KĨTHOOMO KIA 02

Bibiria Nĩejanaga Wĩrĩgĩĩro

Printed Edition

Antũ babaingĩ barĩ na mathĩĩna jarĩa jatũmĩte bakeethĩrwa na mũthũũro, kũmaka, ona kinya ũrũrũ. Gwe-rĩ, kũrĩ rĩo wagwatwa nĩ ũntũ bwatũma wigua mantũ ta jau? Mbuga nĩ ũkũthangĩkua nĩ mbajua kana gũkuĩrwa nĩ muntũ wendete. No ũciũrie, ‘Kũrĩ rĩo ũtũũro, bũkoroagĩra?’ Bibiria nĩ ĩcookagia kĩũria kĩu na njĩra ya kũbooreria.

1. Nĩatĩa Bibiria ĩejanaga wĩrĩgĩĩro?

Bibiria nĩtaaragĩĩria nĩkĩ kũrĩ na mathĩĩna jamaingĩ, kinya nĩtwejaga nkuma ĩnjega atĩ Mũrungu akeeja kũthiria mathĩĩna jaja jonthe kagiita gatĩ kũraaja. Mawĩrane ja Bibiria joomba gũkwaa “wirigiriro” bwa kagĩĩta kejĩte. (Thooma Jeremia 29:11, 12.) Mawĩrane jau nĩ jatũtethagia kũrwa na mathĩĩna jeetũ na kwĩthĩrwa na kũgwĩrua kinya nandĩ, na nĩjatwejaga ũrikithia atĩ tũkeethĩrwa na kũgwĩrua kenya na kenya.

2. Nĩatĩa wĩrane bwa Bibiria bũkwonania ũrĩa ĩgiita rĩĩjĩte rĩkeethĩrwa rĩkari?

Bibiria nĩ ĩtaaragĩĩria ĩgiita rĩĩjĩte rĩrĩa “gikuu gutirio gigacoka gukara o kairi, na gutirio gugacoka kugita kieba kana kiriro kana kinya murimo.” (Thooma Kugwurirwa 21:4.) Mathĩĩna jarĩa jatũmaga antũ bathangĩka ntukũne cietũ—ta ũkĩa, wagi bwa ĩota, mbajua na gĩkuũ—jatĩĩthĩrwa o kaĩrĩ. Bibiria nĩejanĩte wĩrĩgĩĩro atĩ antũ bakagwĩrĩrua ũtũũro kenya na kenya Paradiso nthĩgũrũne.

3. Nĩatĩa ũũmba kwĩthĩrwa na mma atĩ mawĩrane ja Bibiria jakoojũra?

Antũ babaingĩ berĩgagĩĩra mantũ jameega jakarĩka, ĩndĩ batĩĩthagĩrwa na mma kethĩra mawĩrĩgĩĩro jau jao jakoojũrua. Mawĩrane jarĩa Bibiria ĩejanĩte nĩ mwanya. Twomba gwĩtĩkia jarĩa yugaga na njĩra ya gũcũũnkũna ‘Maandĩko’ bwega. (Mathithio 17:11) Wairitana Bibiria, ũkoomba kwithuurĩra wengwa kethĩra ũgetĩkia jarĩa yugĩte jegie ĩgiita rĩĩjĩte.

ĨNJA NKŨRŨKI

Cũnkũũna jamwe ja mantũ jarĩa Bibiria ĩĩranĩrĩte jegie ĩgiita rĩĩjĩte. Ona ũrĩa mawĩrane jarĩa Bibiria ĩejanaga jatethagia antũ ntukũne cietũ.

Mbica: Mbica ikĩonanagia nkũrani ya mantũ jarĩa antũ bagũkũrũkĩĩra nandĩ na jarĩa jeranĩri nĩ Bibiria ja kagiita kejĩte. Mbica iu niicookeri aja gaiti.

4. Bibiria nĩtwejaga wĩrane bwa gũtũũra kenya na kenya tũtĩ na mĩthangĩko

Tega mawĩrane jaja jathingatĩte jarĩa jaumanĩtie na Bibiria. Nĩ jarĩkũ jamwe kĩrĩ jo jagũgũkucĩĩria nkũrũki? Na nĩkĩ?

Thooma Maandĩko jarĩa joonanĩtue kĩrĩ mawĩrane jau, na ũthũgaanĩrie biũria bibi:

Nũkwona teka Maandĩko jaja jagũkwaa wĩrĩgĩĩro? No joombe kwaa antũ ba nja yaaku na acoore wĩrĩgĩĩro kinya bo?

Ũthũgaania ũgĩtũũraga nthĩgũrũ ĩrĩa

GŨTĨ MUNTŨ . . .	O MUNTŨ WONTHE . . .
ũkaigua ũrũrũ, ainyĩĩrua nĩ ũkũrũ, kana akua.—Isaya 25:8.	akoona endwa baawe bariũkĩtue na gũcooka gũtũũra nthĩgũrũne.—Johana 5:28, 29.
ũkaajua kana atũũra na wonje.—Isaya 33:24; 35:5, 6.	akagwĩrĩrua ũgima bwa mwĩrĩ na inya ya wĩthĩĩne.—Ayubu 33:25.
ũgakũrũkĩĩra wagi bwa ĩota.—Isaya 32:16, 17.	akethĩrwa na biakũrĩa bia kũngˈana, nyomba ĩnthongi, na ngũgĩ ĩnjega.—Zaburi 72:16; Isaya 65:21, 22.
ũkathangĩka tontũ bwa ndwa.—Zaburi 46:9.	akaingĩĩrwa nĩ thĩĩrĩ.—Zaburi 37:11.
ũkathangĩka kĩmathũgaanio kana ariikana mantũ jamathũũku.—Isaya 65:17.	agatũũra kenya na kenya athiũrũkĩri nĩ mantũ jameega.—Zaburi 37:29.

Mũtana ũrĩa waajĩtue arĩna ũgima bwa mwĩrĩ agĩcuuncaga ngˈina.

Muntũ mũrũme ũrĩa waarĩ ũmũkũrũ, nandĩ arĩ ũmwĩthĩ etithĩtie njagĩra yũjũri into bia kũrĩa.

5. Mawĩrane ja Bibiria joomba kũgarũra ũtũũro

Antũ babaingĩ nĩ bauni nkoro kana bakaigua bũbũĩ tontũ bwa mathĩĩna jarĩa jabathiũrũkĩte. Bamwe nĩ baciũmagia mono kwagĩrithia mantũ. Ona ũrĩa wĩrane bwa Bibiria atĩ mantũ jakaagĩra bũtethagia antũ naarua. Tega VIDIO, rĩu bwarĩĩrie biũria birĩa bithingatĩte.

VIDIO: Nĩ Ndendeete Kũrwa na Wagi bwa Ĩota (4:07)

Mbica: Mbica kuuma kĩrĩ vidio ‘Nĩ Ndeendete Kũrwa na Wagi bwa Iota.’ 1. Rafika naakethaga bamba arĩna antũ ba rũrĩĩjo rwawe rĩrĩa aarĩ mwarĩ ũmũniini. 2. Rafika agwĩrĩtue kwona antũ ba ndũrĩĩjo mwanyamwanya bagwatanĩrĩte amwe arĩgwĩta kĩgomanone kĩa Akũũjĩ ba Jehova rĩa mbere.

Kĩrĩ vidio, nĩ wagi bwa ĩota bũrĩkũ bwacumbũraga Rafika?
Kinya kethĩra wagi bwa ĩota bũrĩa oonaga bũtathirĩre, nĩatĩa Bibiria yamũtetherie?

Wĩrane bwa Bibiria bwa kagiita kejĩte no bũtũtethie kũrwa na mantũ ja gũtuuna nkoro na kũrwa na mathĩĩna jarĩa tũgũkũrũkĩĩra na njĩra ĩnjega. Thooma Njuno 17:22 na Aroma 12:12, rĩu bwarĩĩre biũria bibi:

Jarĩa Bibiria yugĩte jegie ĩgiita rĩĩjĩte-rĩ, no joombe kwagĩrithia ũtũũro bwaku? Na nĩkĩ?

ANTŨ BAMWE BAUGAGA: “Mawĩrane ja Bibiria jegie ĩgiita rĩĩjĩte jarĩ na inya mono kũũjũra.”

Nĩkĩ bũrĩ ũntũ bwa gĩtũmi gwicũnkũũnĩra gwe wengwa?

NA NJĨRA ĨNKUĨ

Bibiria nĩtwejaga wĩrĩgĩĩro na ĩgatũtethia kũrwa na mathĩĩna na njĩra ya gũtwaa wĩrĩgĩĩro bwa ĩgiita rĩĩjĩte rĩrĩ na kũgwĩrua.

Gũcookera

Nĩkĩ antũ bakũbatara wĩrĩgĩĩro?
Nĩatĩa Bibiria yugaga bwegie kagiita kejĩte?
Nĩatĩa kwĩthĩrwa na wĩrĩgĩĩro bwa kagiita kejĩte kũũmba gũgũtethia naarua?

Kĩthoomo gĩkĩ kĩathira tarĩki

Mworoto

Menya nkũrũki bwegie mawĩrane ja Bibiria na njĩra ya kũthooma Maandĩko jarĩa joonanĩtue kĩthoomone gĩkĩ.

Ũntũ bũngĩ:

Mworoto jwaku jũngĩ

CŨNKŨŨNA

Iritane nkũrũki ũrĩa wĩrĩgĩĩro bũũmba gũgwĩkĩra inya rĩrĩa ũgũkũrũkĩĩra mantũ jamoomũ.

“Nĩkũ—Ũũmba Kwona Wĩrĩgĩĩro?” (Amkeni!, Aprili 22, 2004)

Ona ũrĩa wĩrĩgĩĩro bwa ĩgiita rĩĩjĩte bũũmba gũtethia barĩa batũũraga na mbajua indito.

“Bibiria-rĩ, no Yũũmbe Gũntethia Nkeeja Kwĩthĩrwa na Mbajua Ĩtĩkũthira?” (Thooma intanetine)

Watega rwĩmbo rũrũ kĩrĩ vidio, ringa mbica ũkĩgwĩragĩrua ũtũũro amwe na antũ ba nja yaaku kĩrĩ paradiso ĩrĩa ĩĩranĩri Bibiriene.

Thũgaanĩria Ũtũũro Ũrĩ Paradiso (3:37)

Iritane ũrĩa ũtũũro bwa mũteteeri wa kĩoto kĩa ũmuntũ bwagarũkĩre arĩkwiritana wĩrĩgĩĩro bwa Bibiria bwegie ĩgiita rĩĩjĩte.

“Ntĩkwirĩrĩĩria Kaĩrĩ Kũgarũra Nthĩgũrũ” (Mnara Wa Mlinzi, Julai 1, 2013)