¿Tyukˈaguanëˈäjttëbë Jyobaa tyestiigëty parë jäˈäy dyajtëgatsëdë ryelijyonk?

Kyaj, kyaj pën ttukˈaguanëˈattë. Mä rebistë Diˈib Xytyukˈawäˈänëm jyënany: “Axëëk ko jäˈäy yajtukˈaguanëˈaty parë dyajtëgatsëdë ryelijyonk”. Min nˈokˈijxëm tiko kyaj yajtukˈaguanëˈatyë jäˈäy:

• Jesus ninäˈä tkatukˈaguanëˈäjtyë jäˈäy parë tkupëkët tijaty yëˈë tukniˈˈijxë. Yëˈë nyijäˈäwëbë nety ko niwaanë ja jäˈäy diˈib myëdoowˈitandëp (Matewʉ 7:​13, 14). Tëgok ojts näägë yˈëxpëjkpëty myastuˈudëdë mët ko kyaj tkupëjktë ti tëgok tukniˈˈijxë. Jesus nyasˈijxë parë nyëjkxtët, kyaj aguanë ojts dyajwëˈëmdë (Fwank 6:​60-​62, 66-​68).

• Jesus tyukniˈˈijxë ja yˈëxpëjkpëty ko kyaj mbäät ttukˈaguanëˈattë jäˈäy parë dyajtëgatstëdë myëbëjkën. Diˈibë nety mbäät ttundë, yëˈë tˈëxtäˈäytyëdë jäˈäy diˈib myëdowandëp (Matewʉ 10:​7, 11-​14).

• Kyaj tsyobääty ko jäˈäy yajtukˈaguanëˈaty dyajtëgatsëdë ryelijyonk. Dios tsyojkypy etsë jäˈäy myëdunëdët amumduˈukjot, kyaj mët ko yajtukˈaguanëˈaty (Deuteronomio 6:​4, 5; Matewʉ 22:37, 38).

¿Mëktaˈagyë Jyobaa tyestiigëty dyajtëkëyäˈändë jäˈäy mä ryelijyonk?

Kyaj. Nmënëjkxtëbëtsë oybyë ayuk diˈib yajpatp mä Biiblyë mä “tëgekyë naxwinyëdë”. Käjpxwäˈkxtëbëts oytyim määjëty ets tëjkmdëjkm extëmë Biiblyë jyënaˈany (Apostʉlʉty o Hechos 1:8; 10:42; 20:20). Per mayë jäˈäy jyënäˈändë kots ndukˈaguanëˈattë nrelijyonk duˈun extëm yajniwäämbajtë pënaty tëëyëp ojts tpanëjkxtë Kristë (Apostʉlʉty 18:12, 13). Per kyaj tyëyˈäjtënëty extëmëts nyajniwäämbattë. Pes tuˈuk tuˈugë jäˈäy myëdäjtypyë madakën parë twinˈixët ti tyunaampy ets nwintsëˈkëdëbëts wiˈix wyinmaytyë. Diˈibëts jeˈeyë nduundëp yëˈë etsë jäˈäy tnijawëdët wiˈixë Biiblyë jyënaˈany parë këˈëm twinˈixëdë ryelijyonk.

Kyajts ndukˈaguanëˈatäˈändë jäˈäy parë dyajtëgatstëdë ryelijyonk. Nan kyajts nyajtundë relijyonk parë myëjwindëkëdë politikë ets kyajts nˈawanëdë naybyudëkë o meeny sentääbë parë jäˈäy tyëkëdët mätsë nrelijyonk. Ëëtsëty, kyajts nduˈunˈattë extëm mayë jäˈäy diˈib naytyijëdëp Kristianë, per kyaj ttundë diˈibë Kristë ttukniˈˈijxë.

¿Myëdäjtypyë madakën tuˈugë jäˈäy parë këˈëm dyajtëgatsëdë ryelijyonk?

Myëdäjtypy. Biiblyë myaytyakypy mayë jäˈäy diˈib wyinˈijxtë tˈawdatäˈändë Diosë tëyˈäjtënbë ets kyaj ojts tpanëjkxtë ja relijyonk diˈibë netyë tyääk tyeety tyukˈijtëdëp. Duˈun ttundë Abrahán, Rut, näägë jäˈäy diˈib Atenas etsë apostëlë Pablo (Josué 24:2; Rut 1:​14-​16; Apostʉlʉty 17:22, 30-​34; Galasyʉ 1:​14, 23). Perë Biiblyë nan jënäämp ko jäˈäy nan myëdäjttëbë madakën ets ttukpëtsëëmduˈudëdë relijyonk diˈibë Dios kyupëjkypy (1 Fwank 2:​19).

Declaración Universal de Derechos Humanos, jyënaˈany ko ONU yëˈë yajnaxkëdakypyë anaˈamën abëtsemy nyaxwinyëdë tijaty madakënë jäˈäy myëdäjttëp ets jyënaˈany ko niˈamukë “nmëdäjtëmë madakën parë nyajtëgäjtsëmë relijyonk o tijaty nmëbëjkëm”. Nan yajnaxkëdakypyë anaˈamën mä jyënaˈany ko niˈamukë jäˈäy tmëdattë madakën parë tpayeˈeytyët tijaty, tkupëktët ets tnimaytyäˈäktët tijaty nyijäˈäwëdëp ets wiˈix wyinmaytyë. Tyäˈädë nan yëˈë yˈandijpy, tnimaytyäˈäktët tijaty jyäjttëp mä ryelijyonk.a Per nan wyingutsëˈëgëdëp ja madakën diˈib myëdäjttëbë wiink jäˈäy parë tnitsiptundët ja myëbëjkën ets tjëjpkudijëdët ja nrelijyonkˈäjtëm.

¿Kyaj nety yajwintsëˈëgë ja familyë ko nyajtëgäjtsëmë relijyonk?

Kyaj mbäät duˈun njaygyujkëm. Pesë Biiblyë xyˈanmäˈäyëm ets nwintsëˈkëm niˈamukë jäˈäy oy diˈibë relijyonk ttukˈitëdët (1 Peedrʉ 2:​17) Jyobaa tyestiigëty nan myëmëdoowdëbë tyäˈädë anaˈamën ko jyënaˈany yajwintsëˈëgëdë tääk teety, oy ttukˈitëdë wiink relijyonk (Éfesʉ 6:​2, 3).

Per kyaj niˈamukë jäˈäy duˈun wyinmaytyë extëmë Biiblyë jyënaˈany. Extëm nˈokpëjtakëm, tuˈugë toxytyëjk diˈib yaˈk pajt Zambia jyënaˈany: “Mätsë nnax ngäjpn ko jäˈäy dyajtëgatsyë ryelijyonk, duˈunxyëp [...] extëm ko kyaj fyamilyë tnekyˈixäˈäny ets ja nyax kyäjpn”. Perë tyäˈädë toxytyëjk ko yaˈkpëtsëëmy, ta tˈëxpëjktsondakyë Biiblyë mëdë Jyobaa tyestiigëty ets dyajtëgäjtsyë ryelijyonk. Duˈun jyënany: “Kanäkˈokëtsë ndääk ndeety xyˈanmääytyë ko xyˈaxëkˈijxtëbëtsë nety ets ko axëëgëtsë nety nyajnayjawëdë. Mëkëts njäˈäwë, pes oyëtsë nety mëët nˈittët ets ntsojktëbëtsë nety. [...] Kots nmëmëdoyë Dios ets kots kyaj nbanëjkxyë kostumbrë diˈibë relijyonk tyuundëp kyaj yëˈë tˈandijy ko kyajts nˈixäˈänyë nfamilyë”.