Ĩrĩgĩĩra Mũrungu Nĩkenda Wĩthĩrwa na Mũranũ Jũrĩ na Kũgwĩrua

Jehovaa Mũrungu nĩwe waambĩrĩĩrie mũranũ jwa mbere. Bibiria ĩtwĩraga oombĩre muntũmũka wa mbere na ‘aramwikia kiri muntumurume.’ Adamu nĩ agwĩrĩrue mono na arauga: “Uju ni kiruitu kia maruitu jakwa, na nyama ya nyama ya mwiri jwakwa.” (Kiambiriria 2:​22, 23) Kinya nandĩ, Jehova nendaga antũ barĩa bagũreene bethĩrwe na kũgwĩrua.

Rĩrĩa wagũrwa kana wagũrana, woomba kũthũgaania atĩ mantũ jonthe jageeta bwega. Ĩndĩ ũmma nĩ atĩ, kinya mũkũrũ na mwekũrũ barĩa bendeene mono, bakethĩrwa na mathĩĩna. (1 Akorintho 7:​28) Kĩrĩ iuku rĩrĩ, ũkoona mooritani ja Bibiria, jarĩa joomba gũtũma mũranũ na nja yaaku ĩĩthĩrwa na kũgwĩrua, wajatumĩra.​​—⁠Zaburi 19:​8-​11.

1 ĨTĨKĨRA KAANYA KARĨA JEHOVA AKWEETE

ŨRĨA BIBIRIA YUUGAGA: Muntũmũrũme nĩwe kĩongo kĩa nja.​​—⁠Aefeso 5:​23.

Kethĩra ũrĩ ntomũrũme ũgũreene, Jehova nerĩgagĩĩra ũmenyeera mwekũrũ waaku na njĩra ya kĩao. (1 Petero 3:⁠7) Mũrungu amũũmbĩre nĩkenda agũteethagia na endaga ũmũthithĩria na njĩra ya gĩtĩĩo na wendo. (Kiambiriria 2:​18) No mwanka wende mwekũrũ waaku mono, wĩtĩkĩre gwĩĩka meendekithia jaawe mbere ya jaaku.​​—⁠Aefeso 5:​25-​29.

Kethĩra ũrĩ mwekũrũ ũgũri, Jehova nerĩgagĩĩra ũtĩĩa mũkũrũ waaku mono na ũmũteetheria kwiingia kaanya kaawe. (1 Akorintho 11:3; Aefeso 5:​33) Gwata mbaru matua jaawe na ũgwatanĩre nawe na nkoro yonthe. (Akolosai 3:​18) Waathithia ũu, ũkaathongoma meethone ja mũkũrũ waaku na kĩrĩ Jehova.​​—⁠1 Petero 3:​1-6.

ŨRĨA ŨŨMBA KŨTHITHIA:

• Ũũria ũrĩa bũgũreene nawe, ũrĩa gwe ũũmba kwaa mũkũrũ kana mwekũrũ ũmwega. Thikĩĩra bwega, na ũciũmie buru kũthithia moogarũrũku

• Ĩthĩrwa na weteeri. Gũkajũkia ĩgiita kĩrĩ bũbaĩrĩ kũmenya ũrĩa bũũmba kũgwĩrania

2 MAKĨRA KAMMA ŨRĨA ŨNGĨ AKWIGUA

ŨRĨA BIBIRIA YUUGAGA: Nũbuĩri kũthũgaanĩria meendekithia ja ũrĩa bũgũreene nawe. (Afilipi 2:​3, 4) Thithĩria mũkũrũ kana mwekũrũ waaku ta muntũ wa bata, ũkĩriikanaga Jehova arĩenda nthũmba ciawe ciĩthĩrwa na ‘ukiri kiri antu bonthe.’ (2 Timotheo 2:​24) “Rwaria rwa mpwi-mpwi rukari ta mamuntirwa ja ruciu, indi ruume rwa muntu umuume ni thiiria injega.” Kwou, thuura bwega biugo biaku. (Njuno 12:18) Kĩrundu kĩa Jehova gĩgagũteethia kwaria na njĩra ya kĩao na wendo.​​—⁠Agalatia 5:​22, 23; Akolosai 4:⁠6.

ŨRĨA ŨŨMBA KŨTHITHIA:

• Romba Mũrungu agũteethie kũmarĩĩra na kwĩthĩrwa na mwonere jũmwega, mbere ya kwarĩĩria mantũ jamarito na ũrĩa bũgũreene nawe

• Thũgaanĩria bwega jarĩa ũkauga na ũrĩa ũkajauga

3 THŨGAANĨRIENI MANTŨ BŨRĨ AMWE

ŨRĨA BIBIRIA YUUGAGA: Rĩrĩa wagũrana kana wagũrwa, bwejaga “mwiri jumwe.” (Mathayo 19:⁠5) Amwe na bũu, bũrĩ antũ baĩrĩ na bwomba kwĩthĩrwa na mwonere mwanya. Kwou, nĩbũkũbatara bwiritane kwĩthĩrwa na ũrũmwe kĩmathũgaanio na ũrĩa bũkwiigua. (Afilipi 2:⁠2) Ngwatanĩro nĩ ya gĩtũmi rĩrĩa bũgũtua matua. Nĩbũkũbatara kwaaranĩria nĩkenda bũũmbana. Tongeerueni nĩ mooritani ja Bibiria rĩrĩa bũgũtua matua ja gĩtũmi bũrĩ amwe.​​—⁠Njuno 8:​32, 33.

ŨRĨA ŨŨMBA KŨTHITHIA:

• Aranĩria na mũkũrũ kana mwekũrũ waaku tĩ mantũ jarĩa ũkwona akĩ, ĩndĩ kinya ũrĩa ũkwigua nkorone

• Aranĩria na mũkũrũ kana mwekũrũ waaku mbere ya gwĩĩka mawĩrane