Napande kutsiila kazila umo mu ndeho ya buma muje muli mema a mu kabwelubwelu. 51 Co napande kwambata muti wa sida na hisopu na nanga ya kubenga na kazila wa kuyoya na kubimbwitika mu maninga a kazila uje yanatsiila mu mema a mu kabwelubwelu, co napande kuwashamwina haje ha njibo lwa kupwa 7. 52 Co akajelesa ije njibo ku kujwala kupangesa maninga a uje kazila na mema a mu kabwelubwelu na kazila wa kuyoya na muti wa sida na hisopu na nanga ya kubenga. 53 Co akecelela uje kazila aliile hanja ya nganda mu shwata mangana ije njibo keti ipwe ya kujwala, co ipwa ya kujela.

54 “Eli likelyo lishiko linatalesa ku mushongo woshe-woshe wa mbumba na mushongo wa ha cikola nambe wa ku cipozi, 55 na mbumba ya ha cizalo nambe ya mu njibo, 56 na kutalesa ku mazimbo na mabanda na bitamba, 57 mangana muzibuke nga cuma cinajwala nambe nga cinajele. Eli likelyo lishiko lya mbumba.”