Nĩkĩ Antũ Bakujaga?

Ũrĩa Bibiria yugaga

Nĩ ũntũ bwa wĩthĩre gũciũria nĩkĩ antũ bakũjaga, mono mono rĩrĩa twakuĩrwa nĩ muntũ twendete. Bibiria yugaga ũjũ: “Gĩkuũ kĩonaga inya ya kwigithia ũrũrũ kuuma kĩrĩ meyia.”—1 Akorintho 15:56; Kimeru Bible, 2010.

Nĩkĩ antũ bonthe beagia na bagakua?

Adamu na Hawa nĩbakuĩre tontũ bwa wĩyia bwao bwa kũrega kwathĩkĩra Mũrungu. (Kiambiriria 3:17-19) Gĩkuũ kĩarĩ maumĩĩra jarĩa manene ja kũrega kwathĩkĩra Mũrungu, tontũ nĩwe kaumo ka “mwoyo.”—Zaburi 36:9; Kiambiriria 2:17.

Adamu naatũmĩre nciarwa ciawe cionthe iratonya meyiene. Bibiria yugaga ũjũ: “Untu bwa uria meeyia jaatonyere nthi yonthe ni untu bwa muntu umwe, na gikuu kireeja na njira iu ya meeyia, na gikuu kiu kiratungana antu bonthe ni untu bwa uria bonthe baari eeyia.” (Aroma 5:12) Antũ bonthe bakujaga tontũ bonthe barĩna meyia.—Aroma 3:23.

Ũrĩa gĩkuũ gĩkathirua

Mũrungu neranĩte atĩ “akameria gikuu na akiumbe buru.” (Isaya 25:8) Nĩkenda athiria gĩkuũ buru, no mwanka eberie kaumo gakĩo, nako nĩ meyia. Mũrungu akathithia ũu gũkũrũkĩĩra Jesũ Kristũ ũrĩa ‘weberagia wĩyia bwa kĩrĩndĩ.’—Johana 1:29; 1 Johana 1:7.