Nayˈawäˈänëdë xondaˈakyˈääw xondaˈakyjyot parë tyunäˈändë Myanmar

JESUS duˈun jyënany naa myajtsk mil jëmëjtëp: “May ja jäˈäy diˈibë kyajnëm tˈamëdoonaxtë ja oybyë ayuk. [...] Per waanë ja tuumbë. Pääty amdowdë ja Kugam es tkaxët ja tuumbë” (Luk. 10:2). Ets duˈunën meerë tyam jyaty Myanmar. Pes jeˈeyë jyapëty 4,200 käjpxwäˈkxpë ets ja jäˈäy jap tsyëënëdë 55 miyonk.

Perë Jyobaa, “ja Kugam”, të dyajˈyuˈkxë jyot kyorasoon mëgoˈpxˈamë nmëguˈukˈäjtëm diˈib määyëm tsoˈondëp parë të nyëjkxtë Myanmar ets dyajmuktë ja pëjtaˈaky. ¿Ti të myëyuˈkxëdë parë të nyëjkxtë wiink paˈis? ¿Ti diˈib pudëjkëdë? ¿Tijaty kunuˈkxënë tyam yˈaxäjëdëp? Min nˈokˈijxëm.

“MINDË, NYAJTËGOYˈÄJTTËBËTSË PREKURSOORËTY”

Tam nyëjkxnë kanäk jëmëjt mä Kazuhiro diˈib tsënaapy Japón ets tyuny prekursoor, pyatë moˈotyë päˈäm, tyëgooy ja jyot jyäˈäwën ets ojts yajmënëjkxy mä hospital. Ja doktoor ta yˈanmääyë ko kyaj mbäät yajkarrëyoˈoy majtsk jëmëjt. Kazuhiro myëmääy myëdäj ets wyinmääy: “¿Titsë net ndunëp? Kyajts nmastuˈudäˈänyë prekursoorˈäjtk, pes yëˈëts diˈib mas ntsojkënyëˈajtypy”. Ta amumduˈukjot tmënuˈkxtakyë Jyobaa parë yaˈˈawatsxëdët ja nyëˈë tyuˈu ets duˈunyëm tyuunˈadëˈëtsët.

Kazuhiro tnimaytyaˈaky: “Kyumduk poˈo, tats tuˈugë nmëtnaymyaayëbë tnijäˈäwë wiˈixëtsë nety njaty diˈib tuump Myanmar. Tats ojts xymyëgajpxy etsëts xyˈanmääy: Yää Myanmar yëˈë jäˈäy tyukjëdijtëbë autobus. Pën miimp yap, mbäät duˈunyëm mduunˈadëˈëtsy prekursoor ets kyaj tyim jëjpˈamëty mgarrëwiidët. Tats nyajtëëy ja doktoor pën mbäädëts nëjkxy tsënaabyë Myanmar oyëts duˈun nbëkyëty. Mëjmëdoyëts njäˈäwë kots xyˈanmääy: Ta tyam yajpääty tuˈugë neurólogo diˈib tsoˈomp Myanmar, min nˈoktukˈixyˈaty, net yëˈë mˈixëdët ko tyäˈädë päˈäm mnijëmbitëdët. Duˈunëts njäˈäwë ko yëˈë Jyobaa yˈatsoowëmbijtypy ja nuˈkxtakënëts”.

Kazuhiro ta netyë tnijäˈäyë Betel diˈib Myanmar parë tˈanmääy ko nëjkxäämp jap prekursoorˈäjtpë mëdë kyudëjk. Jantsy jeˈeyë nyajxy mëgoxk xëëw ko Betel yˈatsoowëmbijtë: “Mindë, nyajtëgoyˈäjttëbëtsë prekursoorëty”. Ta Kazuhiro mëdë kyudëjk Mari, ttoˈktë ja kyarrëty, tjuˈttë byisë ets tjuuytyë ja byoletë parë tsyoˈondë abyongoty. Jantsy jotkujk tyam nyayjyawëdë ko tpudëkëdë tuˈugë grupë diˈib señas. Kazuhiro jyënaˈany: “Tijatyëts të nguˈix ngubäädëdë, tëtsë nmëbëjkën dyajkëktëkëdë extëm twandaˈagyë Salmo 37:5: Tuknipëkë Jyobaa mnëˈë mduˈu, tukˈijxpat yëˈë, ets yëˈë nëjkxëp ttuny diˈib mdukˈoyˈatëp”.

JYOBAA YAˈˈAWATSYPY JA NËˈË TUˈU

Mä jëmëjt 2014, tyuunë tuˈugë asamblee espesial jap Myanmar, ets ja nmëguˈukˈäjtëm diˈib jap tsënääytyëp ojts tˈagëˈë tˈaxäjëdë nimay pënaty tsoˈondëp wiink paˈis. Niduˈuk, yëˈë Monique, diˈib tsoˈomp Estados Unidos diˈibë jyëmëjt 34. Yëˈë jyënaˈany: “Kots njëmbijty mätsë ndëjk, tats nmënuˈkxtakyë Jyobaa tits mbäät nduny mätsë njukyˈäjtën. Nan ndukmëtmaytyakëtsë ndääk ndeety titsë nety nduknibëjtakëp. Ets nidëgëëgëts njënandë ko oyëts nëjkxët Myanmar. Per mäts nganëjkxynyëm, jantsy nuˈkxtakëts etsëts nyajnäjxy waanë tiempë”. Monique tnimaytyaˈaky tiko duˈun ttuuny.

Jyënaˈany: “Jesus yˈanmääy ja yˈëxpëjkpëty ets twijtspëtsëmdët nuˈun ja meeny tyunäˈäny. Päätyëts nnayajtëëwë: ¿Pyäädëbëtsë nmeeny nsentääbë parëts jap nëjkxët? ¿Mbäädëts jap këˈëm nnayˈixyëty ets kyajts kajaa ndunët?”. Monique jyënaˈany: “Netyëts nbëjkyë kuentë ko kyajts nëgoo nmeeny nsentääbë parëts nëjkxët tsënaabyë wiink paˈis”. Pääty, ¿ti tyuun parë ojts nyijkxy? (Luk. 14:28).

Monique tˈaknimaytyaˈaky: “Tëgok, tats ja nwindäj xynyigajxë parëts xymyëtmaytyäˈägäˈäny, ojtsëts ntsëˈëgë, pes duˈunëts nwinmääy ko xyˈëxkaxäämbëts. Per yëˈëdëmë nety kyukäjpxëyaampy ko jantsy oyëts nduny ets xyˈaknamoˈoyaˈanyëtsë meeny. Ets duˈunëts ja meeny xymyooy extëmtsë nety nyajtëgoyˈaty parëts ngëbatët ja nuˈkxy”.

Monique ja jyajty Myanmar desde disiembrë 2014. ¿Wiˈix nyayjyawëty ko tyuny mä tyëgoyˈatyë naybyudëkë? Yëˈë jyënany: “Jantsy jotkujkëts nnayjyawëty kots yä nduny, pes nidëgëëgëtsë jäˈäy nyaˈëxpëky. Niduˈuk, yëˈë tuˈugë toxytyëjk diˈibë jyëmëjt 67, koogoots ninëjkxy jantsy oyëts xyˈagëˈë xyˈaxäjë ets xymyënenyëts. Ko tim ogäˈän tnijäˈäwë ko Dios txëwˈaty Jyobaa, axtë käˈäjë wyinëë. Tats xyˈanmääy: Tyamnëmëts nmëdoy ti Dios txëwˈaty. Oyë mxëëw mjëmëjt myutsknëmëty, tëts xytyukniˈˈixë diˈibëts nety kyaj nnijawë mätsë njukyˈäjtën. Tats nanduˈun ojts njotˈamutskë. Kotsë duˈumbë jäˈäy nbääty, yëˈëts agujk jotkujk xyyajnayjyäˈäwëp kots nduny mä tyëgoyˈatyë naybyudëkë”. Monique të yˈotsy näämnëm mä Eskuelë parë pënaty kyäjpxwäˈkxtëbë Diosë Kyutujkën.

Näägë nmëguˈukˈäjtëm nan ojts pyudëkëdë parë nyëjkxët Myanmar ko yajnimaytyaky mä Anuario de los testigos de Jehová 2013. Extëmë Li, tuˈugë kiixy diˈib naa 30 jyëmëjt, japë nety tsyëënë Asia ets sëmään abety myëduny, per ko ojts tkajpxyë Anuario, yëˈë pudëjkë parë wyinmäˈäny tpëjtaky ets nyëjkxët Dios mëduumbë Myanmar. Li jyënaˈany: “Kots nˈojtsy mä tuˈugë asamblee espesial 2014 jap Yangón, tats nˈixyˈajty tuˈugë kasäädë jäˈäy diˈibë nety tuundëp Myanmar mä grupë chino. Ets kom ngajpxypyëtsë tyäˈädë ayuk, tats nduknibëjtakë jap nëjkxäˈäny parëts ndunët mä tyäˈädë grupë. Tats mëdë Monique nnaygyäjpxë parëts tuˈugyë ndundët jap Mandalay. Ojtsëtsë Jyobaa xykyunuˈkxtë, pes nbattëtsë nduunk parëts nimajtsk nmaˈestrëˈattët tukkujkxyëëjaty mä tuˈugë eskuelë, ets nan japyëts nbattë tëjk mäts ntsëënëdët. Jantsy jotkujkëts nnayjyawëdë kots yä ndundë, oy jyantsy yˈany ets oyëts ja ti ngamëyujtë. Yä Myanmar adëyë jäˈäy jyukyˈattë, ajiiky amëguˈugëty ets myëdowandëbë Diosë yˈayuk. Monyˈijx monyjyäˈäwëbëts wiˈixë Jyobaa tkunuˈkxyë tyuunk, ets ijtpëts seguurë ko yëˈë tsyojkypy parëts yä ndunët Mandalay”.

JYOBAA MYËDOOBYË NUˈKXTAKËN

Mayë nmëguˈukˈäjtëm diˈib tuundëp mä tyëgoyˈatyë naybyudëkë të tˈixtë wiˈix pyudëkëdë nuˈkxtakën. Extëm Jumpei mëdë kyudëjk Nao, diˈibë jyëmëjtëty naxy 30. Yëˈëjëty japë nety tsyëënëdë Japón ets tyundë mä tuˈukmujkën diˈib señas, per ta ojts nyëjkxtë Myanmar. ¿Tiko? Jumpei jyënaˈany: “Xëmëts mëdë ngudëjk nwinmääytyë nëjkxäˈändë Dios mëduumbë wiink paˈis. Ets tuˈugë nmëguˈukˈäjtëm diˈibëts nety mëët nduˈukmuktë mä señas të nety nyijkxy Myanmar. Ëëtsëty, tats nanduˈun ojts nëjkxtë mayë poˈo 2010, oyëtsë nety kyaj nëgoo meeny të nikoombattë. Ja nmëguˈukˈäjtëm diˈib Myanmar jantsy oyëts ojts xyˈagëˈë xyˈaxäjëdë”. ¿Wiˈixë jäˈäy tˈaxäjëdë Diosë yˈayuk Myanmar? Jumpei jyënaˈany: “Jyantsy yˈoymyëdoowdëp. Ets pënaty uum, monyˈijx monyjyäˈäwëdëp ko yajtukˈixtë bideo diˈib señas. Jantsy jotkujkëts nnayjyawëdë kots yää nmiindë”.

¿Ti naytyukˈijxëdëbë Jumpei mëdë Nao? Jumpei jyënaˈany: “Ko nyajxy tëgëk jëmëjt, tats nyajkëjxtë ja meeny diˈibëtsë nety të nikoombattë, ets kyaj ti ojts nyekywyeˈemy parëts nˈajuytyuktët ja tëjk mä ja tuˈukpë jëmëjt. Tats nmënuˈkxtaktë Jyobaa. Kyajtsë nety ndimˈawixtë, kots ojts nyajmëgäjpxtë Betel parëts ndundët tuk tiempë prekursoor espesial. Nmëdäjttëtsë mëbëjkënë mä Jyobaa ets kyajts xynyaˈijxtë. Xëmëts xykyuentˈattë”. Jumpei mëdë Nao të yˈotstë näämnëm mä Eskuelë parë pënaty kyäjpxwäˈkxtëbë Diosë Kyutujkën.

JYOBAA TPUDËKË ETS NIMAY TYUNDËT

Simone, ja jyëmëjt 43, etsë kyudëjk Anna 37, yëˈë jap tsyoony Italia etsë kyudëjk Nueva Zelanda, yëˈëjëty nan ojts nyëjkxtë Dios mëduumbë jap Myanmar. ¿Ti pudëjkëdë? Anna jyënaˈany: “Yëˈë Anuario 2013 diˈib nyimaytyakë Myanmar”. Simone jyënaˈany: “Jantsy jotkujkëts nnayjyawëdë kots nˈittë yä Myanmar, pes adëyë jukyˈäjtënë nyaxy ets mbäädëts niˈigyë ndiempë nyajtuny parë Jyobaa. Nˈijxtëbëts yajxon wiˈixë Jyobaa xykyuentˈäjtëm ko nduˈunëm mä tyëgoyˈatyë käjpxwäˈkxpë” (Sal. 121:5). Anna ta jyënaˈany: “Ninäˈänëmtsë nety duˈun nganayjyawëty jantsy jotkujk. Adëyëtsë njukyˈäjtënë nyajnëjkxy ets niˈigyëtsë tiempë nyajnaxy mëdëtsë nmëmëjjäˈäy; niˈigyëts të naymyëwingonëdë ets tëts nbäättë oybyë nmëtnaymyaayëbë. Yä jäˈäy kyaj tëgatsy tˈixtë Jyobaa tyestiigëty ets jyantsy tsyojkënyëˈäjttëbë Diosë yˈayuk”. ¿Ti myaytyäˈägaampy?

Anna tnimaytyaˈaky: “Tëgok yëˈëts määyoty nmëtmaytyak tuˈugë kiixy diˈib ëxpëjkp mä unibersidad, tats mëët ojts nwëˈëmdë kots jatëgok mëët nnaybyäädäˈänëdë. Kots mëët naybyatë, tamë nety të twoowminy tuˈugë myëtnaymyaayëbë. Ets ko jatëgok, ta tˈakwoowmiinyë wiinkpë. Ets tyam jats nimëgoxk nyaˈëxpëktë”. Simone jyënaˈany: “Jantsy ajiiky amëguˈugëtyë jäˈäy diˈibëts nmëtmaytyaktëp ets jyantsy yajtëëwdëp tijaty, nan jyantsy yˈoymyëdoowdëbë Diosë yˈayuk. Ets tim tëyˈäjtën, kyajtsë tiempë nekymyëdattë parëts nyaˈëxpëktët niˈamukë”.

¿Ti nääk të ttundë mä kyanëjkxtënëm tsënaabyë Myanmar? Mizuho, diˈib Japón, jyënaˈany: “Xëmëts nëjkxandë mëdëtsë nmëmëjjäˈäy Sachio mä tyëgoyˈatyë naybyudëkë, per kyajtsë nety nnijawëdë mää. Kots ojts ngäjpxtë eksperiensyë diˈib myëmiinë Anuario 2013 xyˈajäjt xyjyotjäjtëdëts. Tats ogäˈän ndukniwinmäˈäyëdë nëjkxäˈändë Myanmar”. Sachio jyënaˈany: “Jawyiinëtsë nety nˈokniˈˈixäˈändë ja it lugäär, tats ndukniwinmäˈäyëdë nëjkxäˈändë tuk sëmään Yangón, tuˈugë siudad diˈib mëj jap Myanmar. Kots jap nˈojtstë, tats njënandë ko jap mäts mbäät nëjkxtë”.

¿MBÄÄT NANDUˈUN MDUNY?

Rodney mëdë kyudëjk Jane, jap tsyoondë Australia ets ja jyëmëjtëty naa 50. Desde 2010 Dios mëdundë jap Myanmar mëdë yˈënäˈkëty Jordan mëdë Danica. Rodney jyënaˈany: “Amutskˈäjttëtsë nˈääw njotëty kots nˈijxtë wiˈixë jäˈäy dyajtëgoyˈattë Diosë yˈayuk. Nˈanmääytyëbëtsë familyë ets tˈijxmatstët tyundët mä tuˈugë paˈis extëm Myanmar”. ¿Tiko duˈun jyënaˈany? Yëˈë tnimaytyaˈaky: “Nitiits mëët ngaˈijxkijpxyëdë ja kunuˈkxën diˈibëts nˈaxäjëdëp kots yä ndundë. Mayë ënäˈktëjk yëˈëyë wyinmäˈänyˈäjttëp extëmë telefënë, karrë etsë tuunk ayoˈon. Perëtsë nˈuˈunk nˈënäˈkëty, jamë wyinmäˈäny tpëjtäˈäktë mä tjattë jembyë ayuk parë kyäjpxwäˈkxtët. Jyatandëp wiˈixë jäˈäy tmëtmaytyäˈäktët diˈib kyaj tnijawëdë Biiblyë, ets wiˈix kyomentarattët mä reunyonk. Yëˈë Diosë tyuunk myëwiin myëjotëdëp”.

Oliver, diˈibë jyëmëjt 37 ets tsyoony Estados Unidos, tnimaytyaˈaky tiko yˈoyëty nëjkxëm wiink paˈis Dios mëduumbë, jyënaˈany: “Kots të nmastuˈutyë njëën ndëjk mäts njotkujkˈaty ets nmëdunyëtsë Jyobaa wiinktsoo, mëjwiin kajaats ndukˈoyˈaty. Nan tëtsë nmëbëjkën dyajkëktëkë ets xypyudëjkëbëts parëts ndukˈijxpatëdë Jyobaa oyëts ti jotmay nbäädët. Kots nDiosmëduny mëdë nmëguˈukˈäjtëm diˈibëtsë nety kyaj nˈixyˈaty, yëˈëts xytyukˈijxp ko yëˈëyë Diosë yˈAnaˈam Kyutujkën mbäät xyyajtuˈugyëm”. Oliver mëdë kyudëjk Anna, jyantsy tyukxondaktëp ko tmëtmaytyäˈäktë jäˈäy diˈib käjpxtëp chino.

Trazel, diˈibë jyëmëjt 52 ets tsyoony Australia, tyuny Myanmar desde 2004, yëˈë jyënaˈany: “Pënaty mbäät duˈun tyundë, nˈanmääytyëbëts ko jantsy oy pën nëjkxtëp mä tyëgoyˈatyë käjpxwäˈkxpë. Tëts nbëkyë kuentë ko Jyobaa kyunuˈkxypy pënaty pyëjtaktëbë jyot myëjääw parë myëdunëdë. Ninäˈäjëts duˈun nganaybyawinmääyë njukyˈatët. Tyäˈädë duˈun ja jukyˈäjtënë mas oybyë”.

Extëmë tyäˈädë nmëguˈukˈäjtëm tnimaytyäˈäktë, nˈawijx njëjpˈijxtëbëts ets mbudëkëdët parë nanduˈun mijts xywyinmayët pën mbäät xypyudëkë pënaty tsyojkënyëˈäjttëbë Diosë yˈayuk mä kyajnëm yajkäjpxwaˈkxy. Duˈunxyëp extëmë tyäˈädë nmëguˈukˈäjtëm diˈib të yajmaytyäˈäktë mˈanëˈëmxëty: “¡Min yap Myanmar ets pudëjkëdëgëts!”.