Ũrĩa Ũũmba Kwĩthĩrwa na Thĩĩrĩ na Antũ ba Ndũgũ Cienu

Mũranũ jwambagia nja ĩnjerũ. Kinya kethĩra ũgaatũũra wendeete aciari baaku na kũbatĩĩa, ũrĩa bũgũreene nawe nĩwe muntũ wa gĩtũmi mono kĩrĩ gwe nthĩgũrũne. Bũũ no bwĩthĩrwe bũrĩ bũbũũmũ kĩrĩ bamwe ba ndũgũ yaaku gwĩtĩkĩĩria. Ĩndĩ mooritani ja Bibiria jakaabũteethia, nĩkenda bwĩthĩrwa na ũkiri amwe na antũ ba ndũgũ cienu, rĩrĩa bũgwiciũmia gwaaka ngwatanĩro ya nja yeenu ĩnjerũ.

1 ĨTHĨRWA NA MWONERE JŨMWEGA JWĨGIĨ ANTŨ BA NDŨGŨ CIENU

ŨRĨA BIBIRIA YUUGAGA: “Ikagiira abagu na nyakwe.” (Aefeso 6:⁠2) Kinya kethĩra ũrĩ na ũkũrũ bũng’ana atĩa, nũkũbatara gũtĩĩa aciari baaku. Menya atĩ, mũkũrũ kana mwekũrũ waaku, kinya we nakũbatara kũmenyeera aciari baawe ta mwana wao. “Wendani buti ruriitho,” kwou menya wigua bũbũũĩ nĩ ngwatanĩro ĩrĩa arĩ nayo amwe nabo.​​—⁠1 Akorintho 13:4; Agalatia 5:​26.

ŨRĨA ŨŨMBA KŨTHITHIA:

• Ciebanie na rwaria rwa kũmeneeria ta “Rĩonthe antũ ba njeenu kabamenagĩĩria” kana “Nyakwe gũtĩrĩo agwĩragĩrua jarĩa nthithagia”

• Geria kwona mantũ o ta ũrĩa mũkũrũ kana mwekũrũ waaku akũjoona

2 ĨĨKA MĨANKA RĨRĨA GŨKŨBATARA

ŨRĨA BIBIRIA YUUGAGA: “Muntu agatigana na ithe na ng’ina, agwatanage na mukowe, na bo-bairi baejage mwiri jumwe.” (Kiambiriria 2:​24) Rĩrĩa wagũrwa kana wagũrana, aciari baaku boomba kwigua atĩ no barĩ na kaanya ga gũkũmenyeera, na boomba kwenda gwitonyithia mũranũne jwaku nkũrũki ja ũrĩa babatĩĩre.

Nĩ ĩgũrũ rĩaku bũrĩna ũrĩa bũgũreene nawe gwĩtĩkanĩĩria nĩ mĩanka ĩrĩkũ bũkabeekĩra na bũbamenyithie na njĩra ya wendo. Aria ĩmwe kwa ĩmwe ũtĩkwiitha, ĩndĩ tĩ na rũng’eento. (Njuno 15:⁠1) Kwinyiyia, ũkiri na kũũmĩĩria gũgabũteethia kwĩthĩrwa na ngwatanĩro ĩnjega na antũ ba ndũgũ na gwĩta na mbere “bukiendanaga o muntu na ungi.” ​—⁠Aefeso 4:⁠2.

ŨRĨA ŨŨMBA KŨTHITHIA:

• Kethĩra ũtĩkũng’anĩrwa nĩ ũrĩa antũ ba ndũgũ bagwitoonyithia bũng’ana mantũũne jegiĩ ũtũũro bwenu, arĩĩria ũntũ bũu na ũrĩa bũgũreene nawe rĩrĩa mantũ jamaarĩrĩte

• Rĩĩkanieni bubaĩrĩ ũrĩa bũkathithia mantũũne jau