¿Wiˈix xypyudëjkëmë liibrë mëdiˈibë xyëwˈäjtypy Job ko nbatëmë jotmay?

1, 2. Oknimaytyäˈäk tiko yˈoyëty ets ngäjpxëmë Job.

¿TË MIJTS näämnëm xykyajpxyë Job? Tam nyëjkxnë naa 3,500 jëmëjtën mä yajjäˈäy, per duˈunyëm myëjpëtsëmy mëdiˈibë jyaayë yäˈädë liibrë. ¿Tiko? Yëˈë ko atoodë ja ääw ayuk ojts tmaˈkxy, kyaj tsip yajjaygyukë ets jantsy tsujjaty ja ääw ayuk mëdiˈibë yajtuun. Moisés yëˈë jyaayë yäˈädë liibrë, per mëdiˈibë jyaˈäjtypy, yëˈë Jyobaa (2 Tim. 3:16).

² Yäˈädë liibrë mëdiˈibë xyëwˈäjtypy Job mëj yˈity. ¿Tiko? Tuk pëky, yëˈko xytyukjaygyujkëm ko ëjtsäjtëm ets ja anklëstëjk, tsojkëp nwinˈijxëm pën nmëdunäˈänëmë Jyobaa mët ko ntsojkëm ets mët ko nyajmëjpëtsëmäˈänëmë xyëëw. Myëmajtsk, yëˈko xypyudëjkëm parë nnijäˈäwëm wiˈix jantsy oyë Dios jyaˈayˈaty, wiˈix dyajnigëxëˈëgyë tsojkën, wijyˈäjtën, tëyˈäjtën etsë mëkˈäjtën. Ixtëm nˈokpëjktakëm, mä yäˈädë liibrë, 31 ok jap jyënaˈany ko Jyobaa määytyaayëp winë. Nituˈuk duˈunë liibrë mëdiˈibë yajpatp mä Biiblyë duˈun tkanimaytyaˈaky. Ets myëdëgëëk, yëˈko mä yäˈädë liibrë yajnimaytyakp tiko Dios tnasˈixë ayoˈon ets yˈatsoowëmbijtypy tijatyë naxwinyëdë jäˈäy nayajtëëwëp.

3. ¿Wiˈix xypyudëjkëm ko ngäjpxëmë Job?

³ Ko nbajtëm kopkëjxy, mbäät ndukˈijxëtyaˈayëm tukëˈëyë. Nanduˈun yaˈijxkijpxyë ko ngäjpxëmë Job, pes mbäät nbëjkëmë kuentë wiˈixë Jyobaa tˈixy ja amay jotmay mëdiˈibë nyajkëjx nyajnäjxëm. Mä yäˈädë artikulo nˈixäˈänëm wiˈix xypyudëjkëm ko ngäjpxëmë Job mä nbatëmë amay jotmay. Nnijawëyäˈänëm nanduˈun wiˈix pyudëjkëdë nääk ja israelitëty ixtëmë Job jyajty kyëbejty ets wiˈix ëjtsäjtëm xypyudëjkëm. Ets ta net nˈixäˈänëm wiˈix mbäät ndukpudëjkëmë wiink jäˈäy ja yˈijxpajtënë Job.

DIOS NYASˈIJXË ETSË JOB YˈAYOWËT

4. ¿Tiko njënäˈänëm ko Job kyaj duˈun jyaˈayˈajty ixtëm nääk ja israelitëty?

⁴ Job jam tsyënääy Uz, yäˈädë lugäär waˈanë nety yajpääty anikëjxytsyoow mä ja yˈit lyugäärë Arabia, ets jyukyˈajty ja tiempë mä ja israelitëty yajtuumbëˈäjt yajmosëˈäjttë Egipto. Perë Job kyaj duˈun jyaˈayˈajty ixtëm nääk ja israelitëty mëdiˈibë nety të tˈawdäjttsondaknëdë ja awinax jap Egipto, pes yëˈë aduˈugë Jyobaa tmëduuny (Jos. 24:14; Ezeq. 20:8). Jyobaa duˈun nyimaytyakë: ‘Nimää jäˈäyë jëduˈunbë naxwiiny naxkëjxy’ (Job 1:​8, TY).a Nipënë nety duˈunë meeny sentääbë tkamëdaty ixtëmë Job ets kyaˈity mëj mä taabë it lugäär (Job 1:3). Seguurë ko Satanás jantsy awäˈändak ko tˈijxy tuˈugë jäˈäy mëdiˈibë mëj ijtp yä Naxwiiny tmëduny tmëmëdoyë Dios.

5. ¿Tiko Jyobaa tnasˈijxë etsë Job tpäädëdë ayoˈon jotmay? (Job 1:​20-22; 2:​9, 10).

⁵ Satanás jyënany ko Job myäjtstuˈudaambyë Jyobaa ko tpäädëdë ayoˈon jotmay (Job 1:​7-11; 2:​2-5). Jyobaa mëkë nety ttsokyë Job, per nyasˈijxë etsë Satanás yˈijxmatsëdët parë nyigëxëˈëgët pën jantsy tëyˈäjtën ixtëmë nety të jyënaˈany (Job 1:​12-19; 2:​6-8). ¿Tijatyë net tyuun? Ojts dyajwijtskaktääyë ets dyaˈoˈktääy ja jëyujk animal mëdiˈibë netyë Job myëdäjtypy, yaˈoˈk ja nimäjkpë yˈuˈunk ets ta dyajpäˈämbejty ko tyukpëtsëëmdääyë axëëk puˈuts. Per oyë Satanás axëëk ttuunyë Job, yëˈë ninäˈä tkamäjtstutyë Jyobaa (käjpxë Job 1:​20-22; 2:​9, 10). Ko tiempë nyajxy, ta Jyobaa dyajtsoky dyaˈˈagëdakyë Job, tmooy jatëgokë jyukyˈäjt myadakën, ja nimäjkë yˈuˈunk ets ojts jatëgokë jäˈäy myëjˈix myëjpëjktäˈägëdë. Job ja ojts yˈakjukyˈaty 140 jëmëjt ets yˈijx ja yˈuˈunk yˈok taxk naskaˈaxë (Job 42:​10-13, 16). Ixtëmë Job jyajty kyëbejty, ¿wiˈixëdaa pyudëjkëdë nääk ja israelitëty ets wiˈix ëjtsäjtëm tyam xypyudëjkëm?

6. Pën ja israelitëty nyijäˈäwëdë wiˈixë Job jyajty kyëbejty, ¿wiˈixëdaa pyudëjkëdë? (Ix nanduˈunë dibujë).

⁶ Ja israelitëty mëkë nety të jyantsy yˈayowdë jap Egipto. Ixtëm nˈokpëjktakëm, ko Josué mëdë Caleb yˈënäˈkˈäjttë, yajtuumbëˈäjt yajmosëˈäjttë jap Egipto, ets ok, ta tsyënääyëdijttë 40 jëmëjt mä ja it lugäärë äänëˈëk tëëtsëˈëkpë mët ko ja myëguˈuktëjk kyamëdoowdë. Pën ja israelitëty myëdoyˈäjttë wiˈixë Job jyajty kyëbejty ets wiˈixë Jyobaa ojts kyunuˈkxyëty, seguurë ko jyaygyujkëdë pën mëdiˈibë yajjaˈäjtypyë ayoˈon jotmay. Jyaygyujkëdë nanduˈun yajxon tiko Jyobaa tnasˈixë ayoˈon ets ko yëˈë tsyojkypy pënaty mëmëdoowëdëp.

7, 8. Pënaty yajnäjxtëbë ayoˈon jotmay, ¿wiˈix mbäät pyudëkëdë ko tkäjpxtëdë Job? Nimaytyäˈäk wiˈix jyajtyë Hazel.

⁷ ¿Wiˈix ndukˈoyˈäjtëm? Jotmaymyëët njënäˈänëm ko mayë jäˈäy kyaj tnekymyëbëktë Dios mët ko tˈixtë wiˈix jyaty kyëbetyë oyjyaˈaytyëjk. Duˈun jyajtyë Hazel,b tuˈugë toˈoxytyëjk mëdiˈibë Ruanda. Ko myutskˈäjty myëbëjkypyë netyë Dios, per ko axëëk jyajty kyëbejty, ta tyëgäjtsy ja wyinmäˈäny. Ojts yaˈˈajääywyäˈkxtë ja tyääk tyeety, ets ja tyääk ta pyëjktëgäjtsy. Ja kyudeety axëëk tyuunë. Ko Hazel yaˈkpëtsëëmy, ta yˈaguanëˈäjtë tuˈugë yeˈeytyëjk, ets ko tjaˈëxtääyë naybyudëkë mä ja ryelijyonk, kyaj ojts pën pyudëkëty. Tëgok, ta tjääy tuˈugë neky mä tˈanëmääyë Dios: “Të njamënuˈkxtaˈaky ets njatuumbyëts mëdiˈibë oy, per jeˈeyëts të xymyoˈoyë ayoˈon jotmay, pääty nmäjtstutypy tyam ets minëts nˈoktuny tijatyëts xyaˈˈagujkˈat xyajjotkujkˈatëp”. Mon tuk xyajnayjyäˈäwëm ko nˈijxëm duˈunë jäˈäy jyat kyëbattë ixtëmë Hazel ets ko yajtukmëbëktë ko Dios yëˈë mëdiˈibë xyaˈˈayoˈowëm.

⁸ Per ko të ngäjpxëmë Job, ta të nnijäˈäwëm ko mëdiˈibë yajjaˈäjtypy ayoˈon, yëˈë Satanás ets kyaj yëˈëjëtyë Dios. Të nanduˈun nnijäˈäwëm ko kyaj tyim yëˈëjëty tkuˈayowë tuˈugë jäˈäy ti të ttuundëgoy, pesë Biiblyë jyënaˈany ko “niˈamukë xytyukjäjtëm mëdiˈibë kyaj yˈoyëty ets ko tyuny jyatyëty mëdiˈibë kyaj nˈëwxijt njëjpˈijxëm” (Ecl. 9:11; Job 4:​1, 8). Nan të nnijäˈäwëm ko pën xëmë nmëduˈunëmë Jyobaa oy nyajnäjxëmë amay jotmay, yëˈë ta ttukˈixäˈänyë Satanás ko andakp (Job 2:3; Prov. 27:11). Biiblyë xytyukniˈˈijxëm tiko nˈayoˈowëm ets tiko yˈayoy ja njëëkyˈäjt nmëguˈukˈäjtëm. ¡Njantsy kyuˈëˈëw njantsy kyukäjpxëm ko të nnijäˈäwëm! Per min nˈokˈijxëm wiˈix yˈakˈyajnimaytyaˈagyë Hazel. Yëˈë ta yˈëxpëjktsondaky mëdë Jyobaa tyestiigëty ets ta tnijäˈäwë ko Dios kyaj yëˈë xymyoˈoyëmë ayoˈon jotmay. Hazel jyënaˈany: “Ndukmëtmaytyaktääyëtsë Jyobaa wiˈixëtsë nety nnayjyawëty ets tajëts nˈanëmääy ko kyajëts njamäjtstuˈudany jeˈeyë ko kyajëtsë nety yajxon nˈixyˈaty. Per tyam nnijäˈäwëbëts ko Jyobaa xytsyojkpëts ets agujk jotkujkëts njantsy yajpääty”. Ko nnijäˈäwëm tiko Dios tnasˈixë ayoˈon, xyjyotkujkmoˈoyëm nanduˈun, ¿këdii? Minë net nˈokˈijxëm wiˈix mbäät xypyudëjkëmë yˈijxpajtënë Job ko nyajnäjxëmë ayoˈon jotmay.

¿WIˈIX XYPYUDËJKËMË YˈIJXPAJTËNË JOB PARË NMËMADAKËMË AYOˈON JOTMAY?

9. ¿Wiˈix mijts xynyimaytyäˈägëdë Job yaˈijxy yajpaty mä nety yˈayoy? (Santiago 5:11).

⁹ Nˈokpawinmäˈäyëmë Job yˈuˈunyë kuyjyäämoty, naytyuˈuk ets të tyukpëtsëëmdäˈäyëtyë puˈuts. Të yˈatsëgujtmujknë mëdë pëjk adoˈonën ets të wyaaytyëjk pyäjktëjkënë, ets ja nyiniˈkx duˈunyë tyukputstutnë. Kyaj tnekymyëdaty ja jot mëjääw, mëdiˈibë jeˈeyë yˈaktuumpy, yëˈë tkootsy ja pyuˈuts mëdë tuˈtspuˈu ets mëk jyantsy yaˈˈayoyëty ja päˈäm. Job kyaj nety mbäät ti tnekytyuny, per ko tmëmadaky, yëˈë nety jam tyukˈijxypyë Jyobaa ko ninäˈä tkamäjtstuˈudäˈäny (käjpxë Santiago 5:11). ¿Ti pudëjkë parë myadaky?

10. ¿Ti xytyukˈijxëm ko Job oyë nety yˈity mëdë Jyobaa?

¹⁰ Job tyukmëtmaytyaktääyë Jyobaa tukëˈëyë tijatyë nety jyäˈäwëp (Job 10:​1, 2; 16:20). Ixtëm nˈokpëjktakëm, mä kapitulo 3 jap ojts yˈabety kyutuky mët ko nety të tpääty ja ayoˈon jotmay ets wyinmääy ko yëˈë netyë Jyobaa duˈun tuunëp. Ets ko ja nidëgëëkpë myëtnaymyaayëbë jyënandë ko Diosë nety tukumëdoowëp mët ko të pyokytyuny, yëˈë ta mëktaˈaky nyaynyiˈëwdut nyaynyikäjpxtutë ets jyënany ko kyaj nety ti të ttuundëgoy. Ja ääw ayuk mëdiˈibë Job yajtuun, duˈun dyajjaygyukëyanë ko niˈigyë wyäˈätsëty ets kyaj dyuˈunëtyë Dios (Job 10:​1-3; 32:​1, 2; 35:​1, 2). Per kyupëjk nanduˈun ko mä nyaynyiˈëwdut nyaynyikäjpxtutë të nety dyajpëtsëmyë ääw ayuk mëdiˈibë kyaj yˈoyëty (Job 6:​3, 26). Mä kapitulo 31 nˈijxëm ko Job tsyojk parë Jyobaa yajnaxëdët wäˈäts ets myëdoowˈijtxëdët ja yˈääw yˈayuk (Job 31:35). Perë Job kyaj nety tmëdatyë madakënë parë dyajtëwëdë Dios tiko nety jam yˈayoy.

11. ¿Wiˈixë Jyobaa tˈatsoowëmbijtyë Job?

¹¹ Tyam, njaygyujkëmë net ko ixtëmë Job tmëtmaytyakyë Jyobaa yëˈë yajnigëxëˈk ko oyë nety mëët yˈity ets ko tyukjotkujkˈäjtypyë nety ko payeˈeyanëp tëyˈäjtën myëët. Ets ko Jyobaa dyajmiiny ja mëk poj tuu, ta jap ojts tmëgajpxyë Job, per kyaj ttukmëtmaytyaktääy tiko nety yˈayoy ets kyaj ojts ttukwinmëdoy tiko nety yˈabety kyutuky ets nyayajnaxyëty wäˈätsjäˈäy. Tsuj yajxon ojts tjëjwijtsëmbity, duˈun ixtëm tuˈugë uˈunkteety tjëjwijtsëmbityë yˈuˈunk. Jyobaa yˈajäjt jyotjäjtë Job, pes kyupëjk ko kyaj nëgoo ti tnijawë ets myëkjäˈäwë ja ääw ayuk mëdiˈibë nety të dyajpëtsëmy (Job 31:6; 40:​4, 5; 42:​1-6). Pën ja israelitëty myëdoyˈäjttë wiˈixë Job jyajty, ¿wiˈixëdaa pyudëjkëdë ets wiˈix ëjtsäjtëm tyam xypyudëjkëm?

12. ¿Wiˈixëdaa israelitëty pyudëjkëdë ja yˈijxpajtënë Job?

¹² ¿Wiˈixëdaa pyudëjkëdë ja israelitëty? Nˈokwinmäˈäyëmë Moisés mëdiˈibë nety wyoowˈyeˈepy ja israelitëty. Yëˈë kanääk pyëkyë amay jotmay twinguwäˈkë, tam mä nyayjyäˈäwë mon tuk ets axëëk, per kyaj duˈun jyaˈayˈajty ixtëm ja israelitëty mëdiˈibë myëˈabajt myëgutujktë Jyobaa. Moisés myëgäjpxë Jyobaa parë ttukmëtmaytyaktääy ti nety amaytyuun jotmaytyuunëp, duˈun ixtëmë Job (Éx. 16:​6-8; Núm. 11:​10-14; 14:​1-4, 11; 16:​41, 49; 17:5). Ja yˈijxpajtënë Job waˈan nanduˈunë Moisés pyudëjkë ko jyëjwijtsëmbijtë Jyobaa. Ixtëm nˈokpëjktakëm, ko nety ja israelitëty yajpäättë Cadés, mä nety të tsyënääyëdijnëdë naa 40 jëmëjtën mä ja lugäärë äänëˈëk tëëtsëˈëkpë, ta Moisés jyantsy jyotˈambëjky ets ojts ʻyˈëëwnë kyäjpxnë tëgatsyʼ, kyaj tnekymyëjkumääyë Jyobaa ixtëm pyaaty nyitëkëty (Sal. 106:​32, 33, TY). ¿Wiˈix wyimbëtsëëmy? Jyobaa kyaj tnekykyupëjky parë Moisés tyëkët mä ja Nax mëdiˈibë Yajtukwandaktë (Deut. 32:​50-52). Seguurë ko Moisés mëk tjäˈäwë, per ijt yujy tudaˈaky ets kyupëjk ko Jyobaa jyëjwijtsëmbijtë. Ja israelitëty mëdiˈibë ok ak jukyˈäjttë waˈan nanduˈun pyudëjkëdë ja yˈijxpajtënë Job parë tmëmadaktë ja amay jotmay. Pën pyawinmääytyë ja yˈijxpajtënë Job, mbäädë nety pyudëkëdë parë ttukmëtmaytyaktäˈäytyëdë Jyobaa wiˈix nyayjyawëdë, kyaj tyimnayajnaxëdët jantsy wäˈätsjäˈäy ets tkupëktët mëdë yujyˈat tudaˈakyˈat ko Jyobaa jyëjwijtsëmbitëdët.

13. ¿Wiˈix mbäät xypyudëjkëmë yˈijxpajtënë Job parë nmëmadakëmë amay jotmay? (Hebreos 10:36).

¹³ ¿Wiˈix mbäät xypyudëjkëm? Ninuˈun tyam nDiosmëduˈunëm, tsojkëp nanduˈun nmëmadakëmë amay jotmay (käjpxë Hebreos 10:36). Ixtëm nˈokpëjktakëm, waˈan nbëjk nˈijxëm o ngumoˈon ngudujkëm mët ko nmëdäjtëmë depresion o waˈan nmëdäjtëmë amay jotmay mëdë familyë o të yˈooky të tyëgooy tuˈugë njëëkyˈäjt nmëguˈukˈäjtëm. Ets waˈanë net jam pën wiˈix xyˈanëmäˈäyëm o jam ti ttuny mëdiˈibë mëk njäˈäwëm (Prov. 12:18). Perë yäˈädë liibrë mëdiˈibë xyëwˈäjtypy Job, xytyukniˈˈijxëm ko mbäät ndukmëtmaytyaktäˈäyëmë Jyobaa wiˈix nnayjyäˈäwëm ets ijtëm seguurë ko myëdoowˈitaampy (1 Juan 5:14). Yëˈë kyaj xytyukjotˈambëkäˈänëm pën nyajpëtsëˈëmëmë ääw ayuk mëdiˈibë kyaj yˈoyëty, duˈun ixtëm jyajtyë Job. Xymyoˈoyäˈänëmë jot mmëjäˈäw ets ja jot winmäˈäny parë nmëmadakëm ja amay jotmay (2 Crón. 16:9; Sant. 1:5). Ets pënë Jyobaa yˈijxypy ko tsojkëp xyjyëjwijtsëmbijtëm duˈun ixtëmë tjëjwijtsëmbijtyë Job, ta ttunäˈäny mët yëˈëgyëjxmë yˈAyuk, ëxpëjkpajn, tuˈugë mëjjäˈäy o nmëtnaymyaayëbëˈäjtëm mëdiˈibë tapë jyot wyinmäˈäny. Ja yˈijxpajtënë Job xytyukniˈˈijxëm nanduˈun ko pën xyjyëjpwijtsëmbijtëmë Jyobaa, oy ko ngupëjkëm (Heb. 12:​5-7). Job tyukˈoyˈäjt ko tmëmëdooyë Jyobaa ets ëjtsäjtëm ndukˈoyˈatäˈänëm nanduˈun ko ngupëjkëm ja ëwij käjpxwijën mëdiˈibë xymyoˈoyëm (2 Cor. 13:11). ¡Mëjwiin kajaa tijaty xytyukniˈˈijxëmë yˈijxpajtënë Job! Per ¿wiˈixë net mbäät ndukpudëjkëmë wiink jäˈäy? Min nˈokˈijxëm.

NˈOKˈYAJTUˈUNËMË LIIBRË MËDIˈIBË XYËWˈÄJTYPY JOB PARË NDUKPUDËJKËMË JÄˈÄY

14. ¿Wiˈixë jäˈäy ndukmëtmaytyakëm tiko jyaˈˈatyë ayoˈon?

¹⁴ Ko nëjkxëm jënˈayeˈey tëjkˈayeˈeybyë, ta näägë jäˈäy xyajtëˈëwëm tiko nˈayoˈowëm ets njantsy tyukˈawanëyäˈänëm wiˈixë Biiblyë jyënaˈany. Xëmë ndukmëtmaytyakëm ti tuun jäjtë jam Edén. Waˈan nˈanëmäˈäyëm ko Satanás yëˈë wyinˈëˈënë Adán mëdë Eva, ets ta tmëdëgooytyë Dios (Gén. 3:​1-6). Ets ta net ndukmëtmaytyakëm ko päätyë net tyam nˈayoˈowëm ets nˈoˈkëm mët ko Adán mëdë Eva kyaj myëdoowdë (Rom. 5:12). Ta net nˈanëmäˈäyëm ko Dios nyasˈijxëbë tiempë parë nyigëxëˈëgët ko Satanás andakp ets parë naxwinyëdë jäˈäy tnijawët ko yëˈë yajjëjptëgoyaampy tukëˈëyë ayoˈon jotmay (Apoc. 21:​3, 4). Jantsy oy ixtëm nnimaytyakëm ets mbäät pyudëkëdë mayë jäˈäy parë tnijawëdët tiko nˈayoˈowëm.

15. Ko pën xyajtëˈëwëm tiko nˈayoˈowëm, ¿wiˈix mbäät nyajtuˈunëmë liibrë mëdiˈibë xyëwˈäjtypy Job? (Ix nanduˈunë dibujë).

¹⁵ Ja tuk pëky wiˈix nanduˈun nˈatsoowëmbijtëm ko tuˈugë jäˈäy xyajtëˈëwëm tiko Dios tnasˈixë ayoˈon, yëˈë ko ndukmëtmaytyakëm wiˈix jyajtyë Job. Per jawyiin nˈanëmäˈäyëm ko jantsy oy ko duˈun dyajtëy. Ta net nˈanëmäˈäyëm ko tëëyëp, jukyˈäjt tuˈugë jäˈäy mëdiˈibë xyëwˈäjt Job, ets nanduˈun nyayajtëëwë ko tpatyë amay jotmay. Axtë winmääy ko Diosë nety duˈun tuunëp (Job 7:​17-21). Ko duˈun ja jäˈäy ndukmëtmaytyakëm, mbäät yajmonyˈixy yajmonyjawëty ko tnijawët ko duˈunyëmë jäˈäy nyayajtëyëty. Ta net ndukmëtmaytyakëm ko ixtëm jyajtyë Job yëˈë nety duˈun tuunëbë Satanás ets kyaj yëˈëjëtyë Dios. ¿Tiko Satanás dyaˈˈayooyë Job? Yëˈë nety yˈixaampy pënë naxwinyëdë jäˈäy ja jeˈeyë tmëdundë Dios ko tijaty yajmoˈoytyë ets ko myäjtstuttëp pën pyattëbë amay jotmay. Ta net ndukmëtmaytyakëm ko Dios kyaj yëˈë dyaˈˈayooyë Job, per nyasˈijxë, pes ijtpë nety seguurë ko naxwinyëdë jäˈäy kyaj myäjtstuˈudäˈänëdë ets ko yajnigëxëˈëgandëp ko Satanás andakp. Ta net nˈaktukmëtmaytyakëm ko Dios ojts tkunuˈkxy tkuwäˈänyë Job mët ko kyaj myäjtstutë. Ixtëm nˈijxëm, mbäät nˈagujkmoˈoy njotkujkmoˈoyëmë jäˈäy ko ndukmëtmaytyakëm ko Jyobaa kyaj yëˈë yaˈˈayoyëty.

16. Oknimaytyäˈäk wiˈixë Mario pyudëjkë ko ojts tkajpxyë Job.

¹⁶ Min nˈokˈijxëm wiˈixë Mario pyudëjkë ko ojts tkajpxyë Job. Mä jëmëjt 2021, tuˈugë nmëguˈukˈäjtëm ëwäˈkx käjpxwäˈkxpë nety mä telefënë ets ja tim jawyiimbë jäˈäy mëdiˈibë ojts tmëgajpxy, yëˈë Mario. Ta ojts tukwingugäjpxë tuˈugë tekstë ets ttukmëtmaytyaky ko Dios kyaj jeˈeyë tmëdoowˈity ko nmënuˈkxtakëm, nan yˈawäˈänëbë agujkˈäjt jotkujkˈäjtën mä tiempë myiny kyëdaˈaky. Ta net dyajtëëy wiˈixë nety të tmëdoy ja tekstë, Mario ta yˈatsooy ko yëˈë nety jap jyaapy tuˈugë neky mä nyayjëgajpxyëty mëdë fyamilyë mët ko nayaˈooganëp. Ta jyënany: “Nmëbëjkypyëtsë Dios, per mä yäˈädë jopy duˈunëts të njawë ko tëjëts xymyäjtstutnë”. Ko ja nmëguˈukˈäjtëm ojts tmëgajpxyë Mario myëmajtskˈok, ta tnimaytyaktë wiˈixë Job yˈayooy etsë Mario ta jyënany ko tkajpxtäˈäyaˈanyë Job. Ja nmëguˈukˈäjtëm, ta ttuknigejxy tuˈugë link parë mbäät tkajpxyë Biiblyë mä jw.org. ¿Wiˈix wyimbëtsëëmy? Mario ta tyëjkë ëxpëjkpë ets agujk jotkujk jyantsy nyayjyäˈäwë ko mbäät tˈixyˈaty ja Dios mëdiˈibë tsojkëp ets mëmääy mëdäjëp.

17. ¿Tiko mijts xykyuˈëw xykyukäjpxë Jyobaa ko ojts dyajkujayëty mä Biiblyë wiˈix jyajty kyëbejtyë Job? (Job 34:12).

¹⁷ Ixtëm nˈijxëm, Biiblyë mëjwiin kajaa tmëdatyë mëkˈäjtën, pes pyudëjkëp ets jyotkujkmoopy pënaty yajnäjxtëbë ayoˈon jotmay (Heb. 4:12). Mëjwiin kajaa nmëjjäˈäwëm ko Jyobaa ojts dyajkujayëty mä yˈAyuk wiˈix jyajty kyëbejtyë Job (Job 19:​23, 24). Mä yäˈädë liibrë mëdiˈibë xyëwˈäjtypy Job xytyukˈijxëm yajxon ko Jyobaa ‘käˈäp tii tëgatsy ttuny’ (käjpxë Job 34:​12, TY). Xytyukˈijxëm nanduˈun tiko tnasˈixë ayoˈon ets ti mbäät nduˈunëm parë nmëmadakëm. Xypyudëjkëm nanduˈun parë njotkujkmoˈoyëm pënaty yajnäjxtëbë ayoˈon jotmay. Mä jatuˈukpë artikulo nnijawëyäˈänëm tijaty xytyukniˈˈijxëmë yäˈädë liibrë mëdiˈibë xyëwˈäjtypy Job ets xypyudëkëyäˈänëm wiˈix mbäät nyäjkëmë ëwij käjpxwijën.