Maoro Bona Kerere: Baibul ese Ita Na Baine Hakauda Diba

Bema abi hidi ta na siboda eda hemami ai eiava haida daidiai baita karaiamu, basita dibamu una be abi hidi maorona eiava lasi. Baibul ese una na e herevalaia. Dia una mo, to maoro bona kerere edia idau na e hadibadamu dainai ta moalemu.

DIRAVA ENAI BAITA TABEKAU

Baibul ai, Iehovaa Dirava na e gwaumu, namona na taunimanima na ia enai bae tabekau. Badina iena heduru amo abi hidi namodia be karamu. (Ieremia 10:23) Una dainai hahekau herevadia ḡoevadia na ia ese Baibul ai e ato. Ia ese taunimanima na e lalokau henidiamu bona se uramu abi hidi kereredia bae kara bena bae lalohisihisi. (Deuteronomi 5:29; 1 Ioane 4:8) Hereadaena be, ia na ita e Havarada Tauna dainai, ia na heḡereḡere iena aonega bona diba amo baine hakauda. (Salamo 100:3; 104:24) To, Dirava ese taunimanima na se doridiamu iena taravatu bae badinadia.

Iehova ese tau bona hahine ginigunadia, Adam bona Heva, na ḡau iboudiai e henidia bae moalelai. (Genese 1:28, 29; 2:8, 15) Danu, e henidia taravatudia na dia a’auka bona bae badina na asi hekwarahina. Bena e rakatanidia sibodia ese bae abi hidi unu taravatu be bae badina eiava lasi. (Genese 2:9, 16, 17) To madi, Adam bona Heva ese Dirava ena taravatu na se badinaia to sibodia edia ura e abi dae. (Genese 3:6) Unu e kara toma dainai dahaka e vara? Taunimanima sibodia ese dahaka be maoro bona dahaka be kerere abi hididia e karamu neganai, idia e moalemu, a? Lasi. Histori ese e hahedinaraiamu, taunimanima ese Dirava ena taravatu e dadaraimu neganai, maino bona moale na lasi.—Kohelete 8:9.

Herevana eda mauri bona noho daladia na idauidau, to abi hidi namodia baita kara totona ita bae duruda herevadia na Baibul ai baita davarimu. (2 Timoteo 3:16, 17; maua ladana “Taunimanima Iboudiai Edia Buka” ba itaia.) Baibul ese baine duruda daladia haida mani aita ita.

Dahaka dainai Baibul na e gwauraiamu “Dirava ena Hereva”? —1 Tesalonika 2:13. Mani jw.org ai vidio ladana Who Is the Author of the Bible? ba itaia.

HAIDA E LALOAMU BAIBUL ESE BASINE DURUDIAMU BADIDIA

Taunimanima haida na e gwaumu Baibul na dia ita ihakauda bukana namona. Nega haida na reana ini be gwau tomamu:

Ta na baine gwa diba: “Baibul ai hereva haida na hereva ma haida ida se heḡereḡeremu.”

Hereva momokanina bina: Matamanai bo laloamu Baibul ena kaha haida na kaha ma haida ida se heḡereḡeremu, badina o duahiamu sivaraina na sivarai ma ta amo e idaumu. To, una sivarai e torea tauna, e torea dalana bona e torea negana bo haerodia namonamomu neganai, bo itaiamu Baibul ena hereva na maoro.

Bema o uramu haheitalai haida ba ita, baola jw.org ai ina atikol ladana “Are There Contradictions in the Bible?” ba duahia.

Ta na baine gwa diba: “Baibul ena hereva e badinaiamu taudia na kara dikadia e karamu. Una dainai Baibul na dia ita ihakauda bukana namona.”

Hereva momokanina bina: Haida na kara dikadia e karamu badina Baibul ena hahediba herevadia se badinamu. Una dainai dia namo baita gwa una na Baibul ena kerere. Baibul na e peroveta, taunimanima momo, dubu e gunalaidiamu taudia danu, na baeto idia na Baibul ena hereva e badinaiamu to karadia na asie karamu. Idia daidiai Baibul ena “hereva momokani . . . na dikana bae gwauraia.”—2 Petro 2:1, 2.

Dubu igunalaina taudia momo ese Baibul ena hahediba herevadia asie badinamu haheitalaina ta ba diba totona, baola jw.org bona ina atikol ladana “Is Religion Just Another Big Business?” ba duahia.

Ta na baine gwa diba: “Baibul ena hereva e badinaiamu taudia ese Baibul se abia daemu taudia na se ura henidiamu.”

Hereva momokanina bina: Baibul ese ita na e hagoadadamu, taunimanima baita matauraidia na namo. Baibul na e gwaumu . . .

bamomui ba imodaidia.—Filipi 2:3.
taunimanima iboudiai ba matauraidia, ena be e abi daemu gaudia na i’idau.—1 Petro 2:17.
haida basita doridia eda ura o ta abi daemu ḡaudia bae badina.—Mataio 10:14.

Baibul ese e hahedinaraiamu, Dirava na hanaihanai taunimanima e kara namo henidiamu bona e kara henidia heḡereḡeremu. Dirava na e uramu ita danu unu baita kara toma.—Roma 9:14.

Hereva ma haida ba diba totona, jw.org ai atikol ladana “Haida Edia Kara Bona Lalohadai be Ede Baita Lalodia Toma?—Baibul be Dahaka E Gwaumu?” ba duahia.

BAIBUL AMO DIRAVA ENA LALOHADAI TA DIBAMU

Matamana negana amo Dirava ese taunimanima e kara henidia sivaraidia korikoridia na Baibul ai baita davarimu. Unu sivarai amo Dirava ena lalohadai dahaka be maoro bona dahaka be kerere ta lalopararalaiamu. Danu ita iduruda herevadia bona ita ese baita dadarai ḡaudia na Baibul amo ta dibamu. (Salamo 19:7, 11) Bona Baibul ena hahekau herevadia ese be durudamu dina ta ta ai abi hidi maorodia baita kara.

Heḡereḡere, sisiba namona ta na Hereva Lada-isidia 13:20 ai, ini e gwau tomamu: “Aonega taudia ida e raka heboumu tauna na e heaonegamu, a kavakava taudia e bamodiamu tauna na baine hekwakwanai.” Una hahekau herevana ese Baibul negadia ai e nohova taudia e durudia heḡereḡerena ita danu e durudamu. Baibul ai hahekau hereva namodia na momo.—Maua ladana “Baibul Ena Sisiba Na Doini mai Anina Bada” ba itaia.

To reana bo henanadaimu, ‘Hari ina negai Baibul ena sisiba ese lau be momokani be durugumu, eiava?’ Atikol gabena ese taunimanima haida edia sivarai be herevalaiamu.

a Dirava na mai ladana, bona una na Iehova.—Salamo 83:18.

BAIBUL ENA SISIBA NA DOINI MAI ANINA BADA

Ena be Baibul na kahirakahira laḡani 2,000 gunanai e haḡuḡurua, to iseda nega ai ia na doini mai anina bada. Taunimanima ese vaevae e ura henimu ḡaudia na ini: bae moale bona bae noho namonamo. (Kohelete 1:9) Ita edai unu na be varamu bema Baibul ena sisiba baita badinaiamu.

Kara momokani

“A uramu ḡau idoidiai baia kara maoromaoro.”—Heberu 13:18.
“Henao tauna na basine henao lou; ḡaukara namona ta imana amo baine karaia.”—Efeso 4:28.

Ma haida ikara henidia daladia

“Ta sibona ena namo basine tahua, a dekena tauna ena namo danu baine tahua.” —1 Korinto 10:24.
“Ba haheauka heheni. Ta ese bamona baine habadelaia negana ai, emui dika ba hegwau tao heheni.”—Kolose 3:13.

Abi hidi ikaradiai

“Lalo-duhu tauna ese hereva iboudiai e abi daemu, a lalo-parara tauna ese e rakalaiamu dalana na e raraia taomu.” —Hereva Lada-isidia 14:15.
“Lalo-parara tauna ese dika e itaiamu, bena e komumu; a lalo-duhu taudia na e raka e laomu, bena e hekwakwanaimu.” —Hereva Lada-isidia 22:3.