¿Mä tpëktë meeny sentääbë Jyobaa tyestiigëty diˈib yajtuundëp mä ryelijyonk?

Yëˈë këˈëmë Jyobaa tyestiigëty yäjktëp tsojkëngyëjxm parë dyajnëˈëyoˈoy dyajtuˈuyoˈoytyë ja tuunk abëtsemy nyaxwinyëdë.a Mäts nduˈukmuktë tapë käjuˈunk mä mbäät yaˈˈagonë meeny sentääbë, ets nan mbäät wiˈixëm yajˈyaky extëm yajnimaytyaˈaky mä sitio jw.org mä jyënaˈany, meeny yajnayaky. Këˈëm nwinmäˈäyëm mä ntsojkëm ja meeny sentääbë tyunët, pën yëˈë ndukpudëkëyäˈänëm mä tyuˈuyeˈey ja tuunk abëtsemy nyaxwinyëdë, o japyë tyunët mä nduˈukmujkëm o mbäät nyäjkëm parë tyunët majtsk pëky.

Nituˈugë Jyobaa tyestiigë kyayaˈˈanëëmë nuˈun ja meeny sentääbë dyakët, kyaj yaˈˈamdoyë diesmë ets nan kyaj yaˈˈamdoyë meeny sentääbë nuˈun gyanaraty (2 Korintʉ 9:7). Mäts nduˈukmuktë kyaj pënë meeny sentääbë dyajmuky ets nan kyaj pën tˈajuytyuky ko tyëkë. Nan kyaj yajnibëky ko pën nyëbety, ko tuˈugë jäˈäy yˈooky o ko pën pyeky. Ets nan kyaj kyaakytyook tyojkxtooktë parë dyajmuktë meeny sentääbë, kyaj ttukniwitsëdë parë jäˈäy dyaˈëyëˈëk dyajkuyattët, ttundëdë rifë, dyaˈˈats dyajputtët parë ja meeny sentääbë kyäˈäjët. Nan kyaj pën tˈamdowdë meeny sentääbë. Ets nan kyaj yajnigajpxy pënaty ja meeny sentääbë nyayajkypy (Matewʉ 6:2-4). Mä sitio diˈibëts nmëdäjttëp o mä liibrë rebistë, kyaj pyëtsëmyë anunsyë mä tijaty yaˈˈawan yaˈˈayääxë.

Mäjaty tyuˈukmuktë Jyobaa tyestiigëty, poˈoboˈo yajnigajpxy nuˈun ja meeny të tyuny o nuˈun yˈakˈyajmëdaty ets mbäät oypyënëty tnijawë. Ja meeny diˈib käˈäp mä tuˈuk tuˈugë kongregasionk xëmë jatëgok yaˈˈaˈixë ja resiibë parë yajnijawë pën duˈunën të jyantsy tyuny ja meeny (2 Korintʉ 8:20, 21).

Wiˈix mbäät yajnayakyë meeny sentääbë

• Mbäät yaˈˈagonë mä käjë: Yajpatpë tyäˈädë käjë mä mbäät xyˈagonë meeny o cheque mäjatyëts nduˈukmuktë o mä tyunyëtyë asamblee.

• Mbäät nnayäjkëmë meeny sentääbë mä tyäˈädë sitio: Mä kanäägë paˈis, mbäät dyajtundë tyäˈädë pajina “Nayakë meeny sentääbë mä Jyobaa tyestiigëty”, parë tkajxnaxtët ja meeny diˈib myëdäjtëp mä bankë, mä tyarjetë de débito o crédito.b Näägë Testiigëty tyukniwijtsëp nuˈun dyakäˈändë poˈoboˈo etsë net ttuknibanëdë parë duˈun yajpuwitsët (1 Korintʉ 16:2).

  

• Nˈoktukniwijtsëm kontiempë tijaty nyakäˈänëm: Näˈäty, tsojkëp yajtukniwitsët kontiempë ko ti nnayakäˈänëm ets xypyudëjkëm tuˈugë abogaadë. Ko duˈunë jäˈäy ttuny, ta kyaj nëgoo dyaky ja kyugëbety. May yajnidëˈëwëdëp wiˈix mbäät tijaty tnayaktë mientrës jyukyˈattë ets ti tsyojktëp yajmëwëˈëmët ko nety të yˈoˈknë. Parë xynyijawët wiˈix mbäät tijaty xynyayaky, yajnidëwë mä tmëdattë syukursalë Jyobaa tyestiigëty:

  • Kuentë diˈib mmëdäjtypy mä bankë

  • Seguurë mä të xykyujuyë mjukyˈäjtën o mä xynyikoombetyë meeny ko nety myajjubilaräjnë

  • Nax tëjkopk

  • Acciones etsë bonos

  • Testamentë etsë fideicomisos

Nan yäjktëbë meeny sentääbë näägë jäˈäy diˈib kyaj Tyestiigëty parë tpudëkëdë Diosë tyuunk.