Yëˈë myëtnaymyaayëbë Dios tyuundebë oyˈajtën

Ko tuˈugë mëtnaymyaayëbë xymyëdaty diˈib mëjˈijxypy ets mˈoyˈijxypy wiˈix jyaˈayˈaty, mjäˈäyˈatäämp nandëˈën extëm yëˈë. Biiblyë dëˈën tmaytyaˈagyë Jyobaa: «Diˈibë mdiimpy yëˈë dëˈën oy es tëyˈäjtën» (Diˈibʉ Jatanʉp 15:3). Pääty, pën naymyayäˈänëm mëdë Dios, tsojkëp nˈijtëm oyjyaˈay ets nduˈunëmë tëyˈäjtën. Yëˈë Biiblyë jyënaˈany: «Mët ko miitsëty mˈuˈunkˈatëdë Dios, jikyˈattë extëm yëˈë ttseky. Jikyˈattë es naytsyokëdë nixim niyam» (Ɛfɛsʉ 5:1, 2). Yä yajnigäjxäˈäny kanäk peky wiˈix mbäät niˈijxtutëmë Jyobaa o njukyˈäjtëm extëm yëˈë ttsoky:

Pudëkë wiink jäˈäy. «Pën xyajmadakëmë Dios, mbäät nmayˈäjtënduˈunëm oy tyim pënëty mëët, nidëgekyëty.» (Galasyʉ 6:10.)

It tuumbë jäˈäy. «Pën maˈtstëp, mastuˈudë maˈtsk. Niwäˈägë mduunk mˈayoˈon yajxon es xypyäädëdë mgäˈäjy mˈukën.» (Ɛfɛsʉ 4:28.)

Naymyëdatëdë wäˈäts nikëjxy këbajky ets mä mjot mwinmäˈäny. «Pääty mbäät nayaˈijtëm wäˈäts mä yëˈë diˈibë mbäät xyaˈaxëˈkëm.» (2 Korintʉ 7:1.)

Yaˈixëdë tsojkënë etsë wintsëˈkënë mä mfamilyë. «Niduˈuk niduˈuk miitsëty [...] kasäädë yetyëjk mbäät ttsekyë nyëdoˈoxy extëm nyaytsyekyëty këˈëm es ko yëˈë kasäädë toxytyëjk niduˈuk niduˈuk mbäät tmayˈaty twintsëˈëgë yëˈë yˈuˈunk nyaˈajy. Nidëgekyë miitsëty ënäˈkëty, diˈibë mbatëp xytyunët extëmë Kristë myëduumbë, yëˈë mbäät xymyëmëdowdë mdääk mdeety yajxon.» (Ɛfɛsʉ 5:33-6:1.)

Tsokë wiink jäˈäy. «Naytsyojkëm nixim niyam, mët ko yëˈë tadë tsojkën myiny mä Dios.» (1 Fwank 4:7.)

Mëmëdowë yˈanaˈamënë kuduunk justisë etsë gobyernë. «Nidëgekyë miitsëty mbäät xymyëmëdoy ja justisëtëjkëty esë gobyernëty, [...]. Pes, miitsëty mbäät xykyëbattë diˈibë mbatëdëp. Mbäät mgëbety mä ja rekauradoor es ja mgugëbetyëty diˈibë myajkypy mä gobyernë.» (Romʉ 13:1, 7.)