¡Wingoomp ja jukyˈäjtënë mä ja Naxwinyëdë jyëmbitäˈäny tsuj!

Tadë axëkˈäjtënë diˈib tyam tuun jäjtëp yä Naxwiiny yëˈë yaˈijxëp ko wingoomp ja jukyˈäjtënë mä ja it lugäär jyëmbitäˈäny tsuj. Biiblyë ojts tnaskäjxë tëëyëp ko nˈixäˈänëm tsyiptäˈäganë tiempë ko nety tyim wingoonë tyäˈädë jukyˈäjtënë. Ets tyam yëˈë ndukjukyˈäjtëmë tadë tiempë. Tyäˈädë dëˈën diˈibë Biiblyë myaytyak ko tyunäˈäny jyatäˈänyëty:

Mëjatypyë tsip. «Mët ko tsyiptunäˈändë nasiongëty nixim niyam esë anaˈambëty nandëˈën.» (Matewʉ 24:7.) Diˈib yajnaskäjxë tëëyëp tadën tyuny jyatyëty. Mä tsyondakyë jëmëjt 1914 ja kujk tyunyëty majtskë tsipë mëjatypyë ets kanäägë tsipë mutskatypyë. Miyonkˈamë jäˈäy të jyantsy yˈooktë mä tadë tsip.

Päˈäm diˈib mëjwindëjkënëp. Jyaˈatäˈäny «mäjatyë käjpn [...] ja mëkpäˈäm» (Lukʉs 21:11). ¿Të yˈadëyë tyäˈädë ijxtäˈänënë? Të. Miyonkˈamë jäˈäy kujk jyantsy ooktë mëdë päˈäm diˈib mä korasoon, kanser, tëˈëtsˈoj, paludismë, siidë etsë wiingatypyë päˈäm.

Tyëgoyˈatyë jeˈxy peky. Abëtsemy Nyaxwinyëdë ta jäˈäyëty diˈib kyaj tmëdaty nëgoo tii jyëˈxëp. Jëmëjt jëmëjt miyonkˈamë jäˈäy yuuˈooktë. Tyäˈädë yëˈë ja tuˈugë ijxtäˈänënë ko wingoombëdën ja jukyˈäjtënë mä ja it lugäär jyëmbitäˈäny tsuj. Yëˈë Biiblyë jyënaˈany: «Es myinäˈänyë [...] mëk yuu» (Markʉs 13:8).

Mëk ujx. «Es myinäˈänyë mëk [...] ujxëty oy myääty.» (Matewʉ 24:7.) Tyäˈädë nan tadën yˈadëy mä ntiempëˈäjtëm. Pes, mä tsyondakyë jëmëjt 1914 ja kujk yˈooktë jäˈäy tuk miyonk naxy mëdë mëk ujx.

Axëkjäˈäy. Yëˈë jäˈäyëty yˈitanëdë meeny yˈook ets kyaj pën tneky tsyokäˈändë. Yëˈëyë yˈëxtäˈäyandëbë xondakënë mä jyapäätyëty tˈawdattëdë Dios. Yëˈë uˈunk ënäˈkëty kyaj tneky myëmëdowäˈändë tyääk tyeety (2 Timoté 3:1-5). ¿Këdii dëˈën tyamë jäˈäy jyukyˈattë? Kyaj twintsëˈëgëdë Dios ets jeˈeyë tjotmaymyoˈoytyë pënaty jyaˈëxpëkandëbë Diosë yˈää yˈayuk.

Axëkˈäjtënë. Nandëˈën ojts yajnigajxy «es jaˈatäämp ja axëkˈäjtën» (Matewʉ 24:12). Waˈan mijts nandëˈën xyˈixy ko ja axëkˈäjtënë të jyantsy myëjwiinënë tyam. Oymyääty, kutsëˈëgë ko jäˈäy yajmaatsët, yajwinˈëënët o wiˈix yajtunët.

Tëgekyë tyäˈädë yëˈë xytyukˈijxëm ko Diosë Kyutujkënë wingon yˈity. Mä Biiblyë jyënaˈany: «Ku xˈejxtët jadeˈen ja ayoˈon, jadeˈents ja xnëjawëdët jëts ku wyingony ja Dios kyutujk» (Lucas 21:31, Øgyajpxy Ømyadya̱ˈa̱ky diˈib Xamgëjxm). Per ¿tidën yˈandijpy Diosë Kyutujkën? Yëˈë tuˈugë anaˈamënë diˈib ijtp tsäjpotm diˈib yaˈoyëyaambyë Naxwinyëdë extëm tuˈugë it lugäärë tsujpë. Yëˈë wyingudëgatsˈataampy nëˈënë anaˈambëty diˈib yä Naxwiiny (Daniel 2:44).