¿Yëˈë Dios yajtuunë evolución parë ojts dyajkojy tukëˈëyë mëdiˈibë ja jukyˈäjtp?

Biiblyë duˈun tnimaytyaˈaky

Biiblyë jyënaˈany ko kyaj, ets ko Dios yëˈë ojts dyajkojy ja naxwinyëdë jäˈäy, kanäk nax ja jëyujk animal etsë ääy ujts (Génesis 1:12, 21, 25, 27; Diˈibʉ Jatanʉp o Apocalipsis 4:11). Nanduˈun jyënaˈany ko niˈamukë naxwinyëdë jäˈäy jam ntsoˈondäˈäyëm mä Adán ets mä Eva (Génesis 3:20; 4:1). Mä Biiblyë nimää kyajënäˈäny ko Dios yëˈë yajtuunë evolución parë ojts dyajkojtäˈäy tijaty jaa jukyˈäjtp. Per kyaj net tjëjpkugäjpxë ko ëxpëkyjyaˈaytyëjk tˈëxpëjkpëtsëmdë ko mbäädë jëyujk animal tyëgatsyë ryasë o ko ääy ujts mbäät wanaty tyëgatsy.

• ¿Wiˈix näägë jäˈäy tmëbëktë?

• Extëmë jäˈäy tmëbëktë evolución, ¿tuˈugyëp extëmë Biiblyë jyënaˈany?

• Ets ko tuˈugë jëyujk o ääy ujts yajmënëjkxy wiinktsoow ets tyëgatsy wanaty, ¿yëˈë yˈandijpy ko yëˈë të tyunyë evolución?

¿Wiˈix näägë jäˈäy tmëbëktë?

Pënaty myëbëjktëp ko Dios yëˈë yajtuunë evolución parë ojts dyajkojy tijaty jukyˈäjtp yä naxwiiny, kyaj tuknax tnimaytyäˈäktë wiˈixënë Dios ttuuny. Näägë jäˈäy tmëbëktë ko Dios yëˈë yajtuumpy mëdiˈibë tyijtëp selección naturala parë jyaˈˈatyë jukyˈäjtënë yä naxwiiny.

Ta nanduˈun pënaty myëbëjktëp:

• Ko tukëˈëyë tijaty jukyˈäjtp yä naxwiiny jeˈeyë tmëdattë tuˈugë tyëëm yˈääts mä tsyoˈondääytyë.

• Ko tuˈugë jëyujk o tuˈugë ujts mbäät wanaty wanaty tyëgatsy ets jyëmbijnët wiink ujts o wiink jëyujk.

• Ko Dios yëˈë duˈun yajtuun yajjäjtëp.

Extëmë jäˈäy tmëbëktë evolución, ¿tuˈugyëp extëmë Biiblyë jyënaˈany?

Koxyëp tyëyˈäjtënëty extëmë jäˈäy tmëbëktë evolución, kyajxyëp tyëyˈäjtënëty extëmë Génesis tnimaytyaˈaky mä wiˈix tijaty kyojtääy. Perë Jesus tëyˈäjtënë dyajnäjxy wiˈixë Génesis jyënaˈany (Génesis 1:26, 27; 2:18-24; Matewʉ 19:4-6). Biiblyë jyënaˈany ko mä Jesus kyakëdaˈakynyëm yä naxwiiny, jamë nety tsyëënë tsäjpotm ets ko yëˈë ojts tpudëkë Dios parë dyajkojtääy “tëgekyë diˈibë jaˈäjtp” (Fwank 1:3). Pääty kyaj tyuˈugyë mëdë Biiblyë ko jäˈäy jyënäˈändë ko Dios yëˈë yajtuunë evolución parë ojts dyajkojtäˈäy tijaty jukyˈäjtp.

Ets ko tuˈugë jëyujk o ääy ujts yajmënëjkxy wiinktsoow ets tyëgatsy wanaty, ¿yëˈë yˈandijpy ko yëˈë të tyunyë evolución?

Biiblyë kyaj tnimaytyaˈaky nuˈunën mbäät tyëgatsy ja jëyujk animal o ja ääy ujts, o pën mbäät jyaˈˈaty kanäk nax. Ets ni kyajënäˈäny ko kyaj mbäät tyëgatsyë jëyujk animal etsë ääy ujts ko muum wiinktsoow yajmënëjkxët o ko myëj myayët. Pääty ko näägë jäˈäy tˈixtë tyëgatsy wanaty ja ääy ujts o ja jëyujk animal, ta jyënäˈändë ko yëˈë të tyunyë evolución. Per ko nˈokwinmäˈäyëm, jeˈeyën wanaty tyëgatsy, kyaj pyëtsëmyë wiink ujts o wiink jëyujk.