Nˈokwinmäˈäyëm wixaty ndukˈoyˈäjtëm ko nmaˈkxtujkëm. Ko nmaˈkxtujkëm xypyudëjkëm parë agujk jotkujk nyajpatëm, kyaj nˈyubajt nbäˈämbajtëm ets kyaj nëgoo ti nmëmäˈäy nmëdäjëm. Xypyudëjkëm nanduˈun parë oy nˈijtëm mëdë nmëguˈukˈäjtëm ets kyaj nyajamˈäjtëmë jëën tsip mä nduˈukmujkëm. Pën kyaj pojën njotˈambëjkëm ko jam pën wiˈix xytyuˈunëm, ta kyaj nëjkx nyajmëjwindëjkëm ja jotmay (Sal. 37:​8, notë; Prov. 14:29). Duˈunë nety nbanëjkxëmë Jyobaa yˈijxpajtën ets niˈigyë nmëwingoˈonëm. Jantsy oy ko nmaˈkxtujkëm, pes mëjwiin kajaa ndukˈoyˈäjtëm. Näˈäty tsiptakp duˈun njäˈäyˈäjtëm, perë Jyobaa xypyudëkëyäˈänëm parë nmaˈkxtujkëm. Mientrës njëjpˈijxëm ja jembyë jukyˈäjtëm maˈkxtujkën myëët, mbäät nˈijtëm seguurë ko “Jyobaa yˈijxypy pënaty tsëˈk jäˈäwëdëp, pënaty yˈëwxijt jyëjpˈijxtëp parë tsyok jyawëdët” (Sal. 33:18). Pääty, nˈokpëjktakëmë winmäˈäny parë xëmë nmaˈkxtujkëm. w23.08 paj. 22 parr. 7; paj. 25 parr. 16, 17

Santiago jyënany ko niˈamukë ja Diosmëduumbëty kyaj nety tsyobäädäˈäny ja myëbëjkënëty pën kyaj dyajnigëxëˈëktë mä ja tyuˈunën (Sant. 2:​1-5, 9). Santiago myaytyak nanduˈun, pen tuˈugë jäˈäy yˈijxypy ko ja myëguˈuk yajtëgoyˈajtypy ja wyit xyox o ja kyaˈay yˈukën, per pen kyaj tpudëkë kyaj tsyobääty oyë netyë nuˈun jyanaynyigajpxyëty ko tmëdatyë mëbëjkën (Sant. 2:​14-16). Santiago yëˈë myaytyakë yˈijxpajtënë Rahab parë ttukˈijxtë ja myëguˈuktëjk wiˈixën tuˈugë jäˈäy dyajnigëxëˈëky ko tmëdatyë mëbëjkën mët ja tyuˈunën (Sant. 2:​25, 26). Rahab myëdoyˈäjt wiˈixë Jyobaa yajnimaytyaˈaky ets ko yëˈë nety pyudëjkëp ja israelitëty (Jos. 2:​9-11). ¿Per ti tyuun parë dyajnigëxëˈky ko myëdäjtypyë netyë mëbëjkën? Ojts tˈyuˈutsy nimajtskë ja käjpn niˈˈijxpëty parë kyaj jäˈäy yaˈoogëdët. Ets ko duˈun dyajnigëxëˈkyë myëbëjkën, ta Dios yajnäjxë wäˈäts extëmë Abrahán oyë nety kyawäˈätsjäˈäyëty ets oyë nety kyaˈisraelitëty. Ja yˈijxpajtënë Rahab yëˈë xytyukˈijxëm ko jëjpˈam nyajnigëxëˈkëm mët ja tuˈunën ko nmëdäjtëmë mëbëjkën. w23.12 paj. 5, 6 parr. 12, 13

Niˈamukë ninuˈun nDiosmëduˈunëm kyaj mbäät yëˈëyë ndukjotkujkˈäjtëm ko të nnijäˈäwëm ja tëyˈäjtënë wingëjxypyë. Tsojkëbën njaygyujkëm “ja këkpë nimëjääbë wyinmäˈäny ja Dios” ets xytyukpudëkëyäˈänëm ja myëjääw (1 Kor. 2:​9, 10). Pääty, oyxyëp ko xytyuknibëjktäägë parë mˈëxpëkët naytyuˈuk ets niˈigyë xymyëwingonëdë Jyobaa. Taaˈäjtp kanäk pëky wiˈix mbäät duˈun xytyuny. Extëm nˈokpëjktakëm, mbäät xypyayeˈey wiˈixë Jyobaa ttukˈijxy tëëyëp pënaty mëduunëdë ko tsyojkypy, ets wiˈix nanduˈun tyam mdukˈixyëty ko mtsojkëp. Mbäät nanduˈun xyˈëxpëky wiˈixë Jyobaa ojts ttukˈaneˈemy ja israelitëty parë yˈawdatëdët ets wiˈix ttsoky parë tyam yaˈˈawdatët. O mbäät nanduˈun xyˈëxpëky këkpäät wiˈix yˈadëëy tijatyë nety të yajnaskäjpxë mä Jesus ko myiiny yä Naxwiiny. Seguurë ko mdukxondäˈägaampy ko duˈun xypyayeˈeyët mä Índice de las publicaciones Watch Tower ets mä foyetë Naybyudëkë parë tijaty tpayoˈoytyëdë Jyobaa tyestiigëty. Ko duˈun mˈëxpëkët, mbudëkëyanëp parë niˈigyë mëbëjkën xyajkëktëkët ets “nëjkx xypyaatyë Diosë yˈëxpëjkën” (Prov. 2:​4, 5). w23.10 paj. 18, 19 parr. 3-5