Mukanda Wakulibanga wa Samwele
9 Kwakele munalume umo mu Benjamini wa lizina lya Kishi, Kishi muna Abiele, Abiele muna Zelo, Zelo muna Bekolati, Bekolati muna Afiya. Ou munalume wapwile Kabenjamini wa kufuka manene. 2 Wakele na mwana wa munalume wa lizina lya Saulu, uje wapwile mukwenje, co lalo wapwile wamubwa. Kukwakele munalume hakati ka Baisalele uje wapwile wamubwa kumutubakana, co lalo wapwile wamulaha kutubakana banu boshe, omwo bamupwisilile ha bitsili.
3 Bidonki* ba Kishi ishe ya Saulu mubazimbalele, Kishi walekele munendi Saulu ngwendi: “Ambata umo wa baka-kupanga muye na kutonda bidonki.” 4 Betile mu mutambela wa malundu wa Efremu na mu lifuti lya Shalisha, oloni kubabawanenemo. Betile mu lifuti lya Shalimu, oloni obo bidonki kubakelemo. Betile mu lifuti lyoshe lya Babenjamini, oloni kubabawanene.
5 Mubetele mu lifuti lya Zufu, Saulu walekele muka-kupanga yakele nendi ngwendi: “Twiluke kwimbo, mangana tate keti ashangumuke kushota yetu mbunge kutubakana kushota mbunge bidonki.” 6 Oloni owo muka-kupanga wamukumbulwile ngwendi: “Tala, kuli ngamba ya Njambi omu mu nganda, co owo munalume bamusingimika. Byoshe byakendeka bikalishulisilila. Tuyemo hano bene. Hamo asa kukatuleka kutunapande kutalesela.” 7 Co Saulu walekele muka-kumupangela ngwendi: “Nga tuya, bika bitumwambatela? Mu bingonga byetu kumwesi makende. Kukwesi bwana butwasa kwambatela owo ngamba ya Njambi wa busunga. Bikajo bituli nabyo?” 8 Muka-kupanga wakumbulwile lalo Saulu ngwendi: “Tala! Njili na hafu ya hafu ya shekele* ya siuva mu liboko. Njikayana ngamba ya Njambi wa busunga, co akatuleka kutunapande kutalesela.” 9 (Mu bisimbu bya kunima mu Isalele, munu mwakele na kuya na kwihula Njambi wakele na kwendeka ngwendi: “Ijeni tuye kuli muka-kumona.” Mwafwa mu bisimbu bya kunima, kapolofweto bakele na kumutumbula ngwabo muka-kumona.) 10 Co Saulu walekele muka-kumupangela ngwendi: “Biunendeka byabibwa. Tuye.” Ngeci baile mu nganda mwakele ngamba ya Njambi wa busunga.
11 Mubakele na kukanduka mu nganda, bawanene bambanda baje bakele na kuya na kutekula mema. Co babehwile ngwabo: “Kuma muka-kumona mwali omu mu nganda ndi?” 12 Babakumbulwile ngwabo: “Mwali. Taleni, ali lika halutwe lweni. Zambuleniko, mwafwa lelo naija omu mu nganda, mwafwa banu bana mulambu lelo ha mwela wa kulunduka. 13 Mucikobela lika mu nganda, mumuwana simbu kanda aye ku mwela wa kulunduka na kukalya. Mwafwa banu kubali, kubanga nete, mwafwa ikeye akabezikisa mulambu. Nga namanesa, co baje babanalanya basa kulya. Kandukeni hano bene, mumuwana.” 14 Ngeci, bakandukile mu nganda. Mubakele na kushwena hakati ka nganda, bamwene Samwele uje wakele na kubashesha mangana aye nabo ku mwela wa kulunduka.
15 Litangwa lya kulinga ngwabo lyamukwabo Saulu eta, Yehova walekele Samwele ngwendi: 16 “Imene ha simbu ino bene, njituma munalume umo kutunda ku lifuti lya Benjamini. Unapande kumubwabesa kupwa ntwama wa banu bange Baisalele, co obola banu bange mu liboko lya Bafilistiya. Mwafwa njinamono kayando ka banu bange, co miteto yabo inete kuli yange.” 17 Samwele mwamwene Saulu, Yehova wamulekele ngwendi: “Ou ikeye munalume injinakulekele byendi ngwange, ‘Ou ikeye ayula banu bange.’”*
18 Co Saulu washwenene Samwele hakati ka cikolo ca nganda na kwendeka ngwendi: “Njilomba kwihulako mwane. Njibo ya muka-kumona ili kuli?” 19 Samwele wakumbulwile Saulu ngwendi: “Yange bene muka-kumona. Twama kulutwe lwange tukanduke ku mwela wa kulunduka. Mulya nange lelo. Imene mutondo njikusununa, co njikuleka byoshe biushaka kuzibuka.* 20 Keti ushote mbunge bidonki banazimbalele izuzi-lije mwafwa banabawana. Byuma byoshe byabibwa mu Isalele byeya? Kuma keti byobe na bakunjibo ya isho boshe?” 21 Saulu wamukumbulwile ngwendi: “Kuma kunjitundu mu muyati wa Benjamini uje wapwa muyati waundondo manene ku miyati ya Isalele ndi? Co lalo kuma naanga yange keti ikeyo yaindondo manene ku binaanga byoshe bya mu muyati wa Benjamini ndi? Bikoni biunendekela nange ngacije?”
22 Co Samwele wambatele Saulu na muka-kumupangela na kubanena mu njibo ya kulila, co wabanene mwela wa bulemu manene wa kutumama, kutubakana boshe babalanyele. Kwakele banalume ba kweta ku 30. 23 Samwele walekele muka-kuteleka ngwendi: “Nena uje mutamba unjinakwanene, unjinakulekele ngwange, ‘Wake kumukulo.’” 24 Co muka-kuteleka wakakwile litako lyoshe lya cimuna na kulyaka halutwe lwa Saulu. Co Samwele wendekele ngwendi: “Bibanatulikile banakwakelabyo. Lya, mwafwa banabitulikilile yobe, mwafwa yeci cilika. Omwo njinabalekele ngwange, ‘Njinalanya bangenzi.’” Ngeci, Saulu walile na Samwele lije litangwa. 25 Co basikumukile mu nganda kutunda ha mwela wa kulunduka, co Samwele watwaleleleleho kusimutwiya na Saulu helu lya njibo. 26 Lyamukwabo, bendukile mutondo-tondo, co mukwakele na kukya, Samwele watambekelele Saulu helu lya njibo ngwendi: “Libwahesele mangana njikusunune.” Ngeci Saulu walibwaheselele, co ikeye na Samwele batuhukile hanja. 27 Mubakele na kusikumuka, kushwena kulako na nganda, Samwele walekele Saulu ngwendi: “Leka muka-kukupangela atwame kulutwe lwetu, oloni yobe imana hano bene mangana uzibe byanendeka Njambi.” Co muka-kumupangela watwamene kulutwe.