June

Namona na teacher ese stiuden bae lalokau henidia. Reana gabeai idia na tadikaka o taihu ai be laomu. Vaia idia ese tanobada turadia bae rakatanidia bona Iehova ihesiai henina totona senisi bae kara na mai hekwarahina. Teacher namodia ese edia stiuden e durudiamu pablisa ma haida e dibadiamu neganai, pablisa ese danu stiuden bae durudia diba Dirava turana ai baela totona. Bena stiuden ese Dirava ena taunimanima baine bamodia neganai, idia ese dala idauidau ai ia bae durua diba. Ita na ta uramu stiuden ese baine itaia ia na kongrigeisin tauna ta bona eda tadikaka ta. Ita na ta uramu ia na iseda Kristen oreana lalonai baine vareai. Bena ia ese kavakava taudia edia hebamo na be dadaraidia haraḡamu, badina idia ese asie duruamu Iehova baine lalokau henia totona. (Her. 13:20) Bema turana gunadia ese ia be dadaraiamu, ia dibana Iehova ena orea ai ia ese turana korikoridia baine davaridia diba.​—Mar. 10:29, 30; 1 Pet. 4:4. w20.10 rau 17 par. 10-11

Iesu turana ai baitala na mai anina bada bema ita na ta uramu hetura karana namona Iehova ida baita moalelaia. Dahaka dainai? Mani badi rua aita lalo. Ginigunana na, Iesu ese ena hahediba e hamaorodia, eto: “Tamada ese e ura henimuimu, umui ese lau o ura henigumu dainai.” (Ioa. 16:27) Ia na ma eto: “Tamada dekena baela taudia iboudiai edia dala na lau.” (Ioa. 14:6) Bema oi na o uramu Iehova turana ai baola to bema emu hetura karana Iesu ida na dia namo, oi na vaitani ruma ta ai o uramu ba vareai to iduara na so ḡaukaralaiamu. Iesu ese haheitalai unu bamona e ḡaukaralaia neganai ia na sibona e hegwaurai “mamoe ikoukouna” o iduarana. (Ioa. 10:7) Badi iharuana na Iesu ese Tamana ena kara na e tohotohodia ḡoevaḡoeva. Ena hahediba e hamaorodia, e gwa: “Vada eme itagu tauna ese Tamagu danu vada eme itaia.” (Ioa. 14:9) Una dainai Iehova baita dibaia dalana badana na Iesu ena mauri baita stadilaia. Iesu baita dibaiamu neganai, eda lalokau ienai na be badamu. Bona eda hetura karana Iesu ida be goadamu neganai, eda lalokau Iehova enai danu be goadamu. w20.04 rau 21-22 par. 5-6

Oi be gorere dainai bedi ai o hekuremu eiava wheelchair ai o helaimu, a? Tuimu e hisihisimu eiava matamu be dika, a? Bema unu bamona, oi ese tauanidia goada taudia bona eregabe taudia ida Iehova ba hesiai henia hebou diba, a? Oibe, unu ba kara toma diba. Burukadia bona gorere taudia momo na mauri hanaihanai dalana ai e heaumu. To, sibodia edia goada amo unu na basie kara toma diba. Idia na Iehova amo goada e abimu dalana ta na, telefon amo Kristen hebou herevadia e hakalamu. Bona dokta, nesi bona varavaradia e haroro henidiamu amo hahediba ḡaukarana e karaiamu. Ena be Iehova totona o uramu ba kara ḡaudia iboudiai na basio kara dibamu, to basio lalomanoka bona basioto oi na dia heḡereḡere ba haheauka ela bona ina tanobada oromana dokona. Emu abidadama dainai Iehova ese oi na e lalokau henimumu bona Ia totona o kara ḡaudia na doini e lalodiataomu. Iena heduru bavabia na namo, bona Ia ese oi na basine rakatanimumu. (Sal. 9:10) To Ia ese oi na be durumumu. w20.04 rau 29 par. 16-17

Tomadiho e laloa badamu tauna ida be dahaka ba herevalai diba? Ia bona oi ese Baibul ai o abi daemu ḡaudia ba herevalai. Reana ia na Dirava tamona e toma henia dihomu, reana e abia daemu Iesu na taunimanima edia Hahemauri Tauna, eiava reana e abia daemu ita na kara dika e badamu negana ai ta nohomu bona una na kahirakahira be oremu. Umui raruosi ese o abi daemu ḡaudia heḡereḡeredia ai Baibul ba herevalaia, unu amo ia na be uramu baine kamonai. Ba helalotao taunimanima na dia edia tomadiho ese e hahedibalaimu ḡaudia iboudiai e abi daemu. Ena be ta ena tomadiho na o dibaia, to namona na ia ese e abi daemu ḡaudia danu ba dibadia. Misinari tadikakana ta na e gwaumu haida na e tomu toi tamona na e abia daemu, to idia na asie hamomokaniamu Tamana, Natuna bona lauma helaḡa na Dirava tamona. Ia na ini e gwau tomamu: “Una na dibaia dainai egu ai na haraḡa taunimanima ese e abi daemu ḡaudia baina dibadia totona.” Una dainai taunimanima ese e abi dae momokanimu ḡaudia ba dibadia toho. Bena, aposetolo Paulo heḡereḡerena, oi na “taunimanima idau-idau iboudiai edia ḡau idau-idau iboudiai” baola diba.​—1 Kor. 9:19-22. w20.04 rau 10 par. 9-10

Daniel bona Ioane ese e hahedinaraia, Iehova bona Iesu na hisihisi bada hereana amo edia hesiai taudia be hamauridiamu. Una dainai, bae vara ḡaudia daidiai basita gari na namo. Daniel na e gwa “buka ai ladadia vada e hetore taudia” na bae roho mauri. Dahaka baita kara ladada na buka ai bae hetore totona? Namona na baita hamomokania Iesu, Dirava ena Mamoe na ta abidadama heniamu. (Ioa. 1:29) Dirava enai eda mauri baita gwauhamatalaia bona bapatiso baita abi na namo. (1 Pet. 3:21) Bona Dirava ena Basileia baita durua totona, mai goadada ida ma haida baita durudia Iehova bae dibaia. Hari na nega namona, Iehova bona iena orea baita abidadama henidia. Bona Dirava ena Basileia baita durua. Bema unu baita kara tomamu, not kahana pavapavana bona saut kahana pavapavana na Dirava ena Basileia ese be haorediamu neganai, ita na be hamauridamu. w20.05 rau 16 par. 18-19

Adam bona Heva na mai dibadia Dirava ladana na Iehova, bona iena kara danu mai dibadia. Heḡereḡere, idia na mai dibadia Ia na ḡau iboudiai e Havara Tauna, ia na edia mauri, edia noho gabuna paradaiso e heni, bona edia headava e karaia Tauna. (Gen. 1:26-28; 2:18) To idia ese daradia ḡoevadaedia e ḡaukaralai, Iehova ese idia daidiai e kara ḡaudia bae lalodia dobu totona, a? Idia ese edia lalokau bona tenkiu karana Iehova enai e habadaia, eiava? Dirava inaina ese e dibaḡanidia neganai, unu henanadai haeredia na e hedinarai. Satana ese gaigai e ḡaukaralaia bena Heva e nanadaia, eto: “Momokani Dirava eto umui na imea audia ta huahuana basio ania?” (Gen. 2:16, 17; 3:1) Una henanadai lalonai koikoi herevana ta na mia bona una na poisin ta bamona. Dirava na e gwa idia na imea audia iboudiai huahuadia bae ani, to tamona mo basie ania. (Gen. 2:9) Satana na ena hereva amo e hahedinaraia toana na Dirava na dia hariharibada tauna. Heva na reana e lalo, ‘Dirava be ḡau namona ta lauegu amo e huniamu, a?’ w20.06 rau 3-4 par. 8-9

Iehova ena hesiai taudia haida na tadikaka eiava taihu haida edia kara ese e hahisidia. Aposetolo Paulo na e diba nega haida tadikaka ta eiava taihu ta na badi maorona ta dainai baita hahebadelaiamu o baita maumauraiamu. Reana e kara henida dalana na dia maoro. Bema basita henari namonamomu, reana baita badumu. Badu karana ese ta na Iehova ena taunimanima amo baine hadaudaua diba. South America ai, tadikaka ta ladana Pablo na kerere ta se karaia, to ta ese e samania koikoi, una dainai kongrigeisin ai ena maduna e kokia. Ia be dahaka e kara? Pablo na e gwa: “Lau na na badu bona taina ruana kongrigeisin amo na daudau.” Eiava, ta na guna kara dika badana ta e karaia, nega daudau lalonai una ese ia lalona mamina na be hadikaiamu. Be laloamu Dirava ese ia na se lalokau heniamu. Ena be ia na e helalo-kerehai bona Iehova ena hebogahisi na e mamia, to reana e mamiamu ia na dia heḡereḡere Dirava ena hesiai tauna ta ai bainela. Unu hekwakwanai e davarimu tadikaka bona taihu be ede o lalodia tomamu? w20.06 rau 19 par. 6-7

Ita ese dika toadia idauidau baita diba be namo, unu amo dika baita hanaia o basita hekwakwanai. (Heb. 5:14) Heḡereḡere, namona na moale karadia (recreation o entertainment) maorodia baita abi hidi. Nega momo, television program bona muvi ai matabodaḡa karadia idauidau e hedinaraimu. Ita na dibada Dirava ese matabodaḡa karadia iboudiai e inai henidiamu bona kara unu hetomadia e karamu taudia na sibodia e hahedikamu bona ma haida e hadikadiamu. Karaharaḡa, moale karadia dikadia baita dadarai badina kara unu hetomadia ese Dirava ta lalokau heniamu karana na bae hamanokaia diba. (Efe. 5:5, 6) Namona na aposteit taudia edia koikoi herevadia edia dika baita dibaia, badina idia na e uramu iseda tadikaka bona Iehova ena orea ladana bae hadikaia. (1 Tim. 4:1, 7; 2 Tim. 2:16) Koikoi hereva unu hetomadia ese eda abidadama baine hamanokaia diba. Namona na aposteit taudia edia koikoi herevadia baita dadarai. Dahaka dainai? Badina unu sivarai koikoidia e haripiumu taudia “lalodia e kereremu bena hereva momokani vada e rakatanimu taudia.” Idia na e uramu “henanadai bona hepapahuahu” bae hamatama. (1 Tim. 6:4, 5) Bona e uramu edia hahedika herevadia bona koikoi karadia baita abi dae, bena iseda tadikaka baita dadaraidia. w20.09 rau 29 par. 13, 15

Namona na tau bona hahine na bae helalokau heheni bona bae hemataurai heheni. (Efe. 5:33) Baibul ese e hadibadamu, ḡau ihenina karana baita laloa bada, to dia ḡau iabina karana. (Apos. 20:35) Edena kara ese headava tau bona hahine baine durudia lalokau bona hemataurai bae hahedinarai? Una na manau karana. Manau karana ese Kristen headava taudia momo e durudiamu edia headava bae moalelaia totona. Heḡereḡere, headava tauna ta ladana Steven na e gwa: “Bema oi bona adavamu na tim ta bamona o ḡaukara hebou namonamomu, hekwakwanai negadiai danu umui na bo ḡaukara heboumu. Basio lalo, ‘lauegu ai dahaka be namo?’ to ba lalo ‘aiemai ai dahaka be namo?’” Ia adavana Stephanie danu unu e lalo toma, e gwa: “Ta na se uramu inaina ida baine noho. Hekwakwanai ta e varamu neganai, ai ese una hekwakwanai badina a tahuamu. Bena a ḡuriḡurimu, eda pablikeisin haida a duahimu, bona ihamaoromaorona dalana a herevalaiamu. Asia heaimu, to a hekwarahimu una hekwakwanai baia hamaoromaoroa.” Headava tatau bona hahine na e moalemu bema asie laloamu ta ese ma ta na e hereaiamu. w20.07 rau 3-4 par. 5-6

Iehova ba hesiai henia negadiai, sibomu emu goada o aonega ai na basio tabekau. Aposetolo Paulo na e skuli namonamo tauna​—ia e hadibaia tauna ladana na, Gamaliel; una negai Iuda ena hegunalai taudia ese Gamaliel na e matauraia badava. (Apos. 5:34; 22:3) Bona gunaguna, Iuda taudia bogaraḡidiai Paulo na mai ladana. (Apos. 26:4) To, Paulo na sibona ena aonega eiava goada ai se tabekau. Paulo na mai moalena ida tanobada ḡaudia e dadaraidia badina unu ḡau daidiai taunimanima ese ia na e imodaiava. (Fili. 3:8) Paulo na Keriso e badinaiava dainai hekwakwanai momo e davari. Madi, iena bese taudia ese e inai heniava. (Apos. 23:12-14) Bona Roma taudia ese Paulo na e dadabaia bona dibura ruma ai e tahoa vareai, ena be ia na idia edia bese tauna. (Apos. 16:19-24, 37) Danu, dibana ia na dia ḡoevadae dainai, e hekwarahiva kara namo baine karaia totona. (Roma 7:21-25) Ia na mai moalena ida Iesu baine badinaia, herevana ia na dia ḡoevadae o taunimanima ese e daḡedaḡe heniava. Dahaka dainai? Badina ena mauri lalonai e itaia ia e manokava negadiai, Dirava ese goada na e heniava.​—2 Kor. 4:7; 12:10. w20.07 rau 16 par. 7-8

Hari ina negai, namona na haroro ḡaukara baita atoa guna. Iesu na e peroveta eto, baine mase murinai ina ḡaukara na basine doko to baine bada ela bona tanobada heḡeḡemadai. Iesu na mase amo e toreisi lou murinai, hoa karana ta e karaia, unu amo ena hahediba taudia haida e durudia gwarume momo herea e veri. Una murinai, Iesu ese e hamaorodia, namona na taunimanima ihaoda-henidia ḡaukarana bae atoa guna. (Ioa. 21:15-17) Iesu na guba do sela neganai, ena hahediba e hamaorodia ia ese e hamatamaia ḡaukarana na bae habadaia, Israel ena boda baine hanaidia ela bona tanobada heḡeḡemadai. (Apos. 1:6-8) Laḡani momo muridiai, Iesu ese vairai o “Lohiabada ena dina” ai baine vara ḡauna na Ioane enai e haheitalaia. Matahanai lalonai, aposetolo Ioane ese e itaia ḡauna ta binai: Aneru ta ese “mia-hanaihanai sivaraina namona na tanobada ai e nohomu taudia ediai e laohai, bese iboudiai, iduhu iboudiai, gado iboudiai, tano iboudiai e harorolai henidia.” (Apok. 1:10; 14:6) Oibe, Iehova na e uramu ina ḡaukara badana baita karaia hanaihanai ela bona ia baineto, ‘Ḡaukara na vada ba hadokoa.’ w20.09 rau 9 par. 5

Abraham ena ruma bese lalonai hekwakwanai badadia haida e varava danu. Ia adavana lalokauna, Sara, na asi natuna. Una dainai, laḡani momo lalodiai, idia na lalohisihisi ai e nohova. Nega ta ai, Sara ese ena hesiai kekenina, Hagara, na Abraham e henia baine adavaia, unu amo ia ese natuna baine havaradia, bena Abraham bona Sara baine henidia. To, Hagara e rogorogo bona Ismael baine havaraia neganai, ia ese Sara na se matauraiava. Una hekwakwanai e bada e laova dainai, Sara ese Hagara na ruma amo e lulua. (Gen. 16:1-6) Gabeai, Sara e rogorogo bena Abraham natuna ta e havaraia, ladana be Isaak. Abraham ese Ismael bona Isaak na e lalokau henidiava. To, Ismael ese Isaak e daḡedaḡe heniava dainai, Abraham ese Ismael bona Hagara na e luludia. (Gen. 21:9-14) Gabeai, Iehova ese Abraham e noia Isaak baine bouboulaia. (Gen. 22:1, 2; Heb. 11:17-19) Unu nega ruaosi ai, Abraham dibana, Iehova ese ena gwauhamata anidia na ia natuna raruosi ediai be hamomokaniamu. w20.08 rau 4 par. 9-10

Toreisi lou taudia ese edia kara na be haidaumu bena Dirava ena taravatu be badinamu neganai, idia na be moale dikadikamu. Bona idia na be mauri hanaihanaimu. To, Dirava e gwau-edeede henia taudia na Paradaiso ai basie nohomu. (Isa. 65:20; Ioa. 5:28, 29) Basileia baine lohia neganai, Dirava ena taunimanima iboudiai ediai Hereva Lada-isidia 10:22 ena hereva na be momokanimu, etomu: “Iehova ena hahenamo ese taḡa e habadaiamu, bona lalo-hisihisi sina taina se atoa kaumu.” Iehova ena lauma helaḡa ena heduru dainai, Dirava ena taunimanima edia lauma taḡana na be bada be laomu, anina na idia ese Keriso ena kara be tohotohomu ela bona idia danu ḡoevadae taudia ai be laomu. (Ioa. 13:15-17; Efe. 4:23) Oibe, dina ta ta ai, idia na taunimanima namodia bona goadadia ai be laomu. Una negai, ita na mauri namona baita moalelaiamu!​—Iobu 33:25. w20.08 rau 17 par. 11-12

Nega iboudiai baita laloatao, singul taudia haida na asie uramu headava. Idia haida be e uramu bae headava to reana idia ese bae adavaia tadikakana o taihuna ta do asie davaria. To, ma haida be reana doḡae o vabu. Herevana daika e headava o lasi, to kongrigeisin taudia na asi edia maoro singul taudia bae nanadaidia dahaka dainai do asie headava, bona idia na asi edia maoro singul ta bae noia idia ese ia bamona ta bae tahua totona. Bema singul taudia ese iseda heduru basie noia, o laloamu iseda henanadai kavakavadia ese singul taudia edia hemami be ede be tomaiamu? (1 Tim. 5:13) Singul tadikaka bona singul taihu na be moalemu bema edia kara namodia baita lalodia badamu, a dia idia na singul dainai baita bogadia hisi kava. Lasi, to baita moale badina idia na e gini goadamu. Asita uramu singul tadikaka bona singul taihu na bae laloa, ita ese idia na ta hamaorodiamu: “Asi emui ḡaukara egu ai.” (1 Kor. 12:21) To, namona na bae diba ita ese kongrigeisin ai idia na ta matauraidiamu. w20.08 rau 29 par. 10, 14

Gabeai, Iesu na Paulo enai e hedinarai danu. (1 Kor. 15:8) Paulo (Saulo) na Damasko e laova lalonai, Iesu gadona e kamonai bona matahanai ta amo guba ai Iesu hairaina e itaia. (Apos. 9:3-5.) Paulo enai e vara ḡauna ese e hamomokania Iesu ena toreisi lou na sivarai momokanina. (Apos. 26:12-15) Taunimanima haida na Paulo ena hereva e urava bae kamonai badina guna ia danu Kristen taudia e daḡedaḡe henidiava tauna ta. To Paulo na gabeai e abia dae Iesu na mase amo e toreisi lou neganai, e ḡaukara goada ma haida ediai ina hereva momokani e gwauraia. Ena be e dadabaia, dibura rumadia ai e atoa, bona e gui kadadia haida na e dika, to Iesu e mase bena e toreisi lou sivaraina na e harorolaia goadagoada. (1 Kor. 15:9-11; 2 Kor. 11:23-27) Paulo na e abia dae vaitani Iesu na mase amo e toreisi lou dainai ena mauri na se laloa, to mai ena ura ida ena abidadama e gwauraia hedinarai. Kristen ginigunadia ese e gwaurai hahemomokani sivaraidia dainai, oi o abia daemu Iesu na mase amo e toreisi lou, a? Bona una ese emu abidadama toreisi lou helarona ai e hagoadaiamu, a? w20.12 rau 3 par. 8-10

Reana siboda baita henanadai: ‘Nega iboudiai lau be kongrigeisin heboudia na laomu, a?’ Iehova ena orea ena hebou ta laomu negadiai, lauma dalanai goada matamata ta abimu bona tadikaka taihu edia habamo namona ta moalelaiamu. (Mat. 11:28) Reana ma siboda baita henanadai: ‘Dina ta ta ai, lau be Baibul na stadilaiamu, a? Eiava bema lau na egu ruma bese ida na nohomu, wiki ta ta lalodiai, ai be ruma bese ena tomadiho a karaiamu, a? Eiava bema lau na sibogu na nohomu, lau ese Baibul na stadilaiamu, a? Danu, nega iboudiai lau ese haroro ḡaukara bona hahediba ḡaukara na karaiamu, a? Dahaka dainai ita siboda ese henanadai unuhetomadia baita heni na namo? Baibul etomu: “Iehova ese taunimanima iboudiai lalodia e tahudiamu, bona lalo-hata bona lalo-hadai iboudiai na dibana.” (1 Sis. 28:9) Bema ita ese ta itaiamu eda plan, kara, o lalohadai baita sensi na ḡau badana, namona na Iehova baita noia baine duruda sensi baita kara. Hari na nega namona siboda baita heḡaeḡae, gabeai bae vara hahetohodia baita hanaidia totona. w20.09 rau 19 par. 19-20

Iesu ese haheitalai ta amo e hahedinaraia, tau ta be dahaka baine kara bema ia na e uramu Iesu ena hahediba ai bainela. Iesu eto, kapenta be e ura kohoro ta baine haginia, bona king ta be e ura bainela tuari. Iesu eto, namona na kapenta na baine “helai diho guna” bona ‘davana baine laloa,’ unu amo baine itaia kohoro baine haḡuḡurua diba eiava, danu king na baine “helai diho guna” bona ma haida edia lalohadai baine tahua guna, unu amo baine itaia ena tuari taudia be heḡereḡeremu inaidia bae hadareredia totona eiava. (Luka 14:27-32) Una heḡereḡerena, Iesu dibana bema tau ta e uramu hahediba ai bainela, namona na ḡau iboudiai baine lalohadailaidia namonamo guna, unu amo baine itaia ia heḡereḡere Iesu murinai baine raka eiava. Baibul stiuden baita hagoadadia wiki ta ta ai baita stadi henidia na namo. Teacher e, namona na ba heḡaeḡae namonamo muridiai stadi ba karaia. Stiuden ba hadibaia dalana ba lalohadailaia loulou, unu amo stadi ba karaia neganai, ia ese stadi anina baine lalopararalaia bona baine badinadia na dia auka.​—Neh. 8:8; Her. 15:28a. w20.10 rau 7 par. 5; rau 8 par. 7

Iesu ena haheḡani na hedinarai ḡoevaḡoeva. Namona na ia ese ita e haḡanida ḡaudia na taunimanima baita hadibalaidia. To, ina baita laloa na mai anina bada. Iesu na se gwa: ‘Lau ese na henimui haheḡanidia iboudiai ba hadibalaidia.’ To, e gwa: Ba hadibadia “na henimui haheḡanidia iboudiai bae badina.” Iesu ena haheḡani baita badinaia totona, namona na Baibul stiuden baine kara ḡaudia, bona ikaradia dalana danu baita hadibaia. (Apos. 8:31) Edena dala ai ta baita hadibaia Keriso ena haheḡani baine badinaia? Haida ida Baibul ta stadilaiamu neganai, ita ese Dirava ena ura ta hadibalaidiamu. To, ḡau ma haida baita kara na namo. Namona na eda Baibul stiuden baita hadibadia e dibadiamu ḡaudia na edia mauri lalonai bae badina. (Ioa. 14:15; 1 Ioa. 2:3) Eda kara amo baita hahedinaraia eda stiuden ese Baibul ena hahekau herevadia na sikuli ai, ḡaukara gabudiai, eiava moale negadiai bae badina diba. Eda stiuden ida ta ḡuriḡurimu neganai, Iehova baita noia ena lauma helaḡa amo baine hakaudia.​—Ioa. 16:13. w20.11 rau 2-3 par. 3-5

Iesu ena hahediba ese hekwakwanai na e davari. Heḡereḡere, Toretore Helaḡadia edia kopi na dia momo. Eiava stadi bukadia na lasi. Eiava hahediba taudia na gado idauidau ai taunimanima e haroro henidiava. Herevana dahaka, to idia ese haroro ḡaukara na e karaia​—oibe, laḡani 30 lalodiai, idia ese sivarai namona na “taunimanima iboudiai guba henunai vada e harorolai henidia.” (Kol. 1:6, 23) Hari ina negai, Iehova ese ena taunimanima na doini goada e henidiamu. Oibe, Dirava ese ena Buka Helaḡa amo ena taunimanima e hakaudiamu. Baibul ai ta duahimu, Iesu ese haroro ḡaukara e karaia bona ia ese ena hahediba e haḡanidia ia e hamatamaia ḡaukarana bae karaia. (Mat. 28:19, 20) Iehova ese taunimanima oromadia na se lalomu; ia e peroveta eto, sivarai namona na “bese iboudiai, iduhu iboudiai, gado iboudiai, tano iboudiai [bae] harorolai henidia.” (Apok. 14:6, 7) Ia na e uramu taunimanima ibounai ese Basileia sivaraina bae kamonaia. w20.10 rau 21 par. 6-8

King David na “Iehova ena taravatu” e lalokau heniava tauna. (Sal. 1:1-3) David na mai dibana Iehova ese manau taudia e hamauridiamu, to hekokoroku taudia na e dadaraidiamu. Una dainai David na Dirava ena taravatu heḡereḡerena ena lalohadai e haidaua. Ia eto: “Iehova na hanamoamu, ia ese e hahealo henigumu; hanuaboi lalonai lau lalogu ese e hadibagumu.” (Sal. 16:7) Bema ta manaumu, ita na ta uramu Dirava ena Hereva ese eda lalohadai kereredia baine hamaoromaorodia, unu amo kara kererena ta basita karaia. Dirava ena Hereva na gado ta bamona, ita e hadibadamu: “Dalana binai, ia lalonai ba raka.” Bema idiba kahana eiava lauri kahana ta laomu, una gado ese be hadibadamu. (Isa. 30:21) Iehova baita kamonai heniamu neganai, dala idauidau ai namo baita davarimu. (Isa. 48:17) Heḡereḡere, ta ese eda kara be hamaoromaoroamu neganai, basita hemaraimu. Bona Iehova kahirakahira baita laomu, badina ta dibamu ia na tama lalokauna ta bamona ita be naridamu.​—Heb. 12:7. w20.11 rau 20 par. 6-7

Korinto taudia haida na unu e lalo tomava. (1 Kor. 15:12) Bona haida na e laloava toreisi lou na dia ḡau korikorina. Kara dika taudia be e gwauraidiava “mase” taudia, bona Kristen ai ela taudia be e gwauraidiava “mauri” taudia. Toreisi lou herevana na asie abia daeva dainai, edia abidadama na asi anina. Bema Dirava ese Iesu basinema hatorea isi lou, mauri davana na basinema heni bona taunimanima iboudiai edia kara dika na basinema gwautao. Una dainai bema ta na toreisi lou herevana se abia daemu, ia na asi ena helaro. (1 Kor. 15:13-19; Heb. 9:12, 14) Aposetolo Paulo na mai dibana “Keriso na mase amo vada e tore isi.” Una ese guna tanobada ai mase amo e toreisi lou taudia edia toreisi lou e hereaia, badina unu taunimanima na gabeai e mase. Paulo na eto Iesu na “mahuta taudia edia tore isi lou roboana.” Ia na tau ginigunana lauma ai e toreisi lou bona guba ela.​—1 Kor. 15:20; Apos. 26:23; 1 Pet. 3:18, 22. w20.12 rau 5 par. 11-12

Aposetolo edia negai, Ierusalem ai, gavanin bodi na e ḡaukara hebouva badina asie urava Dirava ena taunimanima na bae heiriheiri, lasi, to maino ai bae noho. (Apos. 2:42) Heḡereḡere, 49 C.E. ai, peritome hepapahuahuna e vara neganai, gavanin bodi ese una hekwakwanai e herevalaia. Bema una ese kongrigeisin be hapararaiamu, idia ese haroro ḡaukara basie karaiamu. Herevana aposetolo bona heitatao taudia na Iuda taudia, to idia na asie ura edia kastom o hahediba gunadia ese bae biagudia. Oibe, idia ese Dirava ena Hereva bona lauma helaḡa ena hahekau dalana e badinaia. (Apos. 15:1, 2, 5-20, 28) Bena dahaka e vara? Edia disisin na Iehova ese e hanamoa, maino bona lalotamona e vara, bona haroro ḡaukara na se doko. (Apos. 15:30, 31; 16:4, 5) Hari ina negai, Iehova ena orea na e hekwarahimu dainai, Iehova ena taunimanima na bae heiriheiri, to maino ai e nohomu. w20.10 rau 22-23 par. 11-12

Reana buruka o gorere, eiava ḡau ma haida daidiai maduna haida na asita abimu. Bema eda noho dalana na unu bamona, King David ena haheitalai amo ḡau ta baita dibamu. David na e ura Dirava ena dubu helaḡa baine haginia, to Iehova ese ta e abia hidi una ḡaukara baine karaia. David na Iehova ese e abia hidi tauna e urava baine durua dainai, mai lalona idoinai ida gold bona silver momo herea e heni. Ita edai David na haheitalai namona. (2 Sam. 7:12, 13; 1 Sis. 29:1, 3-5) France ai, tadikaka ta ladana Hugues na e gorerea dainai elda maduna e atoa diho, bona ruma ai ḡaukara maraḡidia baine kara na auka. Ia na eto: “Matamanai, na hemami lau na asi anigu bona na lalohisihisi bada herea. To gabeai na abia dae egu goada na mai hetoana, bona egu goada heḡereḡerena ai Iehova dainai na karamu ḡaudia na moalelaimu. Lalogu na hadaiamu basina hesiku. Ena be Gideon bona tatau 300 na e hesiku, to e kwalimu. Una heḡereḡerena lau danu dounu baina hekwarahi.”​—Hah. 8:4. w20.12 rau 25 par. 14-15

Aposetolo Ioane ese Iesu sivaraina e torea neganai, Mataio, Mareko, bona Luka padadiai Ioane mo ina hereva “lalokau” e herevalaia momo. Ia ese e tore Baibul bukadia ese ita e hadibadamu, lalokau ese eda kara bona hereva baine biagu na ḡau badana. (1 Ioa. 4:10, 11) To, Ioane na laḡani haida lalodiai una kara e dibaia. Ioane na eregabena neganai, lalokau na se hahedinaraia momova. Heḡereḡere, nega ta Iesu bona ena hahediba taudia na Ierusalem baela totona, Samaria hanua ai e raka vareai. Samaria hanua ta ai taunimanima na se urava idia bae abidia dae. Ioane ese Iesu e nanadaia eto, ‘O uramu lahi guba amo baia gwauraia, baine diho bona una hanua taudia iboudiai baine habuadia, a?’ (Luka 9:52-56) Nega ma ta ai, Ioane bona tadikakana Iakobo ese sinadia e hamaoroa Iesu baine noia, Basileia lalonai idia raruosi dagi badana baine henidia bona Iesu badinai bae helai. Aposetolo ma haida na una e kamonai neganai, e badu dikadika! (Mat. 20:20, 21, 24) Ena be Ioane na kerere momo e kara, to Iesu ese e lalokau henia.​—Ioa. 21:7. w21.01 rau 8-9 par. 3-4

Iehova ese abi hidi e karamu neganai, haida edia namo danu e lalomu. Heḡereḡere, ia ese mauri ḡaudia iboudiai e kara, badina e uramu ita ese mauri baita moalelaia. Ta ese se doria Natuna baine siaia eda kara dika dainai baine mase. To ia na unu e kara toma badina e ura ita baine duruda. Iesu danu abi hidi e karava neganai, haida edia namo e lalova. Heḡereḡere, ia ese ena laḡa-ani negana e ḡaukaralaia hutuma e hadibadia. (Mar. 6:31-34) Ruma bese kwarana namona na mai dibana, ena ruma bese totona abi hidi maorodia baine kara na namo, bona una maduna na e laloa badamu. Ia na dia sibona ena ura o hemami dainai abi hidi be karamu. To be uramu Iehova ese baine hadibaia abi hidi maorodia baine kara. (Her. 2:6, 7) Unu amo dia sibona ena namo be tahumu, to haida edia namo be tahumu. (Fili. 2:4) Bema tama na Iehova bona Iesu edia haheitalai be badinamu, ia na ruma bese kwarana namona ai be laomu. w21.02 rau 7 par. 19-21

King Asa tauhaunai, ia na manau bona boga-auka tauna. Heḡereḡere tamana, Abia, gabuna e abia neganai, ia ese kaivakuku iboudiai e haoredia. Danu, “Iuda taudia e haḡanidia, Iehova, senedia edia Dirava, bae tahua, bona taravatu bona haheḡani bae badinadia.” (2 Sis. 14:1-7) Sera, Etiopia tauna mai ena tuari taudia 1,000,000 ida ese Iuda e tuari henia neganai, Asa na mai aonegana ida Iehova e noia baine durua, e gwa: “Iehova e, asi ikahamai ta oi heḡereḡeremu, goada taudia bona manoka taudia padamai ai. Iehova e, emai Dirava, a kahamai; badina be emu ai a hetao kaumu.” Ini hereva namodia amo Asa ese e hahedinaraia ia na e abidadama, Iehova ese ia bona ena taunimanima na baine hamauridia diba. Asa ese Tamana guba ai e abidadama henia, bona “Iehova ese Etiopia taudia e hadareredia.” (2 Sis. 14:8-12) Reana bo abia daemu, tuari taudia 1,000,000 ituari henidia na hekwakwanai badana, to Asa na e kwalimu. w21.03 rau 5 par. 12-13

Baibul ese e hahedinaraiamu ena be taunimanima haida na dia ḡoevadae to idia ese danu lalokau bona hebogahisi karana e hahedinaraia. Mani Ionatan bona David edia haheitalai aita herevalaia. Baibul na e gwa: “Ionatan bona David na lalo-tamona ai e hetura heheni; Ionatan ese David e lalokau henia, ia sibona e helalokau heniva heḡereḡerena.” (1 Sam. 18:1) Iehova ese David na e abia hidi King Saulo gabuna baine abia. Una murinai, Saulo ese David na da e mama heniava bona e urava baine alaia. To Ionatan na se ura tamana Saulo baine durua David bae alaia totona. Ionatan bona David na e gwauhamata edia hetura karana na baine mia ela bona hanaihanai bona nega iboudiai bae heduru heheni. (1 Sam. 20:42) Ionatan bona David edia lalokau na hoa ḡauna, badina ḡau momo ese edia hetura karana na bema hadikaia diba. Heḡereḡere, Ionatan laḡanina na bada, ia bona David padadiai na laḡani  30 heḡereḡerena. Una dainai reana Ionatan na basinema ura David baine hetura henia badina ia na meromero, bona ḡau momo na asi dibana. To Ionatan na unu se lalo toma, ia ese David na e matauraiava. w21.01 rau 21-22 par. 6-7

Iesu na e gwauhamata ia murinai bae raka taudia na do bae moale. To e hadibadia danu, idia na hahetoho be davarimu. (Mat. 10:22, 23; Luka 6:20-23) Ta moalemu badina ita na Keriso ena hahediba taudia. To, ede baita hemami tomamu bema eda ruma bese ese be inai henidamu, gavamani ese be daḡedaḡe henidamu, eiava ḡaukara o skul turadia ese be doridamu kara dika ta baita karaia? Vaia ḡau unu bamodia ese lalohekwarahi na be havaramu. Taunimanima na daḡedaḡe e davarimu neganai, asie moalemu. To, Baibul na etomu baita moale. Heḡereḡere, hahediba tauna Iakobo na e gwa, hedibaḡani negadiai, basita lalohekwarahi to baita moale. (Iak. 1:2, 12) Bona Iesu na e gwa, daḡedaḡe ta davarimu neganai namona na baita moale. (Mat. 5:11) Iehova ena siahu amo Iakobo ese Kristen taudia e tore henidia bona sisiba namodia amo e durudia hekwakwanai negadiai dounu bae moale totona. w21.02 rau 26 par. 1-2; rau 27 par. 5

Timoteo ena negai, Kristen taudia haida na Dirava ida e ḡaukara hebouva hahenamona na se laloa bada. Heḡereḡere Dema, Fugelo, Heremogene, Humenaio, Alesana, bona Fileto. (1 Tim. 1:19, 20; 2 Tim. 1:15; 2:16-18; 4:10) Mani a laloa, ini taunimanima na gunaguna lauma dalana ai e goadava, to gabeai idia ese harihari ḡaudia na e haboiodia. Satana be edena dalai ita e tohoadamu Iehova e heni ḡaudia baita dadaraidia totona? Satana ena koikoi karadia haida aita herevalai. Ia ese TV, muvi, Intanet, niuspepa, buka, bona magasin amo ita laloda e hadiburaia tohomu, unu amo Iehova bona ena taravatu baita dadaraidia. Ia ese lalo-ani herevadia bona daḡedaḡe karadia amo ita e hagaridamu, unu amo haroro ḡaukara baita hadokoa. Bona e uramu aposteit taudia edia “kavakava herevadia” baita kamonai henidia, unu amo hereva momokani baita rakatania. Bema nahuada basita tohomu, taina ruana hereva momokani baita rakataniamu.​—1 Tim. 6:20, 21. w20.09 rau 27 par. 6-8

Turamu ta o emu bese tauna ta ese lalomu e hahisia, a? Bema oibe, King David natuna Absalom sivaraina istadilaina karana amo heduru bavabi diba. (2 Sam. 15:5-14, 31; 18:6-14) Una sivarai ba laloa bona haida ese e kara auka henimu karana na Iehova ba hamaorolaia. (Sal. 6:6-8) Mani unu e vara neganai David ena hemami a laloa. Ia ese Absalom na e lalokau heniava bona Ahitofel na e abidadama heniava. To, ia mai dibana taudia raruosi ese e gwau-edeede henia. Idia ese lalona e hahisia bada bona e ura bae alaia. David ese turana ma haida na basinema abidadama henidia, bema lalo reana idia danu Absalom e badinaiamu. Reana sibona bema helalo bona hanua bema rakatania. Eiava ena metau dainai basinema ura kara ta baine karaia. To, ḡuriḡuri amo Iehova ena heduru e noia. Danu turana e noidia ia bae durua. Bona e abia hidi ḡauna na e karaia haraḡa. Ia ese Iehova bona bamona namodia na dounu e abidadama henidiava. w21.03 rau 15 par. 7-8; rau 17 par. 10-11