Metiu ese E Torea

23 Iesu ese hutuma bona ena disaipol e hereva henidia, eto: 2 “Itorena taudia* bona Farisea taudia* na sibodia Mose ena helai ḡauna ai vada e helai. 3 Una dainai idia ese bae hamaoromui ḡaudia iboudiai na ba badina bona ba kara. A edia kara basio tohotoho, badina be e herevamu, to asie karamu. 4 Idia ese maduna metaudia e ḡuimu, taunimanima paḡadia ai e ato kaumu, to idia sibodia na asie uramu imadia kwaki-kwakidia ta amo bae abi isi. 5 Bona e karamu ḡaudia iboudiai na taunimanima ese bae ita helaoreana. Bagudia ai e kwatumu mauamauadia* e habadamu, unu amo sibodia bae hegima, bona edia dabua rimudia danu e halatamu. 6 Aria negadia ai, idia na e uramu lada bada taudia edia helai gabudiai bae helai. Bona sinagog* ai e uramu gabu namo hereadia ai bae helai, 7 pablik gabudia* ai danu e uramu taunimanima ese mai hematauraidia ida bae hanamodia bona bae gwauraidia Hahediba Tauna.* 8 A umui na basie gwauraimui Hahediba Tauna, badina be emui Hahediba Tauna na tamona, bona umui iboumui ai na tadikaka.* 9 Bona tanobada ai ta basio gwauraia tamamui, badina be Tamamui na tamona, guba ai e nohomu. 10 Bona basie gwauraimui hahekau taumui, badina emui Hahekau Tauna na tamona, Keriso. 11 To bogaraḡimui ai daika na bada, ia ese isiaimui baine lao heni. 12 Sibona e heimodaimu tauna na do bae hamanaua; a sibona e hahemanaumu tauna na do bae imodaia.

13 “Itorena taumui bona Farisea taumui, koikoi taumui, madi ihabaimui! Badina be guba Gavamanina na taunimanima vairadiai o koua ahumu; umui na asio raka vareaimu, bona bae raka vareai e tomu taudia na o laodia ahumu. 14* ——

15 “Itorena taumui bona Farisea taumui, koikoi taumui, madi ihabaimui! Badina davara bona tanobada o loadiamu, ta na Juda tauna ai ba halaoa helaoreana, bona ia na Juda tauna ai e laomu neganai, umui ese ia na Gehena* bainela tauna ai o halaoamu bona iena kerere ese emui na e hereaiamu.

16 “Hahekau taumui matamui kekepulu, madi ihabaimui! Umui na o tomu: ‘Tempol ladana ai baine gwauhamata tauna ena gwauhamata na asi anina, a Tempol golona ladana ai baine gwauhamata tauna ese ena gwauhamata do baine badinaia.’ 17 Kavakava bona mata kepulu taumui e, edena be mai anina bada, golo eiava golo e hahelaḡaiamu ḡauna, tempol? 18 Danu o tomu: ‘Boubou patana ladana ai baine gwauhamata tauna ena gwauhamata na asi anina, a boubou patana latanai e atoamu harihari ḡauna ladana ai baine gwauhamata tauna ese ena gwauhamata do baine badinaia.’ 19 Mata kepulu taumui e, edena be mai anina bada, harihari ḡauna eiava harihari ḡauna e hahelaḡaiamu boubou patana? 20 Una dainai, boubou patana ladana ai e gwauhamatamu tauna na boubou patana bona ia latana ḡaudia iboudiai ladadia ai e gwauhamatamu, 21 bona tempol ladana ai e gwauhamatamu tauna na tempol bona inoholaina Tauna ladadia ai e gwauhamatamu, 22 bona guba ladana ai e gwauhamatamu tauna ese Dirava ena helai gabuna* bona latanai e helaimu Diravana ladadia ai e gwauhamatamu.

23 “Itorena taumui bona Farisea taumui, koikoi taumui, madi ihabaimui! Badina be umui ese mint rauna, dill koukouna bona cumin koukouna* edia karoa 10 amo karoa ta o henimu, to Taravatu* ena hereva badadia heḡereḡere, hahemaoro maoromaoro, hebogahisi bona abidadama, be o dadaraimu. Momokani, ini karoa 10 o heni na maoro, to Taravatu ena hereva badadia o dadarai na dia maoro. 24 Hahekau taumui matamui kekepulu, umui ese kapusi ai namo ta e morumu be o negeamu, a kamelo be o hadonoamu.

25 “Itorena taumui bona Farisea taumui, koikoi taumui, madi ihabaimui! Badina umui na murimurina mo e haḡoevaia kapusina bona disina na heto. Lalomui na mataḡaniḡani bona ura dikadia amo e honu. 26 Mata kepulu Farisea taumu e, kapusi bona disi lalodia ba haḡoeva guna, unu amo murimuridia danu bae ḡoeva.

27 “Itorena taumui bona Farisea taumui, koikoi taumui, madi ihabaimui! Badina be umui na e penidia kurokuro garadia na heheto, murimuridia na mai hairaidia to lalodia na mase turiadia bona miro ḡaudia idauidau amo e honu. 28 Una heḡereḡerena, taunimanima vairadiai toamui be kara maoromaoro taudia, to lalomui be koikoi bona taravatu iutudia karadia amo e honu.

29 “Itorena taumui bona Farisea taumui, koikoi taumui, madi ihabaimui! Badina be umui ese peroveta taudia garadia o haginimu bona kara maoromaoro taudia edia gara* gabudia o hahairaimu, 30 bona umui na o gwaumu: ‘Bema senemai edia nega ai baiama noho, peroveta taudia raradia ihahebubudia karana ai idia na basiama durudia.’ 31 Una dainai, sibomui o hegwauraimu, umui na peroveta taudia e aladia taudia natudia. 32 Vadaeni, senemui ese e hamatamaia ḡaukarana ba haḡuḡurua.

33 “Gaigai, poisin gaigaidia natudia e! Gehena* hahemaorona amo ede ba roho mauri toma? 34 Una dainai lau ese peroveta taudia, aonega taudia bona hahediba taudia na siaidia vasimu. Idia haida bavaladia, haida au ai ba kokodia kau, ma haida be sinagog ai ba dadabadia bona siti iboudiai lalodiai ba daḡedaḡe henidia, 35 unu amo tanobada ai e aladia kara maoromaoro taudia iboudiai raradia na umui latamui ai baine mia, kara maoromaoro tauna Abel rarana amo ela bona Barakaia natuna Sekaraia rarana. Sekaraia na umui ese tempol bona boubou patana padadiai o alaia mase. 36 Lau ese na hamaoromui momokanimu, ini ḡau iboudiai na ina uru ediai bae vara.

37 “Jerusalem e, Jerusalem e, oi na peroveta taudia o aladia mase, bona dekemu e siaidia vasi taudia na nadi amo o hododia mase, nega momo na ura natumu baina haboudia, kokoroku hahinena ese hanina henudiai natuna e haboudiamu heḡereḡerena. To oi na so ura. 38 A kamonai! Dirava ese emu ruma* na baine rakatania.* 39 Badina be lau ese na hamaoromumu, hari dina amo lau na basio itagu, lasi ona lasi vaitani, ela bona baoto: ‘Iehova* ladana ai e maimu tauna na e hanamoa.’”