¿Myëdäjttëbë kyëˈëm Biiblyë Jyobaa tyestiigëty?

Jyobaa tyestiigëty të dyajtundë kanäk pëkyë Biiblyë parë të yˈëxpëktë, pes kyaj nety tmëdattë kyëˈëm Biiblyë. Tyam yajtsobattëp ko tmëdattë Traducción del Nuevo Mundo de las Santas Escrituras diˈib jaˈäjtp kanäk ayuk, pes myëmiimbyë Diosë xyëë, mëdëy të yajkäjpxnaxy ets wäˈäts yajjaygyukë.

• Diosë xyëë. Pënatyë Biiblyë yajpëtsëëmdëp kyaj niˈamukë dyajmëjpëtsëmdë Dios diˈib të dyajjäˈäyëty. Extëm nˈokpëjtakëm, ko pyëtsëëmy tuˈugë Biiblyë ja tmëmiiny 70 naxyë jäˈäy xyëë diˈib tuundë, per ni tëgok kyayajkujäˈäyë Diosë xyëë, Jyobaa, diˈib yajjääyë Biiblyë.

  Perë Traducción del Nuevo Mundo myëmiimpy kanäk milˈokë Diosë xyëë ets jap të yajkujayë mäjatyë nety myiny ko tim jawyiin yajjääy këˈam. Nan kyaj të yajkujayëdë xyëë pënaty të tkäjpxnaxtë Biiblyë.

• Mëdëy. Ta Biiblyë mä kyaj mëdëy të yajkäjpxnaxyë ää ayuk extëm tim jawyiin yajjääy këˈam. Extëm nˈokpëjtakëm, mä ayuk Biiblyë duˈun tkäjpxnaxyë Matewʉ 27:​40: “Pën mijtsë dëˈën ja Diosë yˈUˈunk, nayyajnitsoˈogëdë mij këˈëm es jënak kruuskëjxy”. Ko tim jawyiin yajjääy këˈam, yëˈë yajtuundë tuˈugë ayuk diˈib nikajp “kepy”. Ets waˈan duˈun tkujäˈäyëdë mët ko pënaty kyäjpxnäjxtë tmëbëjktë ko Jesus yˈoˈky kruuskëjxy. Per extëm tim jawyiin yajjääy këˈam kyaj duˈun jyënaˈany. Päätyë Traducción del Nuevo Mundo të tkäjpxnaxy “kutëgoˈoyën” extëm tim jawyiin yajjääy këˈam.

• Yajxon yajjaygyukë. Diˈib oy yajkäjpxnäjxp, yëˈë diˈib mëdëy ets diˈib yajxon yajjaygyujkëp. Min nˈokˈijxëm jatuˈugë ijxpajtën. Mä ayuk Biiblyë duˈun të yajkäjpxnaxyë Matewʉ 5:3 “Kuniˈxy ja diˈibëty nayˈëxkäjpëdëp ko pyojpëjäˈäyˈattë”. Perë tyäˈädë tekstë kyaj yajxon yajjaygyukë. Päätyë Traducción del Nuevo Mundo duˈun tkäjpxnaxy: “Jotkujk yajpäättë pënaty jyäˈäwëdëp ko yajtëgoyˈäjttëbë Dios”.

Traducción del Nuevo Mundo mëj dyajnaxyë Diosë xyëë, mëdëy të yajkäjpxnaxy ets yajxon yajjaygyukë, per kyaj yëˈëyëty jeˈeyë, nan mbäädë jäˈäy tˈaxäjë namayˈäjtën. Ets mbäädë net miyonkˈam tkäjpxtë Biiblyë mä yˈayuk oy tkamëdattë meeny sentääbë parë tjuytyët.