GĨCUNCĨ KĨA 3
Ũrĩa Bũũmba Kũthiria Mathĩĩna
“Karageni bwendeene bwingwa; tontu wendani nibu bukunikagira meeyia jamaingi.”—1 Petero 4:8
Rĩrĩa bwambĩrĩria ũtũũro amwe bũrĩ mũkũrũ na mwekũrũ, mathĩĩna mwanya mwanya jakaumĩra. Joomba kuumania na mwanya jwenu jwa kĩmathũgaanio, ũrĩa bũkwigua, na mwonere jwenu jwa mantũ. Kana mathĩĩna no jaumanie na mantũ jangĩ oome ya mũranũ, na ũntũ bũtĩĩrĩgĩĩri.
Twomba kũgeria gũciebania na ũmma bwa mantũ, ĩndĩ Bibiria ĩtwĩĩraga tũrwe na mathĩĩna jeetũ. (Mathayo 5:23, 24) Ũkoona njĩra ĩnjega ya kũthiria mathĩĩna jaaku watumĩra mooritani ja Bibiria.
1 ARĨĨRIENI THĨĨNA
ŨRĨA BIBIRIA YUUGAGA: Kũrĩ na “igita ria . . . kwaria.” (Mutumiiria 3:1, 7) Tumĩreni ĩgiita rĩa kũng’ana kwaarĩĩria thĩĩna. Menyithia mũkũrũ kana mwekũrũ waaku ũtĩkwitha ũrĩa ũkwigua, na ũrĩa ũkũthũgaania kĩrĩ ũntũ bũrĩa bũkwarĩĩria. Rĩonthe aragia “jaria jari ja mma” na ũrĩa bũgũreene nawe. (Aefeso 4:25) Kinya rĩrĩa kũrĩ na mantũ joomba gũkũthũũria na mpwĩ, nĩbwega kwirigĩĩria bũtĩgatete. Ĩcookio rĩa ũkiri rĩgatũma rwaria rwa wĩthĩre rũtĩkareete ndwaa.—Njuno 15:4; 26:20.
Kinya bwaremwa gwĩtĩkanĩĩria, onania kĩao, na menya ũũrĩrua kwonia mũkũrũ kana mwekũrũ waaku wendo na gĩtĩĩo. (Akolosai 4:6) Ciũmieni kũthiria mathĩĩna o rĩu jaumĩra, na menya bũtiga kwaaranĩria.—Aefeso 4:26.
ŨRĨA BŨŨMBA KŨTHITHIA:
Baanganieni kaanya karĩa gakwaagĩra ga kwaarĩĩria thĩĩna
Kaanya gaaku ga kũmũthikĩĩra gakinya, irigĩĩrie ũtĩkamũgitarie. Kaanya gaaku ga kwaria, gagakinya
2 THIKĨĨRA NA ŨCIŨRE
ŨRĨA BIBIRIA YUUGAGA: “Endanageni mono o muntu na ungi.” Kĩrĩ gũtĩĩana, ĩthĩrwa ũrĩ wa mbere. (Aroma 12:10) Njĩra yaaku ya kũthikĩĩra nĩ ya gĩtũmi mono. Geria kũmenya bwega mwonere jwa ũrĩa bũgũreene nawe na njĩra ya ‘kiao na winyiĩtie.’ (1 Petero 3:8; Jakubu 1:19) Menya ũciethia nũmũthikĩĩrite. Rĩrĩa gũkũũmbĩka, tigana na jarĩa ũkũthithia na ũmwee matũ jaaku buru, kana ũmũũrie kethĩra no bwaarĩĩrie ũntũ bũu kagiita kangĩ. Kethĩra ũkoona mũkũrũ kana mwekũrũ waaku ta mũcoore na tĩ ta munthũ, ũtĩĩthĩrwa na mpwĩ cia “kwimbatara nkorone ni muthuuro.”—Mutumiiria 7:9.
ŨRĨA ŨŨMBA KŨTHITHIA:
Thikĩĩra ũrĩ na mwonere jũmwega, kinya kethĩra jarĩa ũkwigua jatĩgũkũgwĩria
Geria gũciũkĩrwa nĩ jarĩa akuuga. Ciũra bũrĩa bũkwonanua nĩ mathithio ja mwĩrĩ jwawe na kaajũ kaawe
3 THINGATĨĨRENI JARĨA BŨTUĨTE
ŨRĨA BIBIRIA YUUGAGA: “Ngugine cionthe kuri na mpongeeri, indi ndwaria cia miromo cionka iretaga ukia.” (Njuno 14:23) Gwĩtĩkanĩĩria akĩ ũrĩa bũkathithia bũtĩng’ani. Bũrĩbatara kũthingatĩĩra jarĩa bubaĩrĩ bũtuĩte. Bũũ bwomba kwenda kwiritanĩria na gwiciũmia mono, na bũu nĩ bwa gĩtũmi. (Njuno 10:4) Bwagwatanĩra kũthithia ũu, bũkoona “uumithio bubwega” nĩũntũ bwa ngũgĩ yeenu ĩnjũũmũ.—Mutumiiria 4:9.
ŨRĨA BŨŨMBA KŨTHITHIA:
Tueni mantũ jarĩa o ũmwe weenu akathithia nĩkenda bũthiria thĩĩna
Ĩgiita kwa ĩgiita, thimeeni wĩĩti na mbere bwenu