KITHOOMO KIA 01
Nĩatĩa Bibiria Yũũmba Gũgũteethia?
Twinthe nĩ twendete kũmenya biũria biegie ũtũũro, mĩthangĩko, gĩkuũ na kinya mantũ ja kagita kejĩte. Kinya nĩ tũmakagĩra mantũ ja o-ntukũ-o-ntukũ ta ngũgĩ na kwĩthĩrwa na nja ĩrĩna kũgwĩrua. Antũ babaingĩ nĩ boonete Bibiria ĩtĩbateethagia akĩ gũcookia biũria biria bibacubũraga ũtũũrone kinya nĩbaejaga kĩrĩra gĩa gũtumĩra mũtũrĩrene. Rĩ, kũrĩ muntũ wijiĩ ũũmba gũteethua nĩ Bibiria?
1. Nĩ ta biũria birĩkũ Bibiria ĩcookagia?
Bibiria nĩ ĩcookagia biũria bibi bia bata: Nĩatĩa ũtũũro bwambĩrĩrie? Nĩkĩ twombĩrwe? Nĩkĩ antũ babeega bathangĩkaga? Nĩatĩa gũkarĩkaga muntũ akua? Kethĩra antũ bonthe nĩ bakwenda thĩĩrĩ, nĩkĩ kũrĩ na ndũa? Nĩmbi ĩgakarĩka nthĩgũrũne ĩgiita rĩĩjĩte? Bibiria nĩtwĩkagĩra inya gũcwaa macookio ja biũria ta biu na antũ babaingĩ nĩ boonete macookio ja kũbaguna.
2. Nĩatĩa Bibiria yũũmba gũtũteethia tũgwĩrĩrua ũtũũro?
Bibiria nĩtwejaga ũtaaro bũbwega. Ngerekano, nĩ ĩritanaga ũrĩa nja ciũmba kwĩthĩrwa na kũgwĩrua. Nĩtwejaga kĩrĩra gĩa gũtũteetheria kũrũa na mantũ jarĩa ja gũtwinyĩĩria na kũgwĩrĩrua ngũgĩ cietũ. O ũrĩa tũkwiritana iuku rĩrĩ tũkamenya jarĩa Bibiria ĩritanaga bwegie mantũ jaja na jangĩ jamaingĩ. Womba kwĩja kwona atĩ “o ruteto runthe [runthe rũrĩa rũrĩ Bibiriene] ruri . . . kiguni.”—2 Timotheo 3:16.
Iuku rĩrĩ rĩtĩkũjũkia kaanya ka Bibiria. Ĩndĩ nĩ rĩa gũgũteetheeria ũcũnkũũna Bibiria gwengwa. Kwou nĩ tũgũgwĩkĩra nkoro ũthoome Maandĩko jarĩa joonanĩtue ithomoone bibi na ũringithanie na jarĩa ũkwiritana.
ĨNJA NKŨRŨKI
Iritane ũrĩa Bibiria yũũmbĩte gũteethia antu, ũrĩa ũũmba kũgwĩrĩrua kũmĩthooma na nĩkĩ bũrĩ ũntũ bũbwega gũcwa ũteethio nĩkenda ũciũkĩrwa nĩyo.
3. Bibiria yoomba gũtũtongeeria
Bibiria nĩta werũ bũbwingĩ. No tũtumĩre Bibiria gũtua matua jaamega na gũtũtetheeria kũmenya mantũ ja kagiita kejĩte.
Thooma Zaburi 119:105, na rĩu bwarĩĩrie biũria bibi:
Mwandĩki wa Zaburi ĩjĩ oonaga Bibiria atĩa?
Nĩatĩa gwe wonaga Bibiria?
4. Bibiria yoomba gũcookia biũria bietũ
Mwekũrũ ũmwe noonere Bibiriene macookio ja biũria birĩa biatwĩre bimũcumbũraga mĩaka ĩmiingĩ. Tega VIDIO, na bwarĩĩrie biũria birĩa bithingatĩte
Kĩrĩ vidio mwekũrũ ũu aarĩ na biũria birĩkũ?
Kwiritana Bibiria kwamũteethererie atĩa?
Bibiria nĩ ĩtwĩkagĩra inya tũũrie biũria. Thooma Mathayo 7:7, na bwarĩĩrie kĩũria gĩkĩ:
Nĩ biũria birĩkũ ũrĩ nabio Bibiria yũũmba gũcookia?
5. No ũgwĩrĩrue kuthooma Bibiria
Antũ babaingĩ nĩ bagwĩragĩrua kũthooma Bibiria na bakagunĩka kuumania nayo. Tega VIDIO, na bwarĩĨrie biũria bibi.
Kĩrĩ vidio, antũ babeethĩ baigagua atĩa bwegie kũthooma?
Kinya kethĩra bateendete kũthooma, nĩkĩ nandĩ bagwĩragĩrua kũthooma Bibiria?
Bibiria yugaga, no ĩtwee mooritani jarĩa joomba gũtũboreria na gũtwaa kinya wĩrĩgĩĩro. Thooma Aroma 15:4, rĩu bwarĩĩrie kĩũria gĩkĩ:
Rĩ, nũkũgwĩrĩrua wĩrane bwa Bibiria bũrĩa bũtwejaga kũborerua na wĩrĩgĩĩro?
6. Bangĩ no batũteetheerie gũciũkĩrwa nĩ Bibiria
O amwe na kwithoomera Bibiria babaingĩ nĩbonete kwarĩria Bibiria na bangĩ nĩ gũtethagia. Thooma Mathithio 8:26-31, rĩu bwarĩrie kĩũria gĩkĩ:
Nĩatĩa tũũmba gũciũkĩrwa nĩ Bibiria?—Tega mũstaarĩ jwa 30 na 31.
Muntũ mũrũme Mwethiopia naabataraga ũteethio nĩkenda aciũkĩrwa nĩ Bibiria. Naarua antũ babaingĩ nĩ bagunĩkaga rĩrĩa baarĩria Bibiria amwe na bangĩ
ANTŨ BAMWE BAUGAGA: “Kwiritana Bibiria nĩ gũta kaanya.”
Ũũmba kuuga atĩa? Na nĩkĩ?
NA NJĨRA ĨNKUĨ
Bibiria nĩ ĩejanaga kĩrĩra kĩa mũtũũrĩre, ĩgacookia biũria bia bata na ĩkaa antũ wĩrĩgĩĩro na kũbaboreria.
Gũcookera
Nĩ kĩrĩra kĩrĩkũ twonaga kuumania na Bibiria?
Nĩ biũria ta birĩkũ Bibiria ĩcookagia?
Nĩmbi bio wenda kwiritana Bibiriene?
CŨNKŨŨNA
Iritane ũrĩa ũũmba gũtumĩra ũũtaro bwa Bibiria naarua.
“Mafundisho ya Biblia—Hekima Isiyopitwa na Wakati” (Mnara wa Mlinzi Na. 1 2018)
Ona ũrĩa Bibiria yatetheererie muntũ mũrũme ũmwe kũrũa na kwigua arĩ wenka kuuma waneene bwawe.
Cũnkũũna kĩrĩra kĩa Bibiria kĩegie mũtũũrĩre jwa nja.
Iritane ũrĩa Bibiria yugaga nũũ wathaga nthĩgũrũ mwanya na ũrĩa antũ bamwe betĩkĩtie.