¿Xytyukmëwingoˈonëmë Dios oytyim mëdiˈibëtyë relijyonk?

Biiblyë tˈatsoowëmbity

Kyaj. Mët ko kyajë relijyonk tyuknaxëty. Mä Biiblyë miimp kanäägë ijxpajtën tiko Dios kyaj tkupëky extëm näägë jäˈäy yˈawdatëdë. Min nˈokˈijxëm majtsk pëky.

Myëduk pëky: Ko jäˈäy tˈawdattë dios mëdiˈibë kyaj tyëyˈäjtënëty

Biiblyë xyˈanmäˈäyëm ko pën nˈawdäjtëmë Dios mëdiˈibë kyaj tyëyˈäjtënëty, ninuˈun kyatsobääty (Jeremías 10:3-5; 16:19, 20). Jyobaa duˈun tˈanmääy ja nyax kyäjpn jam Israel: “Kyaj xymyëdatëdë wiinkpë dios”a (Éxodo 20:3, 23; 23:24). Ko ja israelitëty tˈawdäjttë ja wiink diosëty, “ta Jyobaa tyukjotˈambëjkëdë” (Números 25:3; Levítico 20:2; Jueces 2:13, 14).

Jyobaa duˈunyëm kyaj tkupëky ko yaˈˈawdaty mëdiˈibë kyaj “diosëty” (1 Korintʉ 8:5, 6; Galasyʉ 4:8). Ets pënaty mëdunanëp, tsojkëp tmastuˈuttët tukëˈëyë tijaty tyuundëp ja relijyonk mëdiˈibë kyaj tyëyˈäjtënëty. Biiblyë jyënaˈany: ‘Puyeˈeytyuˈuttë yëˈëjëty ets nneyjyëbëkëdë’ (2 Corintios 6:14-17, TY). ¿Këdii kyajxyëp duˈunë Dios xytyukˈanaˈamëm koxyëbë relijyonk yˈoktuknaxëty ets koxyëp xyˈokpudëjkëm parë yëˈë niˈigyë nmëwingoˈonëm?

Myëmajtsk pëky: Ko yaˈˈawdatyë Dios extëm kyaj tkupëky

Jyobaa kyaj tnekykyupëjky ja israelitëty ko ojts ttuun tkäjpxnëdë tijaty ja jäˈäy tyuundëp ko tˈawdattë ja dios mëdiˈibë kyaj tyëyˈäjtënëty ets ko tˈaduunmujktë ja relijyongë tëyˈäjtënbë mët ja mëdiˈibë kyaj tyëyˈäjtënëty (Éxodo 32:8; Deuteronomio 12:2-4). Jesus yˈanmääy pënatyë nety nyiwintsënˈäjttëp ja relijyonk ko kyaj yˈoyëty extëmë nety tˈawdattë ja Dios ets ko nëgoobë kyëxëˈëktë ko ttsoktë. Duˈun tˈanmääy: “Kyaj xytyundë kuentë ja ëxpëjkën diˈibë niˈigyë yˈoyëty mä yëˈë anaˈamën, diˈibë dëˈën ja tëyˈäjtën, ja paˈˈayoˈon es ko jäˈäy jyikyˈattë yajxon” (Matewʉ 23:23).

Tyam, tuˈuk jeˈeyë relijyonk jyaˈˈaty mëdiˈibë xytyukmëwingoˈonëmë Dios ets yëˈë tukniˈˈijxëp ja tëyˈäjtën mëdiˈibë yajpatp mä Biiblyë (Fwank 4:24; 17:17; 2 Timotee 3:16, 17). Pääty tukëˈëyë relijyonk mëdiˈibë kyaj dyajtundë Biiblyë ko tyukniˈˈixëdë, niˈigyë jäˈäy ttukmëjagamgaˈaktë Dios. Mayë relijyonk tukniˈˈijxëdëp ko nyidëgëëgëty Dios mëdiˈibë yajtijp Trinidad, ko nmëdäjtëm tuˈugë anmë ets ko Dios tyëytyuumbyë jäˈäy mä infiernë. Tukëˈëyë yäˈädë tukniˈˈijxën kyaj yajpääty mä Biiblyë, jam tsyoony mä relijyonk mëdiˈibë kyaj tyëyˈäjtënëty. Pääty, ninuˈun kyatsobääty ko duˈunë jäˈäy tmëbëktë ets tˈawdattë Dios, pes yëˈë pyanëjkxtëp wiˈix ja kostumbrë tmëdattë ets kyaj yëˈëjëty wiˈix ja Diosë yˈanaˈamën jyënaˈany (Markʉs 7:7, 8).

Dios mëk nanduˈun tˈaxëkˈixy ko mayë jäˈäy yˈawdatëdë wingëˈëy agëˈëy (Titʉ 1:16). Parë tuˈugë relijyonk xypyudëjkëm ets nmëwingoˈonëmë Dios, kyaj jeˈeyë tsyokyëty nyojx noˈkëm o nduˈunëm ja kostumbrë; tsojkëbën nyajnigëxëˈkëm ko xypyudëjkëm tuˈuk tuˈugë xëëw mä ja jukyˈäjtën. Extëm nˈokpëjktakëm, Biiblyë jyënaˈany: “Pën nayjyäˈäp ko twintsëˈëgë Dios, ets nëgoo nyanigajxy nyakëxkajxy, naywyinˈëˈënëp këˈëm ets nitii tkatsooty diˈib yˈandijpy twintsëˈëgë Dios. Diˈibë oy yˈawdäjtypy ja Dios, pyudëjkëp ja keˈˈegyuˈungëty etsë kuˈeekytyoˈoxyëty ko yˈayow jyotëgoytyë, ets kyaj [nyayajmäˈädëdët] mët ja naxwinyëdë wyinmäˈäny” (Santya̱ˈa̱gʉ 1:26, 27). Ko jyënaˈany nˈawdäjtëmë Dios wäˈäts ets amumduˈukjot, mä Biiblyë La Palabra de Dios para Todos, duˈun jyënaˈany “relijyonk mëdiˈibë wäˈäts”.