¿Näägë Diosë xyëëw tmëdaty?

Biiblyë duˈun tnimaytyaˈaky

Dios jeˈeyë tmëdaty tuˈugë xyëëw. Mä ayuk ebreo ja yajjäˈäy יהוה (YHWH) ets ayuk ja të yajkäjpxnaxy “Jyobaa”.a Dios duˈun jyënany mët yëˈëgyëjxm ja kyugajpxy Isaías: “Ëjtsën Jyobaa. Duˈuntsën nxëwˈaty” (Isaías 42:8). Mä ja nekyxyaatsy mëdiˈibë tëëyëp yajjäˈäy, ja yajkujäˈäyë Diosë xyëëw naa 7,000 okën. Kyaj duˈun kanäkˈok yajkujäˈäyë wixatyë Dios yajtijy etsë wiink jäˈäyë xyëëw.

¿Myëdäjtypyë Dios wiinkpë xyëëw?

Mä Biiblyë jeˈeyë jap tnigajpxy tuˈugë Diosë xyëëw, per miimp kanäk pëky wiˈix yajtijy. Tyää yajnigäjpxäˈäny kanäk pëky wiˈix yajtijy ets yëˈë xytyukˈijxëm wiˈixë Jyobaa jyaˈayˈajty.

Wiˈix yajtijy	Mä myiny mä Biiblyë	Wiˈix nyikejy
Alá	(Kyaj mää)	Alá ja myiny mä ayuk árabe ets ja nyikejy Dios. Alá kyaj yëˈëjëty tuˈugë xëëw, miimp mä Biiblyë mëdiˈibë árabe ets yëˈë yˈandijpyë Dios, yajtuundëp nanduˈun mä wiinkpë ayuk.
Dios	Génesis 1:1	Yëˈë yˈandijpy oytyim tiijëty mëdiˈibë yaˈˈawdäjtp o mëdiˈibë kumëjääw. Mä ayuk ebreo ʼElohím yëˈë yˈandijpy ko Jyobaa nitëjkëbë mayˈäjt wintsëˈkën ets yajmëjkumayët.
Diosë kunuˈkxypyë	1 Timotee 1:11	Ko yëˈë tuˈugë Dios mëdiˈibë agujk jotkujk yajpatp (Salmo 104:31). Mbäät nanduˈun yajkäjpxnaxy “Diosë jotkujkpë” (Traducción del Nuevo Mundo).
Dios mëdiˈibë nyidiosˈäjtypy ja wiink diosëty	Deuteronomio 10:17	Ko yëˈë niˈigyë ja kutujkën myëdäjtypy, ets kyaj dyuˈunëty “diosëty mëdiˈibë nitii tkatsoowˈattë” (Isaías 2:8).
Ëjtsë duˈun mëdiˈibë ëjtsˈäjtpën	Éxodo 3:14, (Mʉgoxpʉ ja̱ noky mʉdiˈibʉ jyaayʉn Moisés)	Mä ayuk ebreo yëˈë yˈandijaampy ko Dios mbäät tijaty dyajtuuny dyajjatyëty ti tyuknibëjktakëp. Ko duˈunë Dios nyaynyimaytyaˈagyëty, yëˈë xytyukˈijxëm wiˈixën nyikejˈyë xyëëw, Jyobaa, mëdiˈibë miimp mä bersikulo 15 (Éxodo 3:15).
Kaats	Salmo 18:2, 46	Ko jam mbäät nnayuˈtsëm ets ko yëˈë mëdiˈibë mbäät xyajnitsokëm.
Mëdiˈibë jantsy këjxm	Salmo 47:2	Ko yëˈëyë tuˈuk mëdiˈibë mëj ijtp.
Mëdiˈibë jantsy wäˈäts	Proverbios 9:10	Ko nipën duˈun kyawäˈätsëty extëm yëˈë.
Mëdiˈibë myëdoowˈijtypyë nuˈkxtakën	Salmo 65:2	Ko myëdoowˈijtypyë nuˈkxtakën ko nduˈunëm amumduˈukjot.
Mëdiˈibë tëgokyë mëkˈäjtën myëdäjtypy	Diˈibʉ Jatanʉp o Apocalipsis 1:8	Ko nipën duˈun mëkˈäjtënë tkamëdaty extëm yëˈë.
Mëdiˈibë tijaty të dyajkojy	Isaías 40:28	Ko yëˈë tijaty yajkojtääy.
Mëjjäˈäy mëdiˈibë tamyëm jyukyˈäjnë	Daniel 7:9, 13, 22	Ko kyaj tmëdäjtyë tsyonëˈk tsyondakën, ets ko tamyëmë jyukyˈaty määnëmë nety ti kyakaˈty o määnëmë nety pën kyajukyˈaty (Salmo 90:2).
Pastoor	Salmo 23:1	Ko kyuentëˈäjtypy pënaty mëduunëp.
Rey winë xëëw winë tiempë	1 Timotee 1:17	Ko yëˈë mëdiˈibë myëdäjtypy ja këjxmbë kutujkën ets xëmë tmëdatäˈäny.
Tatë	Matewʉ 6:9	Ko yëˈë mëdiˈibë xyajjukyˈäjtëm.
Tuˈtspojtspë	Isaías 64:8	Ko myëdäjtypyë kutujkën mä nax käjpn ets mä naxwinyëdë jäˈäy, duˈun extëmë ja tuˈtspojtspë tkëˈamˈaty ja moˈonts (Romanʉs 9:20, 21).
Wintsën	Salmo 135:5	Mëdiˈibë wintsënˈäjtp, mä ayuk ebreo yajtijy ʼAdhóhn ets ʼAdhoním.
Wintsën mëdiˈibë yajkutujkp	Génesis 15:2	Ko yëˈë myëdäjtypy niˈigyë ja kutujkën. Mä ayuk ebreo yajtijy ˈAdhonái.
Yajnitsokpë	Isaías 45:21	Ko yaˈˈawäˈätspëtsëëmp mä ayoˈon, oˈkën etsë kutëgoˈoyën.

¿Tiko jyëjpˈamëty nnijäˈäwëm ti Dios txëwˈaty ets ndukmëgäjpxëmë xyëëw?

Seguurë ko Jyobaa tsyojkypy ets nnijäˈäwëm ti txëwˈaty, pääty jantsy kanääk ok yajkujäˈäyë mä Biiblyë (Malaquías 1:11).
Jesukristë, ja Diosë yˈUˈunk, ojts dyaˈixyëty ko jëjpˈam etsë Dios xyëëw nnijäˈäwëm. Extëm nˈokpëjktakëm, ko tmënuˈkxtakyë Jyobaa, ta tˈanmääy: “Waˈanë mxëëw twäˈätsy” (Mateo 6:9, Traducción del Nuevo Mundo [TNM]; Juan 17:6, TNM).
Pënaty nyijäˈäwëbë Diosë xyëëw ets tyukmëgäjpxtëp ta mëët ëgäˈäny nyaymyaaybyëkëdë (Salmo 9:10; Malaquías 3:16). Ets ko mëdë Dios nyaymyayëdët mbäädë net ttuny extëm twandaˈaky: “Kom xytsyojkpëts, nyaˈˈawäˈätspëtsëmaambyëts. Nguwäˈänaambyëts mët ko nyijäˈäwëbëtsë nxëëw” (Salmo 91:14).
Biiblyë jyënaˈany: “Ta nimayë dios esë wintsënëty tsäjpotm es naxwiiny” (1 Korintʉ 8:5, 6). Per ko yajnigajpxy ja Diosë xyëëw Jyobaa, ta nnijäˈäwëm ko yëˈëyë tukpäjk ja Dios mëdiˈibë tëyˈäjtën (Salmo 83:18).

a Näägë jäˈäy mëdiˈibë yajxon jyäjttëbë ebreo ja tkäjpxnaxtë “Yahweh” o “Yahvé”.