Ko tyuˈukmuky kanäägë relijyonk: ¿duˈunë Dios ttseky?

Tuˈugë perioodikë diˈib xyëˈäjtypy The Sydney Morning Herald, duˈun dyajtëëy ja jäˈäyëty diˈib kyäjpxtëp: “¿Ti tyuumbyë relijyonk, xyajnaywyäˈkxëm o xyajtuˈukmujkëm?” Nimay yˈatsoowdë ko relijyonk yajnaywyäˈkxëbë jäˈäy.

PËNATY kyupëjktëp etsë relijyonk tyuˈukmukët tëgatsy wyinmaytyë. Eboo Patel diˈib yajnaxkëdak parë tyuˈukmuktëdë relijyonk Interfaith Youth Core, jyënany: “Tukˈijxkëts tuˈugë relijyonk diˈib kyaj tmëdatyë paˈˈayoˈojën [...,] diˈib kyaj tkuentˈatyë naxwinyëdë [...,] ets diˈib kyaj yˈoyjyaˈayëty”.

Budistas, katolikëtëjk, protestantes, hindúes, musulmanes etsë wiinkpë relijyonk, tuˈukmujktëp näˈäty parë tnimaytyäˈäktë wiˈix kyaj mbäät nyekyjaˈˈatyë ayoobë jäˈäy, yajkubojktëp parë kyaj pën tnekyyajtunët extëmë bombë, parë kyaj tnekyyajwindëgoytyëdë Naxwinyëdë ets tnitsiptundë jäˈäy parë tmëdattëdë madakën. Nan të kanäägë relijyonk tyuˈukmuktë parë tkäjpxmuktë wiˈix mbäät nyayjaygyukëdë. Ets nan wiˈixëm tmëjtundë ko nety të nyayjaygyukëdë, ta diˈib yajtooytyëbë beladoor, yˈëw yäˈäxtë o nyuˈkxtäˈäktë.

¿Mbäädë relijyonk dyaˈoyëdë amay jotmay ko duˈun tyuˈukmuktë? ¿Duˈunënë Dios dyaˈoyëyaˈanyë tyäˈädë jukyˈäjtën?

¿WIˈIX WYIMBËTSËËMY DIˈIB TYUUNDË?

Tuˈugë organisasion diˈib yajtuˈukmujkypy kanäägë relijyonk, jyënaˈany ko mä 76 paˈis ja dyajtuˈukmuky 200 naxyë relijyonk. Ets diˈib tyukniwinmäˈäyëdëp yëˈë “parë xëmë nyaybyudëkëdët kanäägë relijyonk”, per tsiptakp duˈun ttundët. Extëm nˈokpëjtakëm, diˈib nyiwintsënˈäjttëbë tyäˈädë organisasion, yajxon ojts twinmaytyë wiˈix ja anaˈamën tjäˈäyäˈändë extëm nituˈugë relijyonk tkayajpokët ets ni ja jäˈäyëty diˈib wiink rasë. ¿Tiko? Tuk pëky, yëˈko kyaj nyayjaygyujkëdë parë tkujayëdët ja Diosë xyëë mä ja anaˈamën. Pääty kyaj ttimmaytyaktë Dios.

Per pën kyaj mbäät yajmaytyaˈagyë Dios, ¿tiko jyaˈˈatyë relijyonk? ¿Ti tëgatsyˈäjtënë jaˈäjtp mä tyäˈädë organisasion diˈib yajtuˈukmujkypy kanäägë relijyonk mët tuˈugë organisasion diˈib pyudëjkëbë jäˈäy? Tyäˈädë organisasion diˈib yajtuˈukmujkypy kanäägë relijyonk, jyënäˈändë ko kyaj ttukˈitëdë tuˈugë relijyonk, jeˈeyë jäˈäy tpudëkëdë parë nyayjaygyukëdët.

¿YËˈËYËDAA TSOBATP KO RELIJYON DYAMËJWINDËKËDË OYBYË JÄˈÄYˈÄJTËN?

Dalai Lama diˈib nyitsiptuumpy parë relijyonk tuˈugyë yˈitët, jyënaˈany: “Tukëˈëyë relijyonk yëˈë nyimaytyaktëbë tsojkën, paˈˈayoˈojën etsë naybyokymyaˈkxë”. Ta yˈakjënäˈäny: “Tyäˈädë jäˈäyˈäjtën yëˈë duˈun diˈib tsobatp ets duˈunxyëp mbäät njäˈäyˈäjtëm”.

Duˈunë duˈun, mëjwiin kajaa tsyobäätyë tsojkën, paˈˈayoˈojën etsë naybyokymyaˈkxë. Diˈib mayë jäˈäy yˈixyˈäjttëp extëmë Regla de Oro yëˈë diˈibë Jesus nyigäjpx: “Diˈibë miits mtsojktëp es ja wiinkpëty mdukmëdunëdët, miits mdukmëdundëbë taadë” (Matewʉ 7:12). Per ¿yëˈëyëdaa mbäät ttunyë relijyonk diˈib tëyˈäjtën? ¿Dyajmëjwindëkëdë oyˈäjtën?

Apostëlë Pablo jyënany ko mayë netyë jäˈäy tjantsy myëdunäˈändë Dios, “per kyaj tjaygyukëdë ti Dios tsyejpy”. Ets kom kyaj nety “tjaygyukëdë wiˈixë jäˈäy oy wyëˈëmdët mët ja Dios”, ta dyajtuundë kyëˈëm winmäˈäny (Romanʉs 10:2, 3). Ets kom kyaj nety yajxon tnijawëdë ti Dios tsyejpy, kyaj tsyobaty oy tjamëdunandë ets oy tjamëbëjktë (Matewʉ 7:21-23).

BIIBLYË ETS KO TYUˈUKMUKYË RELIJYONK

Jesus jyënany: “Jotkujk yajpäättë pënaty kyaj tsyipˈëxtäˈäy” (Mateo 5:9, Traducción del Nuevo Mundo [TNM]). Jesus kyuytyuun tijaty kyäjpxwäˈkx, kyaj dyajmëjwindëjkë tsip ets tyukmëtmaytyakë jäˈäyë jotkujkˈäjtën oy ti relijyonk ttukˈijtëdë (Matewʉ 26:52). Pënaty myëdoodë tyäˈädë ayuk, ta niˈigyë yajtuˈukmujkëdë ja tsojkënë diˈib xëmë ijtp (Kolosʉ 3:14). Per ¿yëˈë yˈandijpy ko Jesus komformaräjt ko jeˈeyë jäˈäy dyajnaymyëwingoonë ets tuˈugyë yˈittët? ¿Waˈan ttuuny diˈibë wiink relijyonk tyuundëp?

Ja fariseety etsë saduseetyë wyintsëndëjk pyajëdijttë Jesus ets axëëk ttuundë axtë tjayaˈoogandë. ¿Ti Jesus tyuun? Ojts tˈanëëmë ja yˈëxpëjkpëty: “Mastuˈuttë. Wiintsëtyëˈë” (Matewʉ 15:14). Extëm nˈijxëm, Jesus kyaj tyuˈukmujky mët yëˈëjëty.

Ko nyajxy kanäk jëmëjt, ta jam Grecia mä ja siudad diˈib xyëˈäjtypy Corinto nyaxkëdaky tuˈugë naymyujkën, mayë nety jamë relijyonk ets wiˈixëmë nety tmëdattë ja kostumbrë. ¿Wiˈixë nety mbäät jyaˈayˈattë ja Dios mëduumbëty? Apostëlë Pablo yajxon ojts tnigajpxy ko kyaj nety mbäät tyuˈukmuktë mëdë wiinkpë mä Diosˈawdattë, duˈun tkujäˈäyë: “¿Tii mbäät nyaymyikyëty ja oyˈäjtën mët ja axëkˈäjtënë? ¿Tii mbäät nandëˈën yˈity ja jäjjën mët ja kootsˈatë?, o ¿waˈan mbäät ja Jesukristë tyiˈigyëˈaty mët ja kaˈoybyë?” Ets ta yˈakjënany: “Tukpëtsëëmduˈuttë es katë mnaymyayëdë mët ja axëk jäˈäyëty” (2 Korintʉ 6:14, 15, 17).

Extëm nˈijxëm, Biiblyë xykyäjpxwijëm parë kyaj nduˈukmujkëm mëdë wiinkpë relijyonk. Per waˈanë net mnayajtëyëty, “¿ets wiˈixën mbäät tuˈugyë nˈijtëm?”.

PËNATY TUˈUGYË JANTSY NAYAˈIJTËDËP

Tuˈugë empresë diˈib kyojpyë jëën tëjkë mëjatypyë, myëdäjtypy mayë tyuumbëtëjk. Per ¿mbäät tkojˈabattë jëën tëjk pën kyaj nyayjaygyukëdë extëm tijaty ttukniwitsëdë?

Ko tyuˈukmuktë kanäägë relijyonk, ¿mbäät nanduˈun nyayjaygyukëdë? Oy jyajënäˈändë nyaywyintsëˈëgëdë ets tuˈugyë tyundë, kyaj nyayjaygyukëdë ti mbäät ttundë parë dyajkëktëkëdë mëbëjkën. Pääty xëmë dyajtsiptäˈäktë mä wiˈix mbäädë jäˈäy jyukyˈattë ets tijaty mbäät tmëbëktë.

Biiblyë myëmiimbyë Diosë yˈanaˈamën diˈib mbäät dyajkëktëkë mëbëjkën ets diˈib xytyukniˈˈijxëm wiˈix mbäät njukyˈäjtëm. Pënaty të tpanëjkxtë Biiblyë kyäjpxwijën kyaj nyekyyajnaywyäˈkxëdë ryelijyonk ets ni ryasë, të tjattë tuˈugyë tyundët. Dios duˈun ojts tnaskäjpxë: “Nyajtëgatsaambyëtsë yˈayuk ja nax käjpn ets nmoˈoyaˈanyëts tuˈugë ayuk diˈib wäˈäts, parë niˈamukë yëˈëjëty tkäjpxtëdë Jyobaa xyëë, ets tmëdundët tuˈugyë Jyobaa”. Diˈib tuˈugyë yaˈijtëdëp, yëˈko tkäjpxtë ja “ayuk diˈib wäˈäts” o ko tkuytyundë Diosë yˈanaˈamën (Sofonías 3:9; Isaías 2:2-4).

Jyobaa tyestiigëty mwoojëdëp parë mnëjkxët mä ja Tëjk mä yˈëxpëktë diˈib wingon mwëˈëmxëp ets këˈëm xyˈixët wiˈixën tuˈugyë yajpäättë (Salmo 133:1).

[Rekuäädrë diˈib mä pajina 27]

¿Jantsy jaˈäjtpë tëyˈäjtën?

Pënaty kyupëjktëp etsë relijyonk tyuˈukmukët, wyinmaytyë ko nituˈugë relijyonk tkamëdatyë tëyˈäjtën, ets ja relijyonk diˈib jënäämp ko myëdäjtypyë tëyˈäjtën, yëˈë net yajjaˈäjtypy mëjwiin kajaa amay jotmay.

Per mä Biiblyë Jyobaa yajtijy “Dios diˈib myëdäjtypyë tëyˈäjtën”, ets këˈëm jyënaˈany ko yëˈë kyaj tyëgatsy (Salmo 31:5; Malaquías 3:6). Nanduˈunë Jesus tˈanmääyë Tyeety: “Ja mˈayuk yëˈë duˈun ja tëyˈäjtën” (Juan 17:17, TNM). Tyäˈädë tëyˈäjtën yëˈë diˈibë Dios të tnigajpxy mä Biiblyë, diˈib xytyukniˈˈijxëm ets xyaˈëxpëjkëm parë nduˈunëm “tëgekyë ja oybyë tsujpë tuunk” (2 Timotee 3:16, 17).

[Dibujë diˈib mä pajina 28]

Kanäägë relijyonk tyuˈukmujktë 2011. ¿Mbäät dyaˈoyëdë yˈamay jyotmay ko tyuˈukmuktë?

Yëˈë të dyakyë dibujë]

Ryetratë Franco Origlia/Getty Images