Emu Hetura Karana Iehova ida Ba Hagoadaia Lou

LAḠANI ta ta ai momo na Kristen kongrigeisin e lou heniamu. Mani a laloa, idia ta ta e loumu neganai “guba ai moale” bada e varamu. (Luka 15:7, 10) Bema oi na oreai o vareai lou, ba diba Iesu, aneru, bona Iehova na e moalemu badina hereva momokani o abia dae lou. To, emu hetura karana Iehova ida bo hanamoa loumu neganai, hekwakwanai na bo davarimu. Unu hekwakwanai haida be dahaka, bona dahaka ese baine durumu diba?

BO DAVARIMU HEKWAKWANAIDIA BE DAHAKA?

Momo na kongrigeisin e lou heniamu murinai dounu edia kara dika daidiai e lalometaumu. Reana King David ena hemami na bo lalopararalaiamu. Ena be ena dika e hegwautao, to ia na e gwa: “Egu kara havara ese vada e lasigu tao.” (Sal. 40:12; 65:3) Ta na Iehova e lou heniamu murinai, laḡani momo lalodiai ena kara dika dainai dounu be lalohekwarahimu eiava be hemaraimu. Isabelle, laḡani 20 mai kahana orea murimurinai e noho.a Ia na ini e gwau toma: “Egu ai na e auka baina abia dae Iehova ese egu kara dika na baine gwautao diba.” Bema bo lalomanokamu, lauma dalanai ma bo manoka loumu. (Her. 24:10) Emu ai una basine vara na namo.

Haida na edia hetura karana Iehova ida bae hanamoa lou totona bae kara ḡaudia daidiai e lalohekwarahimu. Antoine na oreai e vareai lou murinai, e gwa, “Guna orea lalonai na nohova neganai na karava ḡaudia na na lalodia boio.” Hemami unu bamodia daidiai, haida na hesiai ḡaukaradia ikaradia ai be halahemu.

Baita haheḡereḡerea totona, mani lai badana ta ese ena ruma e hadikaia tauna aita laloa, ia na be lalohekwarahimu badina be hekwarahimu nega bada lalonai ena ruma be haginia loumu. Una heḡereḡerena, bema kara dika badana ta ese emu hetura karana Iehova ida e hadikaia, reana bo hemamimu una hetura karana ba hanamoa lou totona bo hekwarahi badamu. To idurumu ḡaudia na mimia.

Iehova na ita e vavedamu, e gwaumu: “Aoma, aita hereva hebou.” (Isa. 1:18) Oi na do hekwarahi emu hekwakwanai na Iehova ida do herevalaia hebou bona o hamaoromaoroa. Unu o kara toma dainai, Iehova ese na e lalokau henimumu. Mani a laloa: Oi ese badi namona ta na Iehova o heniamu, Satana ena koikoi herevana baine haerelaia totona!—Her. 27:11.

Unu o kara toma dainai, oi na Iehova o raka henia kahi, bona ia na e gwauhamatamu ia danu oi baine raka henimu kahi. (Iak. 4:8) Momokani, tadikaka taihu ese bae itamu kongrigeisin o lou henia na mai moalena, to ḡau ma haida danu ba kara. Namona na emu lalokau Iehova enai ba hagoadaia, ia na oi Tamamu bona Turamu. Una be ede ba karaia toma?

BA KARA DIBA ḠAUDIA BAVATO

Ba kara diba ḡaudia bavato. Ba helalotao Iehova bona ena gwauhamata vaira negana totona o dibadia karana na dounu o lalodia taomu. To lauma dalanai o karava ḡaudia ma ba karadia lou na namo, bona unu na sivarai namona iharorolaina karana bona tadikaka taihu ibamodia hanaihanai karana. Mani ini bavato diba ḡaudia a lalodia.

Hanaihanai Iehova ba hereva henia. Tamamu na e lalopararamu emu kara dika bo lalohekwarahilai momomu karana dainai, emu ai na be aukamu ia ba ḡuriḡuri henia. (Roma 8:26) To, namona na “ḡuriḡuri ba goadalaia,” Iehova ba hamaoroa oi na o ura dikadikamu ia ba hetura henia lou. (Roma 12:12) Andrej na e helalotamu, e gwa: “Egu kara dika dainai na lalohisihisiva bona na hemaraiva. To na ḡuriḡuriva muridiai, unu hemami na e maraḡiva. Lalogu na e mainova.” Bema asi dibamu dahaka ba ḡuriḡurilai, King David e helalo-kerehai neganai e gwaurai ḡuriḡuridia Salamo 51 bona 65 ai ba lalodia.

Hanaihanai Baibul ba stadilaia. Una ese lauma dalanai baine hagoadamu bona baine durumu emu lalokau Iehova enai ba habadaia. (Sal. 19:7-11) Felipe na e gwa: “Hanaihanai Baibul iduahina bona istadilaina na asina goadalaiava dainai, na manoka lou bona Iehova lalona na hahisia. Asina ura Iehova ma baina hahisia lou, una dainai lalogu na hadaia sibogu egu stadi baina karaia hanaihanai.” Oi danu unu ba kara toma diba. Bema o uramu sibomu emu stadi totona bae durumu topik haida bavabi hidi, lo tadikaka o taihu ta ba noia diba baine durumu.

Emu hetura karana tadikaka taihu ida ba hanamoa lou. Kongrigeisin e lou heniamu taudia haida na e lalohekwarahimu badina e laloamu haida ese be badu henidiamu. Larissa na e gwa: “Launa na hemaraiva. Na mamiava lau ese tadikaka taihu lalodia na hahisi. Nega daudau lalonai unu na hemami toma.” Namona na ba diba elda taudia bona lo tadikaka taihu na e ura dikadikamu bae durumu emu hetura karana Iehova ida ba hanamoa lou. (Maua ladana “Elda Taudia be Dahaka Bae Kara Diba?” ba itaia.) Idia na e moalemu orea o lou henia dainai, bona e uramu oi danu ba moale!—Her. 17:17.

Dahaka ese baine durumu diba kongrigeisin lalonai ba noho? Hanaihanai tadikaka bona taihu ida hebou baola bona haroro ḡaukara ba karaia. Edena dalai una ese baine durumu? Felix na e gwa: “Kongrigeisin taudia na e ura dikadikava baina lou. Na mamia lau na e lalogu badava. Idia ese e durugu dainai lau na kongrigeisin ai ma na goada lou, na mamia Iehova ese egu dika na e gwauatao, bona ena hesiai ḡaukara na dounu baina karaia diba.”—Maua ladana “Dahaka Ba Kara Diba?” ba itaia.

BASIO HESIKU!

Emu hetura karana Iehova ida o hanamoa loumu lalonai, Satana na dounu hekwakwanai idauidau be havaramu oi ihamanokamu totona. (Luka 4:13) Ba heḡaeḡae totona, namona na hari emu hetura karana Iehova ida ba hagoadaia.

Iehova na ena mamoe daidiai, ina gwauhamata e gwauraia: “Boio ḡaudia na baina tahudia davari, bona e raka eva-evamu ḡaudia baina hakaudia lou, bona ae-hedairike ḡaudia aedia baina kumidia; manoka ḡaudia baina hagoadadia.” (Esek. 34:16) Iehova ese momo de durudia edia hetura karana ia ida e hanamoa lou, namona na ba diba ia na e uramu baine durumu emu hetura karana ia ida ba hagoadaia.

Elda Taudia be Dahaka Bae Kara Diba?

Oreai e abidia vareai lou pablisadia ese edia hetura karana Iehova ida bae hagoadaia lou totona, elda edia heduru na mai anina bada. Oreai e abidia vareai lou taudia totodia bae kara diba ḡaudia mani aita itadia.

Lalodia bae hagoada. Aposetolo Paulo na mai dibana helalo-kerehai tauna na “dara-doko ese baine gugubaia mase” diba. (2 Kor. 2:7) Reana baine hemarai bona baine lalomanoka diba. Paulo ese kongrigeisin e sisiba henia, e gwa: “Ena dika ba gwau tao bona tauna ba haloa.” Namona na oreai e vareai lou taudia na bae diba Iehova bona tadikaka taihu ese na e lalokau henidia badamu. Hanaihanai hahenamo herevadia bae heni bona dala idauidau ai bae durudia karana ese be durudiamu basie lalomanokamu.

Idia ida bae ḡuriḡuri hebou. “Kara maoromaoro tauna ena ḡuriḡuri ese anina e havaraiamu mai siahuna ida.” (Iak. 5:16) Larissa, atikol ai e herevalaia taihuna, na e gwa: “Egu daradara bona lalohekwarahi na elda taudia na hamaorolaidia. Lau daigu ai e ḡuriḡuri. Bena na laloparara elda taudia na asie badumu lauegu ai. Idia na e uramu lau bae durugu egu hetura karana Iehova ida baina hanamoa lou.” Theo na e gwa: “Elda taudia edia ḡuriḡuri dainai na abia dae Iehova ese lau na e lalokau henigu momokanimu, bona ia ese egu kara namo e itamu, dia egu kara dika mo.”

Bae bamodia. Oreai e vareai loumu taudia na e uramu kongrigeisin taudia ese bae bamodia. Elda ta ladana Justin na e gwa: “Dala e hekehomu neganai ba boiridia haroro ḡaukara ai ba ḡaukara hebou, bona edia ruma ai ba ha vadivadidia na ḡau badana. Ibamodia karana na mai anina bada!” Elda ma ta ladana, Henry na e gwa: “Bema kongrigeisin taudia ese bae itaia elda taudia na oreai e vareai lou taudia e bamodiamu, idia danu unu be kara tomamu.”

Bae durudia bae stadi. Lo tadikaka o taihu ese oreai e vareai lou tauna baine durua diba, stadi hanaihanai karana baine manadalaia. Elda ta ladana Darko na e gwa: “Na ura dikadikamu sibogu egu stadi amo na davari hereva namodia na idia ediai baina herevalai, bona Baibul istadilaina urana na idia ediai baina hahedinaraia. Danu idia ida nega a atomu topik ta baia stadilaia hebou.” Elda ma ta ladana, Clayton na e gwa: “Na hagoadadiamu idia ese e abi hekwakwanai heḡereḡeredia taudia edia sivarai na Baibul ai bae tahu bona bae diba ḡaudia bae ita.”

Bae vadivadidia. Oreai e vareai lou taudia ese e itaia elda taudia na hahemaoro ḡaukarana e karaiamu taudia. To hari, namona na bae itaia idia na mamoe ireḡudia taudia. (Ier. 23:4) Namona na bae hakala bona hahenamo herevadia bae gwaurai. Idia ida bae herevahereva hanaihanai. Elda ta ladana Marcus ese mamoe vadivadi ai e badinaiamu dalana e herevalaia neganai, eto: “Baibul sirina ta a herevalaia heboumu, a hanamodiamu, bona a hadibadiamu ai na a moale dikadikamu badina idia na e hekwarahi orea e lou henia bona Iehova danu e moalemu. Emai vadivadi ta ta dokodiai, baia vadivadidia lou dinana ma a gwauraiamu.”

a Ina atikol ai lada haida na a haidau.