ËXPËJKËN 5
Ja arkë diˈibë Noé kyoj
Ko ja tiempë nyajxy, ta jäˈäy ojts nyimayëdë yä naxwiiny, per nimaybyë yëˈë axëkjäˈäy. Axtë näägë anklës jyëmbijttë axëkjäˈäy, tsyoˈondë tsäjpotm mä nety tsyëënëdë ets kyëdaktë yä naxwiiny. ¿Mnijäˈäwëp tiko? Yëˈë parë jyukyˈatandë extëmë naxwinyëdë jäˈäy ets pyëkandë mët ja toxytyëjkëty.
Ja anklësëty pyattë ja yˈuˈunk yˈënäˈk mët ja toxytyëjkëty. Ko yaˈktë ja yˈuˈunk yˈënäˈk, jantsy mëkatyëty yˈijttë, tsyiˈk kyojxtë ja jäˈäy ets yˈaxëktuundë. Jyobaa kyaj tnasˈixëyany parë duˈunyëm axëëk yˈadëˈëtstët. Pääty ttuknibëjtakë dyajkutëgoyaˈany ja axëkjäˈäytyëjk ko dyajmiiny ja kom jyantsy tyuuy axtë ko nyipaˈtstääy ja naxwinyëdë.
Per tamë nety tuˈugë yetyëjk diˈib tëgatsy, tsyojkypyë netyë Jyobaa, txëwˈäjty Noé. Tamë netyë kyudëjk ets nidëgëëgë myäänk: Sem, Cam ets Jafet, ets ak tamë kyudëjkëty. Jyobaa tyukˈanaˈamë Noé ets tkojët tuˈugë arkë, diˈib duˈun extëmë mëj käjë diˈib kënaanëˈëgëp nëëwingëjxy. Ets japë Noé mëdë fyamilyë nyitsoˈoktë ko myinët ja Ayoˈonduu. Jyobaa nan ojts tniˈanaˈamë ets nimayë jëyujk animal tyëkëdët mä ja arkë parë nanduˈun nyitsoˈoktët.
Noé netyë ojts tkojtsondaˈaky ja arkë, ja ttuunkˈäjttë mëdë fyamilyë, naa 50 jëmëjtën ets duˈun ojts tkojtë extëmë Jyobaa yˈanmääyë. Nuˈun nyajxyë tadë tiempë, Noé tyukˈawäˈänë jäˈäy ko minäämbë nety ja Ayoˈonduu, per nipën tkamëjpëjtaky.
Ta tpatyë tiempë parë tyëkëdët mä ja arkë. ¿Mnijawëyaampy ti net tuun jäjtë?
“Kots nminët ëj, ja Naxwinyëdë Jäˈäyëtyë Kyudënaabyë, dëˈën jyatäˈäny extëm mä ja Noˈee jyikyˈaty” (Matewʉ 24:37).