Nijëmbittë ja “diˈibë mguentˈäjtëdëp extëm tuˈugë borreegë kuentˈäjtpë”

JYOBAA mduˈumoˈoyanëp parë jatëgok xynyijëmbitët. Yëˈë mbudëkëyanëp parë xywyinguwäˈägëdë amay jotmay, parë kyaj axëëk mnekynyayjawëdët ets parë oyë mjot mwinmäˈäny xyjawët. Ko duˈun xytyunët, ta jatëgok xytsyojkënyëˈatäˈäny xymyëdunëdë Jyobaa mëdë mëguˈuktëjk. Pes nanduˈun myajpääty extëm ja nmëguˈukˈäjtëm diˈib mä primer siiglë, diˈibë apostëlë Pedro anmääyë: “Dëˈën miits mˈijttë extëm ja borreegë diˈibë të yˈëxˈyoˈoy, per të mjëmbittë mä [...] diˈibë mguentˈäjtëdëp extëm tuˈugë borreegë kuentˈäjtpë” (1 Peedrʉ 2:25).

Nitii duˈun kyaˈoyëty extëm ko xynyijëmbitëdë Jyobaa. ¿Tiko? Yëˈko nëjkxëp jotkujk nyayjawëty (Proverbios 27:11). Mijts mnijäˈäwëp ko mbäädë Dios yajxondaˈagyëty o yajmay yajtäjˈyëty tijaty nduˈunëm. Per yëˈë kyaj xytyukˈaguanëˈäjtëm parë nmëduˈunëm ets ntsojkëm (Deuteronomio 30:19, 20). Tuˈugë jäˈäy diˈibë Biiblyë nyimaytyakypy jyënany: “Kyaj mbäät pën dyaˈˈawäˈätsyë mjot mgorasoon, këˈëmën mbäät xyaˈˈawäˈätsy”. Ko nmëduˈunëmë Jyobaa mët ko ntsojkëm, duˈunxyëp extëm këˈëm nyaˈˈawatsëmë jot korasoon. Tyäˈädë jantsy jotkujk yajnayjawëty ets yajtsobatypy ko nmëduˈunëm amumduˈukjot. Nitii xykyayajjotkujkˈatäˈänëm extëm ko nmëduˈunëmë Jyobaa extëm nyitëkëty (Apostʉlʉty 20:35; Diˈibʉ Jatanʉp 4:11).

Ko xynyijëmbitëdë Jyobaa, ta xyˈaxäjëyaˈany ja ëxpëjkën diˈib myajtëgoyˈajtypy (Mateo 5:3, Traducción del Nuevo Mundo). Mayë jäˈäy nyayajtëwëdë, extëm: “¿Tiko të nmiˈinëm jukyˈäjtpë?”. Ets kyaj tpäättë mä yaˈˈatsoowëmbity. Jyobaa të xyajkojëm parë yëˈë nˈëxtäˈäyëm ets nyijäˈäwëp ko jotkujk xyajnayjäˈäwëm ko nmëduˈunëm. Pääty, nitii xykyayajjotkujkˈatäˈänëm extëm ko nmëduˈunëmë Jyobaa mët ko ntsojkëm (Salmo 63:1-5).

Jyobaa tsyejpy ets xynyijëmbitët, päätyë tyäˈädë foyetë të kyojy. Të yaˈˈamdoyë Jyobaa nyaybyudëkë parë yajxon të yajjäˈäy. Ta net të mmoˈoyëty ja diˈib tuump mëjjäˈäy o tuˈugë nmëguˈukˈäjtëm, ets mijts ta net të mjënäˈäny ko xykyäjpxäˈäny. Seguurë ko të mjotjäˈtëty diˈib të xykyajpxy. Tukëˈëyë tyäˈädë, yëˈë mdukˈijxëp ko Jyobaa kyaj mjäˈäytyëgoyëty ets ko jantsy oy mˈaxäjëyaˈanyëty (Fwank 6:44).

Xyjotkujkmoˈoyëm ko Jyobaa kyaj tjäˈäytyëgoyë byorreegë diˈib të yoˈoytyëgoy. Tyäˈädë yëˈë jyaygyujkë Donna. Yëˈë jyënaˈany: “Wanaty wanatyëts nmëjjagamgekyë tëyˈäjtën, per xëmëts nwinmääyë Salmo 139:23, 24 mä jyënaˈany: Tukˈijxnäjxtaagyëts, mijts Dios, ets ixyˈatëtsë ngorasoon. Ijx tuungëts, ets nnijawë tijatyëts nmëmääy nmëdajpy. Ix pën jaa nëˈë tuˈu diˈibëts mbäät xyˈaxëktuny, ets tuˈumoogyëts mä ja nëˈë tuˈu diˈib winë xëë winë tiempë. Ninäˈäts oy nganayjäˈäwë mëdë Satanásë jyaˈay, pes kyajtsë nety jap mbäät nyajpääty. Nnijäˈäwëbëtsë nety ko mä Diosë kyäjpn, japëts mbäät nyajpääty. Nbëjkëtsë kuentë ko Jyobaa ninäˈäjëtsë nety xykyamastuˈuty, jeˈeyë ko tsojkëbëtsë nety nduˈubäädët parëts jatëgok nijëmbitët. ¡Jantsy jotkujkëts nnayjawëty kojëts jatëgok të njëmbity!”.

Nuˈkxtaktëbëts parë jatëgok xypyäädëdë jotkujkˈäjtën diˈib yajkypyë Jyobaa (Nehemías 8:10). Ninäˈä nëjkx xykyamëkjawë ko jatëgok xynyijëmbitëdë nDeetyˈäjtëmë tsäjpotmëdë.