February

King Hesekia na e gorerea neganai, Iehova e noia baine durua baine namo totona. Bona Iehova ese ena noinoi na e abia dae bona e hanamoa. (2 Han. 20:​1-6) To, aposetolo Paulo na Iehova e noia iena “ginigini” baine kokia totona, to Iehova ese una na se kokia. (2 Kor. 12:​7-9) Aposetolo Iakobo bona Petro na King Herod ese e ura baine hamasedia. Iakobo be e mase, a Petro be hoa dalanai aneru ta ese e hamauria. (Apos. 12:​1-11) Reana ita na baita lalomu, ‘Dahaka dainai Iehova ese Petro e hamauria to Iakobo be lasi?’ Baibul ese una na se gwauraia. Namona na ina baita diba, Iehova ena dala iboudiai na mamaoro. (Deu. 32:4) Nega haida Iehova ese eda ḡuriḡuri na dia ita ese ta laloamu dalanai e haerelaimu. To ta abia daemu Iehova na mai lalokauna ida eda ḡuriḡuri e haerelaimu bona iena kara na maoromaoro, una dainai eda ḡuriḡuri e haerelaiamu dalana na basita daradaralaia.—Iobu 33:13. w23.11 rau 21 par. 6

Iakobo bukana e torea tauna Iakobo na e gwa, aonega taudia na ‘heḡaeḡae hereva bae badina.’ Una anina be dahaka? Anina na mai eda ura ida Iehova ese siahu e henidia taudia baita kamonai henidia. Vaia, Iehova na se gwaumu ta ese ita baine hamaoroda iena taravatu baita utu neganai baita kamonai. (Apos. 4:​18-20) Ita na baita uramu Iehova baita badinaia dia taunimanima. Badina Iehova ese e henimu hahekau herevadia na nega iboudiai mamaoro. (Sal. 19:7) A taunimanima be dia unu bamona. To, Iehova ese tama sina, gavamani taudia, bona elda taudia na siahu e henidia ita bae narida. (Her. 6:20; 1 Tes. 5:12; 1 Pet. 2:​13, 14) Ita ese idia edia hereva ta badinamu neganai, anina na Iehova ta badinaiamu. w23.10 rau 6 par. 2-3

Eda abidadama baita hagoadaia dalana ta na, Iehova ena siahu baita haeroa. Ia na mai ena siahu ena gwauhamata iboudiai baine haḡuḡurudia. Iehova na Siahu Idoinai Diravana. (Iobu 42:2; Mar. 10:27; Efe. 3:20) Ia ese Abraham bona Sara na iahudia negana ai e hamaorodia natudia ta bae havaraia. (Gen. 17:​15-17) Danu, Abraham e hamaoroa ena bese na Kanaan tanona baine henidia. Laḡani momo lalodiai, Abraham ena bese Israel na Aigupto ai iḡui hesiai ḡaukara e karava dainai, reana bema lalo una gwauhamata na basine ḡuḡurumu. To una na e ḡuḡuru. Ia ese Maria, rami-hebou hane-ulatona, e hamaoroa, ia Natuna baine havaraia. Ina ese Eden imeana ai Iehova ese laḡani tausen momo gunadiai e gwauraia gwauhamatana e haḡuḡurua! (Gen. 3:15) Iehova ena gwauhamata bona e haḡuḡuru daladia baita lalomu neganai, baita lalopararamu iena siahu na bada herea. Una ese eda abidadama tanobada matamatana gwauhamatana ai na e hagoadaiamu.—Ios. 23:14; Isa. 55:​10, 11. w23.04 rau 28 par. 10-12

David ese Iehova e noia baine hamauria neganai Iehova na e haere. (1 Sam. 19:​10, 18-20; 2Sam. 5:​17-25) Ita danu unu bamona baita laloa na namo. (Sal.145:18) Iehova ese eda ḡuriḡuri na dia hanaihanai ita ta lalomu dalanai se haerelaimu. Paulo ese Dirava e noia ia e hahisiava “ginigini” bamona hekwakwanaina baine kokia. Nega toi Paulo na una hekwakwanai e ḡuriḡurilaia. Iehova ese ena ḡuriḡuri e haerelai? Oibe, to dia ia e laloa dalanai. Iehova ese iena hekwakwanai na se kokia, to goada e henia mai ena abidadama ida dounu Ia baine hesiai henia. (2 Kor. 12:​7-10) Ita danu eda ḡuriḡuri na be haerelaimu, to nega haida asita lalomu daladia ai unu be kara tomamu. Iehova na mai dibana edena dala ai ita na baine duruda. Iehova ese eda noinoi bona ta lalohadailaimu ḡaudia mo basine henimu, to unu e hereadiamu ḡaudia danu baine heni diba. (Efe. 3:20) Una dainai, eda ḡuriḡuri haeredia na ita asita lalomu negadia bona daladia ai be henimu. w23.05 rau 8-9 par. 4-6

Dina ta ta ai, Baibul ai e gwauraia tore isi lou gwauhamatana baita laloa. Dahaka dainai? Badina ita na asi dibada edena negai gorere badana ta baita abiamu o eda lalokau tauna ta be masemu. (Koh. 9:11; Iak. 4:​13, 14) Tore isi lou helarona ese baine duruda diba, unu hekwakwanai baita haheaukalai. (1 Tes. 4:13) Baibul ese e hadibadamu Tamada guba ai ese ita na e dibada ḡoevaḡoeva, bona e lalokau henida badamu. (Luka 12:7) Iehova na mai dibana namonamo ita, una dainai be hatoreda isi loumu neganai, eda kara bona memori iboudiai be heni loumu. Momokani, Iehova ese ita na e lalokau henidamu dainai dala e kehoa baita mauri hanaihanai, bona ena be baita masemu to be hatoreda isi loumu. Dahaka dainai tore isi lou gwauhamatana baita abia dae? Badina baita diba una gwauhamata e karaiamu Tauna na e ura dikadikamu bona mai ena siahu una gwauhamata baine haḡuḡurua. w23.04 rau 8-9 par. 2-4

Iosef bona Maria na e ḡaukara hebou edia hetura karana Iehova ida bae hagoadaia totona. Idia na e laloparara edia ruma bese ibounai ese Iehova bae tomadiho henia hebou na mai anina bada. (Luka 2:​22-24; 4:16) Idia na haheitalai namona hari ina negai headava taudia ediai! Bema umui na mai natumui, Iosef bona Maria heḡereḡeredia, reana o hekwarahimu hebou iboudiai baola bona nega bavato emui ruma bese tomadihona ba karaia. Danu reana auka nega bavato adavamu ida ba stadi bona ba ḡuriḡuri hebou. To ba helalotao, umui raruosi ese Iehova bo tomadiho henia heboumu neganai, emui hetura karana ia ida bona umui raruosi padamui ai na be goadamu. Una dainai Iehova itomadiho henina karana na bavatoa guna. Bema emu headava lalonai hekwakwanai o davarimu, Reana bo hesikumu ruma bese tomadihona ba karaia hebou. Bema unu o hemami tomamu, raruosi ese o moalelaiamu ḡauna ta ba herevalaia diba. Una ese emui lalokau be hagoadaiamu bona bo uramu Iehova ba tomadiho henia hebou. w23.05 rau 22 par. 7-8

Edena dala ai Dirava imatauraina o igari henina karana ese Obadia e durua? Dala ta na, ia na mai momokanina ida e kara bona taunimanima ese e abidadama henia. Una dainai king ese ena ruma ireḡuna tauna ai e halaoa. (Nehemia 7:2 ba haheḡereḡerea.) Danu, Obadia na Dirava e gari henia dainai, ena lalo goada karana na e habadaia. Una kara na mai anina bada badina ia na King dikana Ahaba ena lohia negana lalonai e nohova. (1 Han. 16:30) Danu, Ahaba adavana Iesebel na Baal e tomadiho heniava, bona Iehova e inai henia bada dainai, e ura not basileiana ai tomadiho momokani baine haorea vaitani. Dirava ena peroveta taudia momo e hamasedia danu. (1 Han. 18:4) Iesebel na Dirava ena peroveta taudia baine hamasedia totona e tahudiava neganai, Obadia ese idia 100 e abidia bona ‘imahui imahui amo kohua ai e hunidia, bona aniani bona ranu e henidia.’ (1 Han. 18:​13, 14) Bema ia na Iesebel ese bema davaria, bema hamasea diba. Vaia, Obadia na reana e gari bona se ura baine mase. To ia ese Iehova bona ena hesiai taudia e lalokau henidia bada dainai, sibona ena mauri na se laloa. w23.06 rau 16 par. 9-10

Hari ina negai Iehova na doini ena taunimanima e hakaudiamu idaunegai e kara heḡereḡerena. Ia ese Natuna, kongrigeisen kwarana, bona ena Hereva amo e hakaudiamu. O laloamu hari ina negai Dirava ese taunimanima e ḡaukaralaidiamu ita baine hakauda, a? Oibe. Laḡani 1870 murinai e vara ḡaudia haida mani aita herevalai. Charles Taze Russell bona bamona na e laloparara 1914 na laḡani badana. Una laḡani ai, Iehova ese ena Basileia e haginia. (Dan. 4:​25, 26) Idia e durudia ḡauna na Baibul ena peroveta herevadia e hetahulai namonamo. Iehova ese edia hetahu karana e hanamoa, a? Oibe. Laḡani 1914 ai e vara ḡaudia ese e hamomokania, Dirava ena Basileia na una nega ai vada e lohia matama. Tanobada Tuarina Ginigunana e vara, una murinai dai-hanai goreredia, tano laga bona doe e vara. (Luka 21:​10, 11) Momokani, Iehova na unu abidadama ta’tau e ḡaukaralaidia iena taunimanima baine durudia. w24.02 rau 22 par. 11

Ita na Iehova ena taunimanima dainai, ta dibamu ia ese e lalokau henidamu bona e uramu mauri namona baita moalelaia. (Roma 8:​35-39) Danu, ta dibamu bema Baibul ena hahekau herevadia baita badinamu, hanaihanai namo baita davarimu. (Isa. 48:​17, 18) To, asita lalomu hekwakwanaidia baita davari neganai, dahaka baita kara? Heḡereḡere, eda ruma bese tauna ta ese laloda be hahisiamu. Reana gorere badana ta dainai Iehova ena hesiai ḡaukara lalonai guna ta karava ḡaudia na basita kara dibamu. Reana disasta ta dainai ḡau momo baita haboiomu. Eiava reana eda abidadama dainai be daḡedaḡe henidamu. Hekwakwanai unu bamodia baita davarimu neganai, reana baita lalomu: ‘Dahaka dainai lauegu ai e varamu? Lau be ḡau ta na karaia kerere, a? Una ese e hahedinaraiamu Iehova be lau se hanamogumu, a?’ Nega haida unu o lalo tomamu, a? Bema oibe, basio lalomanoka. Guna Iehova ena hesiai taudia momo na lalohadai unu bamodia e abiva.—Sal. 22:​1, 2; Hab. 1:​2, 3. w23.04 rau 14 par. 1-2

Hedibaḡani ta davarimu neganai baita dadaraia haraḡa na namo, badina asita uramu lalohadai dikana ta o kara dikana ta ese eda hetura karana Dirava ida baine hadikaia. Iehova na e uramu “mai kudouda ibounai ida” ia baita badinaia. (Roma 6:​17, NWT) Ia ese ena hahekau herevadia e henimu na iseda namo totona, bona iena taravatu na basita haidau diba. (Isa. 48:​17, 18; 1 Kor. 6:​9, 10) Diabolo ese daḡedaḡe karadia bona lalohekwarahi ḡaudia e ḡaukaralaimu eda abidadama baine hamanokaia totona. Ia na e uramu iseda hetura karana Iehova ida baine hadikaia. (1 Pet. 5:8) Aposetolo edia negai, Kristen taudia edia abidadama na goada dainai, inaidia ese e hagaridia, e dadabadia bona e hamasedia. (Apos. 5:​27, 28, 40; 7:​54-60) Hari ina negai, Satana na doini daḡedaḡe karadia e ḡaukaralaimu. Russia bona tano ma haida ai tadikaka taihu e daḡedaḡe henidiamu o dala ma haida amo e hahisidiamu karana amo una ta dibaiamu. Satana na “kara dibaka” o hehuni daladia e ḡaukaralaimu danu.—Efe. 6:11. w23.07 rau 15-16 par. 6-9

Baibul o stadilaiamu neganai, emu lalokau Iehova enai danu e bada e laomu. Una lalokau dainai o dibamu ḡaudia na o badinadiamu. Baibul ena hahekau herevadia heḡereḡeredia ai abi hidi namodia o kara. Bona emu lalohadai bona kara o haidau, badina o ura Dirava ba hamoalea. Natu ta ese tamana o sinana lalokauna e tohotohoamu heḡereḡerena, oi ese Tamamu guba ai o tohotohoamu. (Efe. 5:​1, 2) Reana siboda baita henanadai: ‘Kristen tauna ai nala negana amo egu lalokau Iehova enai be na habadaiamu eiava? Lau na bapatiso negana amo tadikaka taihu na lalokau henidiamu ese e hahedinaraiamu, Iehova ena lalohadai bona kara na tohotohomu, a?’ Bema Iehova bona ma haida ediai o hahedinaraia ‘lalokauna’ na e keru, basio lalomanoka. Kristen ginigunadia ediai una na e vara. To Iesu ese idia na se dadaraidia, una heḡereḡerena ita danu basine dadaraidamu. (Apok. 2:​4, 7) Ia na mai dibana hereva momokani ta dibaia matama neganai ta hahedinaraia lalokauna na baita hagoadaia lou dibamu. w23.07 rau 8 par. 2-3

Aposetolo Petro na kerere haida e kara. Petro ese e karaia kerere ginigunana na, ia na e gwa taunimanima iboudiai bae hekwakwanai, a lau be lasi. (Mar. 14:​27-29) Iharuana be, ia na se gima to e mahuta. (Mar. 14:​32, 37-41) Ihatoina be, hutuma ese Iesu e dabaia tao neganai Petro na e heau. (Mar. 14:50) Dokonai, Petro na nega toi Iesu e ḡorea. (Mar. 14:​66-71) Petro na e laloparara ia na kara dika badana ta e karaia neganai ia be dahaka e kara? E tai dikadika. (Mar. 14:72) Iesu na Petro ena kerere dainai se gwau henia, to maduna badadia haida e henia. (Ioa. 21:​15-17) Ena be Petro na kara dika badana ta e karaia, to dounu e hekwarahiva kara maorodia baine kara. Dahaka dainai? Badina e diba, biaguna Iesu na dounu ia e lalokau heniava. Una haheitalai amo dahaka ta dibamu? Iehova na e uramu baita diba ia ese ita na e lalokau henidamu bona ia na heḡaeḡae eda dika baine gwautao.—Roma 8:​38, 39. w24.03 rau 18-19 par. 13-15

Matabodaḡa karadia e karamu taudia na be hemaraimu, be mamiamu idia na asi anidia, haida na be rogorogo kavamu, bona ruma bese be pararamu. Momokani, kavakava hahinena ena “ruma” basitala na aonega karana. Matabodaḡa karadia e karamu taudia momo na edia hetura karana Dirava ida e hadikaiamu, bona daihanai goreredia amo e mase haraḡamu. (Her. 7:23) Hereva Lada-isidia karoa 9 siri 18 na e gwaumu: “Hahine vadivadina na mase ena dobu gabudia ai.” To, dahaka dainai momo ese iena boiboi na e abia daemu, ena be dika bae davari diba? (Her. 9:​13-18) Momo e hamorudiamu ḡauna badana ta na, ponografi. Haida na e laloamu ponografi i’itadia karana na dia kerere. To, una na mai ena dika, bona e itamu taudia na sibodia edia mauri se matauraiamu, ma haida asie matauraidiamu bona una kara idadaraina na auka. Danu, matabodaḡa laulaudia bae lalodia boio na auka. Dia una mo, to ponografi i’itadia karana ese ta lalona ai ura dikadia e habadamu. (Kol. 3:5; Iak. 1:​14, 15) Oibe, ponografi laulaudia e itamu taudia momo na kara bodaḡadia e karamu. w23.06 rau 23 par. 10-11

Ena be bese ma haida ese Anglo-American World Power na be tuari heniamu, to gabuna na basie abiamu. Unu ta gwau tomamu badina na, Dirava ena Basileia e laulaulaia “nadina” ese Anglo-America e laulaulaia ae palapaladia baine hamakohidia sisisisi. (Dan. 2:​34, 35, 44, 45) Daniel ese auri bona raro ae palapaladia e perovetalaia herevana be o abia daemu, a? Bema oibe, una ese be durumumu emu mauri lalonai abi hidi maorodia bo karamu. Heḡereḡere, moni bona kohu momo itahudia karana na basio laloa badamu, badina mai dibamu kahirakahira ina tanobada dikana na be oremu. (Luka 12:​16-21; 1 Ioa. 2:​15-17) Danu, ina peroveta herevana bo lalopararalaiamu neganai, bo dibamu haroro bona hahediba ḡaukaradia na mai anidia bada. (Mat. 6:33; 28:​18-20) Ina peroveta herevana o stadilaiamu murinai, sibomu ba henanadai: ‘Egu abi hidi ese e hahedinaraiamu lau be na abia daemu Dirava ena Basileia ese taunimanima edia gavamani iboudiai be kahirakahira be haorediamu, a?’ w23.08 rau 11 par. 13-14

Mai manaumu ida bavabia dae oi laḡanimu, emu helt, bona noho dalana dainai ḡau haida na basio karamu. Barasilai bamona, bema oi na gorere o buruka dainai asainmen ta ba karaia na auka, bao gwa diba oi na dia heḡereḡere. (2 Sam. 19:​35, 36) Mose bamona, ma haida edia heduru bavabi dae bona maduna haida na ma haida ba henidia. (Eso. 18:​21, 22) Una ese be durumumu, ba kara diba ḡaudia ba kara. Namona na basita lalomu haida ese e karamu abi hidi kereredia na iseda kerere. Ita ese haida edia abi hidi na basita kara, bona edia abi hidi kereredia amo bae vara dika na basita koudia dibamu. Heḡereḡere, reana natu ta na lalona be hadaiamu Iehova ihesiai henina karana baine hadokoa. Una abi hidi ese tamana sinana lalodia na be hahisimu. To, bema idia na be lalomu idia edia kerere dainai natudia na una abi hidi e karaia, una ese be hametaudia badamu. Iehova na se uramu idia na unu bae lalo toma. w23.08 rau 29 par. 11-12

Samson na ita heḡereḡereda dia ḡoevadae, una dainai abi hidi kereredia haida e kara. E karaia abi hidina ta na dika bada e havaraia. Samson na hahemaoro ḡaukarana e karaia murinai, ia na “Soreke kourana hahinena ta e ura henia; hahine ladana na Delila.” Guna, Iehova ena ura dainai Samson na Filistia hahinena ta e adavaia, badina una dala amo Filistia taudia baine tuari henidia. To gabeai, Samson na Filistia hanuana Gasa ela bona ariara hahinena ta ena ruma ai e noho. Una negai, Iehova ese Samson na goada e henia dainai hanua iduaradia mai audia ida e raḡadia bona e huadia lasi, una ese hanua ihabuatarina dalana e kehoa. (Hah. 14:​1-4; 16:​1-3) To Delila be idau, ia na Israel hahinena bona Samson na sibona ena ura ai una hahine e adavaia. Delila na Filistia taudia ese moni bada e henia Samson taona baine tore. w23.09 rau 5 par. 12-13

Ita ese ma haida baita lalopararalaidiamu neganai baita manaumu. Laloparara tauna na e boga aukamu bema e abi daemu ḡaudia na haida ese e henanadailaimu. Taunimanima edia lalohadai na ranu dobuna na heto, una dainai nega momo edia henanadai badidia na basita dibamu. Una dainai haere do asita heni lalonai, namona na edia henanadai badidia baita lalopararalai. (Her. 16:23) Mani Gideon ese Efraim taudia e kara henidia dalana aita laloa. Idia na mai badudia ida ia e hamaoroa dahaka dainai Israel inaidia e tuari henidia neganai idia na se boiridia. Dahaka dainai idia na e badu? Reana idia na e hekokoroku. To Gideon na idia e badu badina e lalopararalaia bona mai manauna ida e haere. Baibul na e gwaumu: “Unu e hereva toma, bena idia lalodia e keru bona edia badu e doko.”—Hah. 8:​1-3. w23.09 rau 16 par. 8-9

Iehova bona Iesu edia hetura karana na goada herea, tama ta natuna ida edia hetura karana heḡereḡerena. Oibe, ia Natuna na haida ese e kara auka henia, e dadaraia bona e hahisia bada neganai, Ia danu e hisihisi bada. Natudia e mase tama sina na mai dibadia mase ese e havaraiamu hisihisina na bada herea. Ita ese toreisi lou helarona na ta abidadama heniamu, to lalokau tauna ta e masemu neganai ta abiamu hisihisina na dounu ta mamiamu. Una ese e durudamu laḡani 33 C.E. ai Iehova Natuna lalokauna e hisihisi bona e mase neganai, Iehova ese e abia hemamina ta lalopararalaiamu. (Mat. 3:17) Memorial negana e lao heniamu lalonai, sibomu emu stadi ai eiava ruma bese tomadiho ai, mauri davana ena kaha haida ba stadilai. Bona basio helaloboio, Memorial dinana ai Morning Worship vidiona danu ba itaia. Dala unu bamodia ai Memorial totona baita heḡaeḡaemu neganai, ma haida baita durudiamu Memorial amo namo bae davari.—Esr. 7:10. w24.01 rau 11 par. 10-12

Iehova ena amo goada baita abi dalana ta na ia baita ḡuriḡuri henia, bena ia ese “siahu herea-daena” be henidamu. (2 Kor. 4:7) Bona goada baita abi dalana ma ta be iena Hereva baita duahia bona baita laloa dobu. (Sal. 86:11) Iena Hereva na “mai siahuna.” (Heb. 4:12) Iehova bo ḡuriḡuri heniamu bona iena Hereva bo stadilaiamu neganai, hekwakwanai bo haheaukalaimu, bo moalemu, bona asainmen aukana bo haḡuḡuruamu. Iehova ese peroveta tauna Iona e hagoadaia dalana mani aita laloa. Iona na e gari dainai Iehova ese e henia asainmen amo e heau. Una dainai lai gubana ta lalonai, ia bona ma haida na kahirakahira edia mauri e haboio. Ia na bouti amo e tahoa dobi neganai, gwarume badana ta ese e hadonoa. Iona na gwarume bogana lalonai dahaka e kara? Ia na e ḡuriḡuri.—Iona 2:​1, 2, 7. w23.10 rau 13 par. 4-6

Ena be aposetolo Petro ese ena revareva na iena negai e nohova taudia daidiai e tore, to Iehova ese unu revareva na Baibul ai e atodia. Una dainai hari ita danu unu revareva amo namo ta davarimu. (Roma 15:4) Ita na Baibul ena peroveta herevadia asie abi daemu taudia bogaraḡidiai ta nohomu. Ita e inai henidamu taudia ese e kirikirilaidamu badina laḡani momo lalodiai ita na nega dokona ta herevalaiamu. Taunimanima haida na e gwaumu dokona na basine maimu. (2 Pet. 3:​3, 4) Bema ta haroro heniamu tauna, ta ḡaukara heboumu tauna, eiava eda ruma bese tauna ta ena amo hereva unu bamodia baita kamonaimu, eda abidadama na be manoka dibamu. To Petro ese ita iduruda ḡauna na e herevalaia. Taunimanima haida na e laloamu Iehova ese ina tanobada dikana na basine haorea haraḡamu. Petro ena hereva ese ita be durudamu lalohadai maorona baita abia, badina e hadibadamu Iehova ese nega e laloamu dalana na idau, taunimanima edia amo. (2 Pet. 3:​8, 9) Iehova enai laḡani 1,000 na dina tamona na heto. Iehova na e haheaukamu bona se uramu ta baine mase. To iena dina be kaumu neganai, ina tanobada dikana na be haoreamu. w23.09 rau 26-27 par. 2-5

Dahaka dainai aposetolo Paulo ese Iudea ai e nohova Heberu Kristen taudia e tore henidia? Badi rua daidiai. Ginigunana na, e ura baine hagoadadia. Guna idia momo na Iuda tomadihona e badinaiava. To gabeai idia na Kristen taudia ai ela neganai, reana Iuda tomadiho igunalaina taudia ese e kirikirilaidiava. Dahaka dainai? Badina Kristen taudia na asi edia dubu, asi edia boubou patana, bona asi edia hahelaḡa taudia. Una ese Keriso ena hahediba taudia edia abidadama na bema hamanokaia diba. (Heb. 3:​12, 14) Reana idia haida na e urava Iuda tomadihona bae lou henia. Badi iharuana be, Paulo na e ura unu Heberu Kristen taudia baine hadibadia idia na asie ḡaukara goadava Dirava ena Hereva “aniani korikoridia” hahediba hereva matamatadia bona dobudia bae lalopararalai. (Heb. 5:​11-14) Idia haida na dounu Mose ena Taravatu e badinaiava. w23.10 rau 24-25 par. 3-4

Haida na lalodia e hadai do basie headava. (Mat. 19:​10-12) Namona na ba diba Iehova bona Iesu ese singul Kristen taudia na e lalodia badamu. Tanobada heḡeḡemadai, singul taihudia na kongrigeisin ai haheitalai namodia. Idia ese ma haida e lalokau henidiamu bona e lalodia badamu dainai momo ese taihudia o sinadia ai e halaodiamu. (Mar. 10:​29, 30) Taihu haida be ful-taim hesiai ḡaukarana e karaiamu. Tanobada heḡeḡemadai haroro ḡaukarana na Kristen taihudia momo ese e karaiamu. (Sal. 68:11) Hari plen ba karaia diba ful-taim hesiai ḡaukarana ai ba vareai totona, a? Oi ese painia, konstraksen, eiava betele ḡaukara ba karaia diba. Emu tahua ḡauna na ba ḡuriḡurilaia. Bona ful-taim hesiai ḡaukara e karaiamu taudia ba nanadaidia oi be dahaka ba kara unu amo ful-taim hesiai ḡaukara ai ba vareai. Bena plen ta ba karaia una ese oi baine durumu emu tahua ḡauna ba haḡuḡurua. Emu tahua ḡauna bo haḡuḡuruamu neganai dala na be hekehomu hesiai ḡaukara ma haida ba kara. w23.12 rau 22 par. 16-17

Hisihisi bada hereana na kahirakahira dainai, ta lalopararamu haroro ḡaukarana ena haheḡani baita badinaia na mai anina bada. To reana nega haida moni hekwakwanaina o daḡedaḡe dainai, ita edai na be aukamu haroro ḡaukara baita atoa guna. Dahaka ese ita baine duruda Dirava ena ura baita atoa guna? Namona na hanaihanai baita abia dae “Tuari oreadia edia Iehova” na ita ida. Bema hanaihanai ena ura baita atoa gunamu Ia ese be durudamu. Una dainai basita gari. (Hag. 2:4) Iehova na e uramu hahediba ḡaukara na baita laloa bada. Hagai ese Iehova ena taunimanima e hagoadadia dubu helaḡa bae haginia lou. Unu bae kara toma neganai, Iehova na e gwauhamata eto: “Lau ese baina hanamomui.” (Hag. 2:​18, 19) Una ese ita danu e hagoadadamu bema Iehova ena ḡaukara baita atoa gunamu ia ese be hanamodamu. w23.11 rau 16 par. 8; rau 17 par. 11

Aposetolo Paulo ena revareva ai, Roma taudia e hamaorodia taunimanima iboudiai na mai edia kara dika. To, edena dala ai ta na Dirava ese baine lalonamo henia bona maorona baine gwaurai? Paulo ese Abraham sivaraina amo Kristen taudia e durudia, una henanadai haerena bae dibaia. Abraham na Kanaan tanona ai e nohova neganai, Iehova ese maorona e gwaurai. Dahaka dainai? Badina be Abraham ese Mose ena Taravatu e badinaia ḡoevaḡoeva dainai, a? Lasi. (Roma 4:13) Dirava ese Abraham na maorona e gwaurai guna bena laḡani 400 muridiai, Israel besena na Mose ena Taravatu e henidia. Dirava ese Abraham maorona e gwaurai badina be dahaka? Iehova ese Abraham enai hebogahisi hereadaena e hahedinaraia bona maorona e gwaurai badina Abraham na mai ena abidadama.—Roma 4:​2-4. w23.12 rau 3 par. 4-5

Una hanuaboi ai peroveta tauna Natan na King David enai ataiai herevadia e gwaurai neganai, Iehova ese Natan e hamaoroa David ese dubu helaḡa na basine haginia. (1 Sis. 17:​3, 4, 11, 12) David na una hereva e kamonai neganai dahaka e kara? Ia ese moni bona kohu e habou, natuna Solomon ese dubu ihaginina ai baine ḡaukaralai totona. (1 Sis. 29:​1-5) Iehova ese David na dubu helaḡa basine haginia herevana e hamaorolaia murinai, maoromaoro ia ida gwauhamata ta e karaia. E gwa David ena bese amo ta na baine lohia ela bona hanaihanai. (2 Sam. 7:16) Tanobada matamatana ai, Iesu Ena Lohia Laḡanidia 1,000 lalonai, David na be moalemu badina be dibamu King Iesu na ena bese amo e vara. Una sivarai ese e durudamu ena be Iehova ena ḡaukara ai ta uramu baita kara ḡaudia iboudiai na basita kara dibamu, to Iehova ese hahenamo na asita lalomu dalana ai be henidamu. w23.04 rau 16 par. 8-10

Baibul ai oi bae hagoadamu sivaraidia ba duahi, heḡereḡere, Iobu, Salamo, Hereva Lada-isidia, bona Iesu ena hereva Mataio karoa 6 ai. Iehova bo ḡuriḡuri heniamu bona iena Hereva bo duahiamu neganai, tauhalo bona goada bo davarimu. Ita na ta abia daemu, hekwakwanai badadia edai be varamu negadiai, Iehova ese ita na be durudamu. Ita na basine rakatanidamu. (Sal. 23:4) Iehova na e gwauhamata baine gimada, baine imudada, baine duruda, bona baine hagoadada. Isa. 26:3 ai Iehova na ini e herevalaia toma: “Lalona ese oi e badinamumu tauna na oi ese maino ḡoeva-daena ai o hanohoamu, badina be ia ese oi e abidadama henimumu.” Una dainai Iehova bavabidadama henia, bona ia ese e durumumu daladia na bavabi dae. Unu bo kara tomamu neganai, nega aukadiai oi na bo goadamu. w24.01 rau 25 par. 16-17

Hari unu siri herevadia na e ḡuḡurumu. Ini hereva danu iseda negai na e ḡuḡurumu: “Natumu mamaruanedia iboudiai na Iehova ese baine hadibadia, oibe, natumu mamaruanedia edia noho na baine namo herea. Kara maoromaoro ai do baina haginimu . . . badina be basio gari, bona hahegari karana amo danu, badina be basine kahi henimu.” (Isa. 54:​13, 14) Danu Satana, “ina tanobada diravana,” na asi siahuna Iehova ena taunimanima ese e karaiamu hahediba ḡaukarana baine koua. (2 Kor. 4:4) Tomadiho ḡoevana na vada e gini lou bona ta ese basine hadikaiamu, to baine gini hanaihanai. Oibe tuari ḡauna ta eiava tau ta ese ita na basine hadarereda! w24.02 rau 4 par. 10

Ita Kristen taudia ese eda gwauhamata Iehova enai na ta laloa badamu. Una dainai, eda abi hidi bona kara haida na ruma bese taudia ese basie moalelaimu. Baibul ena hereva heḡereḡerena ita na ruma bese madunadia ta huadiamu, to idia edia ura basita ato guna, a Iehova ena ura hari baita atoa guna. (Mat. 10:​35, 36; 1 Tim. 5:8) Bona Iehova baita hamoalea totona, nega haida ita ese ta karamu abi hididia daidiai varavara na basie moalemu. Iehova ese ruma bese e haginia bona ia na e uramu ruma bese iboudiai na bae moale. (Efe. 3:​14, 15) Una dainai bema ita na ta uramu baita moale, namona na Iehova ena dala baita badinadia. Namona na ba diba Iehova ese emu hekwarahi ia itomadiho henina karadia ai na e lalo badamu, bona mai lalokaumu ida emu bese o naridiamu bona o matauraidiamu dainai ia na e moalemu.—Roma 12:10. w24.02 rau 18 par. 11, 13