Yaˈixëdë ko mmëjjäˈäwëp ko Jyobaa yˈoyjyaˈayëty

KO NˈIJXËMË Jyobaa kyojy pyëjtaˈaky, ta nbëjkëmë kuentë ko yëˈë tuˈugë Dios diˈib jantsy oyjyaˈay (Santya̱ˈa̱gʉ 1:17). Extëm nˈokpëjtakëm, kyaj jeˈeyë tuˈuk majtskë mëtsäˈä ojts tpëjtaˈaky tsäjpotm, miyonkˈamën tpëjtaky. Etsë tyäˈädë Naxwinyëdë nan të dyajwinduky mëdë ääy kepyë tsujatypyë (Salmo 65:12, 13; 147:7, 8; 148:3, 4).

Tëëyëp, ojts tuˈugë Dios mëduumbë mëjwiin kajaa tmëjjawë tijatyë Jyobaa të dyajkojy, pääty axtë jyaay tuˈugë ëy. Mijts mbäät xykyajpxy wiˈix jyënaˈanyë tyäˈädë ëy mä Salmo 104. Tyäˈädë yetyëjk duˈun jap jyënany ko myëjkumayaambyë Jyobaa nuˈun ja xyëë jyukyˈäjtën (Salmo 104:33). ¿Nanduˈun mijts xytyunäˈäny?

JYOBAA XYMYOˈOYËM TUˈUGË OYBYË IJXPAJTËN

Jyobaa tsyejpy ets ëtsäjtëm nanduˈun nˈoyjyaˈayˈäjtëm extëm yëˈë. Pääty twinmäˈänymyooyë apostëlë Pablo parë duˈun tkujayët: “Ëwij käjxwij ja mëkjäˈäytyëjkëty ko katë nëgoo myëj pyäädëdë es kyaj jeˈeyë tjotmoˈoyët ja mëkjäˈäyˈat, mët ko këjx näjxpëˈë. Waˈan niˈigyë tpëjtaˈaky ja wyinmäˈäny mä Dios, diˈibë jikyˈäjtp es xymyoˈoyëm tëgekyë mëjwiin kyajaa es njotkujkˈäjtëm. Tukˈanaˈamdë es, ttundët diˈibë dëˈën oy. Waˈan nayajmëkjäˈäytyäˈägëdë mët ja oybyë tuunk, es dyajwäˈxäˈänët diˈibë myëdäjt jyaygyajptëp. Es ko dëˈën ttunët, nyapatypy extëm ttukjëjpˈixy ja jyikyˈäjtën diˈibë miimp oknëm, es dëˈën yˈaxäjëp ja jikyˈäjtën diˈibë tëyˈäjtënbë” (1 Timotee 6:17-19).

Ko Pablo ttuknigejxy ja myëmajtskpë neky ja Corinto jäˈäyëty, ta jap tnimaytyaky wiˈix mbäät yˈoyjyaˈaytyäˈäktë. Jyënany: “Niduˈuk niduˈugëty miits xyaktët ja mbudëjkën extëmë naty të xytyukniwinmayëdë, kyaj majtsk ää majtsk jot es kyaj aguanëbë, mët ko Dios tsyejpy ko ti yajˈyaky xondaˈakyˈää xondaˈakyjyot” (2 Korintʉ 9:7). ¿Pën tyukˈoyˈajtypy ko nˈoyjyaˈaytyakëm? Yëˈë ja jäˈäy diˈib yajtëgoyˈajtypyë naybyudëkë. Per nan ndukˈoyˈäjtëm ëtsäjtëm mët ko xykyunuˈkxëmë Jyobaa (2 Korintʉ 9:11-14).

Pablo nan yˈanmääy ja Corinto jäˈäyëty ko tsojkëp nmoˈoyëmë dyoskujuyëmë Dios mët ko të xymyoˈoyëm tuˈugë regalë diˈib niˈigyë tsobatp (2 Korintʉ 9:15). Tyäˈädë regalë, yëˈë tukëˈëyë oyˈäjtën diˈib të xynyamoˈoyëm mët yëˈëgyëjxmë yˈUˈunk, Jesukristë. Ets kyaj yajpäätyë ää ayuk parë nimaytyakëm.

¿Wiˈix mbäät nyajnigëxëˈkëm ko nmëjjäˈäwëm tijatyë Jyobaa mëdë Jesus të ttuny ets tijaty xyˈaktukmëdunäˈänëm? Tuk pëky, yëˈë ko nˈyojxëmë xëë tiempë, jot mëjää etsë meeny sentääbë parë nmëduˈunëmë Jyobaa ets nbudëjkëmë jäˈäy parë yˈixyˈatëdët. Tyäˈädë mbäät niˈamukë duˈun nduˈunëm, oy nmëdäjtëm kajaa meeny sentääbë ets oy nëgoo ngamëdäjtëm (1 Crónicas 22:14; 29:3-5; Lukʉs 21:1-4).

Wiˈix nääk tpudëkëdë Diosë tyuunk abëtsemy nyaxwinyëdë

Ja Dios mëduumbëty diˈib jukyˈäjttë mä primer siiglë, myëdäjttëp ijty ja kostumbrë parë tpëjkëˈëktë abëky ja meeny sentääbë diˈib nyayakandëp mä ja tuˈukmujkën. Nanduˈun tyam ttundë nimayë Dios mëduumbë, yˈagoˈonëdëp ja myeeny syentääbë mä ja käjë diˈib yajpatp mä tuˈukmujkën (1 Korintʉ 16:2). Ta netë tyäˈädë meeny yajkexy poˈoboˈo jam Betel. Per mijts nan mbäät jam nidëyë xykyexy. Pën mnijawëyaampy wiˈix mbäät xykyexy, käjpx mä sukursal diˈib nyikëjxmˈäjtypy ja lugäär mä mtsëënë. Mä Internet www.jw.org/mco, jap xypyäädëdë direksion. Tyää yajnigajpxy wixaty mbäät xytyuny:

WIˈIX NNAYÄJKËM TIJATY

Mbäät japyë mä bankë xykyajxnaxyë meeny o mëdë tarjeta de débito o crédito. Mä näägë paˈis nan mbäät yajkexy mä sitio jw.org o mä wiinkpë sitio diˈib mä Internet.
Mbäät xynyayakyë meeny sentääbë, o tijaty tsobatp extëmë oorë platë. Ko nety duˈun xyakäˈäny, ta xyjyaˈayët tuˈugë neky mä xynyigajpxy ko duˈunyë xynyayakäˈäny.

YAJˈYAKYË MEENY SENTÄÄBË DIˈIB YAJKOONËMBIJTP

Mbäät xyakyë meeny sentääbë ets ko nety xyajtëgoyˈaty, ta yajkoonëmbitët.
Yaˈoyë tuˈugë neky mä xynyigajpxy ko myajkypy ja meeny, per ko mtsejpy parë jatëgok yajkoonëmbitët.

WIˈIX MBÄÄT NˈAKˈYÄJKËM TIJATY

Min nˈokˈijxëm kanäk pëky wixaty mbäät nbudëjkëmë Diosë tyuunk diˈib yajtuump abëtsemy nyaxwinyëdë. Pën mdunaampy extëm yajnigäjpxäˈäny, yajtëw jam Betel pën mbäät duˈun xytyuny. Net xynyijawët tijaty mbäät xyaky parë xypyudëkëdë Diosë tyuunk. Mä tuˈuk tuˈugë paˈis tëgäjtspë ley, pääty jyëjpˈamëty ets xyajtëwëdë jäˈäy diˈib nyijäˈäwëbë ley ets wiˈix tijaty yajkugëbety.

Seguurë: Pën mmëdäjtypyë mseguurë mä të xykyujuyë mjukyˈäjtën o pën të myajjubilaraty, mbäät ja meeny jam xykyexy mä sukursal diˈib myëdäjttëbë Jyobaa tyestiigëty.

Kuentë diˈib mmëdäjtypy mä bankë: Mijts mbäät xyaˈoyë tuˈugë neky mä xynyigajpxy ko ja meeny diˈib mmëdäjtypy mä bankë, certificado de depósito o ja fondo de jubilación, yëˈë yajtunëbë sukursal diˈib myëdäjttëbë Jyobaa tyestiigëty mientrës mjukyˈaty. Nan mbäät xyajnigutukë ko nan yëˈë myëwëˈëmëp ja meeny sentääbë ko mˈoogët. Per duˈun xytyunët extëm ja bankë dyajnigutukë.

Acciones etsë bonos: Mbäät xynyamoˈoyë sukursal diˈib myëdäjttëbë Jyobaa tyestiigëty. Nan mbäät xyaˈoyë tuˈugë neky mä xynyigajpxy ko ja acciones etsë bonos jam yajkaxët ko mˈoogët.

Nax: Pën mijts jamë mnax diˈib mbäät yajtooky, mbäät xynyayaky mä sukursal diˈib myëdäjttëbë Jyobaa tyestiigëty. Ets pën jam mtsëënë mä ja mnax, mbäät xyaˈoyë tuˈugë neky mä xynyigajpxy ko jaanëm xykyëyakäˈäny ko nety mˈoˈknë.

Yajnayaky ja meeny diˈib uˈunkˈäjtp: Mbäät xyakyë meeny o títulos valores mä sukursal diˈib myëdäjttëbë Jyobaa tyestiigëty, ets xynyigäjpxët nuˈunën xytsyeky myajmoˈoyët ja meeny jëmëjt mientrës mjukyˈaty. Ets mbäät kyaj ti myajtukugëbety mä tadë jëmëjt jëmëjt ko nety duˈun ja meeny xyaky o títulos valores.

Testamentë etsë fideicomisos: Mijts mbäät tyam xyaˈoyë tuˈugë testamentë o fideicomiso mä xynyigajpxy ko ja mnax, mjëën mdëjk o meeny sentääbë, yëˈë myëwëˈëmëbë sukursal diˈib myëdäjttëbë Jyobaa tyestiigëty ko nety mˈoˈknë. Ko duˈun xytyunët mbäät kyujënaky ja mgugëbety.

Pën mˈaknijawëyaampy wixaty mbäät xyakyë meeny parë xypyudëkëdë Diosë tyuunk diˈib yajtuump abëtsemy nyaxwinyëdë, käjpxë foyetë Donaciones planificadas para favorecer el servicio del Reino en todo el mundo. Miimp Inglés ets amxan. Kom tëgäjtspë ley mä tuˈuk tuˈugë paˈis, mbäät kyaj nääk mduˈunxëty diˈib miimp mä tyäˈädë foyetë. Nan myaˈˈanmaapy ets ko xykyäjpxtäˈäyët, ta xyajtëwët tuˈugë jäˈäy diˈib nyijäˈäwëbë ley ets wiˈix yajˈyakyë kugëbety. Mayë jäˈäy yäjktëbë meeny sentääbë parë tpudëkëdë Diosë tyuunk diˈib yajtuump abëtsemy nyaxwinyëdë ets ko duˈun ttundë, ta kyaj nëgoo kyugëbattë. Pën mä mbaˈis yajmëdäjtpë tyäˈädë foyetë, amdowë sekretaaryë diˈib tuump mä mduˈukmuky.

Pën mˈaknijawëyaampy niˈigyë, yajnidëwë mä sukursal diˈib nyikëjxmˈäjtypy ja lugäär mä mtsëënë.