Nˈoknaymyëjääwmoˈoyëm nixim niyam

Niˈamukë jantsy yajpäädäˈänëm mëdë nmëguˈukˈäjtëm mëdiˈibë mëët nˈëxpëjkëm parë naymyëjääwmoˈoyäˈänëm nixim niyam, per kyaj yëˈë jeˈeyë tˈandijy nduˈukmujkëm mëët. Biiblyë xyˈanëmäˈäyëm parë naymyëjääwmoˈoyëm nixim niyam ets nbudëjkëm ja nmëguˈukˈäjtëm parë dyajkëktëkëdët ja myëbëjkën (Rom. 1:​11, 12). Per ¿wiˈix mbäät duˈun nduˈunëm?

Mëjääwmoˈoy ja mmëguˈuktëjk mët ja mˈääw mˈayuk. Ixtëm nˈokpëjktakëm, ko mgomentaratët mä reunyonk, këdii jeˈeyë mijts mnaynyimaytyaˈagyëty, nigäjpx nimaytyäˈägë Jyobaa, ja yˈAyuk ets ja jäˈäyëty mëdiˈibë mëduunëdëp. Ets oy ko yëˈë xynyigäjpx xynyimaytyäˈägët mët ja mmëguˈuktëjk mëdiˈibë mbäät pyudëkëty parë kyëktëkët ja myëbëjkën.

Mëjääwmoˈoy ja mmëguˈuktëjk mët tijaty mduumpy. Ixtëm nˈokpëjktakëm, waˈan mijts xyajtuny kajaajë mxëëw mdiempë mä Diosë tyuunk oy xywyinguwäˈägë amay jotmay. O mnëjkxy reunyonk sëmäänoty oy të mjantsy yˈanuˈkxë mët ko mëk të mduny ets oy mbëky mˈixyëty.

¿Mëjääwmoopy ja mmëguˈuktëjk mët ja mˈääw mˈayuk ets mët tijaty mduumpy? ¿Mbëjkypyë kuentë nanduˈun wiˈix ja mmëguˈuktëjk mmëjääwmoˈoyëty?