“Waˈan twoy ja mëjjäˈäytyëjk”

1. ¿Wiˈixë Jyobaa të dyajnigëxëˈëky ko nëgooyë ttsojknë pënaty mëduunëp?

JYOBAA nëgooyë ttsojknë pënaty mëduunëp, duˈun ixtëm ja borreegë kuentëˈäjtpë ttsoky ja byorreeguˈungëty. Päätyën ojts tkexy ja tyuˈukˈuˈunk parë ojts xyjuuybyëtsëˈëmëm, ets nan të ttuknipëky ja mëjjäˈäytyëjk parë xyˈijxˈijt xykyuentëˈäjtëm mä ja tuˈukmujkën (Apos. 20:28). Jyobaa yëˈë të ttuknipëkyë Jesús parë tnigëbäjkˈatëdë nyax kyäjpn, päätyë mëjjäˈäytyëjkëty yëˈë pyanëjkxtëp wiˈix nyëˈëmoˈoy tyuˈumoˈoyëdë Jesús. Duˈuntsoow tpudëkëdë niˈamukë ja Diosmëduumbëty parë oy yajpäättët mëdë Jyobaa (Is. 32:​1, 2).

2. ¿Pënaty niˈigyë Jyobaa myëmaapy myëdajpy? (Ezequiel 34:​15, 16).

² Jyobaa naytyukjotmaytyuunëp niˈamukë ja yˈuˈunk yˈënäˈk, per mas niˈigyë pënaty të myëjagamgaˈagëdë. Pääty yëˈë yajtuumpy ja mëjjäˈäytyëjk parë jatëgok oy mëët yˈittët (käjpxë Ezequiel 34:​15, 16). ¿Ti tsojkëp nduˈunëm pën nyajtëgoyˈäjtëmë naybyudëkë? Dios tsyojkypy ets nmënuˈkxtakëm, per nan tsyojkypy ets nˈamdoˈowëmë naybyudëkë ja mëjjäˈäytyëjkëty mëdiˈibë yajpattëp mä ja tuˈukmujkën, pes yëˈë “ja mëbëjkpëtëjk yˈijxˈijt kyuentëˈäjttëp es dyaˈëxpëktë” (Éfes. 4:​11, 12).

3. ¿Wiˈix xypyudëkëyäˈänëm niˈamukë yäˈädë artikulo?

³ Mä yäˈädë artikulo yëˈë yajnimaytyäˈägäämp wiˈixë Jyobaa dyajtunyë mëjjäˈäytyëjk parë oy mëët nˈijtëm. Yaˈˈatsoowëmbitäˈäny yäˈädë yajtëˈëwën: ¿Näˈä mbäät nˈamdoˈowëmë nyaybyudëkë mëjjäˈäytyëjk?, ¿tiko yˈoyëty ets duˈun nduˈunëm? ets ¿wiˈix xypyudëkëyäˈänëm? Waˈan tyam oy nyajpatëm mëdë Jyobaa ets kyaj nyajtëgoyˈäjtëm ja naybyudëkë, perë yäˈädë artikulo xypyudëkëyäˈänëm parë nyajtsobatëm ja naybyudëkë mëdiˈibë Jyobaa yajkypy mët yëˈëgyëjxm ja mëjjäˈäytyëjkëty, ets nanduˈun nnijawëyäˈänëm ti nëjkx nduˈunëm ko nety nyajtëgoyˈäjtëm ja nyaybyudëkë.

¿NÄˈÄ MBÄÄT NMËGÄJPXËM JA MËJJÄˈÄYTYËJK?

4. ¿Tiko njënäˈänëm ko Santya̱ˈa̱gʉ 5:​14-16, 19, 20 yëˈë myaytyäˈägaampy pënaty kyaj oy yˈokˈijnë mëdë Dios? (Ixë nanduˈunë dibujë).

⁴ Santiago ojts tnimaytyaˈaky wiˈixënë Jyobaa dyajtunyë mëjjäˈäytyëjk parë xypyudëjkëm, duˈun tkujäˈäyë: “Pën ja pën pyekyëty, waˈan twoy ja mëjjäˈäytyëjk diˈibë tuundëp mä mëbëjkpëtëjk nyaymyukëdë” (Käjpxë Santya̱ˈa̱gʉ 5:​14-16, 19, 20). Santiago yëˈë nety yˈandijaampy tuˈugë jäˈäy mëdiˈibë kyaj oy yˈokˈyajpatnë mëdë Jyobaa. ¿Wiˈix nnijäˈäwëm? Jaˈko yëˈë ojts tˈaknimaytyaˈaky, pes kyaj ojts tˈanëëmë ja jäˈäy mëdiˈibë pëjkëp ets twowët tuˈugë doktoor, yëˈë duˈun ja mëjjäˈäytyëjk. Pääty tˈaknimaytyaky ko ja jäˈäy ja yˈagëdaˈaky ko yajmeˈkxy ja pyoky kyaytyey. Ko tuˈugë jäˈäy pyäˈämbety tsojkëp tninëjkxët ja doktoor parë myoˈoyëdët tuˈugë tratamientë, ets tsojkëp tmëmëdowët wiˈix yˈanëˈëmxëty ja doktoor. Nanduˈunjäjtp ëjtsäjtëm, pën jam ti të nduundëgoˈoyëm, oy ko nˈëxtäˈäyëm ja mëjjäˈäytyëjk ets ndukmëtmaytyaktäˈäyëm. Ets yëˈëjëty ta xymyoˈoyäˈänëm ja ëwij käjpxwijën mëdiˈibë yajpat mä Biiblyë.

5. ¿Wiˈix mbäät nnijäˈäwëm ko oy nyajpatëm mëdë Jyobaa?

⁵ Mä Santiago kapitulo 5 nyaˈˈanëmäˈäyëm ko tsojkëp nˈamdoˈowëmë nyaybyudëkë ja mëjjäˈäytyëjk ko nety njäˈäwënë ko tam nmëjagamgakënë Jyobaa, ets kyaj jyaanëmëty mä nety të nmëdëgoˈoyënë. Mä Biiblyë xyˈanmäˈäyëm ko tsojkëp mëk nnaygyuentëˈäjtëm, pes mbäät nwinmäˈäyëm ko Jyobaa xykyupëjkëm per kyajtëm dyuˈunëty (Sant. 1:22). Duˈun jyäjtë ja Diosmëduumbëty mëdiˈibë tsënääytyë Sardis, yëˈëjëty winmääytyë ko kupëjkëdëbë netyë Jyobaa, perë Jesús yˈanmääyëdë ko kyaj dyuˈunëty (Diˈibʉ Jat. 3:​1, 2). ¿Wiˈix mbäät nnijäˈäwëm ko oy nyajpatëm mëdë Jyobaa? Tuk pëky yëˈë ko nˈijxëm nuˈunënë nety ndukxondakëm ja Diosë tyuunk ko ojts nnëbajtëm ets nˈijxëm pën duˈunyëm tyam nˈaktukxondakëm (Diˈibʉ Jat. 2:​4, 5). Mbäät mnayajtëyëty: “¿Duˈunyëmëts ndukxondaˈaky kojëts niˈëxpëkë Biiblyë? ¿Xëmëts nëjkxy reunyonk ets niˈëxpëjkëbëts tijaty jap naxäämp? ¿Duˈunyëmëts jëjpˈam nbëjktaˈaky nëjkxët jënˈayeˈepy tëjkˈayeˈebyë? ¿Waˈanëts yëˈë jëjpˈam nbëjktaknë ja it xondakënë o ja meeny sentääbë?”. Wiˈix nˈatsoowëmbijtëm yëˈë xypyudëkëyäˈänëm parë nˈijxëm pën oy nˈijtëm mëdë Jyobaa o pën nyajtëgoyˈäjtëmë naybyudëkë. Pën njäˈäwëm ko kyaj mbäät nˈoknayjyëjpkuwijtsënë o të ngutëjëm ja Diosë yˈanaˈamën, oy ko nˈanëmäˈäyëm ja mëjjäˈäytyëjk ets yëˈë xypyudëjkëm.

6. ¿Ti mbäät ttuny ja mëdiˈibë të pyokytyuny mëjwiin kajaa?

⁶ Pën tuˈugë Diosmëduumbë të pyokytyuny mëjwiin kajaa ets nyijäˈäwëp ko mbäät kyaj yˈokˈyajpatnë mä ja Diosë kyäjpn, oy ko ttukmëtmaytyäˈägët niduˈuk ja mëjjäˈäytyëjk (1 Kor. 5:​11-13). Kyaj mbäät wyinmay ko mbäät këˈëm dyaˈoyë ja jyotmay mëdë Jyobaa. Tsojkëp pyudëkëdët ja mëjjäˈäytyëjk, pesë Jyobaa maˈkxp, per net pën tyuumpy ixtëm jyënaˈany ets dyajnigëxëˈëgët ko të jyantsy jyodëmbity (Apos. 26:20). Ja tuk pëky wiˈix mbäät dyajnigëxëˈky ko të jyantsy jyodëmbity yëˈë ko ttukmëtmaytyäˈägët ja mëjjäˈäytyëjk ti të ttuundëgoy.

7. ¿Pënaty nanduˈun yajtëgoyˈäjttëp ja naybyudëkë?

⁷ Yëˈë mëjjäˈäytyëjk kyaj yëˈë jeˈeyë tpudëkëdë pënaty të pyokytyundë mëjwiin kajaa, nanduˈunën tpudëkëdë pënaty të xyaˈamnëdë ja myëbëjkën (Apos. 20:35). Ixtëm nˈokpëjktakëm, waˈan mtsiptakxëty xyjyëjpkudijët ja axëëkpë tsojkën ets xyjyawë ko myajtëgoyanëp, mët ko määnëm xykyanijawë ja tëyˈäjtën waˈanë nety xyjyëˈkxyë droogë, xyˈixyë pornografía o axëëk ijty mjukyˈaty. Per kyaj myajpääty naytyuˈuk, mbäät xymyëgajpxy tuˈugë mëjjäˈäy mëdiˈibë mdukjotkujkˈäjtypy ets mnijäˈäwëp ko mbudëkëyanëp tsuj yajxon. Mbäät mˈity seguurë ko mmoˈoyanëp ja ëwij käjpxwijën mëdiˈibë miimp mä Biiblyë ets mdukjamyatsanëp ko duˈunyëmë Jyobaa mgupëkäˈänyëty, per net pën kyaj mmëmadaˈagyëty ja axëëkpë tsojkën (Ecl. 4:12). Pën mnayjyäˈäwëp mon tuk ko duˈunyëm ja axëëkpë tsojkën mdukminyëty, yëˈë myajnigëxëˈkypy ko oy mˈitäˈäny mëdë Jyobaa ets ko kyaj këˈëm mnaytyukjotkujkˈatyë (1 Kor. 10:12).

8. ¿Tijaty kyaj tyim tsokyëty ets ndukmëtmaytyaktäˈäyëm ja mëjjäˈäytyëjk?

⁸ Kyaj tyim tsokyëty ndukmëtmaytyaktäˈäyëm ja mëjjäˈäytyëjk mäjaty ndëgoˈoyëm. Ixtëm nˈokpëjktakëm, waˈan pën të xyˈanëëmë wixaty ets të xyajnayjyawëty axëëk mët ko të mjantsy mëk mjotˈambëky, per kyaj tiko xytyim ninëjkxët ja mëjjäˈäytyëjk pes oy ko ak mijtsëty xyaˈoyëdët ja mjotmay, duˈun ixtëm jyënanyë Jesús (Mat. 5:​23, 24). Mbäät xypyayeˈey mä ëxpëjkpajn ixtëm, wiˈix mbäät niˈigyë maˈkxtuky o mnayˈaguwits mnayjyëjpkuwitsëdët. Per pën mˈijxypy ko kyaj yˈoyëyaˈany ja mjotmay mbäät xyˈanëëmë tuˈugë nmëguˈukˈäjtëm mëdiˈibë tuump mëjjäˈäy parë mbudëkëdët (Filip. 4:​2, 3).

¿TIKO MBÄÄT NˈAMDOˈOWËMË NAYBYUDËKË JA MËJJÄˈÄYTYËJK?

9. ¿Tiko yˈoyëty nmëtmaytyakëm ja mëjjäˈäytyëjkëty oy njatsoytyuˈunjäˈäwëm tii të nduˈunëm? (Proverbios 28:13).

⁹ Ko xymyëmadäˈägäˈänënë ja axëëkpë tsojkënë, ja mä net tsyokyëty etsë Jyobaa xypyudëjkëm. Ets pën të nbokytyuˈunënë mëjwiin kajaa tsojkëbë net ndukmëtmaytyakëm ja mëjjäˈäytyëjk parë xypyaˈˈayoˈowëm ets xypyokymyaˈkxëmë Jyobaa. Tsojkëbë jotmëkˈäjtënë etsë mëbëjkënë parë ndukmëtmaytyakëm ja mëjjäˈäytyëjkëty tii të nduˈunëm, pes waˈan ntsoytyuˈunjäˈäwëm. Nˈokjamyajtsëm ko Jyobaa yëˈë yajtuumpy ja mëjjäˈäytyëjk parë xypyudëjkëm ets duˈunyëm oy nmëduˈunëm (Sal. 94:18). Ko duˈun nduˈunëm, yëˈë nety nyajnigëxëˈkëm ko nmëdoˈowëm ets ko ndukjotkujkˈäjtëmë Jyobaa (käjpxë Proverbios 28:13).

10. ¿Tidaa mbäät tyuny jyatyë pën nguyuˈtsëm ja poky?

¹⁰ Ixtëm të nˈijxëm, ko nˈamdoˈowëmë nyaybyudëkë ja mëjjäˈäytyëjk mbäät xypyudëjkëm mëjwiin kajaa, per pën nguyuˈtsëm mbäät niˈigyë nayˈaxëktuˈunëm. Nˈokjamyajtsëm wiˈix jyajty ja rey David, ko tkuyuˈutsy ja pyoky ojts tkuˈayoˈowë, kyaj oy ojts yˈokˈijnë mëdë Jyobaa ets axëëk ojts nyayjyäˈäwënë (Sal. 32:​3-5). Nˈokpëjktakëm tuˈugë ijxpajtën, pën të ntsayujtëm jëjpˈam ets nnayajtsoybyajtëm kyaj duˈunyë naynyaˈijxëm mët ko mbäät niˈigyë myëjtaˈaky. Nanduˈunën jyaty pën të nbokytyuˈunëm, ets pën kyaj nˈamdoˈowënë naybyudëkë mëjjäˈäytyëjk mbäät, niˈigyë nguˈayoˈowëm. Päätyënë Jyobaa xyˈanmäˈäyëm: ‘Mindë, tsojk ja amay jotmay nˈokˈyaˈoˈoyëm’ (Is. 1:​5, 6, 18 TY).

11. ¿Wiˈix mbäät xyˈaxëktuˈunëm ko tuˈugë jäˈäy tkuyuˈutsy ja pyoky kyaytyey?

¹¹ Ko nguyuˈtsëm ja poky kaytyey mbäät ja wiinkpëty nˈaxëktuˈunëm, mbäät kyaj yˈokjapˈäjnë ja Diosë myëjääw mää ja tuˈukmujkënë ets nan kyaj yˈokjapˈäjnët ja tuˈugyëˈäjtënë (Éfes. 4:30). Pääty ko nnijäˈäwëm ko tuˈugë nmëguˈukˈäjtëm mëdiˈibë yajpatp mä tuˈukmujkën të pyoky tyuˈun mëjwiin kajaa, nˈokˈanmäˈäyëm waˈan ninëjkxy ja mëjjäˈäytyëjkëty ets ttukmëtmaytyäˈägët ti të ttuny, per pën nˈijxëm ko kyaj tmaytyaˈaky ja pyoky oy të njamoˈoyëm ja tiempë, mbäädë net ndukmëtmaytyakëm ja mëjjäˈäytyëjk, pes pën nguyuˈtsëm nan nikëjxmˈäjtëmë nety ja pyoky kyaytyey (Lev. 5:1). Pën njantsy tsyojkëmë Jyobaa, ta ndunäˈänëm mëdiˈibë mëdëy. Duˈuntsoow nbudëjkëm ets ja Diosë nyax kyäjpn yˈitët wääts ets ja nmëguˈukˈäjtëm mëdiˈibë të pyokytyuny nyaymyëˈoybyëkëdët mëdë Jyobaa.

¿WIˈIX XYPYUDËJKËM JA MËJJÄˈÄYTYËJK?

12. ¿Wiˈix ja mëjjäˈäytyëjk tpudëkëdë pënaty kyaj oy nyekyyajpäättë mëdë Jyobaa?

¹² Ja mëjjäˈäytyëjkëty pyattëbë ëwij käjpxwijënë mä Biiblyë, mä wiˈix mbäät tpudëkëdë ja mëdiˈibë kyaj oy yˈok yajpatnëdë mëdë Jyobaa (1 Tes. 5:14). Pën kyaj oy mˈokˈyajpatnë mëdë Jyobaa, ja mëjjäˈäytyëjkëty myajtëwanëdëp tijaty mëdë mayˈäjt wintsëˈkën. Duˈuntsoow mbäät tnijawëdë wiˈix mwinmay ets wiˈix mbäät mbudëkëdë (Prov. 20:5). Pääty oy ko yajxon xytyukmëtmaytyaktäˈäyët tijatyën të xytyuny. Mbäät mtsiptakxëty waˈan mët ko mëk mtsoytyuny o xymyëkjawë tijaty të xytyuny, per këdii wiˈix mnayjyawëty pën mtsiptakxëp xynyimaytyäˈägët (Job 6:3). Yëˈëjëty jawyiin tˈokmëdoowˈitäˈändë ja mjotmay ets kyaj ënetyë mbayeˈeyaˈanyëty, tsuj yajxon tmëdoowˈitäˈändë määnëm mgamoˈoyëty ja ëwij käjpxwijënë (Prov. 18:13). Ja mëjjäˈäytyëjkëty kyaj pojënë tijaty ttunäˈändë, pes tsojkëbë tiempë parë tjaygyukëdët yajxon ja mjotmay. Pääty kanääk ok mmëtmaytyäˈägäˈänëdë parë tnijawëdët wiˈix mbäät mbudëkëty.

13. ¿Ti tyunandëbë mëjjäˈäytyëjk parë mbäät mbudëkëdë? (Ix nanduˈunë dibujë).

¹³ Yëˈë mëjjäˈäytyëjk kyaj axëëk myanayjyawëyaˈanyë, niˈigyën mninukxtäägëyaˈanyë ets mˈixaampy ko ja nyuˈkxtakën “myëdäjtypy niꞌigë ja mëkꞌa̱jtën”. Ets yëˈëjëty nan mdukjääxanëp “ja aseytë xyëëgyëjxmë Jyobaa” (Sant. 5:​14-16, TNM). ¿Ti yˈandijpy ja “aseytë”? Yëˈë ja Diosë yˈayuk, mëdiˈibë mnaytyuknëˈëmoˈoyan naytyuktuˈumoˈoyanëdëp parë mbäät mˈagujkmoˈoy mjotkujkmoˈoyëty ets mbudëkëdët parë jatëgok oy myajpäädët mëdë Jyobaa (Is. 57:18). Jyobaa yëˈë yajtuumpy ja mëjjäˈäytyëjkëty parë mbäät mˈëwijy mgäjpxwijˈyëty ets tyunët mëdiˈibë oy ets xymyëdoowˈitët ko Jyobaa mˈanëˈëmxëty: “Tyäˈädë yëˈë duˈun ja tuˈu. Yoˈoytyë yëˈë” (Is. 30:21 TNM).

14. Ixtëm jyënaˈanyë Gálatas 6:​1, ¿wiˈix ja mëjjäˈäytyëjkëty tpudëkëdë pënaty “tëë pokyjotm kyä’äy”? (Ix nanduˈunë dibujë).

¹⁴ (Käjpxë Gálatas 6:​1, TY). Ko ijxëm tuˈugë nmëguˈukˈäjtëm “tëë pokyjotm kyäˈäy” yëˈë yˈandijpy ko kyaj tˈoktuunë mëdiˈibë Jyobaa tyukjotkëdakypy. Pes mbäät ti pojënë nduˈunëm ets ko nbëjkëmë kuentë tëdëm nakutëjënë ja Diosë yˈanaˈamën. Päätyën ja mëjjäˈäytyëjk yaˈˈanëëmëdë: ‘Pudëkëdë ets käjpxwijtë mëët ja naytsyok nayjyawë’. Ko jyënaˈany “pudëkëdë”, mä ayuk grieegë yëˈë myaytyäˈägaampy ko tuˈugë doktoor tjäˈäxˈoyë ja päjk, ets oyˈixyë dyajtëkë parë kyaj nëgoo mëk tjawët ja jäˈäy o parë kyaj tsyoˈogët mäˈät. Pääty mä Biiblyë yajmooytyë ja ëwij käjpxwijënë niduˈuk niduk ja mëjjäˈäytyëjk ets nyaygyuentëˈatëdët ko nety tpudëkëdë ja myëguˈuktëjk, pes nan pokyjyaˈay yajpäättë ets mbäät pyokytyundë. Kyaj mëj këjxm nyayjyawëyäˈänëdë ko oy tijaty tuundë, niˈigyë yˈitäˈändë yujy tudaˈaky ets pyaˈˈayowandëp ja jäˈäy mëdiˈibë të pyokytyuny (1 Peed. 3:8).

15. ¿Ti mbäät nduˈunëm pën nmëdäjtëm tuˈugë jotmay?

¹⁵ Oy ko ndukjotkujkˈäjtëm ja mëjjäˈäytyëjkëty mëdiˈibë yajpatp mä tuˈukmujkënë, pes yëˈëjëty kyaj tmaytyäägëdittë tijaty ndukmëtmaytyakëm. Nan të tjattë ko tsojkëp tjuuttët ja ëwij käjpxwijën mä Biiblyë parë mbäät xyˈanmäˈäyëm ti mbäät nduˈunëm, ets kyaj dyajtundë ja kyëˈëm wyinmäˈänyëty. Duˈuntsoow mbäät xypyudëjkëm parë nmëmadakëm ja amay jotmay mëdiˈibë nwinguwäˈkëm (Prov. 11:13; Gal. 6:2). Tuˈuk tuˈugë mëjjäˈäytyëjkëty wiˈixëm jyaˈayˈattë, tam mëdiˈibë jeky kujk tuunëdëp ets tam mëdiˈibë kyaj, per oy dyuˈunëty tsojkëp nmëwingoˈonëm ets ndukmëtmaytyakëm ja nˈamayˈäjt njotmayˈäjtëm. Per kyaj net yëˈë tˈandijy ko tuˈuk tuˈuk ja mëjjäˈäytyëjk nmëtmaytyaktäˈäyëm etsë net nˈëwxijtëm xyˈanmäˈäyëm mëdiˈibë ëjtsäjtëm njamëdoowˈitäˈänëm. Ko duˈun nˈadëtsëm yëˈëyë nety nmëdoowˈitäˈänëm ti ëjtsäjtëm ntsojkëm ets kyaj yëˈëyëty ja Diosë yˈääw yˈayuk (2 Tim. 4:3). Ko nety nmëtmaytyakëm tuˈugë mëjjäˈäy, waˈan xyajtëˈëwëm pën të wiinkpë mëjjäˈäytyëjk nˈoktukmëtmaytyakëmbë ja njotmayˈäjtëm ets wiˈix të xyˈanmäˈäyëm. Etsë pën yäˈädë mëjjäˈäy yujy tudaˈaky waˈan tˈamdowëdë nyaybyudëkë ja wiinkpë mëjjäˈäy (Prov. 13:10).

TI NIKËJXMˈÄJTËM NIDUˈUK NIDUK

16. ¿Ti nikëjxmˈäjtëm niduˈuk niduˈuk?

¹⁶ Yëˈë mëjjäˈäytyëjk xypyudëjkëm ko nmëdäjtëmë amay jotmay ets xymyoˈoyëm ja käjpxwijën, per kyaj xyˈanmäˈäyëm tii mbäät nduˈunëm. Niduˈuk niduˈuk tsojkëp nyajnigëxëˈkëm ko njantsy tsyojkëmë Jyobaa mä tijaty nduˈunëm (Rom. 14:12). Yëˈë xypyudëkëyäˈänëm parë oy tijaty nduˈunëm ets kyaj nmäjtstutëm. Ja mëjjäˈäytyëjkëty yëˈë xëmë yajtuundëp ja Biiblyë koogoo xypyudëjkëm parë mbäät njaygyujkëm wiˈixë Jyobaa winmay, duˈuntsoow ta ëjtsäjtëm këˈëm nmëwinmäˈänybyatëm “yëˈë oybyë esë axëëkpë” (Eb. 5:14).

17. ¿Ti niduˈuk niduˈuk xypyatëm nduˈunëm?

¹⁷ ¡Yëˈë tuˈugë kunuˈkxën ko Jyobaa xyˈuˈunkˈäjt xyˈënäˈkˈäjtëm ets ko tkejxyë Jesús, “ja oybyë borreegë kuentëˈäjtpë”, parë ojts xyjuuybyëtsëˈëmëm ets nbatëm ja jukyˈäjtënë xëmëkyëjxmbë (Fwank 10:11). Mët yëˈëgyëjxm ja mëjjäˈäytyëjk Jyobaa nan të tkuytyuny ixtëm ojts twandaˈaky: ‘Nmoˈojäˈändë oybyë yajkutujkpë mëdiˈibë tyunëbën mëdiˈibës ndukjotkëdakypyën; yëˈëts mˈënaˈamëdëp mëët ja wijyˈäjtën ets ixpëkyˈäjtën’ (Jer. 3:​15, TY). Pääty pën kyaj nˈoktukˈijt nˈoktukxoˈonënë ja Diosë tyuunk ets të nxaˈamënë oy ko ninëjkxëm ja mëjjäˈäytyëjk ets nˈamdoˈowëmë naybyudëkë, net nëjkx nˈijxëm wiˈixënë Jyobaa yajtunëdë parë xypyudëjkëm.