Jesũ Kristũ Nũũ?

1.Ũtũũro bwa Jesũ bwambĩrĩĩrie atĩa?

Mwanya na antũ bonthe barĩa baatũũra nthĩgũrũne, Jesũ aatũũraga ĩgũrũ arĩ kĩũmbe kĩa gĩkĩrundu mbere aciarwa nthĩgũrũne. (Johana 8:23) Nĩwe waarĩ wa mbere kũũmbwa nĩ Mũrungu, na naateethererie Mũrungu kũũmba into bingĩ bionthe. We wenka, nĩwe woombĩrwe nĩ Jehova ĩmwe kwa ĩmwe, nĩkĩo gĩtũmaga eetwa “Mwana-wa-mumwe” wa Mũrungu. (Johana 1:14) Mũrungu aatumagĩra Jesũ arĩ mwaria waawe, nĩkĩo gĩtũmaga Jesũ eetwa “Ruteto.” ​—Thooma Njuno 8:22, 23, 30; Akolosai 1:15, 16.

2.Nĩkĩ Jesũ eejĩre nthĩgũrũne?

Mũrungu aatũmĩre Mũtaana waawe nthĩgũrũne, na njĩra ya kũthaamia ũtũũro bwawe, na kũbwĩkĩra ndeene ya kĩu kĩa mwarĩ Mũyahudi wetagwa Maria. Kwou, Jesũ ataarĩ na ĩthe mũmũciari. (Luka 1:30-35) Jesũ eejĩre nthĩgũrũne (1) kũritana ũmma bwĩgiĩ Mũrungu, (2) gũtwĩkĩra ngerekano ya kũthithia wendi bwa Mũrungu, kinya rĩrĩa tũrĩna mathĩĩna, na (3) kũrita mwoyo jwawe jũmũũjũru jwee “ikuuri.”​—Thooma Mathayo 20:⁠28.

3.Nĩkĩ tũkũbatara ĩkũũri?

Ĩkũũri nĩ ĩrĩi rĩrĩa rĩrĩagwa kũrekeeria muntũ arĩ ũgwatine bwa kũũragwa. (Kuuma 21:29, 30) Jũtaarĩ mworoto jwa Mũrungu antũ batindira kana bakua. Nĩatĩa tũmenyaga bũu? Mũrungu eerĩte muntũmũrũme wa mbere Adamu atĩ, akeeja kũthithia “wiyia” agakua. Kwou, kethĩra Adamu ataathithĩrie wĩyia atĩngĩkua. (Kiambiriria 2:​16, 17; 5:⁠5) Kũringana na Bibiria, gĩkuũ “kireeja” nthĩgũrũne gũkũrũkĩĩra muntũ wa mbere Adamu. Tontũ bũu, nĩwe wakũrũkĩrie wĩyia kĩrĩ nciarwa ciawe cionthe, na wĩyia bũu nĩbu bũretaga gĩkuũ. Tũbataraga ĩkũũri nĩkenda tũkũũrwa kuuma kĩrĩ gĩkuũ kĩrĩa twareteerwe nĩ Adamu.​—Thooma Aroma 5:​12; 6:​23.

Nũũ ũrĩngĩũmba kũrĩya ĩkũũri rĩa gũtũkũũra kuuma kĩrĩ gĩkuũ? Rĩrĩa twakua, tũrĩaga akĩ meeyia jeetũ. Gũtĩ muntũ ũtĩ ũmũũjũru ũũmba kũrĩĩra bangĩ meeyia jaao. ​—Thooma Zaburi 49:​7-9.

4.Nĩkĩ gĩatũmĩre Jesũ akua?

Mwanya na baatwĩ, Jesũ aarĩ ũmũũjũru. Kwou, ataabataraga gũkua nĩũntũ bwa meeyia jaawe—nĩũntũ gũtĩjo aathithĩtie. Ĩndĩ, Jesũ aakuĩre nĩũntũ bwa meeyia ja bangĩ. Mũrungu oonanĩrie wendo bũũnene rĩrĩa aatũmĩre Mũtaana waawe akua nĩũntũ bwetũ. Kinya Jesũ naatwonerie wendo rĩrĩa aathĩkĩĩre Ĩthe, na ararita mwoyo jwawe nĩũntũ bwa meeyia jeetũ.​—Thooma Johana 3:16; Aroma 5:18, 19.

Tega vidio ĩjĩ Nĩkĩ gĩatũmĩre Jesũ akua?

5.Nĩatĩa Jesũ akũthithia nandĩ?

Rĩrĩa Jesũ aarĩ nthĩgũrũne, nooragia barĩa baajĩtue, akariũkia akuũ, na agateethia barĩa baarĩ na mathĩĩna. Aathithagia mantũ jau kwonania ũrĩa akathithĩria antũ babaagĩru ĩgiita rĩĩjĩte. (Mathayo 15:​30, 31; Johana 5:28) Nyuma ya Jesũ gũkua, Mũrungu naamũriũkĩrie na mwĩrĩ jwa kĩrundu. (1 Petero 3:​18) Aitĩrie ĩgũrũ arakara nthĩ njarene ya ũrĩo ya Mũrungu, areteera mwanka rĩrĩa Jehova aamwetherie Mũnene wa kwathana nthĩgũrũ yonthe. (Ahibirania 10:​12, 13) Nandĩ Jesũ nakwathana ĩgũrũ arĩ Mũnene, na athingati baawe nĩbagũtũmĩĩria nkuma ĩu njega nthĩgũrũne yonthe.​—Thooma Danieli 7:​13, 14; Mathayo 24:⁠14.

Kagiita gatĩ kũraaja, Jesũ agatumĩra inya yaawe arĩ Munene kũthiria mĩthangĩko yonthe na barĩa bamĩretaga. Bonthe barĩa betĩkagia Jesũ na njĩra ya kũmwathĩkĩra, bakagwĩrĩrua gũtũũra nthĩgũrũne ĩrĩ paradiso. ​—Thooma Zaburi 37:​9-​11.