Nĩatĩa Ngũgĩ Yeetũ ya Nthĩgũrũne Yonthe Ĩrũngamagĩĩrwa Kĩmbeca?

Kĩrĩ ũthuranĩri bwetũ, nĩtũcabithagia na kweejana Bibiria na mauku jangĩ mirioni magana jamaingĩ o mwaka tũtĩkũrĩyia. Nĩtwakaga na tũkamenyeera Nyomba cia Ũnene na obici cia ndwang’i. Nĩtũrũngamagĩĩra ngiri inyiingĩ cia barĩa baritaga ngũgĩ Betheli na amĩsonarĩ na nĩtwejanaga ũteethio magiita ja ũgwati. Kwou no ũciũrie, ‘Nĩ atĩa ngũgĩ iu ĩrũngamagĩĩrwa kĩmbeca?’

Tũtĩritaga icuncĩ bia ĩkũmi, tũtĩrĩagia, kana tũũthũrania mĩũthi. Amwe na kwĩthĩrwa ngarama cia kũrũngamĩĩra ngũgĩ yeetu ya gũtũmĩĩria irĩ ĩgũrũ, tũtĩrombaga mbeca. Nkũrũki ya karine ĩmwe ĩkũrũkĩte, ngacĩti ya ijĩrĩ ya Mnara wa Mlinzi gũcabithua yaugĩre atĩ nĩtwĩtĩkĩtie Jehova nĩwe ũtũteethagia na “gũtĩrĩo tũkaromba kana twerenca antũ batũteethie”—na gũtĩrĩo twagĩta ũu!—Mathayo 10:8.

Ngũgĩ cietũ iteethagĩĩrua na mĩũthi ya gũciendera. Antũ babaingĩ nĩbagwĩragĩrua ngũgĩ yeetũ ya kũritana Bibiria, na nĩbaritaga mbeca kũmĩteetheria. Akũũjĩ ba Jehova bongwa nĩbagwĩragua gũtumĩra ĩgiita, inya, mbeca, na into bingĩ biao kĩrĩ ngũgĩ ya kũthithia wendi bwa Mũrungu nthĩgũrũne yonthe. (1 Mantu ja Karaja 29:9) Kĩrĩ Nyomba ya Ũnene na igomanone bietũ, nĩkwĩthagĩrwa na tũthandũkũ twa kũritĩra mĩũthi, arĩa barĩa bakwenda bekagĩra mĩũthi yaao. Kana mĩũthi no ĩritwe gũkũrũkĩĩra webusaĩti yeetũ ya jw.org. Kaingĩ, mbeca irĩa iritagwa itiumanagia na antũ barĩa batoongi, babaingĩ nĩ ta mwekũrũ ntigwa, ũrĩa waarĩ nkĩa, ũrĩa Jesũ aarĩrie bwega ũntũ bwawe arĩgwĩkĩra tũũrabiũ twĩrĩ ĩthandũkũne rĩa mĩũthi kĩromberone. (Luka 21:1-4) Kwou, o muntũ wonthe no ‘eekage’ gantũ ga kũrita rĩonthe “o uria athuganitie kuthithia na nkoro yawe.”—1 Akorintho 16:2; 2 Akorintho 9:7.

Tũrĩ na mma atĩ Jehova ageeta na mbere kũringithia nkoro cia barĩa bakwenda kũmũkumia ‘na into biao’ bia goro, kũgwata mbaru ngũgĩ ya Ũnene, nĩkenda wendi bwawe bũũmba kũũjũrua.—Njuno 3:9.

• Nĩmbi bitũmaga ũthuranĩri bwetũ bwĩthĩrwa bũrĩ na mwanya na ndini ingĩ?

• Nĩatĩa mĩũthi ya gũciendera ĩtumagĩrwa?