KĨTHOOMO KĨA 07

Jehova-rĩ, nĩ Mũrungu Ũkari Atĩa?

Printed Edition

Ũthũgaanagia Jehova nĩ Mũrungu ũkari atĩa? Rĩ, nĩ Mũrungu ũbuĩrĩte gũkĩra, na kwigua ũtĩũmba kwaa mũcoore waawe tontũ arĩ kũraaja mono nagwe ta njota cia ĩgũrũ? Kana ũmwonaga arĩ inya mono, ĩndĩ atĩ na nkuma cia ũmuntũ? Jehova kamma nĩ Mũrungu ũkari atĩa? Gũkũrũkĩĩra Rũteto rwawe Bibiria, Jehova nagwũraga nkuma imwe ciawe ona ũrĩa akũmakagĩra.

1. Nĩkĩ tũtĩũmba kwona Mũrungu?

“Murungu ni Kirundu.” (Johana 4:24) Jehova atĩ mwĩrĩ jwa nyama. We nĩ kĩrundu, atũũraga ĩgũrũ, antũ arĩa tũtĩũmba kwona.

2. Nĩ nkuma irĩkũ imwe cia Jehova?

Kinya kethĩra tũtĩũmba kwona Jehova, arĩ nkuma irĩa ikucagĩĩria barĩa bamwijiĩ. Bibiria yugaga: “Mwathani eendaga iota ria igamba, na atiirukagira atheru bawe.” (Zaburi 37:28) Kinya nĩ mũtugani na nĩ “oojuri ni kiao,” mono mono kĩrĩ antu barĩa bakũthangĩka. (Jakubu 5:11) “Mwathani ari akui na baria bari nkoro imbuniku, Na baria bari mioyo imioro nibo oonokagia.” (Zaburi 34:18) Ũramenya atĩ Jehova naringithagua nĩ mathithio jeetũ? Muntũ ũrĩa ũthuuraga kũthithia mantũ jamathũũku, namwigithagia bũbũĩ na akamũthũũria. (Zaburi 78:40, 41) Ĩndĩ muntũ ũrĩa ũthithagia jameega namũgwĩragia.—Thooma Njuno 27:11.

3. Nĩatĩa Jehova onanagia atĩ natwendeete?

Nkuma ĩrĩa nene ya Jehova nĩ wendo. Kamma, “Murungu ni wendani.” (1 Johana 4:8) Jehova nagwũrĩte wendo bwawe, tĩ gũkũrũkĩĩra Bibiria akĩ, ĩndĩ kinya gũkũrũkĩĩra into birĩa ombĩĩte. (Thooma Mathithio 14:17.) Ngerekano, thũgaanĩria ũrĩa atũũmbĩĩte. Natwete ũũmbi bwa kwona rangi inthongi, kũgwĩrĩrua ndwĩmbo, na gũcema biakũrĩa birĩ na mũrĩo. Nendaga tũgwĩrĩrua ũtũũro.

ĨNJA NKŨRŨKI

Iritane nĩmbi Jehova atumagĩra kũũjũria mantũ ja kũgegania. Rĩu wone ũrĩa Jehova onanagia nkuma ciawe inthongi.

4. Kĩrundu gĩkĩtheru—inya ya Mũrungu

Mbica: Mantũ jarĩa jojũrĩtue nĩ kĩrundu kĩa Mũrungu. 1. Ĩgũrũ na nthĩ na into bingˈuanene na nthĩgũrũ. 2. Mwandĩki wa Bibiria akĩandĩkaga mathũgaanio ja Mũrungu iukune rĩa gũkũnjwa.

O ta ũrĩa tũtumagĩra njara cietũ kũrita ngũgĩ, nou Jehova atumagĩra Kĩrundu kĩawe gĩkĩtheru. Bibiria ĩgwũraga kĩrundu gĩkĩtheru tĩ muntũ, ĩndĩ nĩ inya yaawe ĩrĩa atumagĩra kũthithia mantũ. Thooma Luka 11:13 na Mathithio 2:17, rĩu bwarĩĩrie biũria bibi:

Mũrungu ‘agatuuriria bonthe’ kĩrundu kĩawe gĩkĩtheru barĩa bamũrombaga kĩo. Kwou-rĩ, ũrĩthũgaania kĩrundu gĩkĩtheru nĩ muntũ, kana nĩ inya ya Mũrungu? Nĩkĩ ũkuuga ũu?

Jehova natumagĩra kĩrundu kĩawe gĩkĩtheru kũũjũria mantũ ja kũrigaria. Thooma Zaburi 33:6 na 2 Petero 1:20, 21, rĩu bwarĩĩrie kĩũria gĩkĩ:

Nĩ na njĩra irikũ imwe, Jehova atumĩrĩte kĩrundu kĩawe gĩkĩtheru?

Mantũ jarĩa jojũrĩtue nĩ kĩrundu kĩa Mũrungu. 1. Ĩgũrũ na nthĩ na into bingˈuanene na nthĩgũrũ. 2. Mwandĩki wa Bibiria akĩandĩkaga mathũgaanio ja Mũrungu iukune rĩa gũkũnjwa.

5. Jehova arĩ na nkuma inthongi

Musa aarĩ mũtumĩkĩri wa Jehova mwĩtĩkĩkua, ĩndĩ neendaga kũmenya Mũũmbi waawe nkũrũki. Musa nawe aramwĩra: “Mbonia njira ciaku nandi, nikenda ngakumenya.” (Kuuma 33:13) Jehova neerĩre Musa, We nĩ muntũ ũkari atĩa. Thooma Kuuma 34:4-6, rĩu bwarĩĩrie biũria bibi:

Nĩ nkuma irĩkũ Jehova, aagwũrĩĩre Musa?
Nĩ nkuma irĩkũ cia Jehova ikũgwĩragia?

6. Jehova namakagĩra antũ

Antũ ba Mũrungu, Ahibirania, nĩ baarĩ nkombo Misri. Jehova aigĩrue atĩa nĩ ũntũ bwa mĩthangĩko yaao? Ceetha vidio ya KŨTHIKĨĨRA na ũthingatane nayo, kana ũthoome Kuuma 3:1-10. Rĩu bwarĩĩrie biũria bibi.

VIDIO YA KŨTHIKĨĨRA: Jehova Naabamakagĩra Rĩrĩa Baathangĩkaga (2:45)

Ũntũ bũu bũrĩkũritana atĩa bwegie ũrĩa Jehova aigagua rĩrĩa antũ bakũthangĩka?—Tega gĩcuncĩ kĩa 7 na 8).
Ũrĩthũgaania Jehova kamma nendeete gũtethia antũ, na-rĩ omba kũthithia ũu? Nĩkĩ, kana nĩkĩ tĩu?