Ëxpëjkën 12

Nˈokmëjˈijxëmë jukyˈäjtën etsë neˈpyny

¿Wiˈix mbäät nˈijxëmë jukyˈäjtën? (1) ¿Ets ko toxytyëjk këˈëmë yˈuˈunk dyaˈooky mä kyajnëmë xyëë pyoˈo tpääty? (1)

Pënatyë Dios myëduundëp, ¿wiˈix dyaˈixëdë ko naygyuentˈäjtëdëp ets kyaj yˈayoˈombäädët? (2)

¿Axëëk ko nyaˈoˈkëmë jëyujk animal? (3)

¿Tijaty tuˈunënë diˈibë jäˈäy tyuumpy yaˈijxëp ko kyaj tmëjˈixyë jyukyˈäjtën? (4)

¿Wiˈix jyënaˈanyë Diosë yˈanaˈamën mä neˈpyny? (5)

¿Yajkubejkypyë Dios nandëˈën ko tyëkë neˈpyny niniˈxoty? (6)

1. Mä Jyobaa jam tsyoonyë jukyˈäjtën. Tëgekyë naxwinyëdë jäˈäy myëguentˈäjtypyë Dios mëdë jyukyˈäjtën (Salmo 36:9; Apostʉlʉty 17:24, 25). Yëˈë jukyˈäjtën mëj tˈixyë Dios. Axtë jyukyˈäjtënë maxuˈunk diˈib apenë kyojynyëm tyääk jodoty mëjë Jyobaa tˈixy. Dios windum, axëëk ko jäˈäy dyaˈoogyë maxuˈunk diˈib apenënëm kojp tyääk jodoty (Éxodo 21:22, 23; Salmo 127:3).

2. Pënaty jyantsy myëduundëbë Dios kyuentˈäjttëbë jyukyˈäjtënë. Yˈijx tyuundëbë kyarrë etsë jyëën tyëjk parë kyaj yˈayoˈombëjtäˈägët (Deuteronomio 22:8). Yëˈë Dios mëduumbëty kyaj nanëgoobë o tsojkëngyëjxm tpëjtäˈäktë jyukyˈäjtënë jotmayjëjpˈam. Pääty jyëjpkudijëdëbë kuyaty mä mbäät nijot nyayajtsayutëdë. Ets nandëˈën tëgekyë ixy jawë etsë ëy yaˈaxy diˈib mbäädë jäˈäy yaˈawäˈändaˈagyëty ets yajtuundëgoyëty (Salmo 11:5; Fwank 13:35).

3. Dios diˈib të dyajkojtäˈäy tijaty, mëj tˈixy nandëˈënë jyukyˈäjtënë jëyujk animal. Pënatyë Dios myëduundëp, mbäät dyaˈooktë jëyujk animal ets ttsuˈutsët, twitˈat txoxˈattët o parë këdiibë wiˈix tyunëdët o yajpäˈämbatëdët (Génesis 3:21; 9:3; Éxodo 21:28; Markʉs 1:6). Per diˈibën kyaj yˈoyëty ja ko nyaˈoˈkëmë jëyujk animal nanëgoobë o ko jeˈeyë nyaˈayoˈojëm (Proverbios 12:10).

4. Pënatyë Dios myëduundëp kyaj yˈoyëty jyuˈuktët o tpuˈuytyëdë mariwanë o tabakë. Tyäˈädë tuˈunënë axëëgëˈë yëˈko 1) tsip parë ok tmastuˈudëdë jäˈäy, 2) yˈaxëktuumbyë niniˈx këbäjk ets 3) kyaj wyäˈätsëty (Romanʉs 6:19; 12:1; 2 Korintʉ 7:1). Nmatstutäˈäyëmë tyäˈädë tuˈunën mbäät mëk tsyiptaˈaky, per pën nyajjotkujkˈatäˈänëmë Jyobaa tsojkëp nmatstutäˈäyëm.

5. Tadë neˈpyny nan mëj tˈixyë Dios. Yëˈë jyënaˈany ko jukyˈäjtënë yˈity mä neˈpyny. Pääty kyaj yˈoyëty njëˈxëmë neˈpyny. Nan kyaj mbäät njëˈxëmë tsuˈutsy pën kyaj yajxon të wyindaxy. Pën tuˈugë jëyujk animal dëˈënyë të nyeˈpyny tyukˈoogë kyaj mbäät yajtsuˈutsy. Pën të yajkimy o të yajtujy tsojkëp netyë nyajwindäjxëm ets taanëm mbäät ntsuˈtsëm (Génesis 9:3, 4; Levítico 17:13, 14; Apostʉlʉty 15:28, 29).

6. ¿Axëëk ko ngupëjkëmë neˈpyny tyëkët niniˈxoty? Jamyats ko Jyobaa kyaj dyajnigutukë ets nˈaxäjëmë neˈpyny. Tyäˈädë yëˈë yˈandijpy ko nimäätsoo mbäät ngayajtëjkëmë neˈpyny niniˈxoty, ni wiink jäˈäyë nyeˈpyny ets ni ngëˈëm neˈpynyˈäjtëm diˈibë jäˈäy të tpëjkeˈeky (Apostʉlʉty 21:25). Pääty, pënaty jyantsy myëduundëbë Dios kyaj tkupëktë tyëkëdë neˈpyny mä nyiniˈx kyëbäjk. Per kyupëjktëp tëgekyë diˈibë doktoor nyaskäjxëp ets yajtëjkëp mä nyiniˈx kyëbäjkë tsooy per yëˈë diˈib kyaj tmëdatyë neˈ pyny. Jukyˈatandëp, per kyaj ko tyim jukyˈatäˈändë tkutëjtëdë netë Diosë yˈanaˈamën (Matewʉ 16:25).

[Letrë diˈib miimp mä dibujë mä pajina 25]

Parë nyajjotkujkˈäjtëmë Dios, kyaj yˈoyëty nyajtëjkëmë neˈpyny niniˈxoty, nan kyaj yˈoyëty njuˈkëm ets ni ngapëjtakëmë jukyˈäjtënë jotmay jëjpˈam