Mauri Bona Hesiai Ḡaukara Hebou Pepana Ena Refrens
MAY 4-10
DIRAVA ENA HEREVA ENA NAMO | GENESE 36-37
“Haida ese Iosef E Mama Heniava”
(Genese 37:3, 4) Israel ese hari Iosef e lalokau henia bada, natuna orena e lalokau henidia maraḡi; badina be burukana ai e havaraia. Bena ia ese hahedoki namo-hereana ta e henia. 4 A kakana ese e itaia, tamadia ese Iosef e lalokau henia bada, idia e lalokau henidia maraḡi; bena idia ese e inai henia, hereva namona ta asie gwaurai henia.
w14 8/1 rau 12-13
“Egu Nihi Mani Aina Hamaorolaimui”
Baibul e gwaumu: “A kakana ese e itaia, tamadia ese Iosef e lalokau henia bada, idia e lalokau henidia maraḡi; bena idia ese e inai henia, hereva namona ta asie gwaurai henia.” (Genese 37:4) Vaia Iosef kakana bae mama na asi ena kerere, to una hemami dikana e biaguava na dia aonega karana. (Aonega Herevadia 14:30; 27:4) Nega ta ai oi o mama, a, badina oi o ura henimu gaukarana na tau ta ese e karaiamu eiava ma haida ese una tau mo e hanamoamu, a? Iosef kakana veridia ba lalodia. Idia na e mama dainai kara dikana e karaia to gabeai idia e karaia karana na e lalohisihisilaia. Una ese Kristen taudia e hadibadiamu gauna be ina, “e moalemu taudia ida ba moale.”—Roma 12:15.
Iosef na e mamiava ia kakana veridia na ia e mama heniava. To, ia na kakana dekedia ela neganai, ia ese ena dabua e hunia, a? Reana ia na e ura unu baine kara toma. To baita laloatao, Iakob ese una dabua e heni badina ia na e ura baine hahedinaraia ia ese Iosef na e lalokau heniava. Iosef danu e ura tamana baine hamoalea dainai, una dabua e hahedokilaia. Iena haheitalai baita tohotohoa diba. Vaia Dirava na taunimanima iboudiai e ura henidiamu, to nega haida ai ia ese ena hesiai taudia bogaraḡidiai ta e abia hidimu bena e hanamoamu. Danu, Ia ese idia e noidiamu, idia ese ina kara dika bona matabodaḡa tanobadana bae dadaraia na namo. Iosef ena dabua na idau heḡereḡerena, Kristen taudia momokanidia edia kara be idau bona tanobada taudia edia kara be ma idau. Edia kara unuhetomadia daidiai nega haida tanobada taudia na e mamamu bona e badumu. (1 Petro 4:4) Kristen tauna ese ena kara namodia baine huni be namo, a? Lasi—Iosef heḡereḡerena, ia ese ena dabua na e hahedokilaia, se hunia.—Luka 11:33.
(Genese 37:5-9) Hari Iosef na e nihi, bena ena nihi na kakana e hamaorolaidia; una dainai idia ese e inai henia lalodika. 6 E hamaorodia eto, Egu nihi mani aina hamaorolaimui. 7 Egu nihi ai ita na uma ai, uit ta ḡui; bena lauegu iḡui na e gini tore, a umui emui iḡui ese e ginia heḡeḡe, lauegu iḡui e toma henia diho. 8 Bena kakana ese e gwau henia, eto, Oi na ai emai pavapava ai baola a? Oi ese ai ba halohiamai a? Bena ena nihi bona ena hereva daidiai edia badu ienai vada e bada e laova. 9 Ma e nihi lou, bena ena nihi na kakana e hamaorolaidia, eto, Vada na nihi lou, bena egu nihi ai dina bona hua bona hisiu gwauta-ta ese e toma henigu diho.
(Genese 37:11) Bena kakana e badu dikadika, a tamana ese ena hereva e lalo tao.
w14 8/1 rau 13 par. 2-4
“Egu Nihi Mani Aina Hamaorolaimui”
Iehova Dirava ese nihi ruaosi e heni. Unu nihi na peroveta herevadia na heto, bona Dirava na e ura Iosef ese anidia baine hahedinarai. Baita gwau dibamu, Iosef e karaia karana na gabeai peroveta taudia ma haida ese bae karaia karana hegeregerena—idia ese Dirava ena hereva bona hahemaoro herevadia na Dirava e gwau-edeede heniava taudia bae hamaorolaidia.
Iosef na aonega dalana ai kakana e hereva henidia, eto: “Egu nihi mani aina hamaorolaimui.” Ia kakana ese una nihi anina na e lalopararalaia dainai idia na se moale. Bena kakana ese e gwau henia eto: “Oi na ai emai pavapava ai baola a? Oi ese ai ba halohiamai a?” Baibul na ma eto: “Bena ena nihi bona ena hereva daidiai edia badu ienai vada e bada e laova.” Iosef ese ena nihi iharuana na tamana bona kakana e hamaorolaidia neganai, idia na e badu dikadika. Baibul etomu: “Bena tamana e gwaugwau, eto, Emu nihi anina be dahaka a? Lau bona sinamu bona kakamu ese oi baia toma henimu diho a?” To, Iakob ese Iosef ena nihi e lalo tao. Iehova be Iosef ida e herevahereva, a?—Genese 37:6, 8, 10, 11.
Iosef bona ma haida na Iehova ese e noidia, ena peroveta herevana bae gwauraia totona, herevana una hereva dainai taunimanima basie moale eiava bae dagedage. Unuhetomana herevana e harorolaia tauna hereadaena na Iesu, ia ese ena hahediba taudia e hamaorodia, eto: “Idia ese lau e daḡedaḡe henigumu; umui danu bae daḡedaḡe henimui.” (Ioane 15:20) Kristen taudia iboudiai ese Iosef ena abidadama bona gari lasi karana amo ḡau momo e dibamu.
(Genese 37:23, 24) Taunabunai, Iosef na kakana dekediai e kau ai, idia ese e dabaia tao, ena hahedoki namo-hereana e dokia oho, 24 e laohaia, guri ta ai e tahoa dobi. Una guri na asi ranuna.
(Genese 37:28) Hari hoihoi taudia na Midian amo e raka hanai; bena Iosef kakana ese guri amo e veria dae, Ismael taudia ediai e hoia, silver monidia ruahui davana. Bena idia ese e hakaua lao, Aigupto e laohaia.
Dirava Ena Hereva Ba Tahua Namonamo
(Genese 36:1) Esau garana bini. Ia ladana ta be Edom.
it-1 rau 678
Edom
(Eʹdom) [Red], Edomites (Eʹdom·ites).
Iakob ena twin brother, Esau, ladana iharuana o ena nickname na Edom. (Ge 36:1) Ia ladana na unu e gwauraia toma badina ia ese ena roboa ahuna e hoihoilaia, aniani kakakakana o red stew bae abia totona. (Ge 25:30-34) Danu, Esau e vara neganai, ia kopina kalana na mia kakakaka (Ge 25:25), bona ia bona ena bese ese gabeai e noholai tanodia ai e nohomu taudia kopidia kaladia na ia na heto.
(Genese 37:29-32) Gabeamo Ruben na guri e lou henia, a Iosef na lasihia. Bena ena dabua e darea, 30 tadina dekedia e lou lao, eto, Mero na lasihia; lau na ede baina kara toma? 31 Bena idia ese Iosef ena hahedoki e abia, nani natuna ta e alaia, rarana amo hahedoki e hamiroa. 32 Bena hari hahedoki na tamadia dekena e laohaia, eto, Ina na ai ese a davaria; a itaia, ina na natumu ena hahedoki eiava?
it-1 rau 561-562
Ḡau ta Ba Naria Ena Maoro O Custody
Bema mamoe ireḡudia tauna ta na baineto ia na e uramu mamoe serina baine naridia o baine gimadia, anina na ia ese e hahedinaraiamu unu animal baine reḡudia karana ena maoro na e abia daemu. Ia na vaitani mamoe biaguna e gwauhamata heniamu, mamoe na ia ese baine ubudia bona baine gimadia, unu amo ta ese basine henaodia, eiava bema ta ese mamoe ta baine henaoa, davana na ia ese baine heni. To, iena maduna na mai hetoana, badina be ataiai e atoa taravatuna na asi siahuna bema taunimanima ese basie koua diba ḡauna ta baine vara, heḡereḡere daḡedaḡe animal ta ese mamoe baine alaia. Una baine vara totona namona na mamoe ireguna tauna na daḡedaḡe animal ese e darea sisi mamoe tauanina na mamoe biaguna baine hahedinarai henia. Mamoe biaguna ese una evidens baine itaia murinai namona na ia ese disisin baine karaia, una mamoe ireḡudia tauna na mai ena kerere eiava lasi.
Una Heḡereḡerena, una hahekau herevana na kohu, eiava famili ai danu e ḡaukaralaiava, heḡereḡere, roboa ese tadina memerodia bona kekenidia baine naridia na maoro. Una dainai, Genese 37:18-30 ese e hahedinaraia sivaraina ai, Iakob natuna roboana Ruben na Iosef ena mauri dainai e lalohekwarahiva na ta lalopararalaiamu, badina Iosef kakana na e urava Iosef bae alaia. Ruben eto: “Lasi, ena mauri basita abia oho, basita alaia mase. . . . Unu e gwau toma badina ena lalo hadai be idia imadia amo baine hamauria, tamana baine henia lou eto.” Gabeai Ruben na guri e lou henia, a Iosef e itaia lasihia bena ena lalohekwarahi e bada herea dainai “ena dabua e darea” bona eto: “Mero na lasihia; lau na ede baina kara toma?” Ia na mai dibana Iosef e boio gwauna na ia be heniamu. Una dainai, idia ese palani koikoina ta e karaia unu amo bae hahedinaraia Iosef na uda boromana ta ese vada e alaia mase. Una e karaia dalana na idia ese Iosef ena hahedoki e abia, nani natuna ta e alaia, rarana amo hahedoki e hamiroa. Bena hari hahedoki na Iakob dekena e laohaia, ia na idia tamadia bona edia famili ena hahemaoro tauna, bona ia ese Iosef e boio gwauna na Ruben se henia badina idia ese Iosef ena dabua mai rarana na evidens na heto tamadia e haheitalaia, una dainai Iakob na e abia dae Iosef na uda boromana ta ese vada e alaia mase.—Ge 37:31-33.
Baibul Duahiduahi
MAY 11-17
DIRAVA ENA HEREVA ENA NAMO | GENESE 38-39
“Iehova ese Iosef Na Se Rakatania”
(Genese 39:1) Iosef na Aigupto e laohaia, unuseni ai Aigupto tauna ta, lohia ta Farao ena ruma ai, ladana Potifara, ese e hoia, hari Ismael taudia, e hakaua lao taudia, edia amo.
w14 11/1 rau 12 par. 4-5
“Ina kerere badana baina karaia . . . be edeheto?”
“Iosef na Aigupto e laohaia, unuseni ai Aigupto tauna ta, lohia ta Farao ena ruma ai, ladana Potifara, ese e hoia, hari Ismael taudia, e hakaua lao taudia, edia amo.” (Genese 39:1) Ina Baibul ena hereva kwadoḡina ese ita e durudamu una mero matamatana ena lalohisihisi bona hemarai hemamina baita lalopararalaia, badina ia na ma e hoihoilaia lou. Ia na e kara kohu ta na heto! Mani a laloa Iosef na biaguna matamatana, lohia ta Farao ena ruma ai, murina amo hutuma bona hoihoi ḡaudia bogaraḡidiai ia baine noho gabuna matamatana e raka laomu.
Hanua! Una gabu (Egypt) amo Iosef e nohova gabuna o ena hanua padadia na daudau herea. Ia e bada ruma besena na tent ai e nohova, gabu ta amo gabu ma ta e laova bona mamoe e nariva taudia. A Egypt ai, taḡa tauna Potifara ena ruma na namo herea bona mai hairaina. Archaeologists edia ripot ese e hahedinaraiamu idaunegai Egypt taudia ese edia gabu na e hahairaidiava, edia uma na e magudiava bona au badadi e hadova, pool e karava bona unuseniai papyrus, lotus, bona ranu lalodiai e tubumu tubutubu ḡaudia haida e hadova. Ruma haida na uma amo e hadodia heḡeḡeva, bona unu uma kerukerudia ai lai parakana e moalelaiava, edia window na atai ai e karava unu amo lai namona baine vareai, bona daiutu momo, bona edia aniani gabudia na babada bona edia hesiai taudia na mai edia noho gabudia.
(Genese 39:12-14) Bena hahine ese ena dabua e dogoa tao, e veria, eto, Aoma, aita eno bou. A ia ese ena dabua na hahine imana ai e rakatania, ruma amo e heau lasi. 13 Hahine na e itaia, ena dabua na ia imana ai vada e rakatania, vada e heau lasi; 14 bena ia ese ruma taudia e boiridia, e hamaorodia, eto, O itaia, ia ese ina Heberu tauna vada e abia dae, ita ihakavakavada. Ia na lau dekegu ai e raka vareai, baia eno bou eto: na lolo.
(Genese 39:20) Bena Iosef biaguna ese Iosef e dabaia tao, dibura rumana ai e koua, hanua pavapavana ena iḡui taudia e koudia gabuna ai. Bena dibura rumana ai e nohova.
w14 11/1 rau 14-15
“Ina kerere badana baina karaia . . . be edeheto?”
Ita na asi dibada guna Egypt ai dibura rumadia be ede bamodia. Archaeologists ese gabu unuhetomadia haida e davari—idia na mai maḡudia bona daiutudia na tano lalonai. Gabeai Iosef ese gabu unu hetomana e herevalaia neganai, ia na hereva ta e ḡaukaralaia anina na “the pit” o guri lalona, una ese e hahedinaraiamu una gabu na dibura masemase bona gabu dika rohorohona. (Genese 40:15, futnout) Baibul bukana Salamo ai, baita davariamu Iosef na hekwakwanai ma haida e davari danu, etomu: “Ia aena na auri gadeadia ese e haberodia, ia aiona na auri amo e ḡuia.” (Salamo 105:17, 18) Nega haida Egypt taudia ese dibura ai e nohova taudia na muridia kahadia ai seini amo imadia e ḡuiva, a haida be aiodia seini amo e ḡuiva. Ena be Iosef na kara kererena ta se karaia, to hisihisi bada e ania!
Iosef be dahaka hisihisi haida ma e davari? Baibul na e tomu ia na “dibura rumana ai e nohova.” Ia na laḡani haida una gabu dika rohorohona ai e noho! Bona Iosef na asi dibana ia ese una gabu be rakataniamu eiava lasi! Ia na unuseni ai e noho daudau dainai, o laloamu ia be dahaka ese e durua dainai e haheauka?
Baibul ese haere na e henidamu, etomu: “A Iehova ese Iosef e haḡerea, e bogaia hisi.” (Genese 39:21) Iehova ena lalokau ena hesiai taudia ediai na, dibura magudia ta, seini ta, eiava guri dibura masemasena ta ese basine koua diba. (Roma 8:38, 39) Asita daradaramu Iosef na ena lalohisihisi ibounai ḡuriḡuri amo Iehova e hamaorolaiava, bena Iehova, “tauhalo Diravana” ese tauna e halaoava bona lalomaino e heniava. (2 Korinto 1:3, 4; Filipi 4:6, 7) Iehova be dahaka ma e kara Iosef baine durua totona? Baibul na e gwaumu Iehova ese “dibura rumana igimana tauna lalona e hanamoa ia enai.”
(Genese 39:21-23) A Iehova ese Iosef e haḡerea, e bogaia hisi, dibura rumana igimana tauna lalona e hanamoa ia enai. 22 Bena dibura rumana igimana tauna ese dibura taudia iboudiai na Iosef henunai e atodia, edia ḡaukara iboudiai Iosef ese e reḡudia. 23 Dibura rumana igimana tauna ese ḡau ta se laloa ena hereḡu ai; badina be Iehova ese Iosef e haḡerea, bona ena ḡaukara iboudiai anidia e havara.
w14 11/1 rau 15 par. 2
“Ina kerere badana baina karaia . . . be edeheto?”
Baibul ese haere na e henidamu, etomu: “A Iehova ese Iosef e haḡerea, e bogaia hisi.” (Genese 39:21) Iehova ena lalokau ena hesiai taudia ediai na dibura magudia ta, seini ta, eiava guri dibura masemasena ta ese basine koua diba. (Roma 8:38, 39) Asita daradaramu Iosef na ena lalohisihisi ibounai ḡuriḡuri amo Iehova e hamaorolaiava, bena Iehova, “tauhalo Diravana” ese tauna e halaoava bona lalomaino e heniava. (2 Korinto 1:3, 4; Filipi 4:6, 7) Iehova be dahaka ma e kara Iosef baine durua totona? Baibul na e gwaumu Iehova ese “dibura rumana igimana tauna lalona e hanamoa ia enai.”
Dirava Ena Hereva Ba Tahua Namonamo
(Genese 38:9, 10) Bena Onan dibana mero na basie gwauraia ia natuna dainai ia na hahine enai e raka vareai, a ḡau be tano ai e hahebubua, natuna ta basine vara helaoreana. 10 Una kara dikana dainai Iehova ese e badu henia, e alaia mase, kakana bamona.
it-2 rau 555
Onan
(Oʹnan) [anina na “natu ihavarana siahuna; goada herea”].
Iuda natuna iharuana, una mero na Kanaan hahinena Sua amo e havaraia. (Ge 38:2-4; 1Si 2:3) Onan kakana ladana Ere, na gabani o asi natuna—ia na e kara dika dainai Iehova ese e alaia mase—una dainai Iuda ese Onan e hamaoroa Ere adavana Tamara, vabu baine adavaia. Bema mero ta baine vara, ia na dia Onan ena famili ahuna baine abia to ia na Ere gabuna baine abia bona roboa ahuna baine abia; to bema mero ta basine vara, Onan ese ḡau iboudiai baine abi. Onan na Tamara ida e mahuta hebou neganai, ia na se ura Tamara na baine rogorogo. Onan na masturbation karana na se karaia o usina na se gadaralaia, badina Baibul na e gwaumu ia na Tamara ida e mahuta hebou neganai, ia vesina na tano ai e bubua. Una kara na baita gwauraiamu, “coitus interruptus,” badina Onan na se ura ia vesina na Tamara kiona lalonai baine bubua. Onan ese tamana e gwau-edeede henia, ia na e mataḡaniḡani, bona Dirava ese e gwauraia headava dalana e dadaraia dainai, Iehova ese Onan—ia danu asi natuna–na e alaia mase.—Ge 38:6-10; 46:12; Nu 26:19.
(Genese 38:15-18) Bena Iuda ese e itaia, banava ia na ariara hahinena eto, badina be vairana vada e ḡovaia. 16 Bena ia ese e hereva henia, eto, Mani aita eno bou. Ia na asi dibana hahine na ia ravana. Bena hahine na eto, Davagu be dahaka ba henigu? 17 Ia eto, Nani natuna ta baina henimu. Hahine na eto, Toana be dahaka ba henigu ela bona ba siaia? 18 Ia ma eto, Dahaka bavabia o tomu? Hahine na eto, Imamu kwakikwakina vaḡivaḡina bona emu gana bona emu itotohi. E henia, bena raruosi e eno bou; gabeai hahine na e rogorogo.
w04 1/15 rau 30 par. 5-6
Taunimanima Edia Henanadai
Iuda na dia kara namona e karaia badina Tamara na ia natuna merona, Sela, se henia. Bona ia ese hahine ta e mahuta henia, badina e laloava una na dubu ai e gaukarava ariara hahinena. Ia ese Dirava ena taravatu e utua, badina be taravatu e gwaumu, headava taudia sibodia bo bae mahuta hebou be maoro. (Genese 2:24) To, Iuda na dia ariara hahinena ta e mahuta henia. Ia asi dibana gauna be, ia ese Sela gabuna e abia dainai, ia ese e havaraia natuna na mai edia maoro Tamara adavana ena kohu bae abi.
Tamara danu na dia ariara hahinena ena kara se karaia. Ia ese e havara hekapadia na basita gwauraidia ariara natudia. Betelehem tauna Boa na una kastom e badinaia dainai ia ese Moab hahinena, Ruta, e adavaia neganai, hanua tau-badadia ese Perese, Tamara natuna, e hanamoa badina idia ese Boa e hamaoroa eto: “Emu ruma taudia danu Perese Iuda, Tamara bogana amo e vara tauna, ena ruma taudia heḡereḡeredia ai baela, Iehova ese ina eregabe hahinena ena amo natumu baine henimu dainai.” (Ruta 4:12) Danu Baibul ese e hahedinaraia Perese tubuna na, Iesu Keriso.—Mataio 1:1-3; Luka 3:23-33.
Baibul Duahiduahi
MAY 18-24
DIRAVA ENA HEREVA ENA NAMO | GENESE 40-41
“Iehova ese Iosef E Ruhaia”
(Genese 41:9-13) Bena vine ranuna iseina memerodia ireḡudia tauna ese Farao e hamaoroa, eto, Lau ese egu kerere hari name laloa. 10 Farao ese ena hesiai taudia e badu henidia negana ai na lau bona flaoa igabuna memerodia ireḡudia tauna raruosi dibura rumana igimana tauna imana ai o atomai. 11 Bena hanuaboi ai raruosi a nihi, ta ta ena nihi ena nihi na mai anidia. 12 Tau eregabe ta be dekemai ai, ia na tau Heberu, dibura rumana igimana tauna ena hesiai merona. Bena ai raruosi emai nihi a hamaorolaia; bena anidia ia ese e hadibamai, ta ta ena nihi ena nihi anidia. 13 Taunabunai, nihi anidia ia ese e gwaurai vada e momokani: lau be o halougu egu dagi ai, a bamogu be e taua dae ela bona e mase.
w15 2/1 rau 14 par. 5-6
“Nihi Anidia Ihahedinaraidia Na Dirava Mo Sibona”
Ena be vine ranuna iseina memerodia ireḡudia tauna ese Iosef na e laloa boio, to Iehova ese Iosef na se laloa boio. Hanuaboi ta ai, Dirava ese Farao na nihi idau hereadia rua e henia. Nihi ginigunana ai, Farao ese boromakau namodia 7 na Nile sinavai badana amo e dae, idia muridiai be boromakau dikadia 7 e dae. Bena boromakau varoda varodadia 7 ese boromakau mai digaradia 7 e anidia ore. Gabeai, Farao na ma nihi ai e itaia, uit tuhutuhuna tamona e tubu mai anidia 7. To gabeai, ta ma e tubu anina 7, didika bona mamaragi, lai ese e hahemaraia gaudia, ese uit namodia e anidia ore. Daba ai Farao na mai kudou hetahana ida e noga, bena ia na e hesiai, babalau taudia iboudiai bona aonega taudia iboudiai e boiridia unu nihi anidia bae gwaurai. To idia iboudiai na anidia igwauraidia asi dibadia. (Genese 41:1-8) Idia haere ta se heni eiava dahaka haere idauidau e heni na ita asi dibada. To ita dibada, Faroa na se moale—to ia dounu e ura dikadikava unu nihi idau hereadia anidia na baine diba.
Bena, vine ranuna iseina memerodia ireḡudia tauna ese Iosef e laloa! Ia na e lalohekwarahi, bona ia ese una tau na e abia daeva Iosef ese unu nihi anidia be gwauraimu. Ia na lalona mamina ese eha kotaiava badina eto Iosef baine durua. Bona Farao e hamaoroa, eto, lagani rua gunadia ai, ia bona flaoa igabuna memerodia ireḡudia tauna na e nihi bena dibura ruma ai e nohova eregabe merona ese edia nihi anidia e gwaurai hedinarai bona anidia na e vara momokani. Bena Farao e hesiai, Iosef na bae hakaua mai haraga.—Genese 41:9-13.
(Genese 41:16) Iosef ese Farao e haere henia, eto, Dia lau, a Dirava ese Farao baine haere henia, maino herevana ai.
(Genese 41:29-32) Laḡani hitu be gini daemu, Aigupto tanona idoinai baine madinamo; 30 gabeamo doe laḡanidia hitu do bae gini dae, madinamo idoinai Aigupto tanona ai do bae laloa boio, badina be doe baine bada herea. 31 Taunimanima ese madinamo negana na basie laloa une, doe bada lalonai bae dabu vaitani dainai. 32 Farao na harua e nihi, badina be Dirava ese ina ḡau vada e gwauraia, bona asi vanahana ia ese baine havaraia.
w15 2/1 rau 14-15
“Nihi Anidia Ihahedinaraidia Na Dirava Mo Sibona”
Manau bona abidadama taudia na Iehova ese e lalokau henidiamu dainai, ta dibada Ia ese Iosef e durua nihi anidia e gwaurai hedinarai, a aonega taudia bona babalau taudia be unu anidia asi dibadia. Iosef ese Farao e hamaoroa unu nihi ruaosi anidia na tamona. Iehova ese una nihi e haruaia amo hahedinaraia, ia ese una nihi anina na baine “hagugurua momokani.” Boromakau taudia namodia bona uit anidia namodia 7 anidia be laḡani 7 lalodiai Egypt ai aniani na be momo hereamu, a boromakau taudia dikadia bona uit anidia dikadia 7 anidia be laḡani 7 lalodiai hitolo bada be varamu. Una hitolo bada negana lalonai, Aigupto ai aniani ibounai baine ore.—Genese 41:25-32; NWT.
(Genese 41:38-40) Bena Farao ese ena hesiai taudia e hereva henidia, eto, Edeseni ai tau ta baita davaria ina tau heḡereḡerena: Dirava ena Lauma be ia lalonai ani? 39 Bena Farao ese Iosef e hereva henia, eto, Dirava ese ina idoinai vada e hahedinarai henimu, bona asi tauna ta mai ena lalo-parara bona mai ena aonega oi heḡereḡeremu 40 Una dainai, oi ese egu ruma ba halohiaia, egu basileia idoinai oi eremu bae kamonai; lau hanua pavapavana taugu mo ese oi baina hereamu.
w15 2/1 rau 15 par. 3
“Nihi Anidia Ihahedinaraidia Na Dirava Mo Sibona”
Farao ese ena hereva anina e hamomokania. Iosef na dabua namo-hereadia e hahedokilaia. Farao ese danu gold agevana ta na ia aiona ai e atoa, ring ta na ia imana ai e toia vareai, lohia taudia edia kariota ta na ia e henia, bona gwaumaoro e henia tano idoinai baine rakaia bona ena plan anidia baine haguguru. (Genese 41:42-44) Baita gwau dibamu, dina tamona lalonai, Iosef na dibura ruma amo e raka lasi bona king ena ruma ai e nohova. Oibe, Farao ese dibura tauna na lohia tauna iharuana ai e halaoa. Iosef ese e abia dae vaitani, ia na Iehova Dirava ese e durua! Laḡani momo lalodiai, Iehova ese ena hesiai tauna ena hisihisi iboudiai na e itadia. Dirava ese nega maorona ai bona dala maorona ai unu iboudiai e hamaoromaorodia. Iehova na dia Iosef ena hisihisi baine hamaoromaoroa karana mo e laloa, lasi, to ia na Israel besena ese gabeai namo baine davaria dalana e laloa danu. Atikol gabena ai baita itaiamu Dirava ese una be ede e karaia toma.
Dirava Ena Hereva Ba Tahua Namonamo
(Genese 41:14) Bena Farao e hesiai, Iosef eha boiria. Bena idia ese dibura rumana amo e hakaua lasi haraḡa-haraḡa.
w15 11/1 rau 9 par. 1-3
Oi mai Dibamu Dahaka?
Iosef ese huina e utua (shave) murinai Farao e haitaia badina be dahaka?
Baibul Bukana Genese e gwaumu, Farao e hesiai, Heberu tauna Iosef na dibura ruma amo bae hakaua mai haraga, ia vairanai baine gini bena ia kudouna e hahetahaia nihidia anidia baine gwaurai hedinarai. Reana una negai Iakob na laḡani momo dibura rumana ai vada e noho. Herevana king e ura Iosef na bae hakaua mai haraga, to Iosef na e ura ia huina do baine utua (shave) namonamo guna. (Genese 39:20-23; 41:1, 14) Una amo ta dibamu, Baibul lalonai ina Iosef sivaraina e torea tauna na Egypt edia kastom mai dibana.
Gunaguna, Heberu taudia bona idau bese taudia momo herea ese aukidia huidia na e habadava. To Cyclopedia of Biblical, Theological, and Ecclesiastical Literature etomu: “Gunaguna, Egypt taudia sibodia mo asie urava aukidia huidia na bae habada.”
To, aukidia huidia mo basie utu, a? Magasin ta ladana, Biblical Archaeology Review e gwaumu, Egypt taudia edia kastom haida bini, Farao vairanai bae gini taudia na bae hegaegae namonamo, anina na dubu ta baela hegoevana bae karaia. Una daina, Iosef e boiria neganai, namona na ia ese kwarana huina bona tauanina huidia iboudiai baine utu (shave).
(Genese 41:33) Namona binai: Farao ese lalo parara bona aonega tauna ta baine tahua, Aigupto tanona biaguna ai baine halaoa.
w09 11/15 rau 28 par. 14
Dirava Ena Hesiai Taudia ese Hemataurai Karadia E Hahedinaraimu
14 Baibul negadiai, Dirava e tomadiho heniava tama bona sina ese ruma ai hemataurai karadia na natudia e hadibalaidiava. Abraham bona natuna Isaak e hemataurai heheni sivaraina na Genese 22:7 lalonai bo duahiamu. Danu, Iosef ena sivarai amo ta dibamu, ia na tamana bona sinana ese e hadibaia namonamo. Badina dibura rumana ai, ia ese dibura taudia ma haida e matauraidiava danu. (Gen. 40:8, 14) Ia ese Farao e haere henia dalana amo ta dibamu, dagi bada taudia baine hereva henidia dalana maorona danu na tamana bona sinana ese e hadibalaia.—Gen. 41:16, 33, 34.
Baibul Duahiduahi
MAY 25-31
DIRAVA ENA HEREVA ENA NAMO | GENESE 42-43
“Iosef Na Boga Auka Tauna Hereadaena Ta”
(Genese 42:5-7) Taunabunai, Israel natuna na taunimanima loḡora ida uit ihoina ela; badina be doe na bada Kanaan tanona ai. 6 Iosef na tano idoinai lohiana, taunabunai taunimanima iboudiai ia dekena ela, uit e hoia. Iosef kakana danu ia dekena ela, ia vairanai e goru diho. 7 Iosef ese kakana e itadia negana ai, ia lalona vada e parara idia be daidia, to e hereva henidia idau tauna na heto, e gwau henidia, eto, Umui be ede amo oma? Idia eto, Kanaan tanona amo ama, aniani ihoina totona.”
w15 5/1 rau 13 par. 5
“Lau be Dirava Ibolona A?”
Iosef be ede heto? Ia na e laloparara idia be daidia! Unuseniai Iosef ese kakana e itadia, ia vairanai e goru diho neganai, ia ese ena mero negana e laloa lou. Baibul etomu, “Iosef ese ena nihi ai idia e nihiraidia e helalolai une,” oibe, ia merona negana ai Iehova ese e durua bena e nihilaia gauna be, nega ta ai ia kakana na ia vairanai bae goru diho. (Genese 37:2, 5-9; 42:7, 9) Iosef be dahaka be karamu? Ia ese be harahudiamu, a? Eiava ia be davana be abimu o be panisidiamu, a?
w15 5/1 rau 14 par. 1
“Lau be Dirava Ibolona, A?”
Reana emu ai hahetoho unuhetomana na se varamu. To hari, heai daidiai ruma bese e makohimu. Nega unuhetomadiai, lalohadai kerere baita abi diba. Una dainai, Iosef ena haheitalai baita tohotohoa, anina na Dirava ena ura dalana hegeregerena ai hekwakwanai baita hamaoromaoroa. (Hereva Lada-isidia 14:12) Ba helalotao, ruma bese taudia bogaragidiai maino baine mia be namo, to gau bada hereana binai, ita bona Iehova bona Natuna bogaragidai maino baine mia.—Mataio 10:37.
(Genese 42:14-17) A Iosef eto, Vada na hereva, ani, umui be hasinadoa taumui 15 A baina dibamui: Farao maurina ai na herevamu, ini amo basio raka oho ela bona tadimui bainema. 16 Umui emui amo ta ba siaia, tadimui baine hakaua mai; a orena be dibura rumana ai ba noho. Unu amo baina dibamui, emui hereva be momokani eiava lasi. Bema lasi, umui na momokani hasinadoa taumui. 17 Taunabunai, ia ese dibura rumana ai e koudia, dina toi.
w15 5/1 rau 14 par. 2
“Lau be Dirava Ibolona, A?”
Iosef ese kakana e tohodia badina ia e urava edia lalohadai baine diba. Iosef e herevava neganai, ena hereva na tau ta ese e hahanaiava—Iosef na mai baduna ida idia e gwau henidiava, e gwauva, idia na spy taudia. Iosef ese edia hereva baine abia dae totona, edia ruma bese sivaraina e vasi gwauraia, bona e vasi hamaoroa idia tadidia merona ta na ruma ai noho. Iosef na e moale to se ura una na baine hahedinaraia. To momokani ia tadina dounu mauri, eiava? Iosef vada e diba dahaka baine kara be namo. Ia eto: “Baina dibamui,” bona e hamaorodia ia na e uramu tadidia dokona baine itaia. Gabeai, e siaidia baela tadidia bae ha abia bae laohaia Iosef dekena, to tamona mo dibura ruma ai e atoa badina e ura idia ese tadidia bae loahaia momokani.—Genese 42:9-20.
(Genese 42:21, 22) Bena idia na e hereva heheni, eto, Momokani, ita na vada ta kerere taudia dainai; badina be ena taitai ta kamonai, to ena noinoi asita abia dae; una dainai ina hekwarahi na ita edai vada e kau. 22 Bena Ruben eto, Lau na hamaoromui, ani, nato “Mero na basio hadikaia”, to umui na asio kamonai, harihari ia rarana na ita latadai.
it-2 rau 108 par. 4
Iosef
E varava ḡaudia daidiai, Iosef kakana na e laloava idia ese Iosef e hoihoilaia dainai Iehova ese edia kara dika davana e heniva. Idia na tadidia vairana ai—Iosef toana do se karaia neganai—edia kerere e herevalaiava. Edia hereva amo Iosef na e diba idia na vada e helalokerehai, bena ia na idia vairadia amo e raka siri, e tai. Gabeamo e lou henidia, Simeon e abia gadea amo e ḡuia idia vairadiai badina ia na e ura idia ese tadidia maraḡina ia dekena bae laohaia.—Ge 42:21-24.
Dirava Ena Hereva Ba Tahua Namonamo
(Genese 42:22) Bena Ruben eto, Lau na hamaoromui, ani, nato “Mero na basio hadikaia,” to umui na asio kamonai, harihari ia rarana na ita latadai.
(Genese 42:37) Bena Ruben ese tamana e hamaoroa, eto, Beniamina basina hakaua lou dekemu ai, lau natugu raruosi bavaladia mase. Lau imagu ai ba siaia, bena lau ese ma baina mailaia mai maurina ida.
it-2 rau 795
Ruben
Ruben ese kara namodia haida e hahedinarai. Heḡereḡere ia ese tadina 9 e koudia Iosef basie alaia mase to guri ai bae tahoa dobi, badina ena lalohadai na idia imadia amo hehuni dalanai Iosef baine hamauria. (Ge 37:18-30) Laḡani 20 mai kahana muridiai, Ruben tadina 9 na e laloava idia ese Iosef e kara henia karadiai daidiai Aigupto ai e gwauraidia hasinadoa taudia neganai, Ruben ese e hadibadia ia na idia edia kara dika palanina lalonai se vareai. (Ge 42:9-14, 21, 22) Danu, Iakob se ura Beniamina ese kakana baine bamodia baela Egypt neganai, Ruben na eto: “Beniamina basina hakaua lou dekemu ai, lau natugu raruosi bavaladia mase.”—Ge 42:37.
(Genese 43:32) Bena aniani e dabaraia, pata ta ai Iosef ana, pata ta ai idia adia, bona ma pata ta ai Aigupto taudia adia. Badina be Aigupto taudia na Heberu taudia ida basie aniani hebou, mai edia taravatu dainai.
w04 1/15 rau 29 par. 1
Baibul Bukana Genese Ena Point Badadia—II
43:32—Dahaka dainai Aigupto o Egypt taudia na Heberu taudia ida basie aniani hebou? Badina be reana Egypt taudia ese dubu ma haida o idau bese taudia na e asie ura henidiava. Danu, Egypt taudia ese mamoe ireḡudia taudia na e dadaraidiava. (Genese 46:34) Dahaka dainai? Reana Egypt taudia ese mamoe ireḡudia taudia na gau ta ai asie halaodiava. Eiava uma bae kara tanodia na dia babada daidiai, Egypt taudia na asie urava haida ese animal bae nari gabudia bae tahu.
Baibul Duahiduahi