Ëxpëjkën 9

Yëˈë Dios mëduumbëty tsojkëp nyaymyëdatëdët wäˈäts

¿Tiko mbäät naymyëdäjtëm wäˈäts mët oy tyim tiijëty? (1)

¿Tijaty kajxy maytyaˈaky diˈib kyaj wyäˈätsëty mbäät njëjpkudijëm? (6)

1. Jyobaa Dios mëk wäˈätsëˈë. Pääty ttsoky ets ninëˈënë jäˈäy myëdunëdë nyaymyëdatëdët wäˈäts, tmënëjxëdë jyukyˈäjtënë wäˈäts tmëdatëdë jyot wyinmäˈäny wäˈäts, nyiniˈx kyëbäjk etsë jyënot tyëgot (1 Peedrʉ 1:16). Mëjää mëk yajtunääm ets naymyëdäjtëm wäˈäts Dios windum. Njukyˈäjtëm tyam mä jyaˈatyë axëkˈäjtën. Nandëˈën ko nbokyjyaˈayˈäjtëm xymyëmadäˈägäˈänëmë axëkˈäjtën. Per kyaj mbäät naygyëyäjkëm.

2. Wäˈätsˈäjtën mä nDiosmëduˈunëm: Pën ntsojkënyëˈäjtëm nmëdunäˈänëmë Jyobaa, kyaj mbäät nmëbëjkˈadëtsëmë tyukniˈijxënë tadë relijyonk diˈib kyaj tyëyˈäjtënëty ni ngatuˈunˈadëtsëmë kyostumbrë. Tsojkëp ndukpëtsëˈëmdutëmë tadë relijyonk diˈib kyaj tyëyˈäjtënëty ets ni ti naybyudëkë ngamoˈoyëm (2 Korintʉ 6:14-18; Diˈibʉ Jatanʉp 18:4). Tyam ko të nijäˈäjëmë Diosë tyëyˈäjtën, tsojkëbë net naygyuentˈäjtëm ets këdiibë jäˈäy xywyinˈëˈënëm diˈib kyaj tyukniˈixëdë tëyˈäjtën (2 Fwank 10, 11).

3. Wäˈätspë jukyˈäjtën: Jyobaa tsyojkypy ets pënaty mëduunëdëp jyaˈayˈattë oy, waˈan tim näˈäty (1 Peedrʉ 2:12). Yëˈë yˈijxy tyuumpy tëgekyë diˈib ëtsäjtëm nduˈunëm, axtë diˈib ayuˈutsyë nduˈunëm (Ebreeʉsʉty 4:13). Kyaj yˈoyëty ko jäˈäy yˈity tsyëënë oy tyim pënëty mëët ets nan kyaj yˈoyëty nduˈunëmë wiingatypy axëkˈäjtën diˈib jaˈäjtp yä Naxwiiny, tsojkëp njëjpkudijëtyaˈayëm (1 Korintʉ 6:9-11).

4. Wäˈätsˈäjtën mä jot winmäˈäny: Pën nmëdäjtëmë jot winmäˈäny wäˈäts ta nëjx nduˈunëm diˈib ti oy (Filipʉs 4:8). Per pën yëˈë xëmë nwinmäˈäyëm diˈib axëëk, ta nëjx nduˈunëmë axëkˈäjtën (Matewʉ 15:18-20). Tsojkëp njëjpkudijëmë ixy jawë o noky diˈib ngäjxëm diˈib mbäädë jot winmäˈäny dyaˈaxëëgë. Pën nˈëxpëjkëmë Diosë yˈää yˈAyuk, ta nyajtuktujkëmë jot winmäˈäny mëdë wäˈätsˈäjtën.

5. Wäˈätsˈäjtënë nikëjxy këbajky ets jënoty tëgoty: Kom ëtsäjtëm yëˈë Dios nmëduˈunëm tsojkëp naymyëdäjtëm wäˈäts, nmëdäjtëm wäˈätsë niniˈx këbäjk etsë wit nijam. Nan tsojkëp ngëbujëm ko nyoˈoytyaˈay njëdijtäˈäyëm, ko ngayäˈänëm o ko nixäjëyäˈänëmë jeˈxy peky. Pën mä ntsënäˈäyëm kyaj ti jëdijtakn o pëtsëëmdakn, tsojkëp nitäjëmë tadë axëkˈäjtën (Deuteronomio 23:12, 13). Pes ko wäˈäts ntsënäˈäyëm yëˈë dëˈën yaˈoyˈäjt yajmëkˈäjtp. Pënatyë Dios myëduundëp tsojkëp tmëdattëdë jyëën tyëjk wäˈäts, tpiw tmäˈkxtët tijaty myëdäjttëp, dëˈën jyënoty tyëgoty ets jyënwiiny tyëjkwiiny. Tsojkëp nyigëxëˈëgët mä nax käjpn ko wäˈäts tsyëënëdë.

6. Kajxy maytyaˈagyë wäˈätspë: Yëˈë Dios mëduumbëty tsojkëp xëmë kyäjx myaytyäˈäktët tëyˈäjtën. Diˈibë jäˈäy andakp kyaj tyëkëyaˈany mä Diosë yˈAnaˈamënë (Éfesʉ 4:25; Diˈibʉ Jatanʉp 21:8). Pënaty Dios mëduundëp kyaj kyoˈoyˈëw kyoˈoygyäjxtë. Kyaj tmëdoˈittë anëmaytyaˈaky diˈib mëdë koˈoygyajxy ets ni kyakuyxyiˈiktë, nigëxëˈktëp ko tmëdundë Dios mëdë kyäjx myaytyakënë wäˈätspë dëˈën mä tyundë, mä yˈeskuelëˈattë ets mä myëjëmbäˈä myëdëjkpäˈä (Éfesʉ 4:29, 31; 5:3).

[Letrë diˈib miimp mä dibujë mä pajina 19]

Yëˈë Dios mëduumbëty tsojkëp nyaymyëdatëdët wäˈäts mët oy tyim tiijëty