TIJATYË ËNÄˈKTËJK NAYAJTËËWËDËP
¿Wiˈixëts mbäädë Biiblyë xypyudëkë? Myëduk pëky: Ix tijatyë Biiblyë myaytyakypy
Briana, mëdiˈibë mäjmokxë jyëmëjt jyënaˈany: “Tëts njakäjpxäˈänyë Biiblyë, per nwinmayëts ko näˈänëmëts ngäjpxtäˈäyët”.
¿Nanduˈun mwinmay? Pën duˈun, yäˈädë artikulo mbudëkëyanëp.
¿Tidaa ko jyëjpˈamëty ngäjpxëmë Biiblyë?
¿Yajtsipkaˈxp ko ngäjpxëmë Biiblyë? Mbäät duˈun mwinmay mët ko Biiblyë jantsy majpxy, mutskatyë lyetrë ets kyaj tmëminyë dibujë. Kyaj dyuˈunëty extëm ko nˈijxëmë telebisionk o pelikula.
Per nˈokpëjktakëm tuˈugë ijxpajtën: ko xypyäädët tuˈugë jeky kyääxë mëdiˈibë myëmiimbyë may oorë may blyatë, ¿këdii mjantsy xyondäˈägëp ets myaˈˈawäˈätsäˈänëp?
Pesë Biiblyë duˈun extëm tuˈugë jeky kyääxë mëdiˈibë myëmiimbyë oorë platë. Mbäät jap xypyaatyë oybyë ëwij käjpxwijën mëdiˈibë mbudëkëyanëp extëm:
Wiˈix tijaty xytyunët mä mjukyˈäjtën.
Wiˈix oy mˈitët mëdë mdääk mdeety.
Wiˈix xypyäädëdë oybyë mëtnaymyaayëbë.
Wiˈix kyaj nëgoo tii xymyëmay xymyëdäjët.
Per ¿mbäät tyam xypyudëjkëmë Biiblyë mëdiˈibë tëëyëp yajjääy? Mbäät. Jaˈko Dios yëˈë wyinmäˈänymyooy “ja jyaˈayëty es tkëxjäˈäyët tëgekyë ja Diosë jyaaybyajtën” (2 Timotee 3:16). Pääty ja ëwij käjpxwijën mëdiˈibë miimp mä Biiblyë yëˈë Dios yajkypy, mëdiˈibë mëj ijt abëtsëmy nyaxwinyëdë.
Biiblyë duˈun extëm tuˈugë kääxë mëdiˈibë myëmiimbyë oorë platë. Mbäät jap xypyaatyë oybyë ëwij käjpxwijën.
¿Wiˈix mbäät ngäjpxëmë Biiblyë?
Tuk pëky yëˈë ko xykyäjpxët mä tyim tsondaˈaky axtë mä jyëjpkëxy. Ko duˈun xykyäjpxët, ta xyjyaygyukët tidën myaytyäˈägaambyë Biiblyë. Parë xykyäjpxtäˈäyët, mbäät xytyuny extëm yä majtsk pëky yajnigajpxy.
Mbäät xykyäjpxtsondaˈaky mä Génesis axtë mä Diˈibʉ Jatanʉp o Apocalipsis.
Mbäät nanduˈun xykyäjpxtsondaˈaky tijaty jawyiin tuun jäjtë ets duˈun xypyanëjkxët axtë ko xyajkëxët.
Mbäät nanduˈun xytyuny: Käjpxë tekstë mëdiˈibë miimp mä foyetë Naybyudëkë parë nˈëxpëjkëmë Diosë yˈAyuk numero 4 mä jyënaˈany: Tijaty tuun jäjtë ko Jesus jyukyˈajty yä Naxwiiny.
Majtsk pëky, yëˈë ko xyˈëxtäˈäyët mä Biiblyë ti mbäät mbudëkëty mä ja jotmay mëdiˈibë jam mbatypy. Extëm nˈokpëjktakëm:
¿Mjapäädaambyë mëtnaymyaayëbë mëdiˈibë mbäät xytyukjotkujkˈaty? Käjpx mä yajnimaytyaˈagyë David mëdë Jonatán (1 Samuel, kapitulo 18-20). Ta net xykyäjpxët mä liibrë Jukyˈat agujk jotkujk leksion 48, numero 4 parë xynyijawët wiˈix mbäät mbudëkëty yˈijxpajtënë David mëdë Jonatán.
¿Mjamëdataampy niˈigyë jot mëjääw parë xyjyëjpkudijët tijaty myajtëgoyanëp? Käjpx mä Génesis kapitulo 39 mä yajnimaytyaˈaky wiˈixë José ojts tjëjpkudijë mëdiˈibë jayajtëgoyanë. Ta net xykyäjpxët mä liibrë Jukyˈat agujk jotkujk leksion 41, numero 3 parë xynyijawët wiˈix mbäät xypyanëjkxë José yˈijxpajtën.
¿Mnijawëyaampy wiˈix mbäät mbudëkëty ko Dios xymyënuˈkxtäˈägët? Käjpx mä Nehemías kapitulo 2. Ta net xyˈixët ja pelikula Nehemías: Ja jotkujkˈäjtën diˈib yajkypyë Jyobaa yëˈë xymyëjääwmoˈoyëm (myëduk pëky). Ta net xywyinmayët wiˈixë Nehemías pyudëjkë ko tmënuˈkxtakyë Jyobaa.
Mbäät nanduˈun xytyuny: Ko xykyäjpxäˈänëdë Biiblyë ëxtäˈäy tuˈugë lugäär mä kyaj tii nyeˈemy parë jamyë ja jot mwinmäˈäny xypyëjktäˈägët.
Tëgëk pëky, yëˈë ko xykyäjpxët tuˈugë tekstë o tuˈugë salmo ets xywyinmayët wiˈix mbäät mbudëkëty. Ko xykyäjpxtäˈäyët mbäät mnayajtëyëty:
¿Tiko Jyobaa ojts dyajkujayëty extëm yä jyënaˈany?
¿Tiijëts xytyukniˈˈijxëp mä Jyobaa ets wiˈix tijaty ttuny?
¿Wiˈixëts mbäät xypyudëkë mätsë njukyˈäjtënë mëdiˈibëts yä të ngajpxy?
Mbäät nanduˈun xytyuny: Tuknibëjktäägë wiˈix xykyäjpxäˈäny. Mbäät xyajtunyë “Programë mä yajkajpxyë Biiblyë” mëdiˈibë miimp mä sitio ets jap xykyujayët näˈä xykyäjpxtsondaˈaky.