¿Wiˈixëts mbäädë Biiblyë xypyudëkë? Myëmajtsk pëky: Jat wiˈix xytyukxondäˈägët ko xykyäjpxëdë Biiblyë

Will, tuˈugë mixy mëdiˈibë jeˈeyënëm yaˈkpëtsëmy jyënaˈany: “Mbäät mwinmay ko yajtsipkaˈxp ko ngäjpxëmë Biiblyë ets mbäät duˈun njäjtëm, per net pën kyaj nnijäˈäwëm wiˈixë Biiblyë ngäjpxëm”.

¿Mnijawëyaampy ti mbäät xytyuny parë xytyukxondäˈägët ko xykyäjpxëdë Biiblyë? Min nˈokˈijxëm.

• Naybyawinmayëdë ko tam myajpääty

• Payeˈey

• Wiˈix wyinmaytyë wiinkpë ënäˈktëjk

Naybyawinmayëdë ko tam myajpääty

Mbäät duˈun xykyajpxy Biiblyë parë xytyukxondäˈägët:

1. Winˈix tuk pëky mä Biiblyë mëdiˈibë mgäjpxaampy. Mbäät yëˈëjëty mëdiˈibë Biiblyë myaytyakypy tyuun jyäjtë, o mëdiˈibë tuk pëky miimp mä Evangelio o ja maytyaˈaky mëdiˈibë yajkäjpxp mä Biiblyë mëdiˈibë miimp mä jw.org.

2. Käjpx tuk pëky mä Biiblyë. Mbäät xykyajpxy naytyuˈuk o xykyajpxy mëk mëdë mfamilyë o mmëtnaymyaayëbë, mbäät niduˈuk pën tkäjpxtsoony ja tekstë ets ok mbäät niganääk tkäjpxtë pën niganäägë jäˈäy jap yajnimaytyäˈäktë.

3. Mbäät nanduˈun xytyuny:

   • Yaˈoyë tuˈugë dibujë o kanääk extëm yajmaytyaˈaky tijaty tuun jäjtë, ets këxjäˈäy pyëˈääy tii mëdiˈibë tuun jäjtë.

   • Ko xykyäjpxët mä yajnimaytyaˈaky tuˈugë Diosmëduumbë, kujayë mä tuˈugë mguadernë tuk wääts tijaty tyuun, ja tuk wääts wiˈix jyaˈayˈajty ets xytyukjëjpjayët tijaty kunuˈkxën ojts tˈaxäjë.

   • Käjpxë Biiblyë extëm tuˈugë jäˈäy mëdiˈibë yajnäjxypyë notisyë ets yajtëwdë pënaty jap yajnimaytyaktëp waˈan tnigäjpxtë wiˈix tijaty të tyuny të jyatyëty.

   • Pën jap yajnimaytyaky tuˈugë jäˈäy mëdiˈibë kyaj oy tijaty ttuuny pawinmay wiˈixxyëp wyimbëtsëëmy koxyëp kyaj duˈun yˈadëtsy, extëmë Pedro ko jyënany ko kyaj tˈixyˈatyë Jesus (Markʉs 14:66-72). ¿Tixyëbë Pedro ojts ttuny koxyëp ja jäˈäy yajtëëwë pën yëˈë mëdë Jesus jyëdity?

   • Mbäät xykyujayë tuˈugë maytyaˈaky mëdiˈibë këˈëm të xypyawinmay wiˈix tijaty tyuun jyäjtë mä Biiblyë ets kujayë nanduˈun tijaty të mdukniˈˈixëty (Romanʉs 15:4).

     

Payeˈey

Pën mbayeˈepy yajxon mëdiˈibë jam mgajpxypy mä Biiblyë mbäät xypyaaty mëdiˈibë kyaj nety xynyijawë, mët jeˈeyë ko nbayeˈeyëm tuˈuk o majtskë ayuk, mbäät mëjwiin kajaa tijaty xytyuknijäˈäwëm.

Extëm nˈokpëjktakëm, ijxkijpxyë Matewʉ 28:7 mëdë Markʉs 16:7.

• ¿Tidaa ko Marcos ojts tkujayë ko yaˈˈawanët ja Jesusë yˈëxpëjkpëty “es ja Peedrë” ko jam mëët nyaybyäädëdët Galilea?

• Okwinmay waanë: Marcos kyaj ojts tˈixy tijaty tuun jäjtë, yëˈë jyawë Pedro tukmëtmaytyakë.

• Ja oorë platë mëdiˈibë yajpatp: ¿Tidaa ko Pedro jotkujk nyayjyäˈäwë ko tmëdoy ko Jesus ixanëp jatëgok? (Markʉs 14:66-72). ¿Wiˈixë Jesus ttukˈijxyë Pedro ko jyantsy myetnaymyaayebëˈajtypyë nety? ¿Wiˈix mbäät xypyanëjkxë yˈijxpajtënë Jesus?

Ko nbayeˈeyëm tijaty ngäjpxëm mä Biiblyë ets ko jam nnaybyawinmäˈäyëm, ta niˈigyë njantsy kyäjpxäˈänëm.