Pënaty myëdoowdëp ko yäˈädë toxytyëjk wyoow wyitsëdë, këˈëm mbäät twinˈixtë pën pyanëjkxandëp o kyaj. Ta kanäk pëky tiko mbäät nnaygyuentëˈäjtëm parë kyaj nduundëgoˈoyëm mët tuˈugë yetyëjk o toxytyëjk. Mä Proverbios jyënaˈany ko “ja toxytyëjk mëdiˈibë kyaj jyapëtyë jyot wyinmäˈäny”, duˈun extëm “ja nëë mëdiˈibë yajmaˈtspën ets jantsy päˈäk jyawë” (Prov. 9:17). ¿Ti myaytyäˈägaampy? Ko Biiblyë tmaytyaˈaky yˈit tsyëënëdë kasäädë jäˈäy, yëˈë mët tˈijxkijpxyë nëë mëdiˈibë yajxeˈembyë ääw jot (Prov. 5:​15-18). Ko tuˈugë yetyëjk etsë toxytyëjk syëbilpëky, mbäät yˈit tsyëënëdë extëmë Dios të ttuknibëjktäägë. Per ko jyënaˈany ja “nëë mëdiˈibë yajmaˈtspën”, yëˈë yˈandijpy ko jäˈäy yˈit tsyëënëdë oypyënëty mëët, etsë Dios ninuˈun tkatukjotkëdaˈaky, pes kyutëjëdëp ja yˈanaˈamën. Ko jäˈäy yˈit tsyëënëdë oypyënëty mëët, ayuˈutsyë ttundë, duˈun extëmë maˈtspë ayuˈutsy tijaty ttuny. Yäˈädë “nëë mëdiˈibë yajmaˈtspën”, mbäät tjawëdë ko jantsy päˈäk, pes wyinmaytyë ko nipën tkanijawë ti tyuundëp. Per naywyinˈëˈˈënëdëp mët ko Jyobaa kyaj mbäät ti ndukwinguyuˈtsëm. Nitii duˈun mëk kyayajawë extëm ko nmëjagamgakëmë Jyobaa, pes kyaj nekyˈagujkˈäjt nekyjyotkujkˈäjtëm (1 Kor. 6:​9, 10). w23.06 paj. 22 parr. 7-9

Ets ¿ti mbäät xytyuny pën mjäˈäwëp ko kyaj amumduˈukjot xyˈokmënuˈkxtaknë Jyobaa o ko kyaj xyˈoktukxondaknë ko mnëjkxy käjpxwäˈkxpë ets ko xykyajpxyë Biiblyë? Kom pokyjyaˈay nyajpatëm, pääty kyaj wiˈixëty ko näˈäty duˈun nnayjyäˈäwëm. Pën mˈijxypy ko kyaj tijaty xyˈoktukxondaknë, oy ko xypyawinmayët ja apostëlë Pablo yˈijxpajtën. Yëˈë jyatuunë mëjääw ets xëmë tpanëjkxëdë yˈijxpajtënë Jesus, per näˈäty ojts dyajtëgoyˈaty ja naybyudëkë parë ttunët mëdiˈibë oy. Yäˈädë yëˈë yˈandijaampy ko Pablo të netyë wyinmäˈäny tpëjktaˈaky ko ttunanë ja Diosë tyuunk oy näˈäty oy kyanayjyäˈäwë. Nanduˈun mijts, këdii xynyasˈixë mmëmadäˈägëdët wiˈix näˈäty mnayjyawëty, niˈigyën mbäät ja mwinmäˈäny xypyëjktaˈaky parë xytyunët mëdiˈibë mnijäˈäwëp ko oy, oy näˈäty xykyatsojkënyëˈaty. Ko duˈun xytyunët, yëˈë mbudëkëyanëp parë kyaj duˈun mnekynyayjyawëdët (1 Cor. 9:​16, TNM). w24.03 paj. 11, 12 parr. 12, 13

Mbäät ndukˈijxëmë nmëguˈukˈäjtëm ko ntsojkëm ko tsuj yajxon nˈagëˈë nˈaxäjëm ets ko kyaj jagam jëxkëˈëm nbëjktakëm (2 Kor. 6:​11-13). Mä nduˈukmujkëm tapˈäjttëbë nmëguˈukˈäjtëm mëdiˈibë määyëm tsoˈondëp ets wiˈixëm jyaˈayˈattë. ¿Ti xypyudëkëyäˈänëm parë niˈamukë ntsojkëm? Ko yëˈëyë nˈijxëm tijaty oy tyuundëp. Mbäät nyajnigëxëˈkëm ko ntsojkëm ja nmëguˈukˈäjtëm ko nanduˈun nˈijxëm extëmë Jyobaa yˈijxëdë. Ko nety tyuˈuyeˈey ja mëj ayoˈon, jëjpˈam ets ntsojkëm ja nmëguˈukˈäjtëm. ¿Tiko? Yëˈko net nëjkxë Jyobaa xykyuwäˈänëm. Nˈokwinmäˈäyëm wiˈixë Jyobaa tˈanmääy ja kyäjpn ti tyundëp parë nyitsoˈoktët ko ja Babilonia käjpn nyidëkëdët: “Nëjkx, nnax ngäjpnëts, tëkë mä mguartë ogäjpë, ets yaˈˈadukë mdëjkˈääw. Nayuˈutsëdë jeˈeyë tuk ratë axtë ko nyaxët ja ayoˈon” (Is. 26:20). Waˈan nanduˈun nyaˈˈanëëmëyäˈänëm parë nnaybyëjkëˈkëm ko nety tyuˈuyeˈey ja mëj ayoˈon. w23.07 paj. 6, 7 parr. 14-16