Jyaˈty ja Mesias

¿WIˈIX yaˈëxkapët ja Mesias? Dios yëˈë pyudëjkë naxwinyëdë jäˈäy parë tˈëxkaptët, min nˈokˈijxëm ti tyuun. Ja naty të nyaxy naa taxk mëgoˈpx jëmëjt mä yajjääytyaˈayë Escrituras Hebreas, ko ja anklës Gabryel ojts tmëgajxy tuˈugë kiixy diˈib xyëˈäjt Mariië diˈibë naty tsënaapy Nasaret, Galileeë nyääxoty. Gabryel tˈanmääyë Mariië ko tpäädäˈäny tuˈugë uˈunk. Ets oyë naty kyapekynyëm ojts yaˈˈanëëmë ko mët yëˈëgyëjxmë Diosë myëjää wyëˈëmäˈäny uˈunkmëët. Tyäˈädë uˈunk yëˈë diˈibë naty të yajwandaˈaky tyunäˈäny Rey ets yˈanaˈamäˈäny xëmëkyëjxm. Dios yajtëgäjts ja yˈUˈungë jyukyˈäjtën, dyajtsoˈony tsäjpotm ets tpëjtaky mä Mariië yˈuˈunktëjk.

Mariië kyupëjk ets myëjjäˈäjë ko yaˈˈanmääy dyajmaxuˈunkˈatët ja uˈunk. Yëˈë naty mëët pyëkäˈäny tuˈugë tsajtspë diˈib xyëˈäjtypy Josee, ets ja pyëjktë ko Josee yˈanmääyë tuˈugë anklës ko Diosë natyë yˈuˈunk maxuˈunkˈatäämp. Të naty yajnaskäjxë ko Mesias myaxuˈunkˈatäˈäny Belen, kyaj jyamëty Nasaret (Miqueas 5:2). Per ¿wiˈix myaxuˈunkˈatët Belen diˈib jagam naa 140,000 metrën?

Tuˈugë anaˈambë diˈib Romë ojts tniˈanaˈamë ets niˈamukë jäˈäy nëjx yajkujayë mä naty të myaxuˈunkˈattë. Mariië mëdë Josee jamë naty tsyoondë Belen, pääty ojts nyëjxtë oyë naty ja Mariië yˈuˈunkmëëdëty (Lukʉs 2:3). Ta Jesus myaxuˈunkˈäjty mä jëyujk animal yˈity ets kyoˈknääy mä yajpëjtaˈagyë jyeˈxy. Dios ta tkejxy mayë anklës mä naty ja borreegë kuentˈäjtpë yajpäättë ets tˈanmääytyë ko të myaxuˈunkˈaty ja Mesias o Kristë diˈib yajwandak.

Nan tamˈäjtë jäˈäy diˈib nyigäjx ko Jesus yëˈë ja Mesias diˈib yajwandak. Extëmë ja kugajpxy Isaiië nyaskäjxë ko tamˈatäämbë naty tuˈugë jäˈäy diˈib yaˈˈawäˈätsaampy ja nëˈë tuˈu parë ja Mesias tyëkët tuumbë (Isaías 40:3). Yëˈë yajmaytyak ja Fwank Yajnëbajtpë. Tëgok ko tˈijxyë Jesus ta jyënany: “¡Ixtë! Tyäˈädë dëˈën ja Diosë Byorreguˈunk diˈibë wëˈëmp extëmë wintsëˈkën es yajpojpënitëgoyët yä naxwiiny”. Ta netyë niganääk ja Fwangë yˈëxpëjkpëty ojts tpanëjxtë Jesus. Niduˈuk ojts jyënaˈany: “Të net nbatëm ja Kristë” (Fwank 1:29, 36, 41).

Per ja niˈigyë nyigëxeˈky ko Jesus yëˈë ja Mesias ko Fwank yajnëbajtë. Pes mët yëˈëgyëjxmë espiritë santë Jyobaa wyinˈijxë extëmë Mesias ets jyënany: “Tyäˈädëtsë dëˈën ja nˈUˈungëts diˈibëts njantsy tsyejpy, diˈibëts mëët njotkujkˈaty” (Matewʉ 3:16, 17). ¡Duˈunën nyigëxeˈky ja Mesias diˈibë naty të yajwandaˈaky!

¿Näˈä duˈun tyuun jyäjtë? Mä ja jëmëjt 29 ko naty të nyaxy 483 jëmëjt diˈibë Daniel ojts tnaskäjxë. Tyäˈädë yëˈë tuk peky majtsk peky diˈib yajnigëxeˈkypy ko Jesus yëˈë duˈun ja Mesias o Kristë. Per ¿ti diˈibë naty kyäjxwäˈxaampy ko yˈitët yä Naxwiiny?

(Jap yajnimaytyaˈaky mä Matewʉ kapitulo 1-3, Markʉs kapitulo 1, Lukʉs kapitulo 2 ets mä Fwank kapitulo 1.)