Jesús kyëxeˈeky tëgoty mä ja tëjk adiky

KO JA Peedrʉ mëdë Fwank ojts tsyoˈonëdë mä netyë Jesusë nyiniˈx të yajpëjtaˈaky, ta Mariiʉ ojts wyeˈemy naytyuˈuk. Ta tyëjkë jëëjy yaxpë. ¡Ta kyuˈijxë mä ja jut ets tˈijxy nimajtskë anklës! Extëm yaptsoo të xyˈixy mä dibujë. Ta yajtëëjëdë: ¿Tiko mjëˈëjy myaˈaxy?

Mariiʉ ta yˈatsoojy: Mët ko të tmënëjxtëtsë nWintsënë nyiniˈx ets kyajts nijawë mä të tpëjtäˈäktë. Ta wyäˈkëmbijty ets tˈijxy tuˈugë yetyëjk. Ta yajtëëjë: ¿Pën mˈëxtaapy?

Mariiʉ ta wyinmääjy ko tadë yetyëjk yëˈë nëgamˈijxpë, ets ko waˈan yëˈë të tmënejxyë Jesusë nyiniˈx. Pääty tˈanmääjy: Pën mijts të xymyënejxy anmaagyëts mä të xypyëjtaˈaky. Perë tyäˈädë yetyëjk yëˈë Jesús, jeˈeyë ko Mariiʉ kyaj tˈëxkajpy. Per ko ojts tyukmëgajxyëtyë xyëë, ta tnijäˈäjë ko yëˈë Jesús. Ta pëyeˈegyë ojts jyantsy nyejxy ets tˈanmääjy ja ëxpëjkpëty: ¡Tëts nˈixy ja nWintsënˈäjtëm!

Ok tamë nety nimajtskë Jesusë yˈëxpëjkpëty nyëjxtë Emaús, ko tuˈugë yetyëjk ojts pyuyoˈoyëdë. Jantsy määjy täjtëbë nety ko ja Jesús të yˈooky. Per ja yetyëjk ta tyukmëtmaytyakëdë tijaty diˈib mä Biiblyë ets ta oy nyayjäˈäjëdë. Ta ko nety jam pyoˈxtë mä kyayäˈändë, ta tˈëxkäjptë tyäˈädë yetyëjk ko yëˈë Jesús. Perë Jesús ta dëˈënyë tyëgoojy, ta ja nimajtskpë ëxpëjkpë jyëmbijttë Jerusalén ets tˈawanëyäˈändë ja apostëlëty.

Ta netë Jesús nyaytyukˈijxë Peedrʉ. Ta ko ja Peedrʉ tˈawäˈänëdë wiingatypyë apostëlë, ta jotkujk nyayjäˈäjëdë. Ta ja nimajtskpë ëxpëjkpë diˈib jëmbijttë Jerusalén, jyäjttë jam ets tpattë ja apostëlëty. Ta tˈanmääytyë ko të tˈixtë tuˈääyë Jesús. Tapë nety dëˈën tmaytyäˈäktë ko, ¿mnijäˈäp ti tuun jäjtë?

Ok këxˈix mä dibujë. Yëˈë jamë Jesús të tyëkë tëgoty, oyë nety ja tëjkˈää täˈtspeky yˈadikyëty. ¡Extëm ojts tyim xondaknëdë ja yˈëxpëjkpëty! ¡Ets jantsy jotkujk nyayjäˈäjëdë mä tadë xëë! ¿Mbäät xyjamyetsy näk ok kujkë Jesús kyëxeˈeky? Mëgoxk ok, ¿këdii?

Ja apostëlë Tomás kyaj nety jam ko Jesús kyëxeˈky. Pääty ja ëxpëjkpëty yˈanmääyëdë: ¡Tëts nˈixtë ja nWintsënˈäjtëm! Perë Tomás ta jyënany ko jaanëm tmëbëkët ko këˈëm tˈixët. Wenë kyumduktujk xëë, tamë nety jatëgokë ëxpëjkpëty mëdë Tomás mä tuˈugë kuartë kuniˈadiky. Ko ajotkumonë Jesús kyëxeˈky. Taanëmë Tomás tmëbejky.