Nĩkĩ Jesũ aakuĩre?
Ũrĩa Bibiria yugaga
Jesũ aakuĩre nĩkenda antũ bomba kũrekerwa meyia jaao na boona mwoyo jwa kenya na kenya. (Aroma 6:23; Aefeso 1:7) Gĩkuũ kĩa Jesũ kĩonanĩrie atĩ antũ bomba gũkara barĩ eetĩkĩkua kĩrĩ Mũrungu, kinya rĩrĩa bagũkũrũkĩĩra mantũ jamoomũ ũtũũrone bwao.—Ahibirania 4:15.
Cũnkũũna wone ũrĩa gĩkuũ kĩa muntũ ũmwe kĩaingĩrie mantũ ja gĩtũmi.
Jesũ aakuĩre nĩkenda “meeyia jetu jeebua.”—Akolosai 1:14.
Adamu rĩrĩa oombĩrwe atarĩ na meyia, aarĩ ũmũũjũru. Amwe nou, naathuurĩre kũrega kwathĩkĩra Mũrungu. Kũrega kwathĩka kũu kwawe nĩgwatũmĩre nciarwa ciawe iratonya meyiene. Bibiria yugaga ũjũ, “O ta uria babaingi baaetherue eeyia ni untu bwa uria muntu umwe aaremere Murungu.”—Aroma 5:19.
Jesũ aarĩ ũmũũjũru na gĩtĩrĩo athithia meyia. Kwou, arĩngĩkwa “kigongwana kia meeyia jetu.” (1 Johana 2:2) O ta ũrĩa kũrega kwathĩka kwa Adamu gwatũmĩre antũ bonthe batonya meyiene, nou gũkũrũkĩĩra gĩkuũ kĩa muntũ ũmwe tawe Jesũ kĩebererie meyia ja antũ barĩa bamwĩtĩkagia.
Adamu neka eenderie antũ meyiene. Nawe Jesũ aratũgũra na njĩra ya gũkua tontũ bwetũ. Ta maumĩĩra, “umwe ureeja kwiyia-ri, turi na umwe uria utwerencanagiira kiri Baaba, nawe ni Jesu Kristo uria wagirite.”—1 Johana 2:1.
Jesũ aakuĩre “nikenda muntu kinya uriku uria ukamwitikia atikeeje kuura, indi eeje agite mwoyo jwa kenya na kenya.”—Johana 3:16.
Kinya kethĩra Adamu oombi nĩkenda aatũũra kenya na kenya, meyia jaawe nĩjatũmĩre aratuĩrwa gĩkuũ. Gũkũrũkĩĩra Adamu, “meyia nĩjatonyere nthĩ yonthe, na gĩkuũ kĩreeja na njĩra ĩu ya meyia, na gĩkuũ kĩu kĩratũngana antũ bonthe nĩ ũntũ bwa ũrĩa bonthe baarĩ eeyia.”—Aroma 5:12.
Mwanya nou, gĩkuũ kĩa Jesũ nĩkĩangũrĩre meyia ja barĩa bamwĩtĩkagia na kĩreberia kinya gĩkuũ kĩu. Bibiria ĩrĩkagĩĩria kuuga ũjũ bwegie meyia: “O ta uria wiyia bwathanaga kuu gikuune, utugi kinya bu butue kwathanaga na wagiru kuu mwoyone juria jutikorothira, ndene ya Jesu Kristo Mwathani wetu.”—Aroma 5:21.
Ũmma nĩ atĩ, kinya ntũkũne cietũ antũ barĩna mĩaka ĩmingĩ ya gũtũũra aja nthĩgũrũne. Amwe nou, Mũrungu neranĩte atĩ akaa antũ barĩa bagĩru mwoyo jwa kenya na kenya na kinya ariũkie barĩa bakuĩte nĩkenda bomba kũgunĩka kuumania na gĩkuũ kĩa Jesũ.—Zaburi 37:29; 1 Akorintho 15:22.
Jesũ “araathika mwanka kuuragwa,” na bũu bũronania atĩ antũ bomba gũkara barĩ eetĩkĩkua kĩrĩ Mũrungu kinya rĩrĩa bagũkũrũkĩĩra magerio jamoomũ—Afilipi 2:8.
Kinya kethĩra Adamu naarĩ na mathũgaanio na mwĩrĩ jũmũũjũru, naaregere kwathĩkĩra Mũrungu na njĩra ya kwirirĩria gĩntũ gĩtĩ kĩawe. (Kiambiriria 2:16, 17; 3:6) Nyumene, mũnthũ ũria mũnene wa Mũrungu tawe Shaitani, naaugĩre atĩ gũtĩ muntũ ũũmba kwathĩkĩra Mũrungu akĩendaga, monomono rĩrĩa ũtũũro bwawe bũrĩ ũgwatine. (Ayubu 2:4) Mwanya nou, Jesũ ũrĩa waarĩ muntũ ũmũjũru naathĩkĩĩre Mũrungu na aragwatĩĩra wĩtĩkikua bwawe kinya rĩrĩa akũrũkĩĩre gĩkuũ kĩa gwĩkĩrithia nthao na kĩrĩna ũrũrũ mono. (Ahibirania 7:26) Na bũu bũronania kamma atĩ: Muntũ no akare arĩ mwĩtĩkĩkua kĩrĩ Mũrungu kinya rĩrĩa agũkũrũkiĩra mĩthagĩko kinya ĩrĩku.
Biũria Biegie Gĩkuũ kĩa Jesũ
Nĩkĩ Jesũ abataraga gũkua na kũthagĩka nĩkenda oomba gũkũũra antũ? Nĩkĩ Mũrungu atebererie gĩkuũ orio?
Bibiria yugaga ũjũ, “Ni untu mucara jwa wiyia ni gikuu.” (Aroma 6:23) Mũrungu ataithĩre Adamu watho bwawe ĩndĩ amwĩrĩre atĩ arega kwathĩka no mwanka agakua. (Kiambiriria 3:3) Rĩrĩa Adamu eeĩrie, Mũrungu “Uria utiumba kuuga urongo,” nũũjũrĩrie wĩrane bwawe. (Tito 1:2) Adamu naatũmĩre nciarwa ciawe batonya wĩyiene na kinya mũcarene jwa wĩyia taju gĩkuũ.
Kinya kethĩra antũ barĩa barina meyia nĩbakũbatara gũkua, Mũrungu nakũboonia ‘ũtugi bwawe bũrĩa bwingĩĩte’ (Aefeso 1:7) Wendi bwawe bwa gũkũũra antũ na kũrita Jesũ akue nĩ untũ bwetũ jau jonthe nĩjakwonania kĩawe na ĩota rĩawe.
Nĩrĩ Jesũ aakũĩre?
Jesũ aakuĩre antũ a thaa kenda mũthenya jwa Pasaka ya Kiyahudi. (Mariko 15:33-37) Tarĩki iu ciĩthagĩrwa irĩ jumaa Ĩpurũ, 33 M.J., kũringana na kalenda ya ntũku cietũ.
Nĩkũ Jesũ akuĩrĩre?
Jesũ ooragĩĩrĩrwe antũ “eetagwa Antu a Kiongo, na eetagwa na Kihibirania Gologotha.” (Johana 19:17, 18) Gũntũ gũkũ kwarĩ “ome ya mpingiro” ya Jerusalemu ntukũne cia Jesũ. (Ahibirania 13:12) Kwombĩka kwarĩ karĩmene, nĩkio Bibiria yugaga antũ bamwe nĩbategagĩĩra “bari kuraja.” (Mariko 15:40) Amwe nou, ntukũne cietũ tũtĩ na mma nĩ kũ Gologotha ĩthagĩrwa ĩrĩ.
Nĩatĩa Jesũ aakuĩre?
Kinya kethĩra babaingĩ betĩkĩtie atĩ Jesũ ooragĩĩrwe na gũcuurua mũtharabene, Bibiria yugaga ũjũ: “Ningi niwe wairire meeyia jetu na mwiri jwawe wengwa ari mutine iguru.” (1 Petero 2:24) Aandĩki ba Bibiria baatumĩĩre biugo biĩrĩ bia Kĩgiriki kwonania into biĩrĩ birĩa biatumĩĩrwe gũcuria Jesũ—stau·rosʹ na xyʹlon. Athoomi babaingĩ bakinyĩĩre ĩtua rĩa atĩ Jesũ aacurĩrue gĩkingine kĩa mũtĩ kĩrũngami.
Nĩatĩa tũũmba kũriikana gĩkuũ kia Jesũ?
Ũgoro bũmwe bwa Pasaka ya Kĩyahudi, Jesũ naambĩrĩrie kionanĩria kĩrĩ athingati baawe na arabeera ũjũ: “thithagieni uju ni untu bwa kundiikanaga.” (1 Akorintho 11:24) Mathaa jamakai nyumene, Jesũ aroragwa.
Aandĩki ba Bibiria baaringithanĩrie Jesũ na kangʼondu karĩa karitĩrwe ĩgiita rĩa Pasaka. (1 Akorintho 5:7) O ta ũrĩa Pasaka yaariikanagia Aisiraeli atĩ baakũrĩĩtwe kuuma ũkombone, nou Mũriikana jwa gĩkuũ kia Jesũ Kristũ jũriikanagia Akristũ atĩ nĩbakũri kuuma kĩrĩ ukombo bwa meyia na gĩkuũ. Pasaka ĩrĩa yathithagua Nisani 14 kũringana na kalenda ya Kĩyahudi, yaakũngwagĩrwa rĩmwe mwaka; na Akristũ ba karaaja nĩbakũngwagĩra Mũriikana jũu rĩmwe mwaka.
O mwaka, tarĩki irĩa ĩgwĩtanĩria na Nisani 14, antũ babaingĩ nthĩgũrũne yonthe nĩbariikanaga gĩkuũ kĩa Jesũ Kristũ.