Ëxpëjkën 10

Tuˈunënë diˈibatyë Dios yˈaxëkˈijxypy

Diˈibë Dios nyigajxypy ko axëëk, ¿wiˈix mijts mbäät xyˈixy? (1)

¿Diˈibatyë tuˈunën axëëk mä jäˈäy yˈity tsyëënë? (2)

Pënatyë Dios myëduundëp, ¿wiˈix mbäät tˈixtë anëë? (3) ¿Kuyaty o ëyëˈk diˈib meeny myëët? (3) ¿Maˈtsk? (3) ¿Mëk awäˈänˈat diˈib yajtuundëgoopy? (4) ¿Brujëˈäjtk? (5) ¿Etsë mëˈuk? (6)

¿Wiˈix mbäät tuˈugë jäˈäy yˈawäˈätspëtsemy mä tëgekyë tyäˈädë tuˈunënë axëëkpë? (7)

1. Yëˈë Dios mëduumbëty tsyojktëbë oyˈäjtënë, per tsojkëp nandëˈën tˈaxëkˈixtëdë axëkˈäjtënë (Salmo 97:10; 1 Peedrʉ 3:11). Tyäˈädë yëˈë yˈandijpy njëjpkudijëmë tuˈunënë diˈibë Dios yˈaxëkˈijxypy. ¿Extëm tijatyëty?

2. Poky mä ijt tsënaaky: Ko jäˈäy yˈity tsyëënë mä kyajnëm syëbilpeky, o ko tsyëënë mëdë jëyujk animal, o mëdë wyingon mëguˈuk ets ko tsyëënëdë yetyëjk ak yetyëjk o ko tuˈugë kasäädë jäˈäy tsyëënë mëdë wiinkpë, tëgekyë tyäˈädë mëj poky parë Dios (Levítico 18:6; Romanʉs 1:26, 27; 1 Korintʉ 6:9, 10). Pën tuˈugë yetyëjk mët tuˈugë toxytyëjk tsënääy jukyˈäjttëp ets kyaj të syëbilpëktë, waˈan sëbilpëktë, ets pën kyaj, waˈan tnaymyastuˈudëdë (Ebreeʉsʉty 13:4).

3. Anëë, kuyaty o ëyëˈk diˈib meeny myëët, maˈtsk: Jyobaa Dios kyaj mbäät yˈandaˈaky (Titʉ 1:2). Pääty pënaty tsyojktëp etsë Dios kyupëkëdët kyaj mbäät yˈandäˈäktë (Proverbios 6:16-19; Kolosʉ 3:9, 10). Tëgekyë kuyaty diˈib meeny myëët yajjëmbijtypyë jäˈäy atsojkpë. Pääty pënaty Dios myëduundëp kyaj tniguyattë meeny (Éfesʉ 5:3-5). Nan kyaj myaatstë ets kyaj ti tjuytyë pën nyijäˈädëp ko meetsy ets nan kyaj ti dëˈënyë tmënëjxtë pën kyaj tˈamdowdë (Éxodo 20:15; Éfesʉ 4:28).

4. Mëk awäˈänˈat diˈib yajtuundëgoopy: Tadë mëk awäˈänˈat diˈib kyaabë jyëjpkuwijtsënë mbäät yajtuundëgoy (Génesis 4:5-8; Santya̱ˈa̱gʉ 1:19, 20). Pënaty dëˈën jäˈäyˈäjttëp kyaj mbäät mëdë Dios nyaymyayëty (Salmo 11:5; Proverbios 22:24, 25). Kyaj yˈoyëty nyajjëmbijtëm axëëk ak axëëk ko pën wiˈix xytyuˈunëm (Proverbios 24:29; Romanʉs 12:17-21).

5. Käjxpojk etsë brujëˈäjtk: Näägë jäˈäy tmëgäjxtë tsuu poj ets pyudëkëdët mä jäˈäy dyajtsoybyety. Etsë wiinkpëty tkäjxpoktë myëtsipëty ets pyäˈämbattët o axtë dyaˈooktë. Tëgekyë tyäˈädë tuˈunën yëˈë dëˈën nyikëjxmˈäjtypyë Satanás. Pääty, pënatyë Dios myëduundëp kyaj mbäät ttundë tëgekyë tyäˈädë (Deuteronomio 18:9-13; Diˈibʉ Jatanʉp 21:8). Pën mbäät xykyuwäˈänëm mä tadë jäˈäy diˈib käjxpojkp yëˈë Jyobaa ko nˈijtëm mëët wingon (Proverbios 18:10).

6. Mëˈuk: Ko nˈukëmë binë, serbesë o oy tyim diˈibëtyë nëë diˈib yajmukp kyaj yˈaxëëgëty, per net pën nˈukëm waanë (Salmo 104:15; 1 Timotee 5:23). Perë Dios yajkubojkypy ko nˈukniˈigyëm o ko nmuktëgoˈoyëm (1 Korintʉ 5:11-13; 1 Timotee 3:8). Mëˈuk mbäät myajˈyubety myajpäˈämbetyëty ets mbäät dyajmäˈätyë mtsënäˈäy mjukyˈäjtënë. Nan mbäät pojënë tijaty mduktunyëty (Proverbios 23:20, 21, 29-35; Éfesʉ 5:18).

7. Tadë jäˈäy diˈib tyuunkˈäjtypyë axëkˈäjtën diˈibë Dios jënäämp ko kyaj yˈoyëty «kyaj yˈittët mä Diosë kyutujkën» (Galasyʉ 5:19-21). Pën mijts mjantsy tsyojkypyë Dios ets myajjotkujkˈataampy, mbäät mˈawäˈätspëtsemy mä tëgekyë tyäˈädë tuˈunën (1 Fwank 5:3). Axëkˈix diˈibë Dios jënäämp ko axëëk (Romanʉs 12:9). Naymyayëdë mëdë jäˈäy diˈib jäˈäyˈäjtp extëmë Dios ttsoky (Proverbios 13:20; Ebreeʉsʉty 6:12). Yëˈë nmëguˈukˈäjtëm diˈib myëdäjtypy kajaa Diosë yˈëxpëjkën mbäät xypyudëjkëm mëjwiin kajaa (Santya̱ˈa̱gʉ 5:14). Per pën niˈigyë mbäät mbudëkëty yëˈë Dios ko xymyënuˈkxtäˈägët (Filipʉs 4:6, 7, 13).

[Letrë diˈib miimp mä dibujë mä pajina 20, 21]

Dios yˈaxëkˈijxpyë mëˈuk, maˈtsk, kuyaty o ëyëˈk diˈib meeny myëët etsë mëk awäˈänˈat diˈib yajtuundëgoopy