Jesús jyukypyeky

¿MNIJÄˈÄP pënë tyäˈädë toxytyëjk etsë tadë nimajtskpë yetyëjk? Tyäˈädë toxytyëjk yëˈë Jesusë myëtnaymyaayëbë, diˈib xyëˈäjt Mariiʉ Magdalenʉ. Etsë tadë yetyëjkëty diˈibë wyit poop yëˈë anklës. Mariiʉ tap kyuˈixë jutoty mä ja Jesusë nyiniˈx ojts yajpëjtaˈaky, ¡per kyaj jap mä ja Jesusë nyiniˈx! ¿Pën ojts tmënejxy? Min nˈokˈijxëm.

Të netyë Jesús yˈoˈknë, ko ja saserdotëty ojts tˈanëëmëdë Pilatʉ: Mä netyë Jesús jyukyˈaty, jyënany ko jyukypyëkäˈäny kyumdëgëk xëë. Pääty kaxë jäˈäy diˈib nëjx tkuentˈatyë tadë jutˈää. ¡Netë tadë yˈëxpëjkpëty kyaj tmënëjxtëdë Jesusë nyiniˈx ets jyënäˈändët ko të pyëdeˈeky! Ta ja Pilatʉ tˈanmääytyë ja saserdotëty ets tkaxtëdë soldäädë ets nëjx tkuentˈattë ja jutˈää.

Tyëgëk xëëbë netyë Jesús yˈooky, ko tuˈugë Jyobaa yˈanklës kyëxeˈky ajotkumonë jam jutˈagëˈëy ets dyajjëgeky ja tsää diˈibë nety ja jut yˈagëˈëyˈajtypy. Ja soldäädëtëjk ta jyantsy tsyëˈkëdë ets ojts wyëˈëmdë extëmë oˈkpë. ¡Ta ok, ko kyuˈijxëdë jutoty kyaj nety jap mä ja Jesusë nyiniˈx! Ta ojts nyëjxtë käjpnoty ets ttukmëtmaytyaktë ja saserdotëty. ¿Mnijäˈäp ti tyuundë ja saserdotë axëkjäˈäyëty? Ojts tmëjuytyë ja soldäädëty ets yˈandäˈäktët ta tˈanmääytyë. Jënäˈändë ko yëˈë Jesusë yˈëxpëjkpë të tmënëjxtë Jesusë nyiniˈx mä nety mäˈädë.

Të nety ja soldäädëtëjk nyëjxtë mä ja wintsëndëjk. Ko myiindë mä ja jut näägë toxytyëjk diˈibë netyë Jesús myëtnaymyaayëbëˈäjtypy. ¡Ta tˈijxtë ko tukwäˈäts ja jut! Ets ajotkumonë tˈijxpattë majtskë anklës diˈibë wyit jantsy tëˈxp. Ta yajtëëjëdë: ¿Tiko yä xyˈëxtäˈäytyë Jesús? Ja Jesús të ja jyukypyeky. Nëjxtë tyamyë ets nëjx awanëdë yˈëxpëjkpëty. Ta pëyeˈegyë ojts jyantsy nyëjxtë. Per tuˈääjy ta tuˈugë yetyëjk ojts pyäädëdë. ¿Mnijäˈäp pënë tyäˈädë yetyëjk? ¡Yëˈë ja Jesús! Ta yˈanmääyëdë: Nëjxtë ets awanëtsë nˈëxpëjkpëty.

Ko ja toxytyëjkëty tˈawäˈänëdë ja Jesusë yˈëxpëjkpëty ko të Jesús jyukypyeky ets ko të tˈixtë, kyaj tmëbëkandë. ¡Peedrʉ mëdë Fwank ta pëyeˈegyë ojts nyëjxtë mä ja jut ets këˈëm tˈixandë, per tukwäˈäts ja jut tpattë! Ta ojts jyëmbijnëdë, perë Mariiʉ Magdalenʉ ta ojts wyeˈemy. Ets ja mä kyuˈijxë jutoty ets tˈijxy nimajtskë anklës.

¿Mnijäˈäp wiˈix jyajty ja Jesusë nyiniˈx? Yëˈë Dios ojts dyajtëgoy. Dios kyaj dyajpëdeˈkyë Jesús mët ja nyiniˈx kyëbäjk diˈibë nety myëdäjtypy. Jembyë nyiniˈx myoojy diˈib kyaj yaˈixy, dëˈën extëmë anklësëtyë nyiniˈx. Per parë ja yˈëxpëjkpëty yˈixëdët ko yëˈë të jyukypyeky, ta nyaytyukˈijxë mëdë nyiniˈx kyëbäjk diˈib yaˈijxp.