Jyobaa tyuknijawëyaampy pënaty mëduunëp ko tsyojkypy ets kyupëjkypy. Mä Biiblyë majtsk ok jap yajnigajpxy ko Jyobaa tˈanmääyë yˈUˈunk ko tsyojkypy ets ko kyupëjkypy (Mat. 3:17; 17:5). ¿Mjamëdowaampy ko Jyobaa mˈanëˈëmxëty ko mtsojkëp ets ko jotkujk xyajnayjyawëty? Jyobaa kyaj mbäät mmëgajpxyëty jam tsäjpotm, per mmëgäjpxëp mët yëˈëgyëjxmë Biiblyë, mä myiny ja yˈääw yˈayuk. Extëm ko ngäjpxëm mä Biiblyë wiˈixë Jesus tsuj yajxon ojts tmëgajpxy ja yˈëxpëjkpëty, mbäät nwinmäˈäyëm ko nanduˈunënë Jyobaa xymyëgäjpxëm. Jesus duˈun meerë ojts jyaˈayˈaty extëmë Tyeety, pääty ko ngäjpxëm mä Biiblyë mä tˈanmääy ja yˈëxpëjkpëty ko tsyojkypy, mbäät nbawinmäˈäyëm ko nanduˈunënë Jyobaa xyˈanmäˈäyëm (Fwank 15:​9, 15). Ko nbatëmë jotmay, kyaj mbäät nwinmäˈäyëm ko Jyobaa kyaj xyˈokkupëjkënë, jaajën mä mbäät nyajnigëxëˈkëm ko mëk ntsojkëm ets ko ndukˈijxpajtëm (Sant. 1:12). w24.03 paj. 28 parr. 10, 11

Pën jamë mˈënäˈkuˈunk, tiko xykyapudëkëdë parë kyomentarattët naa kon. Näˈäty, mä reunyonk yëˈë yajmaytyakpë kasäädë jäˈäyë yˈamay jyotmay o wiˈix mbäät njukyˈäjtëm extëmë Dios tkupëkët. Per mä tuˈuk majtskë parrafo, mbäädë ënäˈkuˈunk kyomentarattë. Mbäät nanduˈun xytyukmëtmaytyäˈäktë ko kyaj xëmë yajmoˈoyäˈändë ja kyomentaaryë oy ja kyëˈë tjakonëˈëktë. Ko duˈun xytyukjaygyukëdët, ta kyaj wiˈix nyayjyawëyäˈänëdë ko ja wiinkpë yajmoˈoytyët ja kyomentaaryë (1 Tim. 6:18). Niˈamukë mbäät ngomentaräjtëm parë nyajmëjpëtsëˈëmëmë Jyobaa ets nmëjääwmoˈoyëm ja nmëguˈukˈäjtëm (Prov. 25:11). Näˈäty, mbäät yëˈë ngomentaräjtëm wiˈix të njäjt të ngëbajtëm, per kyaj tiko ëtsäjtëm jeˈeyë ndimynyaynyimaytyakëm (Prov. 27:2; 2 Kor. 10:18). Tsojkëbën nanduˈun nnimaytyakëmë Jyobaa, Biiblyë ets ja nyax kyäjpn (Diˈibʉ Jat. 4:11). w23.04 paj. 24, 25 parr. 17, 18

Parë nnayaˈijtëm wijy kujk ets kyaj nnaygyumanäjxëm, jëjpˈam nmëdäjtëm ja tsojkën (Mat. 22:​37-39). Extëm nˈokpëjktakëm, ko ntsojkëmë Dios, yëˈë xypyudëjkëm parë duˈunyëm ngäjpxwäˈkxëm oy wiˈix ngujäjt ngukëbajtëm (2 Tim. 1:​7, 8). Ets kom ntsojkëm nanduˈunë jäˈäy, ta nˈëxtäˈäyëmë winmäˈäny wiˈix mbäät nduknijäˈäwëm ja oybyë ayuk, axtë nmëgäjpxëm mä telefënë o nduknijäˈäyëmë neky. Janääm jatsojk ninëjkxëm, pes nˈëwxijtëm ets ja näˈä ttundët mëdiˈibë oy (Ezeq. 18:​27, 28). ¿Wiˈix nyajnigëxëˈkëm ko ntsojkëm nanduˈun ja nmëguˈukˈäjtëm? Ko nnaybyudëjkëm nixim niyam ets ko nyajmëjwiin nyajkajaajëm ja mëbëjkën (1 Tes. 5:11). Ko soldäädëtëjk tsyiptundë, naybyudëjkëdëp ja xim ja yam. Nanduˈun ëtsäjtëm, ninäˈä ngatukniwinmäˈäyëm ets axëëk nduˈunëm tuˈugë nmëguˈukˈäjtëm o axëëk ndukmëjëmbijtëm ko jam wiˈix xytyuˈunëm (1 Tes. 5:​13, 15). Nan nmëjˈijx nmëjpëjktakëm pënaty wyindënääytyëp ja Diosë kyäjpn (1 Tes. 5:12). w23.06 paj. 10 parr. 6; paj. 11 parr. 10, 11